“Ang Magtatan-aw Kinahanglang . . . Mapugnganon sa Kaugalingon”
“Ang magtatan-aw kinahanglang . . . mapugnganon sa kaugalingon.”—TITO 1:7, 8.
1, 2. Unsang panig-ingnan sa pagpugong ang gihatag ni William of Orange, ug unsa ang maayong mga resulta?
ANG kasaysayan adunay labing talagsaong panig-ingnan nga nalangkit sa pagpugong sa mga emosyon. Sa tungatunga sa ika-16 nga siglo, ang batan-ong Olandes nga prinsipe si William of Orange mikuyog sa pagpangayam kang King Henry II sa Pransiya. Gibutyag sa hari ngadto kang William ang plano nila sa hari sa Espanya sa pagpuo sa tanang mga Protestante sa Pransiya ug sa Netherlands—sa pagkatinuod, diha sa tibuok Kakristiyanohan. Nagtuo si King Henry nga ang batan-ong William maoy usa ka debotadong Katoliko sama kaniya ug busa iyang gitug-an ang tanang mga detalye sa plano. Nalisang kaayo si William sa iyang nadunggan tungod kay ang kadaghanan sa iyang suod nga mga higala mga Protestante man, apan wala niya ipakita ang iyang gibati; hinunoa, mipakita siyag dakong interes sa tanang mga detalye nga gihatag kaniya sa hari.
2 Apan, sa nakahigayon si William, iyang gisugdan ang mga laraw sa pagsumpo niining planoha, ug kini misangpot sa ulahi ug kagawasan sa Netherlands gikan sa pagmando sa Katsila nga Katoliko. Tungod kay nagpugong si William sa iyang kaugalingon dihang iyang unang nadunggan ang plano, siya nailhang si “William nga Hilomon.” Malamposon kaayo si William of Orange nga kami gisultihan: “Siya mao ang tinuod nga tagmugna sa independensiya ug pagkabantogan sa republikang Olandes.”
3. Kinsa ang makabatog kaayohan kon ang Kristohanong mga ansiano magpugong sa kaugalingon?
3 Tungod sa iyang pagpugong, si William nga Hilomon nakahatag dakong kaayohan sa iyang kaugalingon ug sa iyang katawhan. Sa samang paagi, ang bunga sa balaang espiritu sa pagpugong sa kaugalingon angay ipakita karon sa Kristohanong mga ansiano, o mga magtatan-aw. (Galacia 5:22, 23) Pinaagi sa pagpakita niining hiyasa, sila makabaton ug kaayohan alang sa ilang kaugalingon ug sa mga kongregasyon. Sa laing bahin, ang ilang kapakyasan sa pagpugong sa kaugalingon makahatag ug dakong kadaot.
Pagpugong sa Kaugalingon—Usa ka Kinahanglanon Alang sa mga Ansiano
4. Unsang tambag ni apostol Pablo ang nagpasiugda sa panginahanglan sa mga ansiano sa pagpugong sa kaugalingon?
4 Si Pablo, nga usa ka ansiano, nakasabot sa importansiya sa pagpugong sa kaugalingon. Kon magtambag sa mga ansiano nga moduol kaniya nga gikan sa Efeso, iyang gisultihan sila: “Tagda ninyo ang inyong kaugalingon ug ang panon.” Lakip sa ubang mga butang, ang paghatag ug pagtagad sa ilang kaugalingon nag-apil sa panginahanglan sa pagpugong sa kaugalingon, sa pagbantay sa ilang paggawi. Sa nagsulat ngadto kang Timoteo, si Pablo mihatag ug samang punto, nga nagaingon: “Tagda kanunay ang imong kaugalingon ug ang imong pagpanudlo.” Kining tambaga nagpakita sa kaamgohan ni Pablo sa tawhanong kiling diha sa pipila nga nabalaka kaayo sa pagsangyaw kay sa pagtuman sa ilang ginasangyaw. Busa, iyang unang gipasiugda ang panginahanglan sa pagbantay sa ilang kaugalingon.—Buhat 20:28; 1 Timoteo 4:16.
5. Sa unsang paagi ang Kristohanong mga ansiano ginatudlo, ug diin nasulat sa Kasulatan ang ilang mga kuwalipikasyon?
5 Sa nanglabayng mga katuigan, ang Kasulatanhong papel sa mga ansiano anam-anam nga nagakatin-aw. Karong adlawa, atong makita nga ang pagkaansiano maoy usa ka tinudlo nga katungdanan. Ang mga ansiano itudlo sa Nagamandong Lawas sa mga Saksi ni Jehova o sa direktang mga hawas niini. Kana nga lawas, sa baylo, nagahawas sa “matinumanon ug maalamong ulipon.” (Mateo 24:45-47) Ang mga kuwalipikasyon aron mahimong usa ka Kristohanong magtatan-aw, o ansiano, pangunang gihatag ni apostol Pablo diha sa 1 Timoteo 3:1-7 ug Tito 1:5-9.
