Mga Pangutana Gikan sa mga Magbabasa

◼ Kinsa sa magsusulat sa Bibliya ang gihisgotang usa ka “heneral,” diha sa librong Ang Bibliya—Pulong sa Diyos o sa Tawoa

Kanang makatabang nga libro mahitungod sa Pulong sa Diyos miingon sa panid 10: “Ang Bibliya talagsaon usab tungod sa pangangkon nga gihimo sa daghang mga masusulat niini. Ang 40 ka mga indibiduwal, lakip na ang mga hari, mga magbalantay sa karnero, mga mananagat, mga alagad sibil, mga saserdote, sa dili momenos usa ka heneral, ug usa ka mananambal, ang maylabot sa pagsulat sa nagkalainlaing mga bahin sa Bibliya. Apan sa makadaghan, ang mga magsusulat mihimo sa samang pangangkon: nga sila nagsulat dili sa ilang kaugalingong mga hunahuna kondili sa iya sa Diyos.”

Ang pipila nangutana kon kinsa sa mga magsusulat sa Bibliya ang gipaila uban niadtong may nagkadaiyang mga propesyon o mga kalihokan. Niining bahina, palihog tagda ang buluhaton:

Mga hari: Ubay-ubayng mga magsusulat sa Bibliya maoy mga hari. Si David ug si Solomon mao dayon ang motungha sa hunahuna. (Salmo 3, superskripsiyon; Proverbio 1:1; Ecclesiastes 1:1) Apan, ang awit diha sa Isaias 38:10-20 gisulat ni Ezekias. (Bersikulo 9) Daghang eskolar nagtuo nga siya usab ang misulat sa Salmo 119, tingali sa wala pa mahimong hari. Ug si Ezekias may bahin sa pagkompilar sa mga Proverbio mga kapitulo 25–​29. (Proverbio 25:1) Ang kataposang kapitulo sa Proverbio giandam ni “Lemuel nga hari.” Giila siya sa uban nga si Haring Ezekias, apan ang uban nagtuo nga si Lemuel mao si Haring Solomon.​—Proverbio 31:1.

Mga magbalantay sa karnero: Si David ug si propetang Amos nagtrabaho ingong mga magbalantay. (1 Samuel 16:11-13; 17:15; 28; 34; Amos 1:1) Si Amos misulat sa basahon sa Bibliya nga nagdala sa iyang ngalan, ug si David misulat ug daghang mga salmo. Ang iladong Salmo 23 dayag nagpabanaag sa kahibalo ni David sa pagkamagbalantay.

Mga mananagat: Tali sa mga apostol ni Jesus nga mananagat, si Juan ug si Pedro sa ulahi gidasig sa pagsulat ug mga basahon sa Bibliya. (Mateo 4:18-22) Ilalom sa pagdasig sa Diyos si Juan misulat ug asoy sa Ebanghelyo ug sa tulo ka sulat ug sa basahong Pinadayag. Si Pedro misulat ug duha ka dinasig nga mga sulat.

Mga alagad sibil: Si Daniel ug si Nehemias maoy mga alagad sibil sa langyaw nga mga kagamhanan nga adunay awtoridad ibabaw sa katawhan sa Diyos. (Nehemias 1:1, 11; 2:1, 2; Daniel 1:19; 2:49; 6:1-3) Duha ka ngalan sa basahon sa Bibliya nagdala sa mga ngalan niining mga tawhana.

Mga saserdote: Duha sa mga propeta sa Diyos nga misulat sa mga basahon sa Bibliya maoy mga saserdote. Sila mao si Jeremias ug Ezekiel. (Jeremias 1:1; Ezekiel 1:1-3) Dugang pa, si Esdras maoy usa ka saserdote sa banay ni Aaron nga “hanas nga tigkopya sa kasugoan ni Moises.” Iyang “giandam ang iyang kasingkasing sa pagsusi sa kasugoan ni Jehova ug sa pagtuman niini ug sa pagtudlo sa Israel sa kabalaoran ug sa hustisya.”​—Esdras 7:1-6, 10, 11.

Heneral: Ang papel nga gidula ni Josue sa pagpanguna sa kasundalohan samtang ang Israelinhon mibaktas ngadto sa Yutang Saad ug nakiggubat batok sa daghang kaaway nga nagpakuwalipikar kaniya nga matawag nga usa ka heneral. (Josue 1:1-3; 11:5, 6) Siya nakapribilehiyo sa pagsulat sa basahon ni Josue. Dayon, ang ubang mga magbabasa sa Bibliya molantaw usab kang David ingong usa ka tawo nga milihok ingong usa ka heneral sa wala pa siya mahimong hari.​—1 Samuel 19:8; 23:1-5.

Mananambal: Sa kataposan, ang Colosas 4:14 naghisgot kang “Lucas ang hinigugmang mananambal.” Si Lucas misulat sa Ebanghelyo nga nagdala sa iyang ngalan, ug dayag sa mga Buhat sa mga Apostol usab.

[Footnote]