Pasidunggi si Jehova—Ngano ug Unsaon?

“Ang mga nagapasidungog kanako akong pasidunggan, ug ang mga nagatamay kanako mawalay bili.”—1 SAMUEL 2:30.

1. Kinsay gantihan sa bantog-sa-kalibotang mga premyong Nobel, ug unsay pag-isip sa daghan sa maong mga ganti?

KADA tuig upat ka institusyon sa Scandinavia mohatag sa mga premyong Nobel ngadto niadtong ‘nakahatag ug labing dakong kaayohan sa mga tawo sa miaging tuig.’ Ang mga premyo ginahatag tungod sa mga nalampos sa unom ka magkalaing natad sa paningkamot. Giisip sa daghan ang premyong Nobel nga kinadak-ang pasidungog nga ikahatag nganha sa usa ka tawo.

2. Kinsay gikalimtan sa mga tighatag sa mga premyong Nobel, ug nganong Siya angay ilabina sa pasidungog?

² Bisan tuod dili daotan nga pasidunggan ang takos nga mga tawo, ang mga tighatag sa maong mga pasidungog naghunahuna ba sa pagpasidungog sa labing dakong Magtatabang sa katawhan? Ang maong Magtatabang maoy naghatag sa dimaihap nga mga benepisyo diha sa katawhan sukad gayod sa paglalang niya sa unang lalaki ug babaye mga 6,000 ka tuig kanhi. Ang kanunayng pagkapakyas nga pasidunggan siya makapahinumdom kanato sa mga pulong ni Eliu, ang higala sa karaang si Job, nga miingon: “Apan walay nagaingon, ‘Hain ba ang Diyos ang akong Dakong Magbubuhat, ang Usang nagahatag ug mga alawiton sa magabii?’” (Job 35:10) Ang atong dakong Magtatabang nagapadayon sa pagbuhat ug ‘maayo, nga nagahatag ug ulan gikan sa langit ug sa makapabunga nga kapanahonan, nga nagahupong sa mga kasingkasing sa katugob sa pagkaon ug kalipay.’ (Buhat 14:16, 17; Mateo 5:45) Si Jehova mao gayod ang Maghahatag sa “tanang maayong gasa ug tanang hingpit nga hatag.”—Santiago 1:17.

Kon Unsay Kahulogan sa Pagpasidungog

3. Unsa ang prinsipal nga Hebreohanon ug Gregong mga pulong nga gihubad “pasidungog,” ug unsa ang ilang mga kahulogan?

³ Ang prinsipal Hebreohanong pulong alang sa pasidungog, ang ka·vohdhʹ, sa literal nagkahulogang “pagkabug-at.” Busa ang usa ka tawo nga gipasidunggan giisip nga may gibug-aton, halangdon, o may bili. Makahuloganon, kining Hebreohanong pulong, ka·vohdhʹ, kasagarang hubaron usab diha sa Kasulatan ingong “himaya,” sa dugang nagapaila unsa ka halangdon o kaimportante giisip ang usang gipasidunggan. Ang laing Hebreohanong pulong, yeqarʹ, nga gihubad nga “pasidungog” diha sa Kasulatan, gihubad usab nga “mahal” ug “mahal nga mga butang.” Busa diha sa Hebreohanong Kasulatan, ang pulong pasidungog nalambiggit sa himaya ug pagkamahal. Ang Gregong pulong nga gihubad nga “pasidungog” diha sa Bibliya mao ang ti·meʹ, ug kini usab nagahatag sa diwa sa pagtamod, bili, pagkamahal.

4, 5. (a) Unsay kahulogan sa pagpasidungog sa usa ka indibiduwal? (b) Unsang kahimtang nga giasoy diha sa Ester 6:1-9 nagailustrar kon unsay nalangkit sa paghatag ug pasidungog?

