Mga Magmamantala sa Gingharian Nagtaho
Usa ka Madre Sulod sa 25 ka Tuig sa Kataposan Nakakat-on sa Kamatuoran
GITAGNA sa Bibliya nga ang “usa ka dakong panon” gikan sa tanang kanasoran mangabot ug magsimba diha sa espirituwal nga templo ni Jehova. (Pinadayag 7:9) Kini nagakahitabo karong adlawa, ug kita malipay sa pagkakita nga daghan, sa tabang sa kamatuoran sa Diyos, sa ingon nagbugto sa mga gapos sa bakak nga relihiyon. Giilustrar kini sa mosunod nga mga kasinatian.
◻ Usa ka babaye sa Roma, Italya, misugid: “Sukad sa akong pagkabata pa ang pinakadako kong pangandoy mao nga magmadre, sanglit maoy akong tinguha uban sa bug-os kong kasingkasing ang pag-alagad sa Diyos. Akong natuman lamang ang akong ambisyon sa edad nga 32, sa Disyembre 8, 1960, sa dihang gihimo ko ang unang mga panaad sa pagkamasinugtanon, kakabos, ug kaputli. Ang akong asaynment mao ang pag-atiman sa adlaw ug gabii sa mga 30 ka kabos ug abandonadong mga bata nga maoy ilo o mga anak sa mga priso. Ako natagbaw sa akong asaynment.
“Ang akong pagtuo natarog tapos sa napulo ka tuig nga serbisyo sa dihang mitungha ang panagbingkil sulod sa institusyon. Ako nahibulong kon ngano, kon Diyos maoy nagtultol kanamo, nga itugot niya ang maong mga panagbingkil ug mga kagubot diha sa iyang kaugalingong balay.”
Ang madre may igsoong babaye nga nagpuyo sa Pransiya ug usa sa mga Saksi ni Jehova. Iyang gisangyawan ang madre pinaagi sa sulat ug gipadad-an siyag New World Translation of the Holy Scriptures. Miasoy ang madre: “Tapos sa 23 ka tuig, kadto ang una kong kontak sa Pulong sa Diyos.” Niadto midawat siya sa usa ka pagtuon sa Bibliya uban sa mga Saksi ni Jehova. Siya miingon: “Samtang miuswag ako sa pagtuon, akong nasayran si Jehova nga Diyos ug ang iyang mga kinahanglanon ingon man iyang kahibulongang mga hiyas. Daotan kaayo ang akong gibati sa dihang akong nasayran nga siya dili mouyon sa paggamit ug mga imahen, sanglit ang institusyon puno sa mga imahen sa tanang gidak-on ug matang. Akong nasabtan nga kon buot ko nga mapahimut-an si Jehova, dili ako makapabilin sa maong dapit. Tapos sa 25 ka tuig sa debotadong serbisyo ingong madre, akong nakaplagan sa kataposan ang kamatuoran. Busa sa Oktubre 1, 1985, gihatag ko ang akong pahibalo sa paggawas, sa dakong kaguol sa akong mga superyora.
“Gitabangan ako sa espirituwal ug materyal nga paagi sa akong mahigugmaong mga igsoong lalaki ug mga babaye. Kay mapasalamaton kang Jehova ug sa iyang organisasyon, ako nabawtismohan niadtong Agosto 30, 1986, ug misugod sa pagsubay sa dalan ngadto sa kinabuhing walay kataposan.”
Gipanalanginan ni Jehova ang Tinguha sa Usa ka Tin-edyer sa Pag-alagad sa Diyos
◻ Usa ka magtutudlo sa Brazil nga usa sa mga Saksi ni Jehova nakamatikod samtang nagtsek sa mga papel sa komposisyon nga usa ka 14-anyos nga estudyante misulat bahin sa iyang tinguha nga masayod ug dugang bahin sa Diyos. Gisugdan niya ang usa ka pagtuon sa Bibliya uban sa estudyante, apan sa miuswag ang batang babaye, gidid-an sa iyang Katolikong pamilya ang pagtuon ug gidaot ang iyang mga basahon. Ang batan-ong estudyante misugod sa pagtuon sa Bibliya panahon sa recess sa klase, apan nadiskobrehan. Busa ang pagtuon gipadayon pinaagi sa sulat. Ugaling, sa wala madugay nakit-an sa pamilya ang iyang mga sulat ug gisunog sila. Gipugos siya sa amahan sa pagtambong sa Misa. Siya mikuyog apan nagdalag usa ka kopya sa Bantayanang Torre aron mabasa panahon sa serbisyo, nga nagtago niana tali sa mga panid sa misal sa simbahan. Kadto nagpadayon sa unom ka bulan, hangtod nga usa ka adlaw siya miyuhot sa paggawas sa iyang balay aron moadto sa Kingdom Hall. Panahon sa tigom ang iyang amahan mitungha sa pultahan ug giingnan ang mga igsoon nga pasultihan ang iyang anak babaye nga iya siyang bunalan inigkauli niya sa balay. Ang paningkamot sa mga igsoon nga mangatarongan kaniya wala molampos.
Sa sunod adlaw, nga malipayon ug mapahiyomon, siya nakigkita sa mga igsoon. Gipakita niya kanila ang daghang lagom sa iyang lawas diin gibunalan siya sa iyang amahan. Nan, nganong siya malipayon man? Sa pagbiya sa Kingdom Hall, ang amahan nangutana sa ubay-ubayng mga tawo sa lungsod, apil ang alkalde, bahin sa mga kaayohan ug mga kadaotan sa pagkahimong usa sa mga Saksi ni Jehova sa iyang anak babaye. Ang alkalde miingon nga ang mga Saksi maayong mga tawo, nga takos saligan. Siya midugang nga sila may ekselenteng mga moral ug maayo kaayo nga magbatog anak nga may maong mga sukdanan, nga taas kaayo kay sa iya sa kadaghanang batan-on.
Bisan pa niadto, ang batang babaye gibunalan. Apan giingnan siya sa amahan nga gibunalan siya kay siya mibiya sa balay nga wala mananghid. Ug miingon siya nga siya bunalan pag-usab kon mohunong siya sa pagtuon sa Bibliya o pagtambong sa mga tigom sa mga Saksi ni Jehova! Ang anak babaye karon usa ka madasigong magmamantala, ug ang pipila sa iyang pamilya nagapakitag interes sa kamatuoran.
Sa pagkamatuod, gipanalanginan ni Jehova ang mga batan-on nga may tim-os nga tinguha sa pag-alagad kaniya, sumala sa gipakita niining kasinatiana.—Salmo 148:12, 13.