6, 7. Unsang espisipikong mga kuwalipikasyon sa mga ansiano nga nagkinahanglag pagpugong sa kaugalingon?
6 Si Pablo miingon diha sa 1 Timoteo 3:2, 3 nga ang usa ka magtatan-aw kinahanglang makasaranganon sa mga batasan. Kini ug ang panginahanglan alang sa usa ka ansiano nga magmahusay nagkinahanglag pagpugong sa kaugalingon. Ang usa ka tawo nga kuwalipikado sa pagkahimong magtatan-aw dili tigpanukmag ug dili mabingkilon. Kining mga kuwalipikasyona nagkinahanglan usab nga ang usa ka ansiano mapugnganon sa kaugalingon. Dugang pa, aron ang ansiano dili palaaway nga palahubog, mapatuyangon sa bino, siya kinahanglang magpugong sa kaugalingon.—Tan-awa usab ang mga potnot sa 1 Timoteo 3:2, 3.
7 Diha sa Tito 1:7, 8, espisipikong gisulti ni Pablo nga ang usa ka magtatan-aw kinahanglang mapugnganon sa kaugalingon. Matikdi, hinunoa, kon pila pa ang ubang mga kinahanglanon nga nalista niining mga bersikuloha nga nalangkit ang pagpugong sa kaugalingon. Pananglitan, ang magtatan-aw kinahanglang nahigawas sa sumbong, oo, walay ikasaway. Siyempre, dili maabot sa ansiano ang maong mga kinahanglanon gawas kon siya magpugong sa kaugalingon.
Dihang Makiglabot sa Uban
8. Unsang mga hiyas ang gikinahanglan sa mga ansiano sa paghatag tambag nga nagpasiugda sa panginahanglan sa pagpugong sa kaugalingon?
8 Lain pa, ang magtatan-aw kinahanglang pasensiyoso ug hataas-ug-pailob kon makiglabot sa kaubang mga magtutuo, ug kini nagkinahanglag pagpugong sa kaugalingon. Pananglitan, diha sa Galacia 6:1, atong mabasa: “Mga igsoon, kon ang usa ka tawo mahiligas sa kalapasan nga wala makaamgo niana, kamo nga adunay espirituwal nga kuwalipikasyon [ilabina ang mga ansiano] mao ang magpahiuli kaniya diha sa espiritu sa kalumo, samtang ginabantayan usab ninyo ang inyong kaugalingon, kay basi matintal usab kamo.” Ang pagpakitag espiritu sa kalumo nagkinahanglag pagpugong sa kaugalingon. Alang niana, ang pagpugong nalangkit usab sa pagbantay sa kaugalingon. Sa susama, dihang tawgon ang usa ka ansiano sa pagtabang sa usa ka tawong anaa sa kalisod, ang pagpugong sa kaugalingon importante kaayo. Bisan unsa pay anaa sa hunahuna sa ansiano bahin sa indibiduwal, siya kinahanglang maluluton, mapailobon, ug masinabtanon. Inay abtik nga manambag, ang ansiano kinahanglang andam mamati ug awhagon ang indibiduwal sa pagsulti kon unsay nakasamok kaniya.
9. Unsang tambag ang angay ibutang sa hunahuna sa mga ansiano dihang makiglabot sa nagmagul-anon kaayong mga igsoon?
9 Ilabinang tukma ang tambag diha sa Santiago 1:19 dihang makiglabot sa mga tawong nagmagul-anon kaayo: “Sabta ninyo, hinigugma ko nga mga igsoon. Kinahanglan nga ang tagsatagsa abtik nga mamati, dili madalidalion sa pagsulti, dili dali masuko.” Oo, ilabina kon mag-atubang ug masuk-anon o emosyonal nga mga reaksiyon nga kinahanglang mag-amping ang mga ansiano nga dili tumpangan ang samang reaksiyon. Gikinahanglan gayod ang pagpugong sa kaugalingon sa dili pagbalos sa masuk-anong mga pulong ug masuk-anong mga pulong, sa dili “pagbalos sa daotan ug daotan.” (Roma 12:17) Ang pagpakita ug reaksiyon nga sama niana mopasamot lang hinoon sa kahimtang. Busa dinhi na usab ang Pulong sa Diyos naghatag sa mga ansiano ug maayong tambag, nagapahinumdom kanila nga ang “usa ka tubag, kon malumo, makapahupay sa kapungot.”—Proverbio 15:1.
