Magmalipayon Ka ba sa Daghang Buluhaton?
ANG kadaghanan kanato dunay puliki, kasagaran okupadong mga kinabuhi. Ang walay-hunong nga pagpig-ot sa modernong-adlaw nga pagkinabuhi nagkinahanglan ug walay undang nga paningkamot aron makaapas sa kinahanglanon sa kinabuhi. Kinahanglang kab-oton sa mga bana ug mga amahan ang dinaliang mga kaakohan sa ilang mga pamilya, sa amo ug uban pa. Kinahanglang atimanon sa mga asawa ug mga inahan ang mga panginahanglan sa ilang panimalay ug mapugos sa pagpanarbaho. Ang mga batan-on usab naglisod sa pag-abot sa pipila ka obligasyon samtang nagtungha aron maandam sila alang sa mabungahong papel diha sa katilingban.
Apan komosta na man kita nga nagpahinungod na sa atong mga kinabuhi kang Jehova nga Diyos ug iyang bawtismadong mga Saksi? Dugang pa sa mga gikinahanglan gikan kanato, kita gitambagan ni apostol Pablo niini: “Hinigugma kong mga igsoon, kinahanglang magpakalig-on kamo, dili matarog, sa kanunay magmadagayaon sa buluhaton sa Ginoo, sa nasayran ninyo nga diha sa Ginoo ang inyong pagpangabudlay dili makawang.” (1 Corinto 15:58) Oo, daghang dugang mga responsabilidad maoy bahin sa kinahanglanon sa tinuod nga pagsimba. Unsaon man nato pagtuman kining tanang mga obligasyon ug makabatog kalinaw sa hunahuna ug malipayong panglantaw.
Ang mga Kalamposan Mohatag Kalipay
Ang kalipay—usa ka maayong pagbati o pagkatagbaw—suod nga nalangkit sa kalamposan sa pagdumala sa mga responsabilidad sa kinabuhi. Kon atong mahimo ang adlaw-adlawng mga obligasyon sa rasonable episyenteng paagi, nagatapos sa mga butang nga untop sa panahon ug sa mahapsayng paagi, kita makabaton ug pagbati sa kalamposan ug katagbawan. Angay nga ingon gayod niana, ug ang resulta makaamot sa atong kalipay.
Dili katuyoan sa Diyos nga Jehova nga ang atong pagdumala sa atong mga responsabilidad maoy usa ka mapiogong lulan. Hinunoa, mao gayoy iyang tinguha nga kita, ‘maglipay ug makabaton sa kaayohan sa tanan natong paghago.’ (Ecclesiastes 3:12, 13) Kon malipayon kita sa atong trabaho, sagad kitang mabungahon. Andam kitang modawat ug mga instruksiyon ug makig-ubang malinawon sa uban. Sa laing bahin, kon dili kita malipayon, ang atong trabaho daw mabudlay—butang nga balikbalik, makalaay, pabug-at pa sa pagbati. Motultol kini sa dili mabungahong mga batasan sa trabaho ug negatibong panghunahuna. Ang kinabuhi mahimong adlaw-adlaw nga pakigbisog samtang naningkamot kita sa pagkab-ot sa tanang gipangayo gikan kanato. Apan kon kita makakitag paagi nga magpabiling malipayon sa atong gimbuhaton, malagmit makasinati kitag magantihon ug makatagbaw nga paagi sa kinabuhi.
Magmatimbang
Aron kita magmalipayon bisag daghan kitag buluhaton, angay kitang magmatimbang. Ug unsa man kining pagkatimbang? Kini maoy “mental ug emosyonal nga kalig-on.” Ang timbang nga tawo maninguha nga mahimong hapsay sa iyang mga buluhaton. Nagaplano na siyang daan, dili langaylangayan, ug kasarangan sa iyang mga batasan. Nagapasundayag siya ug pagpugong sa kaugalingon sa pagkaon, pag-inom, lulinghayaw, mga obra nga gikaikagan, ug kalingawan. Sa aktuwal, nagapasundayag siya ug “pagpugong sa kaugalingon sa tanang butang”!—1 Corinto 9:24-27; itandi ang Tito 2:2.
