Ang Dagayang Pagkamaayo ni Jehova

“Pagkadagaya sa imong pagkamaayo, nga gitagana mo sa mga magakahadlok kanimo!”—SALMO 31:19.

1, 2. (a) Unsang dakong buluhaton ang gihimo ni Jehova sa usa ka higayon sa panahong dugay na kaayo? (b) Sa unsang paagi gibatbat ni Jehova ang gisangpotan sa iyang mga kalihokan sa paglalang?

DIHAY panahon nga gisugdan sa Diyos ang paglalang sa ‘langit nga mao ang iyang trono ug ang yuta nga mao ang tumbanan sa iyang tiil.’ (Isaias 66:1) Ang balaang rekord wala magtug-an kon kanus-a kini nahitabo. Kini yanong nag-ingon: “Sa sinugdan gibuhat sa Diyos ang mga langit ug ang yuta.” (Genesis 1:1) Sa panahon sa paglalang, ang dili-maisip nga milyon-milyong mga galaksiya giporma, nga adunay milyon-milyong mga bitoon. Sa gawas nga kilid sa usa sa maong galaksiya mao ang hayag nga bitoon nga gibiyohan sa ubay-ubayng gagmay, mangiob nga mga planeta. Ang usa kanila sa ulahi gitawag nga yuta. Kon itandi sa dako, masidlak nga mga bitoon, ang yuta wala ra sa kumingking. Bisan pa, mao kini ang gilaraw ni Jehova nga iyang himoong tumbanan.

² Busa si Jehova mibali sa iyang mamugnaong mga katakos diha sa planetang Yuta. “Ang panganay sa tibuok kabuhatan” diha sa iyang tapad ingong Agalong Magbubuhat samtang kining gamay, mangiob nga masa gibag-o sa paglabay sa unom ka hataas nga “mga adlaw” sa paglalang. Kini nahimo, sa malarawanon, usa ka takos nga pahulayan sa tiil sa Diyos. (Colosas 1:15; Exodo 20:11; Proverbio 8:30) Dinhi nga gimbut-an sa Diyos nga magbutang ug usa ka bag-ong porma sa intelehenting kinabuhi: ang mga tawo. Ang unang tawhanong paris, gilalang gikan sa upat ka elemento nga makita sa yuta, gibutang diha sa matahom, paraiso nga palibot. (Genesis 1:26, 27; 2:7, 8) Tuman ka hingpit, tuman ka tahom, mao ang kataposang resulta niining tagsaong buhat sa paglalang nga gibutyag sa Bibliya ang pagbati sa Diyos sa buntag​—sa kataposang bahin—​sa ikaunom ka adlaw sa paglalang: “Nakita sa Diyos ang tanang butang nga iyang gihimo ug, tan-awa, kini maayo kaayo.”​—Genesis 1:31.

Ang Pagkamaayo sa Diyos

3. Unsang nangibabawng hiyas sa Diyos ang gipadayag sa kalalangan?

³ Sa milabay ang libolibo ka tuig, ang kaliwat sa unang tawhanong paris nagpanan-aw ug balik sa panahon sa paglalang ug misulat: “Ang dili-makita nga hiyas [sa Diyos] dayag nga makita sukad pa sa pagkatukod sa kalibotan, tungod kay sila naila pinaagi sa mga butang nga iyang nabuhat, bisan ang iyang walay kataposang gahom ug pagka-Diyos.” (Roma 1:20) Oo, ang labaw nga kahalangdon sa yuta ug ang mga linalang diha niana sa pagkatinuod maoy usa ka banaag sa dili-makitang mga hiyas sa Diyos​—nga ang usa niini mao ang dagayang pagkamaayo sa Diyos. Nan, pagkatukma nga gipahayag sa Diyos nga ang tanan niyang gibuhat maayo!​—Salmo 31:19.

4, 5. Unsa ang pagkamaayo?

