Gugma Kang Jehova Modasig sa Matuod nga Pagsimba

“Kini ang kahulogan sa paghigugma sa Diyos, nga atong bantayan ang iyang mga sugo.”​—1 JUAN 5:3.

1, 2. Tungod sa unsang motibo nga kita magaalagad kang Jehova?

USA ka grupo sa 80 ka bisita gikan sa Hapon misuroy sa usa ka Assembly Hall sa mga Saksi ni Jehova sa California, U.S.A. Ang matahom nga palibot, apil ang usa ka harding kompleto sa blue jays, mga salampati, ug mga hummingbird, labaw nga nakapasuod nila ngadto sa ilang Dakong Maglalalang, si Jehova nga Diyos. Sa taudtaod ang ilang giya sa pagsuroy nakaamgo nga hapit ang tanan sa grupo nag-alagad nga bug-os panahon ingong payunir. Busa, sa kaulahian, ang grupo gisuknag usa ka pangutana nga sagad isukna: “Nganong ang Hapon dunay daghan kaayong payunir?” Sa kadiyut dihay kahilom. Unya usa ka dalaga miboluntaryo sa pagtubag: “Kay kami nahigugma ni Jehova.”

² Gugma kang Jehova​—kini motukmod gayod nato nga magmadasigon sa pag-alagad kaniya! Tinuod, dili ang tanan makapayunir. Ngani, ang kinabag-an sa atong kapig upat ka milyong magmamantala sa Gingharian wala makahikay sa ilang eskedyul aron sa pagpahimulos ning maong pribilehiyo. Apan daghan kansang sirkumstansiya makatugot nagapanlimbasog alang niana. Ang uban kanato usab “makasalig ni Jehova ug mobuhat sa maayo,” nga ipakita ang atong gugma pinaagi sa pipila ka pakigbahin sa buluhatong paghimog tinun-an. (Salmo 37:3, 4) Ug ang tanang dedikadong mga magsisimba ni Jehova makaambit sa pagpausbaw sa espiritu sa pagpayunir, pinaagi sa paghatag ug mahigugmaong pagpaluyo niadtong nagapayunir.​—Mateo 24:14; 28:19.

3. Unsang kalainan mamatikdan tali sa kadaghanang nag-angkong mga Kristohanon ug sa mga Saksi ni Jehova?

³ Kasukwahi sa kadaghanang nag-angkong mga Kristohanon, si kinsa sa kasayon nag-isip sa relihiyon nga usa lang ka pakaping bahin sa ilang mga kinabuhi, ang mga Saksi ni Jehova nagapasundayag ug mainit nga gugma kang Jehova nga magadasig kanila sa pagpadayon sa “pagpangita pag-una sa gingharian ug sa iyang pagkamatarong.” Nagkinahanglan kinig sakripisyo, apan mapuslanon kaayo ang maong sakripisyo! (Mateo 6:33; 16:24) Kini nahiuyon sa unang dakong sugo, nga gipahayag pag-una ni Moises ug gisubli ni Jesu-Kristo: “Si Jehova nga atong Diyos maoy usa ka Jehova, ug higugmaon mo si Jehova nga imong Diyos uban sa bug-os mong kasingkasing ug sa bug-os mong kalag ug sa bug-os mong hunahuna ug sa bug-os mong kusog.”​—Marcos 12:29, 30; Deuteronomio 6:4, 5.

4, 5. Kinsa ang pagaisipon nga matinumanon, ug sa unsang paagi ikapakita ang pagkamatinumanon?

⁴ Usa sa mga trabahante sa hedkuwarter sa mga Saksi ni Jehova karong bag-o misulti kang F. W. Franz, ang 98-anyos nga presidente sa Watch Tower Society nga nakagugol ug kapig 70 ka tuig sa bug-os-panahong pag-alagad: “Ikaw usa ka maayong panig-ingnan sa pagkamatinumanon, Brader Franz.” Ug mitubag si Brader Franz: “Oo! Kinahanglan ka nga magmatinumanon.” Kana ang sumada sa butang. Sa bisan unsang bahin sa kalihokan sa Gingharian nga atong ginaalagaran, kita mahimong magmatinumanon.​—1 Corinto 4:2; Galacia 3:9.