Pagpugong sa Kaugalingon Diha sa mga Miting sa mga Ansiano ug sa Hudisyal nga mga Husay
10, 11. Unsa ang nagakahitabo sa mga miting sa mga ansiano, nga nagpakita sa panginahanglan sa pagpugong sa kaugalingon niining mga okasyona?
10 Laing dapit diin ang Kristohanong mga ansiano ilabinang magbantay sa pagpugong sa kaugalingon mao ang panahon sa mga miting sa mga ansiano. Ang pagsulting makalmahon alang sa kamatuoran ug hustisya usahay nagkinahanglag dakong pagpugong sa kaugalingon. Nagkinahanglan usab ug pagpugong sa kaugalingon ang paglikay nga dili mangibabaw sa panaghisgot. Kon may kiling nga ingon niini ang usa ka ansiano, usa ka kalulot alang sa laing ansiano ang paghatag kaniya ug tambag.—Itandi ang 3 Juan 9.
11 Lain pa, diha sa mga miting sa mga ansiano, ang sobra ka masibuton nga ansiano tingali dali nga masuko, o kaha mopataas sa iyang tingog. Pagkadako sa kakulang sa pagpugong sa kaugalingon ang gipakita niining aksiyona! Kini doble nga makadaot sa kaugalingon. Sa usa ka bahin, kon unsa ang sukod sa pagkawala sa tawo sa pagpugong sa kaugalingon, sa ingon usab nga sukod nga mapaluya niya ang iyang kaugalingon tungod sa pagtugot sa emosyon nga maoy mangibabaw sa katarongan. Sa pikas bahin, kon mag-emosyonal ang indibiduwal, siya mahimong masuko o kaha makahatag ug daotang buut sa iyang isigkaansiano. Lain pa, gawas kon magbantay ang mga ansiano, ang dagkong kalainan sa mga opinyon mopahinabog pagbahinbahin sa ilang taliwala. Kini mohatag ug kadaot kanila ug sa kongregasyon.—Itandi ang Buhat 15:36-40.
12. Dihang makiglabot sa unsang mga situwasyona nga ang mga ansiano kinahanglang mag-amping sa pagpugong sa kaugalingon?
12 Ang pagpugong sa kaugalingon gikinahanglan usab kaayo sa mga ansiano aron malikayan ang pagkamapihigon ug maabusohan ang ilang gahom. Sayon kaayong magpadala sa tintasyon, sa pagtugot sa tawhanong mga pangatarongan nga maoy moimpluwensiya sa isulti o buhaton sa usa! Sa daghang higayon, ang mga ansiano napakyas sa paglihok sa husto kon ang usa sa ilang mga anak o ubang mga paryente mapamatud-ang sad-an sa buhat nga daotan. Niining mga situwasyona nga gikinahanglan ang pagpugong sa kaugalingon nga dili tugotang ang relasyon sa dugo mobabag sa matarong nga aksiyon.—Deuteronomio 10:17.
13. Nganong ang pagpugong sa kaugalingon ilabinang kinahanglan sa mga ansiano sa panahon sa hudisyal nga mga husay?
13 Diha sa laing kahimtang nga hinungdanon kaayo ang pagpugong sa kaugalingon mao ang panahon sa hudisyal nga husay. Kinahanglan magpugong gayod sa kaugalingon ang mga ansiano aron sila sa dili-angay maimpluwensiyahan sa emosyon. Kinahanglan nga dili sila madala dayon sa mga luha. Sa samang higayon, kinahanglang magbantay ang mga ansiano nga dili mawala ang ilang panimbang kon sumbatan ug mabutangbutangan siya, sama sa kaso dihang makiglabot sa mga apostata. Dinhi tukma kaayo ang mga pulong ni Pablo: “Ang ulipon sa Ginoo dili kinahanglan makig-away, apan maaghop ngadto sa tanan.” Nagkinahanglan ug pagpugong sa kaugalingon ang pagpakitag kaaghop bisan ilalom sa kalisod. Si Pablo mipadayon sa pagpakita nga “ang ulipon sa Ginoo” kinahanglang “magpugong batok sa daotan, malumong magatudlo sa mga nagasupak.” Ang pagpakitag kalumo ug ang pagkakalmado dihang makiglabot sa pagsupak nagkinahanglan ug dakong pagpugong sa kaugalingon.—2 Timoteo 2:24, 25.