⁴ Ang pagkamaayo mao ang ikaunom nga bahin sa bunga sa espiritu sa Diyos nga gihubit sa apostol diha sa Galacia 5:22. Ang miaging mga pagtuon sa magasing Bantayanang Torre naghisgot sa unang lima sa mga bunga sa espiritu, gipakita ang kahinungdanon niini sa pagpalambo sa hamtong nga Kristohanong personalidad.a Nan, pagkahinungdanon nga dili nato kalimtan ang pagkamaayo! Sa tukma, atong ipunting karon ang atong pagtagad niining hiyasa.

⁵ Unsa ang pagkamaayo? Kini mao ang kalidad o kahimtang sa pagkahimong maayo. Kini maoy labing maayong kinaiya ug labing maayong gawi. Busa, kini maoy usa ka positibong hiyas nga makita sa paghimog maayo ug mapuslanong mga buhat ngadto sa uban. Sa unsang paagi atong mapasundayag kining madanihong hiyas? Sa lintunganay, pinaagi sa pasundog kang Jehova. Busa, sa dili pa dugang hisgotan kon unsaon nato ingong indibiduwal nga mga Kristohanon magpakitag pagkamaayo, atong susihon ang pagkamaayo nga gipakita sa atong mahigugmaong Diyos, si Jehova, sa iyang pagtagana, ug sa pakiglabot sa, tawhanong panimalay.

Pagkamaayo Gipakita Diha sa Kalalangan

6. Unsay nakaagda kang Jehova sa paglalang ug ubang intelehenting mga porma sa kinabuhi?

⁶ Unsay nakadasig sa atong langitnong Amahan sa sinugdan sa pagpaambit sa iyang kalipay sa kinabuhi uban sa iyang intelehenti buhing mga linalang? Gitubag ni apostol Juan kanang pangutanaha sa dihang siya miingon: “Ang Diyos gugma.” (1 Juan 4:8) Oo, ang dili-hakog nga gugma maoy nagpalihok sa dakong Tuboran sa kinabuhi sa paglalang sa ubang mga porma sa kinabuhi, gihatagan ang pipila ug usa ka puy-anan sa langit ug ang uban ug usa ka puy-anan sa yuta. Siyempre, kita wala kaayoy kasayoran kon unsay hitsura sa langit o sa langitnong mga linalang. Sila maoy mga espiritu​—dili-makita sa mga mata sa tawo​—ug ang ilang pinuy-anan maoy sa gingharian sa espiritu. Apan tan-awa ang yutan-ong pinuy-anan sa imong palibot nga gihatag ni Jehova alang sa iyang tawhanong mga anak. Ug palandonga ang mga tawo mismo. Nan imong makita sa imong kaugalingong gamhanang mga mata ang pamatuod sa pagkamaayo sa Diyos.

7-9. Sa unsang paagi ang pagkamaayo sa Diyos nakita sa paagi sa iyang paglalang sa yuta ug sa tawo nga anaa niana?

⁷ Gihatagan ni Jehova ang atong unang mga ginikanan ug kinabuhi. Labaw pa niana, gihimo niya nga ang kinabuhi maanindot kaayo, makalingaw. Sa pagsugod, iyang gilalang ang ilang pinuy-anan, ang yuta, nga nagabiyo, may temperatura, ug usa ka atmospera nga igo ra. Iyang gipalihok ang mga siklo sa tubig, nitrohena, ug oksihena nga hingpit nga nagaobra alang sa kaayohan ug kaharuhay sa mga tawo. Iyang gitabonan samag alpombra ang ibabaw sa yuta ug libolibo ka matang sa mga tanom, ang uban alang sa pagkaon sa tawo ug ang pipila nga ilabinang makalipay sa mata. Iyang gipuno ang kalangitan ug mga langgam nga naghatag dakong kalipay uban sa ilang mga kolor ug sa ilang mga awit. Iyang gipuno ang kadagatan ug duot sa mga isda ug ang yuta sa daghang matang sa mga mananap, ang uban ihalas ug ang pipila mamanso. Pagkakahibulongan nga pagkamahinatagon! Ug pagkadakong pamatuod sa pagkamaayo sa kasingkasing sa Diyos!​—Salmo 104:24.