⁵ Tinuod, daghan ang gustong mobuhat ug labaw pa diha sa pag-alagad kang Jehova, apan tingali sila gilimitihan sa Kasulatanhong mga responsabilidad o mga suliran sa panglawas. Bisan pa niana, kadtong dili makaarang sa pagpayunir dili isipong kulang sa pagkamatinumanon. Ang uban nakapabiling maunongon ubos sa labing lisod nga mga kahimtang ug kasagaran sulod sa daghan kaayong katuigan. Oo, sila nagmatinumanon! Sila nagpakita ug gugma alang kang Jehova ug nag-alagad nga makugihon diha sa bug-os-kasingkasing nga pagpaluyo sa iyang teokratikanhong mga kahikayan. Nagbaton silag dulot nga kaikag sa kalihokan sa mga payunir ug nagdasig sa mga posibleng makapayunir, kadaghanan ilang mga anak mismo, sa pagsingkamot padulong sa payuniring ingong karera sa kinabuhi nga molabaw kay sa tanan nga uban.​—Itandi ang Deuteronomio 30:19, 20.

6, 7. Sa unsang paagi ang panig-ingnan nga gipadayag sa 1 Samuel 30:16-25 mapadapat karong adlawa?

⁶ Ang mahigugmaong panaghiusa sa kalihokan sa tanan nga katawhan sa Diyos karong adlawa mahimong ihulagway sa asoy sa 1 Samuel 30:16-25. Sa pagpakiggubat batok sa mga Amalekahanon, “si David naglaglag nila sukad sa pagbanagbanag sa kabuntagon hangtod sa kagabhion” ug nagkuhag daghang inagaw. Sa pagbalik sa kampo, pipila sa mga tawo sa gubat ni David mihangyo nga walay inagaw ang igahatag niadtong wala modasdas uban kanila sa kainit sa panaggubat. Apan mitubag si David: “Kinsay mamati kaninyo bahin niining mga pulonga? Kay sama sa bahin sa usa nga miadto sa gubat mao usab ang bahin niadtong milingkod tapad sa mga butang. Ang tanan magadawat ug sama nga bahin.”

⁷ Ang samang prinsipyo mapadapat karong adlawa. Ang mga payunir anaa sa unahan sa atong espirituwal nga pakiggubat. Apan ang tanan nga uban diha sa kongregasyon nagahatag ug bug-os-kasingkasing, maunongong pagpaluyo. Ug ang dakong resulta sa ilang tiningob nga kalihokan sa 1991 ginahulagway diha sa tsart nga karon mosunod.

Usa ka Talagsaong Taho

8. (a) Unsay gipadayag sa tibuok-kalibotang taho bahin sa katibuk-ang gidaghanon sa mga magmamantala ug mga oras nga ilang nagugol diha sa pag-alagad kang Jehova? (b) Unsang makaiikag nga mga punto ang imong namatikdan alang sa mga nasod nga bag-o pang mipatim-aw diha sa taho?

⁸ Oo, ang gisundan nga upat ka panid niining magasina nagpakita kon sa unsang paagi ang nahiusa nga paningkamot sa tanang madasigong mga magsisimba ni Jehova nakaamot sa usa ka makapaukyab tibuok-kalibotang pag-uswag sulod sa 1991, sumala sa gipadayag diha sa mga panid 10 hangtod 13 niining magasina. Ang talagsaon nga bag-ong kinatas-ang ihap nga 4,278,820 ka magmamantala sa gingharian ang nahitala​—usa ka 6.5-porsientong pag-uswag. Kini sila migahin ug 951,870,021 ka oras (duolan sa usa ka bilyon!) sa pag-alagad. Ug matikdi ang tim-os nga paningkamot nga gihimo sa atong mga igsoon diha sa mga nasod nga sa nangagi piniotan apan karon makita na diha sa tibuok-kalibotang taho​—Bulgaria, Cameroon, Czechoslovakia, Ethiopia, Mozambique, Nicaragua, Rwanda, ug U.S.S.R.

9, 10. (a) Unsay sanong sa mga payunir sa hagit sa lisod nga kapanahonan? (b) Unsang pagdasig ang gitagana sa pagsulod sa payunir nga pag-alagad?

⁹ Sa katuigang bag-o pa ang espiritu sa pagpayunir misalanap sa tibuok nga kalibotan. Bisan diha sa mga kayutaan diin bag-o pang gitugot ang kagawasan sa pagsimba, ang gidaghanon sa mga payunir nagsugwak. Ang kalisod sa pangabuhi wala magpugong niining maisogong mga Saksi gikan sa paggahin sa tanan nilang nabatonan ngadto sa pagsimba kang Jehova. (Itandi ang 2 Corinto 11:23, 27.) Sa binulan nga aberids, 14 porsiento sa tanang magmamantala sa Gingharian nagpayunir. Ang kinatas-ang ihap sa mga payunir maoy 780,202, nga usa ka ekselenteng 18 porsiento sa tanang magmamantala.