⁴ Busa ang usa magpasidungog sa lain pinaagi sa pagpakita nianang tawhana sa lalom nga pagtahod ug pagtamod. Ingong usa ka ilustrasyon, palandonga ang kahimtang nga giasoy diha sa Bibliya mahitungod sa matinuohong Hudiyo nga si Mardocheo. Sa usa ka higayon giyagyag ni Mardocheo ang usa ka daotang laraw batok sa kinabuhi ni Haring Assuero sa karaang Persia. Sa kaulahian, sa usa ka gabii sa dihang ang hari wala makatulog, ang buhat ni Mardocheo nadala sa pagtagad sa hari. Busa iyang gisukna ang iyang mga alagad: “Unsang pasidungog ug dakong butang ang nahimo ngadto kang Mardocheo tungod niini?” Mitubag sila: “Walay gihimo kaniya.” Pagkamakapahinuklog! Giluwas ni Mardocheo ang kinabuhi sa hari, ug unya ang hari napakyas sa pagpakitag apresasyon.​—Ester 6:1-3.

⁵ Busa, sa nahaigong panahon, gisukna ni Assuero ang iyang primer ministro, si Aman, kon unsaon pagpasidungog sa labing maayo sa usang gikahimut-an sa hari. Dihadiha si Aman nangatarongan diha sa iyang kasingkasing: “Kinsa ba ang gikahimut-an sa hari sa paghatag ug pasidungog nga labaw pa kay kanako?” Busa si Aman miingon nga ang tawo pagasul-oban sa “harianong biste” ug pasakyon sa “usa ka kabayo nga ginasakyan sa hari.” Siya mihinapos: “Siya kinahanglang pasakyon sa kabayo sa hawanan sa siyudad, ug kinahanglang sila magasinggit sa iyang atubangan, ‘Kini mao ang pagabuhaton sa tawo si kinsa gikahimut-an sa hari nga pasidunggan.’” (Ester 6:4-9) Ang usang pasidunggan sa ingon mahimong tinamod kaayo sa tanang tawo.

Kon Nganong si Jehova Angay sa Pasidungog

6. (a) Kinsa labaw sa tanan ang angay sa atong pasidungog? (b) Nganong ang pulong “dako” haom nga nagabatbat kang Jehova?

⁶ Sa tibuok kasaysayan ang mga tawo gipasidunggan, nga kasagaran dili pa angayan. (Buhat 12:21-23) Apan labaw sa tanan kinsa ang angayang pasidunggan? Aw, si Jehova nga Diyos, siyempre! Siya angayan sa atong pasidungog kay siya tino nga dako. Kasagaran ang pulong “dako” ipadapat kaniya. Siya mao ang Usang Dako, ang Dakong Magbubuhat, ang Dakong Maglalalang, ang Dakong Hari, ang Dakong Magtutudlo, ang Dakong Agalon. (Salmo 48:2; Ecclesiastes 12:1; Isaias 30:20; 42:5; 54:5; Oseas 12:14) Siya nga dako maoy harianon, halangdon, binayaw, hamili, bantogan, ug makalilisang. Si Jehova walay katanding, siya walay kasama, siya labaw sa tanan. Siya mismo nagapamatuod niana, nga nagaingon: “Kang kinsa ninyo ako ipanig-ingon o ipakasama o itandi mao nga kami magakasama sa usag usa?”​—Isaias 46:5.

7. Sa labing menos pila ka lainlaing paagi ikaingon nga si Jehova nga Diyos maoy linain, ug nganong ikaingon nga siya walay katanding kon bahin sa pagbulot-an?

⁷ Si Jehova nga Diyos walay ikatanding diha sa labing menos pito ka linaing paagi, nga nagahatag ug tinong mga katarongan sa pagpasidungog kaniya. Una sa tanan, takos si Jehova nga Diyos sa labing dakong pasidungog kay siya walay kasama sa pagbulot-an. Si Jehova nga Diyos mao ang Unibersohanong Soberano​—siya maoy kinalabwan. Siya mao ang atong Maghuhukom, Maghahatag-Balaod, ug Hari. Ang tanang tawo sa langit ug sa yuta manubag ngadto kaniya; apan siya dili manubag kang bisan kinsa. Maayo ang pagbatbat kaniya ingong “dako, gamhanan ug makalilisang.”​—Deuteronomio 10:17; Isaias 33:22; Daniel 4:35.