Ang pag-ampo dunay hinungdanong papel sa paghupot sa Kristohanong pagkatimbang. Ang usa ka alagad ni Jehova makaampo alang sa balaang espiritu sa Diyos ug alang sa tabang sa iyang langitnong Amahan aron maugmad ang mga bunga niini, apil ang pagpugong sa kaugalingon. (Lucas 11:13; Galacia 5:22, 23) Ilabinang angay nga ang usa ka Kristohanon magpakitabang sa Diyos diha sa pag-ampo kon mag-atubang ug mga pagsulay nga makapameligro sa iyang panimbang. “Itugyan mo kang Jehova ang imong dalan, ug salig kaniya, ug siya ang molihok,” miingon ang salmistang David. (Salmo 37:5) Usahay kinahanglan natong moampo sama kang David dihang nangamuyo siya: “O Diyos, pagdali paglihok alang kanako. Ikaw ang akong tabang ug ang Magtatagana ug kaikyasan alang kanako. O Jehova, ayaw kaayo paglangan.” (Salmo 70:5) Ayaw kalimot nga pinaagi sa pag-ampo posible ang paghubot sa panimbang ug matagamtam ang ‘kalinaw sa Diyos nga lapaw sa tanang hunahuna ug nagabantay sa atong mga kasingkasing ug mga panghunahuna.’—Filipos 4:6, 7.
Sanglit nagasalig kang Jehova ug nagatagamtam sa kalinaw sa Diyos, ang timbang nga Kristohanon maayo ug panghunahuna. (Tito 2:11, 12) Kini maoy tungod sa pagbaton ug maayong pagsabot sa mga prinsipyo sa Bibliya ug sa pagpadapat kanila sa iyang kinabuhi. Ang maong tawo dili maot, ni madalidalion sa iyang mga paghukom. Ang pagkamakataronganon magpugong kaniya sa pagkahimong sirado-ug-hunahuna o gahig-ulo. Siya adunay makasaranganong paglantaw sa iyang kaugalingon ug sa iyang mga katakos, ug mopahimo kini kaniya sa pakigkooperar sa uban. (Miqueas 6:8) Makaiikag, ang mga hiyas nga motabang sa usa ka tawo sa pagkahimong timbang maoy pipila usab sa mga hiyas nga gikinahanglan sa mga gitinudlo sa pag-alagad ingong mga magtatan-aw sa Kristohanong kongregasyon.—1 Timoteo 3:2, 3.
Madugangan ug dako ang atong kalipay kon maninguha kita nga mahimong mas timbang sa atong inadlawng mga kalihokan. Pinaagi sa pagpasundayag sa mga hiyas nga nalangkit ang maayong panimbang, atong mahimo ang mga butang nga walay hilabihang pisikal ug emosyonal nga kapit-os. Ang atong estilo sa kinabuhi mopabanaag ug dugang kalig-on, ug mas daghan ang atong malampos. Mas malipay ang uban sa ilang pakig-uban kanato, ug atong masinati ang dugang pagkatagbaw ug kangaya. Apan unsa ang pipila ka praktikal nga paagi aron magpabiling timbang?
Praktikal nga mga Paagi Aron Magpabiling Timbang
Aron magpabiling timbang, angay nga maninguha kita nga magmauntop sa panahon ug organisado sa pagdumala sa atong personal nga mga kalihokan. Kinahanglan kitang magplanong daan, dumalahon ang mga butang sa hapsay, sistematikong paagi. Kadtong dili-organisado ug dunay kiling sa paglangaylangay nagapalisod sa ilang mga kinabuhi tungod sa dugang tensiyon ug kabalaka. Ang kalamposan niining bahina sa kinabuhi motabang kanato nga mobati nga kita maoy nagakontrolar sa kinabuhi inay bation nga kita maoy walay-mahimo nga mga biktima sa mga sirkumstansiya.
Angay nga dili kita mosulay pagbuhat sa tanang butang nga kitakita lang. Kadtong dili andam modawat ug tabang gikan sa uban sagad magbayad ug dakong kantidad sa pagkaluya ug kahigawad. Adunay nagkalainlaing mga buluhaton nga mahimo sa uban. Busa, maalamong pahimuslan ang mga katakos sa mga tawong andam motabang. Gawas nga makapagaan kini sa atong lulan, makapadasig usab kini kanilang gustong makigsuod kanato.
Dili maalamong itandi nato ang atong kaugalingon sa uban nga tingalig mas daghan ug mahimo kay kanato. Ang pagpaningkamot nga mahisama niadtong atong gilantaw nga mas daghan ang mahimo kay kanato makawala sa kadasig, mopabati kanatong ubos ug walay bili. Ang maong panghunahuna malaglagon, makadaot sa atong determinasyon ug pagsalig sa kaugalingon. “Ipamatuod sa matag usa kon unsa ang iyang binuhatan,” misulat si Pablo, “ug unya duna siyay hinungdan sa pagmaya labot sa iyang kaugalingon lamang, ug dili sa pagtandi sa laing tawo.” (Galacia 6:4) Timan-i nga ang labing gipabilhan nga trabahante mao kadtong nagasunod sa mga instruksiyon, dili-mapaling-paling ug kasaligan, ug nagahimog de-kalidad nga trabaho. Kon kita ingon niana, ang atong trabaho pabilhan ug pangitaon.—Proverbio 22:29.