⁸ Karon, tan-awa, ang paagi sa paghimo sa Diyos sa tawo. Ang iyang mga bukton, mga tiil, ug mga kamot mao gayoy gikinahanglan aron makahimo kaniya sa paghupot sa iyang panimbang ug sa paglihok nga haruhay. Busa, gikan sa mga materyal nga abundang makita sa yuta diha sa iyang palibot, siya makabaton ug pagkaon ug ubang mga kinahanglanon alang sa iyang kaugalingon. Si Jehova mihatag ug igtitilaw aron ang pagkaon ug pag-inom dili mahimong mekanikal nga mga lihok nga himoon aron makabatog kusog​—samag nagakonektar ug usa ka gamit diha sa pansakanan sa koryente karong adlawa. Dili, ang pagkaon ug pag-inom gidesinyo aron mohatag katagbaw, sanglit dili lamang gipatagbaw niini ang tiyan kondili nagapagana usab sa igtitilaw. Gihatagan ni Jehova ang tawo ug mga dalunggan ug gilibotan usab siya ug daghan kaayong mga matang sa tingog nga makalingaw sa maong dalunggan. Pagkamakalingaw ang pagpamati sa makahuhupayng pagdaganas sa nagadagayday nga sapa, sa pag-agumod sa salampati o sa pagkagiki sa usa ka gamayng bata! Oo, salamat sa pagkamaayo sa Diyos, bisan pa sa tanang daotang mga butang nga nahitabo sukad sa paglalang, makalilipay gihapong mabuhi.

⁹ Palandonga, usab, ang atong ubang mga igbalati. Pagkadaghang klase sa matahom nga mga kolor ang makapahimuot sa atong mga mata! Ug pagkamakapatagbaw ang pagsimhot sa mahumot nga alimyon sa usa ka bulak! Dili katingad-anan nga mipatugbaw ang salmista kang Jehova: “Dayegon ko ikaw tungod kay makalilisang ug kahibulongan uyamot ang pagkabuhat kanako”!​—Salmo 139:14.

Ang Pagkahulog sa Tawo ug Kaluwasan

10. Unsay pagsanong sa kadaghanang tawo sa kaayo sa Diyos, bisan pa sa unsang paagi sila padayong nagapahimulos niana?

¹⁰ Makapasubo, sa naglakat ang panahon ang atong unang ginikanan nagpakitag kakulang ug apresasyon sa tanang pagkamaayo nga gipakita diha kanila. Ilang gipadayag kini sa dihang ilang gilapas ang sugo ni Jehova ug nakasala batok sa bugtong pagdili nga iyang gihatag. Ingong sangpotanan, sila ug ang ilang mga anak midangat sa pagkaagom sa kagul-anan, pag-antos, ug kamatayon. (Genesis 2:16, 17; 3:16-19; Roma 5:12) Sa milabay ang libolibo ka tuig sukad sa maong buhat sa paglapas, ang kadaghanan sa katawhan nagpakitag pagkawalay-pagtagad o kakulag apresasyon sa pagkamaayo sa Diyos. Apan, bisan pa niining tanan, ang ingrato ug walay apresasyong mga tawo nakapahimulos gihapon sa pagkamaayo sa Diyos. Sa unsang paagi? Si apostol Pablo misaysay sa mga molupyo sa Listra sa Tungang Silangan: “Ang [Diyos] wala magtugot nga walay magpamatuod kaniya nga siya nagbuhat ug maayo, naghatag kaninyo ug ulan gikan sa langit ug kapanahonan nga makapabunga, ang inyong kasingkasing nabuhong sa pagkaon ug sa kalipay.”​—Buhat 14:17.

11. Sa unsang paagi dugang pang gipakita ang pagkamaayo sa Diyos kay sa pagtagana lamag matahom nga pinuy-anan alang sa katawhan?

