Alagara si Jehova Uban ang Kangaya sa Kasingkasing
“Kining tanang panunglo moabot kanimo . . . tungod kay wala ka mag-alagad kang Jehova nga imong Diyos uban ang kalipay ug kangaya sa kasingkasing.”—DEUTERONOMIO 28:45-47.
1. Unsay pamatuod nga kadtong nagaalagad kang Jehova malipayon, bisan asa sila magaalagad kaniya?
ANG mga alagad ni Jehova maoy mangayaon, sila man nagabuhat sa iyang kabubut-on sa langit o sa yuta. Ang manulondaong “mga bituon sa kabuntagon” misinggit sa kangaya sa pagkatukod sa yuta, ug tinong uban sa kangaya nga ang mga panon sa langitnong mga manulonda ‘nagtuman sa pulong sa Diyos.’ (Job 38:4-7; Salmo 103:20) Ang bugtong nga Anak ni Jehova maoy mangayaong “batid nga magbubuhat” sa langit ug nakakaplag ug kahimuot diha sa pagbuhat sa balaang kabubut-on ingon nga tawong si Jesu-Kristo dinhi sa yuta. Dugang pa, “tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.”—Proverbio 8:30, 31; Hebreohanon 10:5-10; 12:2.
2. Unsay nagtino kon ang mga Israelinhon nakasinati ba ug mga panalangin o mga panunglo?
2 Ang mga Israelinhon nakasinatig kangaya sa dihang ilang gipahimut-an ang Diyos. Apan unsa na man kon misupak sila kaniya? Sila gipasidan-an: “Ang [mga panunglo] padayong modangat kaninyo ug sa inyong mga anak ingong usa ka ilhanan ug usa ka tilimad-on hangtod sa panahong walay tino, tungod kay wala ka mag-alagad kang Jehova nga imong Diyos uban ang kalipay ug kangaya sa kasingkasing tungod sa kadagaya sa tanang butang. Ug ikaw magaalagad sa imong mga kaaway nga ipadala ni Jehova batok kanimo uban ang kagutom ug kauhaw ug kahubo ug ang kakulang sa tanang butang; ug siya gayod magabutang ug yugo nga puthaw sa imong liog hangtod nga ikaw malaglag niya.” (Deuteronomio 28:45-48) Ang mga panalangin ug mga panunglo nagtino kon kinsa ug kinsay dili mga alagad ni Jehova. Ang maong mga panunglo nagpamatuod usab nga dili mahimong pakamenoson ang mga prinsipyo ug mga katuyoan sa Diyos, ni tamayon kini. Tungod kay ang mga Israelinhon midumili sa pagtuman sa mga pasidaan ni Jehova bahin sa pagkaawaaw ug pagkadestiyero, ang Jerusalem nahimong “usa ka panunglo sa tanang nasod sa yuta.” (Jeremias 26:6) Busa sundon nato ang Diyos ug pahimuslan ang iyang pag-uyon. Ang kangaya maoy usa sa daghang panalangin sa Diyos nga nasinati sa diyosnong mga tawo.
Kon Unsaon Pag-alagad Uban ang “Kangaya sa Kasingkasing”
3. Unsa ang piguratibong kasingkasing?
3 Ang mga Israelinhon kinahanglang mag-alagad kang Jehova “uban ang kalipay ug kangaya sa kasingkasing.” Mao man usab ang modernong-adlaw nga mga alagad sa Diyos. Ang pagmaya maoy “pagsadya; mapuno sa kangaya.” Bisan tuod nga ang pisikal nga kasingkasing gihisgotan sa Kasulatan, kini dili literal nga maghunahuna o mangatarongan. (Exodo 28:30) Ang pangunang obra niini mao ang pagbomba ug dugo nga nagapakaon sa mga selula sa lawas. Hinunoa, sa kadaghanang kahimtang ang Bibliya nagtumong sa piguratibong kasingkasing, nga labaw pa kay sa pagkasentro niini sa pagbati, panukmod, ug salabutan. Kini gikaingon nga nagahawas sa “sentral nga bahin sa katibuk-an, ang pangsulod, ug busa naghawas sa pangsulod nga pagkatawo ingon nga nagapadayag sa iyang kaugalingon diha sa tanan niyang lainlaing mga kalihokan, iyang mga tinguha, pagbati, emosyon, halawom nga pagbati, katuyoan, iyang mga hunahuna, pagsabot, paghanduraw, iyang kaalam, kahibalo, kahanas, iyang mga pagtuo ug iyang mga pangatarongan, iyang panumdoman ug iyang kaamgohan.” (Journal of the Society of Biblical Literature and Exegesis, 1882, panid 67) Ang atong piguratibong kasingkasing nag-apil sa atong mga pagbati ug mga emosyon, lakip na ang kangaya.—Juan 16:22.
