Ikaw Makakaplag ug Kahumpayan sa mga Panahon sa Kagul-anan
SA UNSANG paagi nato lantawon ang mga pagbati sa kaguol? Kon kita dedikado ngadto kang Jehova, angay ba natong lantawon kini nga katingalahan tungod sa atong maanindot nga paglaom ug sa atong espirituwal nga mga kahinguhaan? Ang mao bang mga pagbati nagkahulogang kita dili takos sa espirituwal nga paagi alang sa pag-alagad sa Diyos?
“Si Elias maoy usa ka tawo nga adunay mga pagbating sama sa atoa,” misulat ang tinun-ang si Santiago. (Santiago 5:17) Bisag gigamit sa Diyos si Elias diha sa talagsaon nga paagi, bisan ang maong matinumanong manalagna mibatig kaguol. “Igo na!” miingon si Elias sa usa ka okasyon. “Karon, O Jehova, kuhaa ang akong kalag, kay ako walay kalainan sa akong mga amahan.” (1 Hari 19:4) Ang maghuhupot-sa-integridad nga tawong si Job, ang matinumanong babaye nga si Anna, ug ang ubang maunongong mga alagad ni Jehova nakasinatig kagul-anan. Bisan ang diyosnong salmista nga si David miampo: “Ang mga kagul-anan sa akong kasingkasing nagakadaghan; O luwasa ako gikan sa akong mga kasub-anan.”—Salmo 25:17.
Ang paggamit ni Jehova sa mga tawo diha sa iyang pag-alagad wala maghimo kanila nga bug-os walay suliran. Sila aduna gihapoy tawhanong mga kahuyangan ug mga pagbati ug makasinatig kaguol sa dihang sulayan. (Buhat 14:15) Ugaling, ang mga alagad sa Diyos adunay mas maayong tabang kay sa uban sa pag-atubang sa emosyonal nga kalisod. Atong tagdon ang pipila ka pananglitan sa Bibliya aron makita kon unsay nakatabang sa pipila ka indibiduwal sa pagbuntog sa ilang kaguol sa hunahuna ug mga pagbati sa kasubo.
Naguol nga Apostol Nakakaplag ug Paglipay
Si apostol Pablo nahibalo kon sama sa unsa ang pagbati sa nagmagul-anon. “Sa pagkamatuod,” miingon siya, “sa among pag-abot sa Macedonia, ang among mga lawas wala makakaplag ug pahulay . . . Dihay pakigbugno sa gawas, ug mga kahadlok sa sulod. Apan ang Diyos, nga nagalipay sa mga masulob-on, naglipay kanamo pinaagi sa pag-abot ni Tito.” (2 Corinto 7:5, 6) Ang kasubo ni Pablo gipahinabo sa daghang malisod nga mga kahimtang nga nahitabo sa samang panahon. Dihay “pakigbugno sa gawas”—ang grabeng paglutos nagapameligro sa kinabuhi mismo. (Itandi ang 2 Corinto 1:8.) Dugang pa, dihay “kahadlok sa sulod” diha sa pormang mga kabalaka labot sa mga kongregasyon, sama niadtong usa sa Corinto.
Pipila ka bulan nga sayosayo, nakasulat si Pablo sa iyang unang sulat ngadto sa mga Kristohanon sa Corinto. Diha niana iyang gihukman ang ubay-ubay daotan kaayong mga kahimtang diha sa kongregasyon ug dayag nabalaka kon unsay pagsanong sa mga taga Corinto sa iyang sulat. Apan, si Pablo nahumpayan sa dihang miabot si Tito gikan sa Corinto nga may dalang maayong taho mahitungod sa ilang pagsanong. Sa susama, mahimong gamiton ni Jehova ang usa sa iyang presenteng-adlaw nga mga alagad sa pagdala kanato ug maayong balita ug hupayon ang atong kasubo.
Kon sa Unsang Paagi Lantawon ang Hinatag-sa-Diyos nga mga Buluhaton
Ang pipila ka Kristohanon may igong kaguol maylabot sa ilang ministeryo. Gani, ang pipila sa mga alagad ni Jehova naghunahuna nga ang hinatag-sa-Diyos nga mga buluhaton nagapangayo ug dako kanila sa pagtuman. Pananglitan, gibati ni Moises nga dili-takos nga mahimong hawas sa Diyos alang sa mga Israelinhon sa Ehipto. Lakip sa ubang mga butang, siya miingon nga siya dili usa ka hanas nga mamumulong. (Exodo 3:11; 4:10) Apan may pagsalig sa Diyos ug kang Aaron nga iyang tigpamaba, gisugdan ni Moises pagtuman ang iyang buluhaton.