¹¹ Apan ang pagkamaayo sa Diyos dili kutob ra sa pagpadayon sa paghatag matahom, makahatag-kinabuhing mga tagana nga niana buhong ang yuta. Dili, siya mihimo pa ug dugang. Si Jehova nagpakita sa iyang kaugalingon nga andam sa pagpasaylo sa mga sala sa mga anak ni Adan ug sa pagpadayon sa pagpalambo sa mga relasyon sa mga matinumanon taliwala sa katawhan. Kining bahina sa pagkamaayo sa Diyos gipasiugda ngadto kang Moises sa dihang misaad si Jehova nga ang ‘tanan niyang kaayo ipaagi sa nawong [ni Moises.]’ Unya si Moises nakadungog sa deklarasyon: “Si Jehova, si Jehova, usa ka Diyos nga maluloy-on ug mapuanguron, mahinay sa kasuko ug dako sa mahigugmaong kalulot ug kamatuoran, nagatipig sa mahigugmaong-kalulot alang sa linibo, nagapasaylo sa pagkadaotan ug kalapasan ug sala.”​—Exodo 33:19; 34:6, 7.

12. Unsang mga tagana sa Moisesnong Kasugoan nga nagpakita sa pagkamaayo ni Jehova?

¹² Sa mga adlaw ni Moises, si Jehova nagtukod ug usa ka legal nga sistema alang sa bag-ong nasod sa Israel diin ang dili-tinuyo nga mga makasasala makabaton ug temporaryo, o simboliko, nga kapasayloan sa sala. Pinaagi sa Kasugoan sa pakigtugon nga gipataliwad-an ni Moises, ang mga Israelinhon nahimong linain nga nasod sa Diyos ug gitudloan sa paghalad kang Jehova ug nagkalainlaing mga halad nga mananap nga motabon sa ilang mga sala ug daotang mga buhat. Busa, bisan sa ilang dili-hingpit nga mga kinaiya, ang mahinulsolong mga Israelinhon makapadayon sa pagduol kang Jehova nga madinawaton ug nahibalo nga ang ilang pagsimba nakapahimuot kaniya. Si Haring David, nga sakop sa maong nasod nga ilalom sa Kasugoan, mipatugbaw sa iyang kaamgohan sa pagkamaayo sa Diyos niining bahina: “Ayaw paghinumdomi ang mga sala sa akong pagkabatan-on ug ang akong mga kalapasan. Sumala sa imong mahigug-maong kalulot hinumdomi ako, tungod sa imong kaayo, Oh Jehova.”​—Salmo 25:7.

13. Sa unsang paagi nagtagana si Jehova ug labi pang epektibong paagi kay sa halad nga mga mananap aron mapasaylo ang mga sala?

¹³ Sa naglakat ang panahon ang pagkamaayo ni Jehova nagpalihok kaniya sa pagtagana ug labi pang epektibo ug permanenteng paagi sa pagpasaylo sa mga sala. Kini maoy pinaagi sa halad ni Jesus, nga maoy usa ka kaliwat ni Haring David. (Mateo 1:6-16; Lucas 3:23-31) Si Jesus walay sala. Busa, sa dihang siya namatay, ang iyang kinabuhi nga gihatag sa paghalad adunay dakong bili, ug gidawat sa Diyos kini ingong lukat nga mapadapat diha sa tanang makasasalang mga kaliwat ni Adan. Si apostol Pablo misulat: “Ang tanan nakasala ug nakabsan sa himaya sa Diyos, ug ingon nga usa ka gasa nga sila gipahayag nga matarong pinaagi sa iyang dili-takos nga kalulot pinaagi sa lukat nga gibayad ni Kristo Jesus. Gitanyag siya sa Diyos ingon nga halad pasig-uli pinaagi sa pagtuo diha sa iyang dugo.”​—Roma 3:23-26.