4. Unsay makatabang kanato sa pag-alagad kang Jehova nga Diyos uban ang kangaya sa kasingkasing?
4 Unsay makatabang kanato sa pag-alagad kang Jehova uban ang kangaya sa kasingkasing? Ang usa ka positibo ug mapabilhong panglantaw sa atong mga panalangin ug hinatag-sa-Diyos nga mga pribilehiyo maoy makatabang. Pananglitan, kita makahunahuna uban ang kangaya mahitungod sa atong pribilehiyo sa paghatag ug “balaang pag-alagad” ngadto sa matuod nga Diyos. (Lucas 1:74) Anaa ang nalangkit nga pribilehiyo sa pagdala sa ngalan ni Jehova ingong iyang mga Saksi. (Isaias 43:10-12) Niini ikadugang nato ang kamangayaon sa pagkahibalo nga pinaagi sa pagsunod sa Pulong sa Diyos kita nagapahimuot kaniya. Ug pagkadakong kangaya ang anaa diha sa pagsumbalik-silaw sa espirituwal nga kahayag ug sa ingon nagatabang sa daghan nga makagula gikan sa kangitngit!—Mateo 5:14-16; itandi ang 1 Pedro 2:9.
5. Unsa ang tuboran sa diyosnong kangaya?
5 Bisan pa niana, ang pag-alagad kang Jehova uban ang kangaya sa kasingkasing wala lamang mag-apil sa positibong paghunahuna. Mapuslanon nga magmapositibo sa panglantaw. Apan ang diyosnong kangaya dili usa ka butang nga atong mapatungha pinaagi sa pag-ugmad sa maayong panggawi. Kini maoy usa ka bunga sa espiritu ni Jehova. (Galacia 5:22, 23) Kon wala kita nianang maong kangaya, hayan kinahanglan natong mohimog mga kausaban aron malikayan ang paghunahuna o paglihok diha sa dili-kasulatanhong paagi nga makapasubo sa espiritu sa Diyos. (Efeso 4:30) Hinunoa, maingon niadtong debotado kang Jehova dili kita mahadlok nga ang kakulang sa kinasingkasing nga kangaya sa pila ka kahimtang maoy pamatuod sa dili pag-uyon sa Diyos. Kita dili hingpit ug nailalom sa kasakit, kaguol, ug usahay bisan sa depresyon, apan si Jehova makasabot kanato. (Salmo 103:10-14) Busa mag-ampo kita alang sa iyang balaang espiritu, nga magahinumdom nga ang bunga niini nga kangaya maoy hinatag-sa-Diyos. Ang atong mahigugmaong langitnong Amahan magatubag sa maong mga pag-ampo ug makapaarang kanato sa pag-alagad kaniya uban ang kangaya sa kasingkasing.—Lucas 11:13.
Dihang Mawala ang Kangaya
6. Kon mahanaw ang kangaya diha sa atong pag-alagad sa Diyos, unsay angay natong buhaton?
6 Kon mawala ang kangaya diha sa atong pag-alagad, kita tingali sa ngadtongadto mawad-an sa atong kasibot diha sa pag-alagad kang Jehova o dili pa gani magmatinumanon kaniya. Busa, maalamon nga mapaubsanon ug mainampoong tagdon ang atong mga motibo ug mohimog gikinahanglang mga kausaban. Aron makabaton ug hinatag-sa-Diyos nga kangaya, kinahanglan kitang mag-alagad kang Jehova tungod sa gugma ug uban sa atong bug-os nga kasingkasing, kalag, ug hunahuna. (Mateo 22:37) Kinahanglang dili kita mag-alagad uban ang makig-indigong tinamdan, tungod kay si Pablo misulat: “Kon kita nagakinabuhi pinaagi sa espiritu, padayon kitang managlakaw nga mahusay usab pinaagi sa espiritu. Dili kita magpakaimportante sa kaugalingon, nga magaaghat ug panag-indigay sa usag usa, nga magasinahay sa usag usa.” (Galacia 5:25, 26) Dili kita makabaton ug tinuod nga kangaya kon kita nagaalagad tungod kay buot natong labwan ang uban o nagapangitag pagdayeg.