¹⁰ Sa pagpaniid sa mga kalipay nga nasinati sa mga payunir, ang uban nadasig usab sa pag-apil sa maong pag-alagad. Kon ikaw wala pa magpayunir, ang imong gugma alang ni Jehova magdasig ba nimo sa pag-ingon, sumala sa atong mabasa sa Isaias 6:8, “Ania ako! Ipadala ako”? O pinaagi sa imong makugihong pagtuon sa Bibliya, mahimo kaha nga ang Pulong sa Diyos maghaling ug mainitong tinguha diha sa imong kasingkasing, mao nga kinahanglang imong kuhaon ang dugang lakang sa pagsulod sa payunir nga pag-alagad? Bisan sa panahon sa pagsulay, ang pulong ni Jehova midasig kang Jeremias, mao nga siya wala makapugong.​—Jeremias 20:9.

Mahigugmaong Pag-alagad sa Katawhan

11. Sa unsang paagi miuswag ang kalihokan sa pagtuon sa Bibliya sa balay?

¹¹ Usa sa talagsaong mga bahin sa taho sa tuig mao ang pag-uswag sa gidaghanon sa libreng mga pagtuon sa Bibliya sa balay, 3,947,261, gidumala nga regular kada bulan sa tibuok nga kalibotan. Kini usa ka mahigugmaong kahikayan diin ang mga Saksi ni Jehova nagahatag ug dugang tabang sa mga tawong interesado nga ilang makaplagan diha sa ilang balay-balay nga buluhaton. Malipay kita sa pagdumalag mga pagtuon sa Bibliya uban sa katawhan sa tanang nasyonalidad ug rasanhong kagikan, nga magabuhat uban sa samang kadasig nga gipakita ni apostol Pablo. Ang iyang ‘bug-os nga pagpamatuod ngadto sa mga Hudiyo ug sa mga Grego’ sa walay duhaduha nagkinahanglag daghang oras sa pagtudlo sa kamatuoran. (Buhat 20:20, 21) Mao usab karong adlawa. Ang mga Saksi ni Jehova nagatabang sa “tanang matang sa mga tawo nga mamaluwas ug mahidangat sa tukmang kahibalo sa kamatuoran.”​—1 Timoteo 2:4.

12-14. Unsang makalipayng mga taho nagagikan sa Uropa?

¹² Pagkamakapaukyab ang mga taho sa miuswag nga kalihokan sa pagtuon ug Bibliya sa Silangang Uropa! Sa tinagpulo ka katuigan ang atong mga igsoon didto kinahanglang magtigom sa gagmayng mga grupo, uban sa tingali usa lang ka gamit-kaayong gimimeograp nga kopya sa usa ka daang Bantayanang Torre alang sa tanan sa grupo. Apan karon ang daghang Bibliya ug mga basahon sa Bibliya gitagana nga dinaghan ngadto sa maong mga yuta. Kini mopahinumdom sa usa sa Awit ni Solomon 2:4, King James Version: “Siya [Kristo Jesus] nagdala nako ngadto sa balay sa [espirituwal] nga kombira, ug ang iyang bandera ibabaw nako mao ang gugma.” Tungod kay nagbaton sa ilang personal nga mga kopya sa mga magasin, daghan ang nasangkapan nag maayo sa paggamit “sa pulong sa kamatuoran sa tukmang paagi.”​—2 Timoteo 2:15.

¹³ Usa ka kongregasyon sa 103 ka magmamantala sa St. Petersburg, Russia, karong bag-o mitahog kapin sa 300 ka pagtuon sa Bibliya sa balay. Ingong bunga sa maong paningkamot sa pagtuon sa Bibliya, 53 ka bag-ong Saksi ang nabawtismohan sa walo lang ka bulan. Kapin ug katunga sa kongregasyon ang anaa sa kamatuoran sa walo ka bulan o ubos pa! Ug sila walay mga ansiano​—usa ra ka ministeryal nga alagad sa pag-atiman sa ilang espirituwal nga pag-uswag.