Pagpugong sa Kaugalingon Uban sa Kaatbang sa Sekso
14. Unsang maayong tambag ang angay pamatian sa mga ansiano sa ilang mga pakiglabot sa kaatbang nga sekso?
14 Ang mga ansiano kinahanglang alisto sa pagpugong sa kaugalingon kon bahin na sa ilang mga pakiglabot sa kaatbang nga sekso. Dili maayo alang sa usa ka ansiano nga duawon ang usa ka igsoong babaye nga mag-inusara. Ang ansiano kinahanglang ubanan sa laing ansiano o usa ka ministeryal nga alagad. Tingali nakasabot niining sulirana, gitambagan ni Pablo ang ansiano nga si Timoteo: “Tambagi . . . ang mga babayeng gulanggulang ingon nga mga inahan, ang mga batan-ong babaye ingon nga mga igsoon, sa bug-os nga kaputli.” (1 Timoteo 5:1, 2) May pila ka ansiano nga nakit-ang nanghawid ug igsoong babaye nga daw inamahan nga aksiyon. Apan mahimong ilang gilimbongan ang ilang kaugalingon mismo, kay basin ug romantikong sugyot inay ang putli Kristohanong pagbating inigsoon ang nakaaghat niining aksiyona.—Itandi ang 1 Corinto 7:1.
15. Sa unsang paagi ang usa ka hitabo nagpasiugda sa pasipala sa ngalan ni Jehova nga mosangpot kon ang usa ka ansiano dili magpugong sa kaugalingon?
15 Pagkadakong kadaot sa kamatuoran ang misangpot tungod kay ang ubang mga ansiano wala magpugong sa kaugalingon sa ilang mga pakiglabot sa mga igsoong babaye sa kongregasyon! Sa mga katuigang dili pa dugay, usa ka ansiano napalagpot tungod kay nakapanapaw siya sa usa ka Kristohanon igsoong babaye nga dili Saksi ang bana. Sa mismong gabii nga gipahibalo ang pagpalagpot sa ansiano kanhi, ang nasukong bana misulod sa Kingdom Hall nga may dalang posil ug giluthang ang duha ka sad-ang mga indibiduwal. Walay namatay kanila, ug nasakmit gikan sa bana ang posil, apan sa pagkasunod adlaw gibalita sa usa ka dakong mantalaan diha sa atubangan nga panid ang nahitabong ‘pagposil diha sa simbahan.’ Pagkadakong pasipala ang nahatag niadto diha sa kongregasyon ug sa ngalan ni Jehova tungod sa kakulang sa ansiano ug pagpugong sa kaugalingon!
Pagpugong sa Kaugalingon sa Ubang Bahin
16. Nganong magbantay ang mga ansiano sa pagpugong sa kaugalingon kon maghatag ug mga pakigpulong sa publiko?
16 Ang pagpugong sa kaugalingon gikinahanglan kaayo dihang ang ansiano mohatag ug pakigpulong publiko. Ang mamumulong sa publiko kinahanglang sulondan sa kompiyansa ug panimbang. Ang uban mosulay sa pagpahimuot sa ilang mga mamiminaw pinaagi sa pagsultig kataw-anang mga pulong nga gituyo aron sa pagpakatawa sa tumatambong. Mopadayag kini nga nagpadaog sila sa tintasyon aron pahimut-an ang ilang mamiminaw. Sa pagkamatuod, ang tanang magpadaog sa tintasyon kulang sa pagpugong sa kaugalingon. Ikaingon pa gani nga ang paglapas sa gitagal nga oras kon magpakigpulong mopadayag ug kakulang sa pagpugong sa kaugalingon, ug kakulang usab sa pangandam.
17, 18. Unsang papel ang gidula sa pagpugong sa kaugalingon sa pagtimbang sa ansiano sa iyang nagkalainlaing mga responsabilidad?
17 Kinahanglang atubangon sa matag usa ka kugihang ansiano ang hagit sa pagtimbang sa nagkalainlaing mga ginapangayo sa iyang panahon ug kusog. Nagkinahanglag pagpugong sa kaugalingon ang dili pagdangop sa usa ka paghingapin ngadto sa lain. Ang ubang mga ansiano nabalaka kaayo sa mga ginapangayo sa kongregasyon nga ila na hinoong napasagdan ang ilang mga pamilya. Busa, sa dihang gisugid sa usa ka igsoong babaye ang maayong pagduaw sa ansiano kaniya ingong magbalantay, ang asawa sa ansiano miingon: “Maayo unta ug duawon usab niya ako ingong magbalantay sa umaabot!”—1 Timoteo 3:2, 4, 5.