7. Unsaon nato pagpukaw ang atong kangaya sa kasingkasing?
7 Adunay kangaya diha sa pagtuman sa atong pahinungod kang Jehova. Sa dihang kita bag-ong nagpahinungod sa Diyos, kita masibotong nagsugod sa Kristohanong paagi sa kinabuhi. Kita nagtuon sa Kasulatan ug regular nga nagpakig-ambit sa mga tigom. (Hebreohanon 10:24, 25) Naghatag kanato ug kangaya ang pagpakig-ambit sa ministeryo. Apan, unsa na man kon ang atong kangaya namenosan? Ang pagtuon sa Bibliya, pagtambong sa mga tigom, pagpakig-ambit diha sa ministeryo—sa pagkatinuod, ang bug-os nga pakiglangkit diha sa tanang bahin sa Kristiyanidad—kinahanglang magahatag sa atong mga kinabuhi ug espirituwal nga kalig-on ug magpukaw pag-usab sa gugma nga atong nabatonan sa sinugdan ug sa atong kanhing kangaya sa kasingkasing. (Pinadayag 2:4) Unya dili kita mahisama sa pipila nga daw walay kangaya ug kanunayng nanginahanglan ug espirituwal nga tabang. Ang mga ansiano malipay nga motabang, apan ang matag usa kanato kinahanglan usab nga motuman sa atong pahinungod sa Diyos. Walay lain nga makahimo niini alang kanato. Busa himoon natong tumong nga mosunod sa naandang Kristohanong rotina aron matuman ang atong pahinungod kang Jehova ug makabaton ug tinuod nga kangaya.
8. Nganong ang hinlong konsensiya hinungdanon kon buot natong magmangayaon?
8 Aron mabatonan nato ang kangaya nga maoy usa ka bunga sa espiritu sa Diyos, nagkinahanglan kita ug hinlong konsensiya. Samtang gisulayan pagtago ni Haring David sa Israel ang iyang sala, siya magul-anon kaayo. Sa pagkamatuod, ang kaumog sa iyang kinabuhi daw nahanaw, ug tingali nagkasakit siya sa pisikal. Nahupayan siya pag-ayo sa dihang siya naghinulsol ug misugid! (Salmo 32:1-5) Dili kita magmangayaon kon kita nagatago ug seryosong sala. Kana hayan magpahinabo kanatong magkinabuhi ug usa ka gubot nga kinabuhi. Sa pagkatinuod, dili kana mao ang paagi nga matagamtam ang kangaya. Apan ang pagsugid ug paghinulsol magdala ug kahupayan ug kapasig-ulian sa usa ka mangayaong espiritu.—Proverbio 28:13.
Paghulat Uban ang Kangaya
9, 10. (a) Unsang saad ang nadawat ni Abraham, apan sa unsang paagi mahimong nasulayan ang iyang pagtuo ug kangaya? (b) Sa unsang paagi kita makabenepisyo gikan sa mga panig-ingnan ni Abraham, Isaac, ug Jacob?
9 Usa ka butang ang pagbaton ug kangaya sa dihang una natong nakat-onan ang katuyoan sa Diyos apan lain usab nga butang ang pagpabiling mangayaon human sa daghang katuigan nga anaa sa kamatuoran. Kini ikailustrar sa kaso sa matinumanong si Abraham. Human niya sulayi sa paghalad ang iyang anak nga si Isaac sumala sa sugo sa Diyos, ang usa ka manulonda mipahayag niining maong mensahe: “‘Tungod sa akong kaugalingon nanumpa ako,’ nagaingon si Jehova, ‘nga tungod kay gibuhat mo kini ug wala ka maghikaw kanako sa imong anak, sa imong bugtong nga anak, pagapanalanginan ko ikaw ug pagapadaghanon ko ang imong binhi sama sa mga bituon sa langit ug sama sa balas nga atua sa baybayon sa dagat; ug ang imong binhi manag-iya sa ganghaan sa iyang mga kaaway. Ug pinaagi sa imong binhi ang tanang nasod sa yuta magapanalangin sa ilang kaugalingon tungod kay gituman mo ang akong tingog.’” (Genesis 22:15-18) Walay duhaduha, si Abraham nagangaya sa hilabihan tungod niining maong saad.