Angay natong ampingan ang atong panglawas. Usa kini sa atong labing bililhong kabtangan, kay kon wala kini lagmit gamay lang kaayo ang atong mahimo. Busa, maningkamot kita nga makabatog makapahimsog nga kalan-on pinaagi sa pagkaong sustansiyado. Angay kitang mopahulay sumala sa atong gikinahanglan, nga matulog sa rasonableng oras sa gabii. Kon lapoy kita kaayo o mobating daw kahilanaton, kinahanglang dili nato pugson ang atong kaugalingon; basin ug bayran kini nato ug dako.
Hinungdanon usab mga magbantay batok sa pag-ugmad ug bagulbolang espiritu. Kon atong pasagdan ang negatibong hunahuna, mahimo kitang hinawayon halos sa tanang butang ug sa tawo. Kini maoy seguradong paagi aron mawad-an kita ug ang uban sa kalipay. Inay manglibak o moreklamo nianang atong gibati nga sayop, angay atong pahibaloon kadtong dunay katungod sa maong butang ug ipiyal kini kanila sa pagtul-id sa mga butang. (Itandi ang 1 Corinto 1:10-12.) Maalamon kita sa paghupot ug positibong panglantaw, kanunayng mangita ug nagalaom nga makakitag maayo sa uban ug sa mga hitabo nga nagahulma sa atong mga kinabuhi.—Itandi ang Judas 3, 4, 16.
Sa magplano sa atong mga kalihokan, atong hinumdoman nga ang pinaspasay nga pagbuhat tingali daghag malampos, apan lisod ang pagpabiling ingon sa taas nga panahon. Ang padayong tumang paghago dili lamang makalapoy apan makahatag usab ug pagkawala sa paglaom nga makadaot sa atong determinasyon nga mopadayon. Busa, pilion nato ang gikusgon nga atong mapadayon sa taas nga panahon. Pananglitan, maayo nga maghimog praktikal nga iskedyol alang sa regular nga pakigbahin sa balay-ug-balay nga buluhatong pagsangyaw ug sa ubang bahin sa Kristohanong pag-alagad. Mogahin kitag panahon sa pagrelaks ug sa makadasig nga lulinghayaw. Atong makaplagang makatabang ang pagpakig-estorya sa mga edaran nga adunay daghang tuig nga kasinatian, kay tingali sila nakakat-on kon unsaon paghimo sa hinungdanong mga butang nga dili tumang malapoy sa pisikal o emosyonal.
Gamita ang Maayong Paghukom
Husto nga mobati nga kita may obligasyon ug tinguha sa pagbuhat sa tanang responsabilidad nga gihatag kanato, apil nianang sulod sa kongregasyon sa katawhan ni Jehova. Ang Diyos malipay sa kugihan, kasaligang mga trabahante. (Itandi ang Mateo 25:21; Tito 2:11-14.) Apan ang Kasulatan nag-awhag: “Ampingi ang praktikal nga kaalam ug ang katakos sa paghunahuna.” (Proverbio 3:21) Ang pagpadapat sa kaalam sa Bibliya makaayo kanato, ug angay natong gamiton ang igong kabuot ug maayong paghukom, maampingong nagahimog mga plano ug kanunayng molihok segun sa atong kusog.
Ang tambag nga magmadagayaon sa buluhaton sa Ginoo kinahanglang timbangan sa pahimangno nga gisugyot sa Ecclesiastes 9:4. Diha atong mabasa: “Ang buhi nga iro labi pang maayo kay sa patay nga leyon.” Oo, ang buhi nga iro, bisag gitamay sa uban, mas maayo pa sa patayng leyon, usa ka mananap nga giisip sa kadaghanan nga harianon. Kon magmatimbang kita ug atimanon ug maayo ang atong panglawas, mabuhi kita ug makapadayon sa pagbuhat sa mga butang. Ang mga patay wala nay bahin pa sa mga kalihokan. Ang maayong paghukom motabang kanato sa pagkaplag ug rasonableng pagkatimbang nga motugot kanato sa pagbuhat sa hinungdanong mga butang nga dili mawad-an sa atong kalipay.
Busa, ang pagkadaghag buluhaton wala magkahulogan nga dili kita mahimong malipayon. Ang labing okupadong mga tawo mahimong labing malipayon kon rasonable sila, dunay maayong panglantaw, ug mogamit ug maayong paghukom aron makapabiling maayong pagkatimbang. Atong masinati ang kinadak-ang kalipay nga posible kon magpasundayag kita ug kaalam, mohimog maayong mga buhat, ug isalig ang atong paglaom diha kang Jehova nga Diyos.—1 Timoteo 6:17-19.