8. Nganong ikaingon nga si Jehova maoy walay kasama (a) kon bahin sa iyang posisyon? (b) kon bahin sa iyang walay-kataposang kalungtaran?

⁸ Ikaduha, si Jehova nga Diyos takos sa labing dakong pasidungog kay siya walay kasama kon bahin sa iyang katungdanan. Siya mao “ang Hataas ug Binayaw,” ang Labing Hataas. Siya labaw kaayo nga dili mahanduraw ibabaw sa tanan niyang yutan-ong kalalangan! (Isaias 40:15; 57:15; Salmo 83:18) Ikatulo, si Jehova nga Diyos pagapasidunggan labaw sa tanan kay siya walay ingon kon bahin sa iyang walay-kataposang kalungtaran. Siya lamang ang walay sinugdanan, tungod kay gikan man sa walay kataposan ngadto sa walay kataposan.​—Salmo 90:2; 1 Timoteo 1:17.

9. Sa unsang paagi si Jehova dili ikatanding (a) kon bahin sa iyang himaya? (b) kon bahin sa iyang paninugdang mga hiyas?

⁹ Ikaupat, si Jehova nga Diyos angayan sa labing dakong pasidungog tungod sa pagkahalangdon sa iyang personal nga himaya. Siya mao “ang Amahan sa langitnong mga kahayag.” Ang iyang persona masidlakon kaayo nga walay tawo ang makakita kaniya ug mabuhi pa. Siya tinuod nga makalilisang. (Santiago 1:17; Exodo 33:22; Salmo 24:10) Ikalima, angay natong ihatag kang Jehova nga Diyos ang labing dakong pasidungog tungod sa iyang kahibulongang mga hiyas. Siya makagagahom sa tanan, waykinutbanan sa gahom; siya nasayod sa tanan, walay kinutoban sa kaalam; siya bug-os hingpit sa hustisya; ug siya ang kahugpongan gayod sa gugma.​—Job 37:23; Proverbio 3:19; Daniel 4:37; 1 Juan 4:8.

10. Sa unsang paagi si Jehova walay ingon (a) kon bahin sa mga buhat sa kalalangan ug sa mga katigayonan? (b) kon bahin sa iyang ngalan ug kabantog?

¹⁰ Ikaunom, si Jehova nga Diyos angayan sa labing dakong posibleng pasidungog tungod sa iyang dagkong mga buhat sa paglalang. Ingong Maglalalang sa tanang butang sa mga langit ug sa yuta, siya sa samang panahon mao ang Dakong Tag-iya sa tanang butang. Atong mabasa sa Salmo 89:11: “Ang langit imo, ang yuta imo usab.” Ikapito, si Jehova nga atong Diyos angayan sa pasidungog labaw sa tanan kay siya walay katupong, walay-kasama kon bahin sa iyang ngalan ug kabantog. Siya lamang ang nagdala sa ngalang Jehova, nga nagkahulogan “Siya Nagapahinabo.”​—Tan-awa ang Genesis 2:4, potnot.

Kon Unsaon Pagpasidungog Kang Jehova

11. (a) Unsa ang pila ka paagi nga kita makapasidungog kang Jehova? (b) Sa unsang paagi atong ikapakita nga kita nagapasidungog gayod kang Jehova pinaagi sa pagsalig kaniya?