10 Lagmit si Abraham nagdahom nga si Isaac mao ang “binhi” nga pinaagi kaniya ang gisaad nga mga panalangin moabot. Apan ang paglabay sa katuigan nga walay bisan unsang butang kahibulongan nga natuman pinaagi ni Isaac lagmit nagsulay sa pagtuo ug kangaya ni Abraham ug sa iyang pamilya. Ang pagsubli sa Diyos sa saad ngadto kang Isaac ug sa ulahi sa iyang anak nga si Jacob nagpasalig kanila nga ang pag-abot sa Binhi maoy sa umaabot pa, ug kini nagtabang kanila sa pagmentenar sa ilang pagtuo ug kangaya. Bisan pa niana, si Abraham, Isaac, ug Jacob namatay nga wala makakita sa katumanan sa mga saad sa Diyos kanila, apan sila maoy mangayaong mga alagad ni Jehova. (Hebreohanon 11:13) Kita usab makapadayon sa pag-alagad kang Jehova uban ang pagtuo ug kangaya samtang nagapaabot sa katumanan sa iyang mga saad.
Kangaya Bisan sa Paglutos
11. Nganong kita magmangayaon bisan sa mga paglutos?
11 Ingong mga alagad ni Jehova, kita makaalagad kang Jehova uban ang kangaya sa kasingkasing, bisan pag kita nagaantos ug paglutos. Si Jesus nagpahayag nga malipayon kadtong gilutos tungod kaniya, ug si apostol Pedro miingon: “Padayon kamo sa pagmaya sanglit mga mag-aambit man kamo sa mga pag-antos sa Kristo, aron kamo magamaya ug usab magangaya sa hilabihan sa panahon sa pagpadayag sa iyang himaya. Kamo malipayon kon kamo ginapakaulawan tungod sa ngalan ni Kristo, kay ang espiritu sa himaya, gani ang espiritu sa Diyos, nagapahiluna man diha kaninyo.” (1 Pedro 4:13, 14; Mateo 5:11, 12) Kon ikaw nagaagwanta ug paglutos ug nagaantos tungod sa pagkamatarong, nabatonan nimo ang espiritu ug pag-uyon ni Jehova, ug kana magapatungha gayod ug kangaya.
12. (a) Nganong kita makaatubang ug mga pagsulay sa pagtuo uban ang kangaya? (b) Unsang pasikaranang pagtulon-an ang makat-onan gikan sa kahimtang sa usa ka Levihanon nga nadestiyero?
12 Kita makaatubang sa mga pagsulay sa pagtuo uban ang kangaya tungod kay ang Diyos maoy atong Dalangpanan. Kini gipatin-aw sa mga Salmo 42 ug 43. Tungod sa usa ka hinungdan, ang usa ka Levihanon nadestiyero. Gipangandoy niya pag-ayo ang pagsimba diha sa sangtuwaryo sa Diyos nga gibati niyang siya usa ka uhaw nga bayeng osa, nga gihidlaw ug tubig diha sa usa ka uga ug umaw nga dapit. Siya “giuhaw,” o naghandom, kang Jehova ug sa pribilehiyo sa pagsimba sa Diyos diha sa Iyang sangtuwaryo. (Salmo 42:1, 2) Ang kasinatian niining nadestiyerong Levihanon kinahanglang magpalihok kanato sa pagpakitag kamapasalamaton sa asosasyon nga atong napahimuslan uban sa katawhan ni Jehova. Kon ang kahimtang sama sa pagkabilanggo gumikan sa paglutos temporaryong magpugong kanato sa pagpakig-uban kanila, palandongon nato ang kanhing mga kangaya nga nagkauban diha sa balaang pag-alagad ug mag-ampo nga makaagwanta samtang kita “magahulat sa Diyos” nga ipasig-uli kita sa regular nga kalihokan uban sa iyang mga magsisimba.—Salmo 42:4, 5, 11; 43:3-5.
“Pag-alagad Kang Jehova Uban ang Pagmaya”
13. Sa unsang paagi gipakita sa Salmo 100:1, 2 nga ang kangaya kinahanglang mahimong usa ka bahin sa atong pag-alagad sa Diyos?
