Mga Magmamantala sa Gingharian Nagtaho
Pagtagbaw sa mga Gigutom sa Espirituwal—Diha sa Eskuylahan
“MALIPAYON kadtong mahunahunaon sa ilang espirituwal nga panginahanglan,” matud ni Jesus diha sa iyang Wali sa Bukid. (Mateo 5:3) Daghang nagtungha pang kabataan giuhaw sa kahibalo bahin sa Diyos ug sa iyang kahibulongang mga katuyoan. Gusto nila ang mga tubag sa mga pangutana mahitungod sa kinabuhi ug buot masayod kon unsaon nila pagkinabuhi aron sa pagdawat sa pag-uyon sa Diyos ug mahimong malipayon. Kini nadayag diha sa usa ka eskuylahan sa British Virgin Islands. Usa sa mga Saksi ni Jehova didto miasoy:
◻ “Mitambong ako sa usa ka miting sa magtutudlo ug ginikanan sa lokal nga eskuylahan, ug daghan ang gipamulong mahitungod sa mga droga, pag-inom, pakigdeyt, pagtan-awg TV, mga grado, ug ubang mga butang, busa mihukom ako nga dad-on ang librong Mga Pangutanang Gisukna sa mga Batan-on—Mga Tubag nga Mosaler ug gipakita kana sa pangulong-maestra. Human niya masusi ang libro, siya miingon nga kadto mao gayod ang ilang gikinahanglan ug nangutana kon ang eskuylahan mahimong makabatog kopya alang sa matag usa sa 120 ka estudyante. Ang butang gihisgotan uban sa mga ansiano sa kongregasyon, ug mihukom sila sa pagdonar sa mga libro ngadto sa eskuylahan. Sa dihang among gihisgotan kadto, ang mga magtutudlo mihangyo nga among ipresentar ang mga libro ngadto sa mga estudyante. Duha ka Saksi ang nangadto, ug ang kuwarto napunog mga estudyante nga naghulat kanila. Ang mga igsoong lalaki nakigsulti sulod sa katunga sa oras, ug ang mga kasinatian nga nagpakita kon sa unsang paagi ang libro nakatabang sa batag tigulang gibasa gikan sa mga magasin sa Watch Tower Society. Dayon ang mga libro gipresentar ngadto sa ikag nga mga estudyante.”
Makalipay ang pagkahibalo nga ang eskuylahan nakahukom sa paggamit sa libro ingong bahin sa regular kuwarto- ug singko-gradong mga kurso. Sa pagkatinuod magtubag kana sa daghang pangutana nga nabatonan niining mga estudyanteha bahin sa kinabuhi ug sa umaabot.
Pagtagbaw sa mga Gigutom sa Espirituwal—Sa Papua New Guinea
Ang mosunod nga kasinatian nadawat gikan sa usa ka nagapanawng magtatan-aw. Nagailustrar kini nga gigutom kaayo sa espirituwal ang katawhan nianang nasora ug tuman ka epektibo ang atong mga basahong gibase sa Bibliya diha sa pagtagbaw sa ilang kagutmanan.
◻ “Kay ako wala makaduaw sa balangay sa Kamberatoro,” matud sa magtatan-aw, “gigugol ko ang akong panahon sa pagsangyaw kauban sa gamayng kongregasyon sa Vanimo. Adunay dakong interes didto. Ubay-ubayng katawhan gikan sa Bewani midawat ug mga basahon. Usa ka tawo mihangyo nga ako moadto ug moduaw sa maong balangay, ug siya magtaganag puy-anan alang kanako. Daghang tawo nasinati sa atong mga basahon. Matag panahong kami mangadto sa lungsod sa Vanimo, kami mahutdan ug mga basahon bisan pag magdalag tulo ka karton sa mga libro. Ang Akong Basahon sa mga Estorya sa Bibliya giisip nga bililhon sama sa bulawan. Ang mga tawo nagapangita niini. Ang mga libro nga akong gidala dali kaayong napahimutang. Sa dihang among ipakita sa katawhan ang among mga basahon, ang pipila mangutana: ‘Hain man ang dalag nga libro?’ Usa ka lalaki mipedidog unom. Gihatag niya kanako ang iyang ngalan ug adres ug mihangyo kanako nga ipasibya sa radyo sa dihang akong madawat kana. Unya siya moanha gikan sa iyang balangay aron sa pagkuha niana.” Ang nagapanawng magtatan-aw midugang: “Akong nadiskobrehan nga daghang tawo sa Vanimo nagdawat sa mga librong Pagpangita sa Katawhan sa Diyos ug Mga Pangutanang Gisukna sa mga Batan-on—Mga Tubag nga Mosaler.”
Kini nagailustrar nga ang mga tawong matinud-anon ug kasingkasing gigutom gayod alang sa espirituwal nga pagkaon nga hikaplagan diha sa Bibliya ug sa mga basahon nga gitagana ni Jehova pinaagi sa “matinumanon ug maalamong ulipon.” (Mateo 24:45-47) Pagkamalipayon ang mga Saksi ni Jehova sa pagkaarang sa pagtabang sa maong mga tawo nga gigutom sa kamatuoran!
[Hulagway sa panid 19]
Pagsangyaw sa Papua New Guinea