¹¹ Tungod sa tanang hiyas ni Jehova, sa unsang paagi makapasidungog kita kaniya? Sumala sa atong makita, kita makapasidungog kaniya pinaagi sa pagpakita kaniyag kahadlok ug pagtahod, pinaagi sa pagsunod kaniya, pinaagi sa pag-ila kaniya diha sa tanan natong dalan, pinaagi sa paghatag ug mga gasa, pinaagi sa pagsundog kaniya, ug pinaagi sa paghimog mga petisyon o hangyo kaniya. Makapasidungog usab kita kaniya pinaagi sa pagbutang ug pagtuo diha kaniya, pinaagi sa pagsalig kaniya bisan unsay mahitabo. “Sumalig kamo kang Jehova uban sa tibuok mong kasingkasing,” kita giawhag. Busa kita magapasidungog kang Jehova nga Diyos pinaagi sa pagtuo sa iyang pulong. Pananglitan, siya nagaingon: “Ayaw kahadlok, kay ako nagauban kanimo. Ayaw pagsud-ong sa palibot [diha sa kahadlok], kay ako mao ang imong Diyos. Pagalig-onon ko ikaw. Pagatabangan ko ikaw.” (Proverbio 3:5; Isaias 41:10) Ang kapakyasan sa pagsalig kaniya sa bug-os maoy pagpakaulaw kaniya.

12. Unsa ang bahin sa pagsugot ug pagkahadlok diha sa pagpasidungog kang Jehova?

¹² Ang nalambiggit kaayong paagi nga kita magapasidungog kang Jehova nga Diyos maoy pinaagi sa pagsugot kaniya. Ug gikinahanglan sa pagsugot ang diyosnong kahadlok, oo, kahadlok nga dili makapahimuot sa Diyos. Nagapakita sa relasyon tali sa pagkahadlok ug pagsugot mao ang mga pulong ni Jehova ngadto kang Abraham tapos si Abraham sa pagkamasinugtanon mosulay sa paghalad kang Isaac, ang iyang anak. “Karon naila ko nga ikaw nahadlok sa Diyos,” miingon si Jehova. (Genesis 22:12) Sa dihang naghisgot kon unsay nautang o katungdanan sa mga anak ngadto sa ilang mga ginikanan, gipakita usab ni apostol Pablo nga ang pagsugot ug pasidungog magkauban. (Efeso 6:1-3) Busa pinaagi sa pagsugot sa mga sugo sa Diyos, nga dili bug-at, kita magapasidungog kang Jehova. Walay duhaduha, ang dili pagsugot kang Jehova nga Diyos maoy dili pagpasidungog kaniya.—1 Juan 5:3.

13. Ang pagpasidungog sa Diyos magpahinabo nga kita makabaton sa unsang tinamdan sa hunahuna bahin sa atong mga kalihokan ug mga plano?

¹³ Dugang pa, kita makahatag ug nahiangayng pasidungog kang Jehova nga Diyos pinaagi sa pagpamati sa tambag sa Proverbio 3:6: “Sa tanan mong dalan matikdi siya [oo, ilha siya], ug siya mismo magatul-id sa imong mga alagianan.” Ang disipulong si Santiago naghatag kanatog maayong tambag maylabot niini. Inay sa pagpadayong masaligon sa kaugalingon sa sunodsunod nga adlaw, nga magsalig sa iyang mga katakos, kita angay moingon: “Kon kabubut-on ni Jehova, kita mabuhi ug magabuhat usab niini o niana.” (Santiago 4:15) Katuigan kanhi nabatasan sa mga Internasyonal nga Estudyante sa Bibliya ang pagdugang sa bisan unsang pamulong maylabot sa ugma-damlag sa pinamubong D.V., nga nagkahulogang Deo volente, nga nagkahulogang “Kon kabubut-on sa Diyos.”

14. (a) Unsang tinamdan maylabot sa atong mga paningkamot ang kinahanglang atong batonan aron kita makapasidungog sa Diyos? (b) Unsang tinamdan ang gipasundayag maylabot sa pagpatik sa mga basahon sa Watch Tower Society?