¹⁴ Usa ka magmamantala sa Gingharian sa Estonia gisukna sa usa ka estudyante sa Bibliya kon kaha siya makadapit sa pipila niya ka higala alang sa pagtuon. Sa pag-abot sa Saksi sa balay sa sunod semana, iyang nakaplagan ang kapig 50 ka tawo nga nagtigom! Siyempre, gikinahanglan ang espesyal nga mga kahikayan alang sa mapinadayonong pag-atiman nianang tanang interes.

15. Unsay ikaingon mahitungod sa tumatambong sa Memorial ug mga bawtismo?

¹⁵ Daghan nga nagatuon nakabaton sa ilang unang pagtilaw sa Kristohanong panag-uban pinaagi sa pagtambong sa Memorial sa kamatayon ni Jesus. Niining miaging tuig, ang tumatambong milapaw ug 10,000,000 sa unang panahon, 10,650,158 nga nagtigom sa tibuok kalibotan diha sa 66,207 ka kongregasyon alang sa maong malipayong okasyon. Sa ubay-ubayng mga nasod sa Latin-Amerika, Aprika, ug Silangang Uropa, may mga tumatambong nga tulo o upat ka pilo sa gidaghanon sa mga magmamantala sa Gingharian. Karon kinahanglang mosugod kita sa pagpangandam alang sa Memorial nga pagahimoon niining tuiga sa Biyernes, Abril 17. Gilaoman nga dakong gidaghanon sa bag-ong mga estudyante sa Bibliya nga motambong sa Memorial mopadayon sa pag-uswag padulong sa bawtismo. Mahitungod sa mga bawtismo, niadtong 1991 nakita na usab nato ang kapin sa 300,000 nga nagpasimbolo sa ilang pagpahinungod kang Jehova nga Diyos pinaagig pagtuslob sa tubig.

Mga Mahigugmaon sa Diyosnong Kagawasan

16. Unsang makapaukyab nga mga taho nagagikan sa “Mga Mahigugmaon sa Kagawasan” Distritong mga Kombensiyon?

¹⁶ Usa ka halandumong bahin sa 1991 tuig sa pag-alagad mao ang serye sa “Mga Mahigugmaon sa Kagawasan” Distritong mga Kombensiyon, nga karon natapos na sa Amihanang Hemispera apan magapadayon sa 1992 diha sa Habagatang Hemispera. Sa unang panahon, ang kompletong programa sa kombensiyon gipresentar diha sa ubay-ubayng nasod sa Silangang Uropa, diin ang atong mga igsoon nagakalipay sa paggamit sa ilang bag-ong-kaplag nga mga kagawasan alang sa kadayegan ni Jehova. Sa Oktubre 1991 ang katibuk-ang tumatambong nga gitaho sa unang 705 ka kombensiyon diha sa 54 ka nasod maoy 4,774,937.

17, 18. (a) Unsang mga kagawasan ang gipahimuslan ug gilaoman sa mga magsisimba ni Jehova? (b) Sa unsang paagi ang diyosnong kagawasan lahi sa kalibotanong mga kagawasan?

¹⁷ Giingnan ni Jesus ang iyang mga tinun-an: “Ang kamatuoran magpahigawas kaninyo.” (Juan 8:32) Karong adlawa, ang kamatuoran sa Bibliya nakapahigawas sa minilyon gikan sa mga pagtulon-an sa Kakristiyanohan. Kini nga minilyon nakakat-on nga ang tagana ni Jehova nga halad-lukat ni Jesus mopaposible nga ang katawhan “mahigawas sa kaulipnan sa kadunotan ug magbaton sa mahimayaong kagawasan sa mga anak sa Diyos.” (Roma 8:19-22) Pagkatalagsaon unya kana nga kagawasan​—pagkinabuhing walay kataposan sa usa ka paraisong yuta sulod sa tukmang mga utlanan nga mahigugmaong gitino ni Jehova!​—Isaias 25:6-8; itandi ang Buhat 17:24-26.

¹⁸ Ang mga kagawasan nga karon gipahimuslan sa mga Saksi ni Jehova, ug gilaomang mapahimuslan nga labaw pang madagayaon diha sa bag-ong sistema sa mga butang sa Diyos, nagagikan sa atong Diyos, si Jehova. (2 Corinto 3:17) Kini sila wala mag-agad sa bisan unsang politikanhon o rebolusyonaryong organisasyon. (Santiago 1:17) Sa pagbantay nga dili hisaypan sa pagsabot bahin niining puntoha, ang 1991 nga badges sa kombensiyon nga gigamit sa mga Saksi ni Jehova diha sa pila ka kayutaan sa Silangang Uropa nasulatan: “Mga Mahigugmaon sa Diyosnong Kagawasan” inay sa “Mga Mahigugmaon sa Kagawasan” lamang.