18 Ang usa ka ansiano nagkinahanglan usab ug pagpugong sa kaugalingon aron matimbang niya ang panahong magugol niya sa personal nga pagtuon uban sa panahong igugol sa pag-alagad sa kanataran o sa mga pagduaw ingong magbalantay. Tungod sa pagkalimbongan sa tawhanong kasingkasing, sayon alang sa usa ka ansiano ang paggugol ug mas daghang panahon kay sa angay niyang igugol diha sa butang nga iyang nakitang labing makalingaw. Kon gusto siyag mga libro, tingali mas daghang panahong magugol niya sa personal nga pagtuon kay sa angay niyang igugol. Kon iyang nakita nga malisod kaniya ang pagpamalaybalay, tingali mangita siyag mga pasangil nga napasagdan kana tungod sa intereses sa paghimog mga pagduaw ingong magbalantay.
19. Unsa ang obligasyong nahuptan sa mga ansiano nga nagpasiugda sa panginahanglan sa pagpugong sa kaugalingon?
19 Ang obligasyon sa pag-amping sa kompidensiyal nga butang na gkinahanglan usab nga ang ansiano alisto sa hugot nga pagpugong sa kaugalingon. Hinungdanon dinhi ang tambag: “Ayaw ibutyag ang tinagoan sa ubang tawo.” (Proverbio 25:9) Ang mga eksperyensiya nagsugyot nga kini mao ang usa sa labing nalapas nga mga kinahanglanon sa mga ansiano. Kon ang usa ka ansiano adunay maalamon ug mahigugmaong asawa diin siya may maayong komunikasyon, basin mokiling siya nga iasoy o hisgotan ang kompidensiyal nga mga butang. Apan kini dili-angay ug labing dili-maalamon. Una sa tanan, ginabudhian niini ang usa ka butang nga gipiyal. Ang espirituwal nga mga igsoong lalaki ug babaye moduol sa mga ansiano ug mosugid kanila sa kompidensiyal nga butang tungod kay may pagsalig sila nga kining mga butanga dili ibutyag. Ang pagsugid ug kompidensiyal nga butang ngadto sa asawa sayop, dili-maalamon, ug dili usab mahigugmaon kay mohatag kini ug wala-kinahanglanang palas-anon sa asawa.—Proverbio 10:19; 11:13.
20. Nganong hinungdanon kaayo nga magpugong sa kaugalingon ang mga ansiano?
20 Sa walay duhaduha, aw, pagpugong sa kaugalingon hinungdanon kaayo, ug ilabina sa mga ansiano! Tungod kay gipiyalan sila sa pribilehiyo sa pagpanguna taliwala sa katawhan ni Jehova, mas dako sila ug tulobagon. Sanglit daghan ang gihatag kanila, daghan ang gikinahanglan kanila. (Lucas 12:48; 16:10; itandi ang Santiago 3:1.) Usa ka pribilehiyo ug katungdanan sa mga ansiano ang pagpakitag maayong panig-ingnan sa uban. Labaw pa niana, ang tinudlong mga ansiano anaa sa posisyon sa paghimog labaw nga ikaayo o labaw nga kadaot kay sa uban, kasagaran depende kon sila may pagpugong sa kaugalingon o wala. Dili ikahibulong nga si Pablo miingon: “Ang usa ka magtatan-aw kinahanglan . . . mapugnganon sa kaugalingon.”
Nakahinumdom Ka Ba?
◻ Unsang kinahanglanon sa Kasulatan sa mga ansiano ang nagpakita nga sila kinahanglang magpugong sa kaugalingon?
◻ Nganong ang mga ansiano nagkinahanglang magpugong sa kaugalingon dihang makiglabot sa isigkamagtutuo?
◻ Sa unsang paagi ang pagpugong sa kaugalingon ipakita diha sa mga miting sa mga ansiano?
◻ Unsang hagit ang mahatag sa panginahanglan sa mga ansiano sa pag-amping sa kompidensiyal nga butang?
[Hulagway sa panid 20]
Ang pagpakitag pagpugong sa kaugalingon hinungdanon sa mga miting sa mga ansiano
[Hulagway sa panid 23]
Ang Kristohanong mga ansiano kinahanglang magpugong sa kaugalingon aron maampingan ang kompidensiyal nga butang