¹⁴ Kita magapasidungog usab kang Jehova nga Diyos pinaagi sa pagpadayag sa mapaubsanong tinamdan, nga ipasidungog sa Diyos ang mga kalamposan nga tingali atong gipahimuslan. Sa tukma mipahayag si apostol Pablo mahitungod sa iyang ministeryo: “Ako ang nagtanom, si Apolos ang nagbisibis, apan ang Diyos ang nagpatubo; mao nga walay bili ang nagatanom o ang nagabisibis, apan ang Diyos nga nagapatubo niini.” (1 Corinto 3:6, 7) Sa pagkamatuod, si Pablo mabalak-on mahitungod sa paghatag ug nahiangayng pasidungog sa Diyos, dili sa iyang kaugalingon o kang bisan kinsang ubang tawo. Busa, karong adlawa, ang mga basahon sa Watch Tower Society dili magpaila sa mga nagsulat kanila, ug ang mga magsusulat nagalikay sa pagpahibalo sa uban kon unsay ilang gitampo. Niining paagiha, ang pagtagad masentro sa impormasyon, nga gilaraw sa pagpasidungog kang Jehova, ug dili sa tawo.

15. Unsang kasinatian nagailustrar nga malisdan ang pila ka tawo sa pagsabot sa pagkamakasaranganon o modestiya sa mga Saksi ni Jehova?

¹⁵ Kining polisa nga isentro ang pagtagad kang Jehova, sa ingon magpasidungog kaniya, maoy katingad-anan sa pipila. Pila ka tuig nga miagi, sa dihang nagtaod sa mikropono ug trompa alang sa usa ka pakigpulong publiko sa Central Park sa New York City, gipatokar sa mga Saksi ang usa sa Kingdom Melodies nga mga teyp aron masulayan ang trompa. Ang usa ka maayog-pamiste nga magtiayon nangutana sa usa sa mga Saksi kon unsa kadtong musikaha. Kay naghunahunang ang magtiayon maoy mga Saksi, siya mitubag: “Kana Kingdom Melodies No. 4.” “Oo, apan kinsay mikomposo sa maong musika?” sila nangutana. Ang Saksi mitubag: “Ah, ang nagkomposo wala magpaila.” Mitubag ang magtiayon: “Ang mga tawo nga nagkomposo sa maong matang sa musika dili magbuhat niana nga dili magpaila.” Mitubag ang Saksi: “Apan kana ang ginabuhat sa mga Saksi.” Oo, sila nagabuhat niini aron ang tanang pasidungog moadto kang Jehova nga Diyos!

16. Sa unsang lainlaing paagi kita makagamit sa atong mga tingog sa pagpasidungog kang Jehova nga Diyos?

¹⁶ Ang laing paagi sa pagpasidungog kang Jehova maoy pinaagi sa paggamit sa atong mga ngabil sa pagpamatuod mahitungod kaniya. Kon tinuod kitang nabalaka sa paghatag pasidungog kaniya, nan kita magbinuotan sa pagpalapnag sa maayong balita sa Gingharian. Mahimo nato kini pinaagi sa pagbalay-balay ug pinaagi sa laing mga metodo nga atong mabatonan, nga dili laktawan ang kahigayonan sa pagsangyaw sa dili-pormal nga paagi. (Juan 4:6-26; Buhat 5:42; 20:20) Dugang pa, kita may kahigayonan sa pagpasidungog sa atong Diyos pinaagi sa atong mga tingog sa atong mga tigom sa kongregasyon, pinaagi sa paghatag ug mga komento ug pinaagi sa pagduyog sa kinasingkasing nga pag-awit sa atong mga awit sa Gingharian. (Hebreohanon 2:12; 10:24, 25) Sa atong inadlaw nga pakig-estorya, makapasidungog usab kita kang Jehova nga Diyos pinaagi sa atong mga ngabil. Uban ang diyutayng paningkamot, makapasimang kita sa estorya ngadto sa makapalig-on sa espirituwal nga mga ulohan, ug kini mosangpot sa pagpasidungog kang Jehova nga Diyos.​—Salmo 145:2.