13 Ang kangaya kinahanglang mahimong prominenteng bahin sa atong pag-alagad sa Diyos. Kini gipakita sa usa ka awit sa pasalamat diin ang salmista miawit: “Managhugyaw kamo alang kang Jehova, kamong tanang tawo sa yuta. Alagara si Jehova uban ang pagmaya. Dumuol kamo kaniya uban ang mangayaong pagsinggit.” (Salmo 100:1, 2) Si Jehova mao ang “malipayon nga Diyos” ug buot niya nga ang iyang mga alagad makakaplag ug kangaya diha sa pagtuman sa ilang mga obligasyon maylabot sa ilang pahinungod kaniya. (1 Timoteo 1:11) Ang katawhan sa tanang nasod kinahanglang magmaya diha kang Jehova, ug ang atong mga pahayag sa pagdayeg kinahanglang kusganon, sama sa ‘paghugyaw’ sa madaogong kasundalohan. Sanglit ang pag-alagad sa Diyos makaparepresko, kinahanglan kining duyogan sa pagmaya. Busa, ang salmista nag-awhag sa katawhan sa pagduol sa Diyos “uban ang mangayaong pagsinggit.”
14, 15. Sa unsang paagi ang Salmo 100:3-5 mapadapat sa mangayaong katawhan ni Jehova karong adlawa?
14 Ang salmista midugang: “Hibaloi [ilha, dawata] nga si Jehova mao ang Diyos. Siya ang nagbuhat kanato, ug dili kita sa atong kaugalingon. Kita iyang katawhan ug mga karnero sa iyang sibsibanan.” (Salmo 100:3) Sanglit si Jehova mao ang atong Maglalalang, siya mao ang tag-iya nato maingon sa usa ka magbalantay sa iyang mga karnero. Maayo kaayo ang pag-atiman sa Diyos kanato nga kita mapasalamatong nagadayeg kaniya. (Salmo 23) Mahitungod kang Jehova, ang salmista miawit usab: “Sumulod kamo sa iyang mga ganghaan uban ang pasalamat, ngadto sa iyang mga sawang uban ang pagdayeg. Ihatag kaniya ang pasalamat, dayegon ninyo ang iyang ngalan. Kay si Jehova maayo man; ang iyang mahigugmaong-kalulot magapadayon sa panahong walay-tino, ug ang iyang kamatinumanon ngadto sa tanang kaliwatan.”—Salmo 100:4, 5.
15 Karong adlawa, ang mangayaong katawhan sa tanang nasod nagasulod sa mga sawang sa sangtuwaryo ni Jehova aron sa paghatag ug mga pasalamat ug pagdayeg. Kita mangayaong magdayeg sa ngalan sa Diyos pinaagi sa kanunayng pagsulti ug maayo bahin kang Jehova, ug ang iyang halangdong mga hiyas magatukmod kanato sa pagdayeg kaniya. Siya maayo gayod kaayo, ug ang iyang mahigugmaong-kalulot o pagkamabination alang sa iyang mga alagad kanunayng masaligan, tungod kay kini magapadayon sa panahong walay-tino. Ngadto “sa tanang kaliwatan,” si Jehova matinumanon diha sa pagpakita ug gugma ngadto sa nagbuhat sa iyang kabubut-on. (Roma 8:38, 39) Nan, sa pagkatinuod kita adunay maayong katarongan sa “pag-alagad kang Jehova uban ang pagmaya.”
Pagmaya Diha sa Inyong Paglaom
16. Sa unsang mga paglaom ug palaaboton nga mahimong magmaya ang mga Kristohanon?
16 Si Pablo misulat: “Pagmaya diha sa paglaom.” (Roma 12:12) Ang dinihogang mga sumusunod ni Jesu-Kristo nagmaya diha sa mahimayaong paglaom sa imortal nga langitnong kinabuhi nga gihimo sa Diyos nga mabatonan nila pinaagi sa iyang Anak. (Roma 8:16, 17; Filipos 3:20, 21) Ang mga Kristohanon nga may paglaom sa walay-kataposang kinabuhi sa Paraisong yuta aduna usab ing pasikaranan sa pagmaya. (Lucas 23:43) Ang tanang matinumanong mga alagad ni Jehova adunay katarongan nga magmaya diha sa paglaom sa Gingharian, tungod kay sila mahimo unyang bahin nianang langitnong kagamhanan o kaha magkinabuhi sa yutan-ong dominyo niini. Pagkamangayaong panalangin!—Mateo 6:9, 10; Roma 8:18-21.