Mainitong Gugma Alang Kang Jehova

19. Sa unsang paagi ang mainampoon nga pakigsuod kang Jehova maglig-on kanato?

¹⁹ Tungod sa atong gugma kang Jehova ug atong pagsalig kaniya kita magpabiling suod kaniya diha sa pag-ampo. Kining pakigsuod uban ni Jehova mao ang nakatabang sa atong mga igsoon sa pag-antos sa daghang kalisdanan ug mga paglutos. (Salmo 25:14, 15) Sa takna sa iyang labing dakong pagsulay, gihuptan ni Jesus ang pakigsuod sa iyang Amahan pinaagi sa pag-ampo. (Lucas 22:39-46) Ang maong mainampoon nga pakigsuod kang Jehova naglig-on kang Esteban latas sa kasakit sa pagpaantos kaniya. Nagahangad sa langit samtang siya pagabatohon na hangtod sa kamatayon, siya miingon: “Tan-awa! Nakita ko nga nabuksan ang mga langit ug ang Anak sa tawo [Jesus] nagtindog sa tuong kamot sa Diyos.”​—Buhat 7:56.

20-22. Sa unsang paagi ang usa ka kasinatian nagailustrar nga ang Diyos nagadungog sa mga pag-ampo?

²⁰ Maingon nga subsob kaayo nga nasinati sa mga magsisimba ni Jehova, si Jehova nagatubag sa mga pag-ampo nga nahiuyon sa iyang kabubut-on. Pananglitan, sa usa ka nasod sa Aprika diin gidili ang buluhaton sa mga Saksi, ang usa ka espesyal payunir nga mibiyahe paingon sa amihanan sakay sa bus may usa ka dakong sako sa mga basahon sa Gingharian ug mga sulat nga ihatod. Ang konduktor sa bus nangutana sa igsoon: “Unsay sulod sa sako?” Ang igsoon misulti sa unang butang misantop sa hunahuna: “Mga sulat.”

²¹ Sa pagpaingon didto, ang bus mihaguros sa pag-agi sa naandang tsekpoint sa karsada, ug ang polis sa trapiko migukod ug mipahunong niana, kay natahap nga kana nagdalag kontrabando. Gimandoan nila nga manaog ang tanang pasahero sa bus ug susihon ang tanang bagahe. Kadto usa ka suliran! Ang igsoon mipalayog diyutay gikan sa nagbagutbot nga panon ug, nga miluhod, miampo kang Jehova. Sa mikuyog siya sa panon, ang bagahe sa matag pasahero ginabuksan na ug gisusi pag-ayo. Sa dihang ang sako sa igsoon mao nay buksan, siya mahilomong misangpit kang Jehova alang sa tabang.

²² “Kinsa kining sakoha, ug unsay sulod niini?” mihulbaw ang polis. Una makaabli ang igsoon sa iyang baba, ang konduktor sa bus mitubag ug miingon: “Kini mga sulat gikan sa —— opisina sa koreyo ngadto sa —— opisina sa koreyo.” “Mao ba diay,” miingon ang polis. Gipunit niya ang sako ug gitunol kana ngadto sa konduktor. “Seguroa nga kana ibutang sa luwas kaayong dapit alang sa biyahe,” misugo siya kaniya. Ang espesyal payunir miluhod na usab sa pagpasalamat sa Tigpatalinghog sa pag-ampo.​—Salmo 65:2; Proverbio 15:29.

23. Unsay gipasundayag ni Jehova, ug nganong usahay iyang itugot nga mabug-os ang paglutos?

²³ Kini, hinuon, wala magkahulogan nga ang mga magsisimba ni Jehova bug-os nahigawas sa makatalagmanong mga hitabo. Sa pila ka kahimtang, sa panahon sa Bibliya ug karong adlawa, gipasundayag ni Jehova nga siya makahimo sa pagluwas sa iyang katawhan. Apan nahiuyon sa paghusay sa isyu sa pagkamatinumanon, usahay mopatim-aw nga iyang itugot nga ang paglutos mabug-os, (itandi ang Mateo 26:39.) Dugang pa, si Jehova wala sa awtomatiko nagapanalipod sa iyang katawhan gikan sa mga aksidente, sibil nga gubat, o krimen, hinoon ang pagbatasan sa praktikal nga kaalam nga pinasikad sa Bibliya mahimong bililhon. (Proverbio 22:3; Ecclesiastes 9:11) Kita makasalig, hinuon, nga kon kita luwason man o dili gikan sa masulayong mga kahimtang, ang atong pagkamatinumanon pagagantihan gani bisan pinaagig pagkabanhaw kon kinahanglanon.​—Mateo 10:21, 22; 24:13.