14. Unsang katingalahang mga paglaom ang gipaposible alang sa mga tawo pinaagi sa halad lukat?

¹⁴ Ang pagtuo sa halad lukat ni Jesus dakog nahimo alang sa mga Kristohanon, mas dako pag nahimo kay sa mga halad nga mananap ilalom sa Kasugoan sa pakigtugon alang sa mga Israelinhon. Kini maoy misangpot sa limitadong gidaghanon sa mga Kristohanon nga mapahayag nga matarong ug gisagop sa espiritu sa Diyos nga mahimong iyang mga anak. Busa sila nahimong mga igsoon ni Jesus ug nakabatog paglaom nga banhawon ingong espiritung mga linalang nga makig-ambit uban kaniya sa iyang langitnong Gingharian. (Lucas 22:29, 30; Roma 8:14-17) Handurawa lang nga gibuksan sa Diyos ang maong langitnong mga palaabuton diha sa mga linalang nga nagpuyo niining gamayng planeta, ang yuta! Usa ka gamayng pundok nga nagakalipay niining paglaoma buhi pa. Apan alang sa ubang minilyong mga Kristohanon, ang pagtuo sa lukat maoy nagbukas sa dalan aron matagamtam ang giwala ni Adan ug Eva​—kinabuhing walay kataposan diha sa usa ka paraiso, samag-hardin nga yuta. Ang Kasugoan sa pakigtugon lamang dili makahatag ug langitnon o yutan-ong mga palaabuton alang sa mga sumusunod niini.

15. Unsay naapil sa maayong balita?

¹⁵ Pagkatukma nga ang mensahe mahitungod sa bag-ong mga kahikayan nga gipalakaw sa Diyos pinaagi kang Kristo Jesus gitawag nga “maayong balita,” kay gipabanaag man niini ang pagkamaayo sa Diyos. (2 Timoteo 1:9, 10) Diha sa Bibliya, ang maayong balita gitawag usahay nga ang “maayong balita sa gingharian.” Karong adlawa kini nagapunting sa kamatuoran nga ang Gingharian natukod na ubos sa pagmando sa nabanhawng Jesus. (Mateo 24:14; Pinadayag 11:15; 14:6, 7) Bisan pa, dugang pa ang nalangkit sa maayong balita. Sumala sa gipahayag sa mga pulong ni Pablo kang Timoteo nga mao pay pagkutlo, kini nag-apil sa kahibalo nga si Jesus mitanyag ug usa ka halad lukat alang kanato. Kon walay halad, ang atong relasyon sa Diyos, ang atong mismong kaluwasan​—bisan dili na hisgotan pa ang Gingharian ni Jesus ug ang 144,000 ka saserdote ug mga hari nga gikuha gikan sa yuta​—dili unta posible. Unsa ka katingalahang kapasundayagan sa pagkamaayo sa Diyos ang lukat!

Ang Pagkamaayo sa Diyos Karong Adlawa

16, 17. Sa unsang paagi ang Oseas 3:5 natuman (a) sa 537 W.K.P.? (b) sa 1919 K.P.?

¹⁶ Nagpaabot sa “kataposang mga adlaw,” si apostol Pablo mipasidaan: “Ang mga tawo unya . . . walay gugma sa pagkamaayo.” (2 Timoteo 3:1-3) Bisan ang kinaiyanhong pagpakitag pagkamaayo, sama sa pagkamahinatagon ug pagkamaayong silingan, dili pabilhan. Unsa ka makapadasig sa kasingkasing ang tagna sa Oseas 3:5: “Ang mga anak sa Israel mamalik ug mangita kang Jehova nga ilang Diyos, ug kang David nga ilang hari; ug mangadto kang Jehova uban ang kahadlok ug sa iyang pagkamaayo sa ulahing mga adlaw.”

¹⁷ Kining tagnaa unang natuman sa 537 W.K.P. sa dihang ang mga Hudiyo mibalik sa Yutang Saad gikan sa pagkabihag sa Babilonya. Sa modernong panahon, nagsugod ang katumanan niini sa tuig 1919 sa dihang ang nahibilin sa espirituwal nga Israel migula gikan sa organisasyon ni Satanas ug misugod sa kinasingkasing nga pagpangita kang Jehova ug sa iyang kaayo. Ilang nakita nga si “David nga ilang hari” naghari na diha sa persona ni Jesu-Kristo sa langitnong gahom sukad sa 1914. Ilalom sa iyang pagdumala sa langit, sila madasigong midawat sa kaakohan sa pagpahayag niining maayong balita ngadto sa mga nasod. Busa ilang gisugdan pagtuman ang sugo nga narekord diha sa Mateo 24:14: “Kining maayong balita sa [natukod] nga gingharian igawali sa tanang ginapuy-ang yuta alang sa pagpamatuod sa tanang kanasoran; ug unya moabot ang kataposan.”