17, 18. (a) Unsay gitagna sa Isaias 25:6-8? (b) Sa unsang paagi kining tagnaa ni Isaias natuman karong adlawa, ug komosta ang katumanan niini sa umaabot?
17 Si Isaias nagtagna usab ug mangayaong kaugmaon alang sa matinumanong katawhan. Siya misulat: “Si Jehova sa mga panon magahimo gayod alang sa tanang katawhan, niining bukira, ug usa ka kombira sa matambok nga mga pagkaon, usa ka kombira sa bino nga pinalugdang, sa matambok nga mga pagkaon nga puno sa utok, sa bino nga pinalugdang, nga sinala. Ug niining bukira iyang pagalamyon ang tabon nga nagatabon sa tanang katawhan, ug ang hinabol nga nahitagik sa tanang nasod. Siya sa pagkatinuod magalamoy sa kamatayon sa walay kataposan, ug ang Soberanong Ginoo nga si Jehova magapahid sa mga luha gikan sa tanang nawong. Ug ang kaulaw sa iyang katawhan pagakuhaon niya gikan sa tibuok yuta, kay si Jehova mismo nagasulti niini.”—Isaias 25:6-8.
18 Ang espirituwal nga piyesta nga atong giambitan karong adlawa ingong mga magsisimba ni Jehova maoy usa ka malipayon gayod nga kombira. Sa pagkamatuod, ang atong kangaya nag-awas samtang kita masibotong nagaalagad sa Diyos nga nagapaabot sa kombira sa literal nga maayong mga butang nga iyang gisaad alang sa bag-ong kalibotan. (2 Pedro 3:13) Pinasukad sa halad ni Jesus, si Jehova magakuha sa “hinabol” nga nagatabon sa katawhan tungod sa sala ni Adan. Pagkadakong kangaya nga makitang kuhaon ang sala ug kamatayon! Pagkamakapahimuot gayod nga abiabihon ang binanhawng mga minahal, nga makita nga mawala na ang mga luha, ug magpuyo sa usa ka paraisong yuta, diin ang katawhan ni Jehova dili na pagapakaulawan kondili makahatag na sa Diyos ug tubag sa dakong tigbiaybiay, si Satanas nga Yawa!—Proverbio 27:11.
19. Sa unsang paagi kita mosanong sa mga palaaboton nga gibutang ni Jehova sa atong atubangan ingong iyang mga Saksi?
19 Dili ka ba matugob sa kangaya ug pasalamat nga masayod kon unsay pagabuhaton ni Jehova alang sa iyang mga alagad? Sa pagkatinuod, ang maong dagkong mga palaaboton makaamot sa atong kangaya! Dugang pa, ang atong bulahang paglaom magpahinabo nga kita molantaw sa atong malipayon, mahigugmaon, manggihatagong Diyos uban sa mga pagbati nga sama niini: “Tan-awa! Kini mao ang atong Diyos. Kita naglaom kaniya, ug siya magaluwas kanato. Kini mao si Jehova. Kita naglaom kaniya. Magmalipayon kita ug magmaya diha sa kaluwasan nga pinaagi kaniya.” (Isaias 25:9) Uban sa atong matahom nga paglaom nga natisok pag-ayo sa atong hunahuna, manglimbasog kita nga ang tanan natong paningkamot itumong diha sa pag-alagad kang Jehova uban ang kangaya sa kasingkasing.
Unsaon Nimo Pagtubag?
◻ Sa unsang paagi kita makaalagad kang Jehova uban ang “kangaya sa kasingkasing”?
◻ Unsay atong mahimo kon mawad-an kita ug kangaya diha sa atong pag-alagad sa Diyos?
◻ Nganong ang katawhan ni Jehova makabaton ug kangaya bisan pa sa paglutos?
◻ Unsay atong mga katarongan nga magmaya diha sa atong paglaom?
[Mga hulagway sa panid 17]
Ang pagpakig-ambit diha sa tanang bahin sa Kristohanong kinabuhi magapauswag sa atong kangaya