Ang Bibliya—Tinuod ba nga Kini Balaan?
PILA ang mga tawo karong adlawa magaisip sa Bibliya nga balaan, ang Pulong sa Diyos? Niining panahona sa pagkamaduhaduhaon, giisip kini sa daghan nga karaan na ug dili na angay, nga nagduhaduha nga kini tinuod nga balaan. Bisan ang pipila sa relihiyosong mga pangulo sa Kakristiyanohan nagatudlo nga ang Bibliya natuhop sa sugilambong ug kasugiran. Giduhaduhaan nila ‘kon kaha ang biblikanhong paghubad sa kasaysayan mauyonan sa usa ka tawong intelihente.’—The Interpreter’s Dictionary of the Bible, Tomo 2, panid 611.
Ginapugas sa iladong mga eskolar ang mga binhi sa pagduhaduha mahitungod sa pagkaangay tawgon sa Bibliya nga Pulong sa Diyos. Usa miingon nga “kon may buot mogamit sa Pulong-sa-Diyos nga matang sa pinulongan, ang hustong termino alang sa Bibliya maoy Pulong sa Israel, Pulong sa pila ka iladong unang Kristohanon.” (The Bible in the Modern World, ni James Barr) Unsay imong hunahuna? Pulong ba sa Diyos ang Bibliya? Tinuod ba nga kini balaan?
Kinsay Nagsulat sa Bibliya?
Ang pagsulat sa Genesis, ang unang basahon sa Bibliya, sa naandan gipasidungog kang Moises, usa ka Hebreohanon nga nagkinabuhi mga 3,500 ka tuig kanhi. Sumala sa Bibliya mismo, mga 40 ka tawo gikan sa lainlaing mga kahimtang sa kinabuhi nakaambit sa pagsulat sa nahibiling bahin sa Kasulatan, nga misangpot sa katigoman sa 66 ka basahon, o mga bahin sa Bibliya. Bisan pa niana, kadtong mga tawhana wala mag-isip nga sila mao ang tinuod nga mga awtor sa Bibliya. Usa ka magsusulat miingon: “Ang tibuok nga Kasulatan gidasig sa Diyos.” (2 Timoteo 3:16) Ang lain misulat mahitungod sa mga magsusulat sa Bibliya: “Ang mga tawo nagsulti gikan sa Diyos samtang sila giagak sa balaang espiritu.”—2 Pedro 1:21.
Kini nagabutang sa mga magsusulat sa kategoriya sa mga eskribiyente, o mga sekretaryo, nga kontrolado, o giniyahan, sa Diyos. Sumala sa Bibliya, ang magsusulat kasagarang gitugotan sa pagpili sa iyang kaugalingong mga pulong sa pagpahayag sa gitagana sa Diyos nga impormasyon. (Habakkuk 2:2) Kana ang hinungdang adunay daghang estilo sa pagsulat sa tibuok Bibliya. Apan ang pagsulat gigiyahan kanunay sa Diyos.
Tinuod, ang mga pangangkon sa maong mga magsusulat sa balaang pagdasig dili sa kaugalingon pamatuod nga ang Bibliya mao ang balaang mensahe sa Maglalalang alang sa katawhan. Bisan pa niana, kon kaha ang Hataas Uyamot mao ang Awtor sa Bibliya o dili angay makita sa tin-aw human sa mainampingon ug dili-madapigong pagsusi sa basahon mismo. Ang Bibliya nagahatag bag ebidensiya nga ang Diyos mao ang awtor niini? Sa pagkamatuod, ikasulti ba natong masaligon nga ang Bibliya maoy balaan?