17. (a) Unsay kalabotan sa hustong kagawian diha sa atong pagpasidungog kang Jehova? (b) Unsa ang epekto sa daotang kagawian?

¹⁷ Bisan pag maayo nga pasidunggan si Jehova nga Diyos pinaagi sa atong mga ngabil, kinahanglan usab nga pasidunggan siya pinaagi sa atong pamatasan. Gisaway ni Jesus kadtong si kinsa, samtang nagpasidungog sa Diyos pinaagi sa ilang mga ngabil, may mga kasingkasing nga halayo kaayo Kaniya. (Marcos 7:6) Ang daotang pamatasan lagmit magdalag pakaulaw kang Jehova nga Diyos. Pananglitan, sa Roma 2:23, 24, atong mabasa: “Ikaw, nga nagapasigarbo sa kasugoan, ikaw ba pinaagi sa imong paglapas sa Kasugoan nagapasipala sa Diyos? Kay ‘ang ngalan sa Diyos gipasipad-an tungod kaninyo taliwala sa kanasoran.’” Sa katuigan nga dili pa dugay libolibo ang napalagpot gikan sa mga kongregasyon sa katawhan ni Jehova. Lagmit, mas daghan pa nga nagbuhat sa makapasipalang kagawian wala ipalagpot kay sila nagpakitag tinuod mahinulsolong tinamdan. Kining tanang katawhan nagpasidungog kang Jehova pinaagi sa ilang mga ngabil, apan sila napakyas sa paghimo niana pinaagi sa ilang kagawian.

18. (a) Unsang pagkamabalak-on ang batonan sa mga tawong napaboran pag-ayo aron ilang ipakita ang nahiangayng pasidungog kang Jehova? (b) Sa unsang paagi ang kahimtang sa pila ka saserdote sa adlaw ni Malakias nagailustrar sa panginahanglan sa kabalaka?

¹⁸ Kadtong puliki sa lainlaing natad sa bug-os-panahong pag-alagad​—diha kaha sa Bethel, sa buluhaton sa nagapanawng magtatan-aw o misyonaryo, o ingong mga payunir​—napaboran pag-ayo kon bahin sa ilang kahigayonan nga makaamot sa kadungganan ni Jehova. Ang ilang katungdanan mao ang pagbuhat sa ilang labing maayo diha sa bisan unsang buluhatong giasayn kanila, ‘nga magmatinumanon sa labing gamay ingon man sa dako.’ (Lucas 16:10) Sa pila ka paagi ang ilang madungganong posisyon, giilustrar, bisan tuod wala pagalandongi sa mga saserdote ug mga Levihanon sa karaang Israel. Ugaling lamang, tungod sa pagpasagad sa pila ka saserdote sa adlaw ni Malakias, si Jehova miingon kanila: “Kon ako usa ka amahan, hain man ang pasidungog alang kanako? Ug kon ako maoy usa ka dakong agalon, hain man ang pagkahadlok kanako?” (Malakias 1:6) Kadtong mga saserdote nagtamay sa ngalan sa Diyos pinaagi sa pagtanyag sa buta, piang, ug masakitong mga hayop ingong mga halad. Gawas kon maningkamot sa pagbuhat sa ilang labing maayo kadtong may linaing mga pribilehiyo sa pag-alagad karong adlawa, sila angay sa pagbadlong nga gihatag ni Jehova nga Diyos niadtong mga saserdote. Sila wala makakab-ot kon bahin sa pagpasidungog sa Diyos.

19. (a) Sumala sa giingon sa Proverbio 3:9, unsa ang usa ka dugang paagi sa pagpasidungog kang Jehova? (b) Unsa ang laing hinungdanong paagi sa pagpasidungog kang Jehova?