18. Kinsay miduyog sa nahibilin sa espirituwal nga Israel sa pagpahayag sa maayong balita?

¹⁸ Karon adlawa, ang nahibilin sa mga dinihogan giduyogan sa “dakong panon,” nga nagabayaw usab sa pagkamaayo ni Jehova. (Pinadayag 7:9) Karon, kapin sa upat ka milyon ang nagpalanog sa tingog sa manulonda nga nakita ni apostol Juan sa panan-awon samtang ilang gipahayag ngadto sa tanang kanasoran: “Kahadloki ang Diyos ug kaniya ihatag ang himaya, kay nahiabot na ang takna sa iyang paghukom, busa simbaha ang Usa nga maoy nagbuhat sa langit ug sa yuta ug sa dagat ug sa mga tuboran sa tubig.”​—Pinadayag 14:7.

19. Pagngalan ug usa sa labing dakong mga pamatuod sa pagkamaayo sa Diyos.

¹⁹ Ang usa sa labing dakong pamatuod sa pagkamaayo sa Diyos mao nga kita iyang gitugotan nga mahimong iyang kaubang mga mamumuo niining kinatayuktokang buluhaton. Pagkadakong pribilehiyo nga gisaligan kita sa “mahimayaong maayong balita sa malipayon nga Diyos”! (1 Timoteo 1:11) Pinaagi sa atong pagsangyaw ug pagpanudlo niini ngadto sa uban, atong gipakita sa dako nga sukod ang hinungdanong bunga sa espiritu sa Diyos, ang pagkamaayo. Sa ingon, kita samag tinamdan sa karaang alagad sa Diyos nga si David, kinsa miingon: “Magabulabula sila sa paghisgot sa pagkadagaya sa imong pagkamaayo, ug tungod sa imong pagkamatarong sila mosinggit sa kalipay.”​—Salmo 145:7.

20. Unsang dugang impormasyon mahitungod sa pagkamaayo sa Diyos ang hisgotan sa sunod artikulo?

²⁰ Ugaling, ang pakigbahin ba sa pagsangyaw sa maayong balita mao lamang ang paagi sa pagpakita sa pagkamaayo diha sa atong mga kinabuhi? Dili gayod! Kita gidasig nga mahimong “magsusundog sa Diyos, ingong mga anak nga pinalangga.” (Efeso 5:1) Ang pagkamaayo sa Diyos gipakita sa daghang paagi. Busa, ang atong pagkamaayo angay makaapektar usab sa daghang bahin sa atong mga kinabuhi. Ang pipila niini usisaon sa sunod artikulo.

[Footnote]

Makatubag Ka Ba?

◻ Sa unsang paagi ang kalalangan nagpabanaag sa kaayo sa Diyos?

◻ Unsang mga kahikayan ang gihimo ni Jehova aron mapasaylo ang mga sala sa mga tawong mahinulsolon?

◻ Sa katumanan sa Oseas 3:5, kanus-a ang dinihogang mga nahibilin miduol kang Jehova ug sa iyang pagkamaayo, ug unsay miagak niini?

◻ Unsa ang usa sa labing dakong pamatuod sa kaayo sa Diyos karon?

[Hulagway sa panid 15]

Ang kalalangan naghatag pamatuod sa pagkadagaya sa pagkamaayo sa Diyos

[Hulagway sa panid 16]

Ang pagtugot kanato nga makabahin sa buluhatong pagsangyaw maoy nangibabawng pamatuod sa pagkamaayo sa Diyos