Mga Magmamantala sa Gingharian Nagtaho
‘Malipayon ang mga Gigutom sa Espirituwal’
SI Jesus miingon: “Malipayon ang mga mahunahunaon sa ilang espirituwal nga panginahanglan.” (Mateo 5:3) Kana sila nagapangita sa nagahatag-kinabuhing impormasyon gikan sa Pulong sa Diyos, ang Bibliya, ug ang pagbaton niining kahibaloa magatultol kanila sa kinabuhing walay kataposan.—Mateo 4:4; Juan 17:3.
◻ Ang usa ka tawong gigutom sa espirituwal sa usa ka Aprikanhong nasod mibaktas ug upat ka oras diha sa katugnaw ug kangitngit aron mabatonan ang usa ka kopya sa Akong Basahon sa mga Estorya sa Bibliya. Sa pagkaabot sa balangay diin ang mga Saksi ni Jehova nagsangyaw, iyang gibati ang mapait nga kapakyasan sa pagkahibalo nga napahimutang na ang kataposang basahon. Siya miestar sa balangay ug tulo ka adlaw hangtod nga mabatonan ang dugang suplay sa mga basahon, ug unya siya malipayon nga sa kataposan siya nakabaton sa maong talagsaong espirituwal nga impormasyon.
Sa bulan sa ilang pag-estar sa maong nahilit nga dapit, ang mga Saksi nakapanagtag ug 55 ka basahon, 365 ka brosyur, ug 145 ka magasin, ug ilang nabatonan ang 5 ka suskrisyon. Natandog kaayo ang ilang balatian sa dihang, sa ilang pagbiya, mga hamtong ug mga bata nagpatugbaw diha sa Kpelle nga pinulongan: “Hinaot si Jehova magauban kaninyo!” Gihimo ang paningkamot sa pag-atiman sa interes.
Ang laing tawo sa mao mismong nasod gigutom usab sa espirituwal. Siya mao ang tesorera sa iyang simbahan ug pangulo sa kalingawan sa iyang distrito. Sa giduaw siya sa mga Saksi, siya nagluhaluhang miangkon nga ang simbahan napakyas sa pagkab-ot sa mga kinahanglanon sa Bibliya alang sa Kristiyanidad. Gipakita kaniya sa mga Saksi gikan sa iyang kaugalingong Bibliya kon unsaon pag-ila ang matuod nga relihiyon. Dayon mitambong siyag duha ka tigom sa Kingdom Hall ug human niadto miingon: “Ang akong nakita ug nadungog nakakombinsir na gayod kanako nga kini mao ang kamatuoran.” Siya nakadayeg sa mga tigom ug sa kagawian niadtong nanambong. Iyang nakita nga ang giingon sa mga Saksi nga miduaw kaniya dili butang nga ilang gimugna kondili butang nga matuod. Nahimo na niya ang mga lakang sa pagbugto sa iyang kalabotan sa simbahan, ug kana misangpot sa maayong pamatuod diha sa komunidad.
◻ Ang usa ka batan-ong Melanesian nga katekista sa New Caledonia gigutom sa espirituwal. Iyang nakaplagan ang usa ka kopya sa librong Ang Kamatuoran nga Motultol sa Kinabuhing Walay Kataposan diha sa ibabaw sa lamesa sa balay sa iyang inahan ug iyang gibasa ang mga kapitulo 2 ug 3. Ang mga teksto sa Bibliya nga Exodo 20:4, 5 ug Juan 4:23, 24 nga gihisgotan didto nakatandog sa iyang kasingkasing. Tungod sa ginaingon sa maong mga kasulatan, iyang gisukna ang iyang pari nganong ang Iglesya Katolika nagatugot sa paggamit sa mga imahen diha sa pagsimba. Gilikayan sa pari ang pangutana. Ang lalaki miadto sa ubay-ubayng laing “Kristohanong” mga relihiyon, apan sila wala makahatag kaniyag makapatagbawng mga tubag sa iyang mga pangutana. Sa kataposan mihukom siya sa pagtambong sa usa ka tigom sa mga Saksi ni Jehova uban sa iyang inahan, nga nagpakita nag interes sa kamatuoran. Ang gugma nga iyang nakita taliwala sa mga Saksi ug ang ilang gipasukad-sa-Bibliya nga mga pagtulon-an nakapahibulong kaayo kaniya.
Bisan pa sa lagyong mga distansiya, siya regular nga tig-angkas paingon sa mga tigom, dali nga mibarog dapig sa kamatuoran, ug nabawtismohan. Karon siya usa na ka ministeryal nga alagad. Ang iyang inahan ug duha niya ka igsoon sa unod nga mga babaye nahimo usab nga mga Saksi ni Jehova. Gisangyawan sa batan-ong lalaki ang iyang kaugalingong tribo ug gisugdan ang daghang pagtuon sa Bibliya. Karon ang ubay-ubay nga tawo sa iyang tribo nagatambong sa mga tigom diha sa maong dapit—kining tanan nahitabo tungod kay ang usa ka batan-ong lalaki nakamatikod lamang sa ibabaw sa lamesa sa usa ka basahong nagsaysay sa Bibliya, gitun-an kana, ug gituohan ug gipadapat ang iyang nakat-onan.
Si Jehova may dakong programa sa pagpakaon sa espirituwal nga nagalihok karong adlawa, ug ang kapid-an nakabenepisyo gikan niana. Sa kahaom si Isaias mitagna bahin niini sa dihang miingon siya: “Tan-awa! ang akong mga alagad magakaon, apan kamo mismo pagagutomon.” (Isaias 65:13) Malipayon kita kon pahimuslan nato ang tagana ni Jehova aron sa pagtagbaw sa atong espirituwal nga kagutmanan.