¹⁹ Ang laing paagi nga kita makapasidungog kang Jehova nga Diyos maoy pinaagi sa pag-amot ug salapi ngadto sa tibuok-kalibotang buluhaton sa pagwali nga iyang gisugo. “Pasidunggi ninyo si Jehova pinaagi sa inyong bililhong mga butang ug pinaagi sa unang mga bunga sa tanan ninyong abot,” giawhag kita. (Proverbio 3:9) Ang pribilehiyo sa pag-amot ug salapi maoy usa ka higayon sa pagpasidungog kang Jehova nga Diyos nga dili angay hikalimtan. Kita makapasidungog usab kang Jehova nga Diyos diha sa atong mga pag-ampo, nga magadayeg ug magapasalamat kaniya. (1 Cronicas 29:10-13) Sa pagkamatuod, tungod kay kita moduol kaniya nga mapaubsanon ug uban ang lalom nga pagtahod, ang atong pagduol mismo sa Diyos diha sa pag-ampo maoy paghatag kaniyag pasidungog.

20. (a) Kinsa ang kasagarang pasidunggan sa mga tawo sa kalibotan, ug sa unsang paagi? (b) Pinaagi sa pagsugot sa unsang sugo nga kita makapasidungog sa dugang kang Jehova?

²⁰ Karong adlawa daghang mga tawo, mga batan-on ilabina, nagapasidungog niadtong ilang ginadayeg pinaagi sa pagsundog kanila​—pinaagi sa pagsulting sama kanila ug paglihok nga sama kanila. Kasagarang ang mga tawo nga ilang ginasundog mao ang bantogang mga magdudula o mga bituon sa kalibotan sa kalingawan. Sa katugbang, ingong mga Kristohanon, kita angay magpasidungog kang Jehova nga Diyos pinaagi sa pagpaningkamot sa pagsundog kaniya. Si apostol Pablo miagda nga buhaton nato kana, nga nagsulat: “Mahimong mga manunundog sa Diyos, ingong minahal nga mga anak, ug magpadayon sa paglakaw diha sa gugma.” (Efeso 5:1, 2) Oo, pinaagi sa pagpaningkamot sa pagsundog kang Jehova, kita magapasidungog kaniya.

21. (a) Unsay magsangkap nato sa paghatag kang Jehova sa himaya ug pasidungog? (b) Unsa ang mga ganti nga ginahatag ni Jehova ngadto niadtong magapasidungog kaniya?

²¹ Sa pagkamatuod, adunay daghang paagi nga kita makahatag ug angay maghatag sa Diyos sa himaya ug pasidungog. Dili nato pagakalimtan nga pinaagi sa regular nga pagtuon sa iyang Pulong ug pagkasinating mas maayo kaniya, kita mas makaarang sa pagpasidungog kaniya. Unsa ang mga ganti sa pagbuhat niana? “Ang mga nagapasidungog kanako,” nagaingon si Jehova, “akong pasidunggan.” (1 Samuel 2:30) Si Jehova sa kataposan magpasidungog sa iyang mga magsisimba pinaagi sa paghatag kanilag kinabuhing walay kataposan diha sa kalipay, sa langit kaha ingong kaubang mga magmamando sa iyang Anak, si Jesu-Kristo, o sa Paraisong yuta.

Nahinumdom Ka Ba?

◻ Kinsa ang sagad ginapasidunggan sa mga tawo, ug kinsa ang kasagarang ilang mahikalimtan sa pagpasidungog?

◻ Unsay kahulogan nga ang usa pasidunggan, ug unsa ang mga paagi nga kini mahimo?

◻ Unsa ang pipila sa paninugdang mga katarongan nga si Jehova nga Diyos angay sa pasidungog?

◻ Unsa ang pipila sa mga paagi nga kita makapasidungog kang Jehova?

◻ Sa unsang mga paagi si Jehova magaganti niadtong magpasidungog kaniya?