24. Unsang mahigugmaong mga gasa gitagana ni Jehova, ug sa unsang paagi kita makasanong sa iyang gugma?

²⁴ Pagkakahibulongan ang mahigugmaong mga gasa ni Jehova! Ang iyang gasa sa katawhan nga mao kining yutaa ug ang tanang butang ibabaw niini maoy usa ka talagsaong pagpahayag sa iyang gugma. (Salmo 104:1, 13-16; 115:16) Ug ang maluluy-ong gasa sa Diyos nga mao ang iyang Anak, si Jesu-Kristo, sa paglukat sa katawhan gikan sa sala ug kamatayon mao ang labing mahigugmaong gasa nga sukad nahimo. “Pinaagi niini ang gugma sa Diyos napadayag sa atong kahimtang, tungod kay gipadala sa Diyos ang iyang bugtong nga Anak sa kalibotan aron kita makabaton ug kinabuhi pinaagi kaniya. Ang gugma maoy niining bahina, dili nga kita nahigugma sa Diyos, kondili siya nahigugma kanato ug nagpadala sa iyang Anak ingong usa ka halad pasig-uli sa atong mga sala.” (1 Juan 4:9, 10) Ingong pagsanong sa maong gugma, hinaot kita makombinsir nga “ni kamatayon ni kinabuhi ni mga manulonda ni mga kagamhanan ni mga butang nga ania karon ni mga butang nga umaabot ni mga gahom ni gihabogon ni giladmon ni uban pang kalalangan makapabulag kanato gikan sa gugma sa Diyos nga anaa kang Kristo Jesus nga atong Ginoo.”​—Roma 8:38, 39.

Pagsubli Niining Artikuloha

◻ Unsay kahulogan nga magmatinumanon?

◻ Sa unsang mga natad sa kalihokan nga atong ikapasundayag ang gugma alang kang Jehova?

◻ Unsang mga bahin sa taho sa tuig sa pag-alagad ang labing nakapaikag kanimo?

◻ Sa unsang paagi kita makapakitag pagpabili sa mahigugmaong mga gasa ni Jehova?

[Kahon sa panid 15]

NGANONG DAGHAN KAAYO ANG MGA PAYUNIR?

Sumala sa taho, sulod sa 2,600 ka tuig ang mga Hapones maoy masibotong mga magsisimba sa ilang mga emperador. Sa mga gubat niining ika-20ng siglo lamang, kapig tulo ka milyong Hapones nga mga sundalo ang nagsakripisyo sa ilang mga kinabuhi, kay sila naghunahuna nga walay labaw nga kadungganan kay sa mamatay tungod sa ilang emperador-diyos. Apan ang Buddhista-Shinto nga militarismo napakyas sa Gubat sa Kalibotan II, ug tapos niadto gisalikway sa emperador ang iyang pagkadiyos. Unsay makapuno sa maong relihiyosong pagkabasiyo? Ikalipay, ang mga pagtuon sa Bibliya sa balay nga gidumala sa mga misyonaryo sa mga Saksi ni Jehova ug sa ulahi sa lumad nga mga Saksi nakatabang sa daghan sa pagkaplag sa matuod nga Diyos, si Jehova, ug sa pagpahinungod sa ilang mga kinabuhi ngadto kaniya. Ang maong pagpahinungod dako ug kahulogan alang sa Hapones nga mga Saksi ni Jehova. Kon sa nangaging panahon sila magsakripisyo unta sa ilang mga kinabuhi alang sa usa ka emperador-diyos, uban sa unsa pa ka dakong kadasig nga sila karon magdeboto sa ilang kusog ingong mga payunir diha sa pagsimba sa buhing Diyos ug Maglalalang sa uniberso​—ang Soberano Ginoong Jehova!

[Chart sa panid 10-13]

1991 SERVICE YEAR REPORT OF JEHOVAH’S WITNESSES WORLDWIDE

(Tan-awa ang tomo)

[Hulagway sa panid 16]

Mga mahigugmaon sa diyosnong kagawasan—mga magsisimba ni Jehova nagkombensiyon sa Prague, Agosto 9-11, 1991