Sa ulahi si Moises wala na magsalig kang Aaron. Sa susama, ang pipila sa sinugdan malisdan sa Kristohanong ministeryo, apan sila makadawat ug pagbansay ug mahimong hanas nga mga ebanghelisador. Pananglitan, daghang batan-ong mga Saksi ni Jehova nga nanagko nga nahimong bug-os-panahong mga magsasangyaw ingong mga payunir ug mga misyonaryo. Makapalipay nga masayod nga si Jehova sa kanunay masaligan aron mahimong takos nga Kristohanong mga ministro ug nagahatag kanila ug gahom sa pagtuman sa ilang hinatag-sa-Diyos nga mga buluhaton.—Zacarias 4:6; 2 Corinto 2:14-17; Filipos 4:13.
Kahumpayan sa Dihang Hasolon sa mga Pagbasol
Kita tingali maguol tungod kay kita nagbasol nga kita wala makahimog daghan diha sa pag-alagad sa Diyos. Ang usa ka igsoong lalaki nga nahimong diaktibo sa daghang katuigan misugod sa pagpakig-ambit pag-usab diha sa ministeryo sa kanataran. Wala magdugay human niadto, siya nagkasakit ug grabe ug naghigda na lamang kanunay. Ang nasubong igsoon miingon: “Sa una, sa dihang makahimo pa unta ako sa pag-alagad, naglikay ako sa responsabilidad. Karon, nga buot ko nang mahimong aktibo, dili na ako makahimo.”
Dili ba maalamon nga buhaton nato ang kutob sa atong maarangan karon inay kay usikan ang kalagsik sa emosyon sa paghunahuna sa nanghitabo sa miagi? Ang igsoon nga mga lalaki ni Jesus sa inahan nga si Santiago ug Judas wala mahimong mga magtutuo hangtod human sa iyang kamatayon ug pagkabanhaw. Kon sila nagbasol tungod niini, kini wala makapugong kanila gikan sa pagkahimong mga alagad sa Diyos ug bisan sa pagkamagsusulat sa Bibliya.
Ayaw Gayod Kalimot sa Pag-ampo
Sa dihang maguol, ang katawhan sa Diyos kinahanglang mainitong mag-ampo. Ngani, ang Kasulatan naundan ug daghang pag-ampo nga gilitok sa mga panahon sa kaguol. (1 Samuel 1:4-20; Salmo 42:8) Ang pipila tingali maghunahuna: ‘Ako naguol kaayo nga ako dili na makahimo sa pag-ampo.’ Nan nganong dili palandongon si Jonas? Samtang diha sa tiyan sa isda, siya miingon: “Sa dihang gibati ko ang akong kalag nag-anam-anam kahanaw sulod kanako, si Jehova mao ang Usa nga akong nahinumdoman. Unya ang akong pag-ampo midangat diha kanimo, ngadto sa imong balaan nga templo. . . . Uban sa tingog sa pagpasalamat ako magahalad kanimo. Kon unsay akong gipanaad, akong tumanon. Ang kaluwasan iya ni Jehova.” (Jonas 2:4-9) Oo, si Jonas miampo, ug ang Diyos naglipay ug nagluwas kaniya.
Bisag ang usa ka igsoong babaye sa Sweden payunir na sa daghang katuigan, siya sa kalit mibating sinalikway ug naluya bisan pa sa mabungahong ministeryo. Iyang gisulti ang iyang kasubo diha sa pag-ampo ngadto kang Jehova. Pipila ka adlaw sa ulahi, siya nakadawat ug tawag sa telepono gikan sa usa ka igsoong lalaki sa sangang buhatan sa Watch Tower Society. Ang igsoon mihangyo kon siya makatabang ba didto sa mga usa ka adlaw sa usa ka semana labot sa gihimong ekstensiyon sa Bethel. Sa ulahi kini nga igsoong babaye miingon: “Ang atmospera sa Bethel ug ang pagpakabaton sa kahigayonan nga makita ang ekstensiyon nga buluhaton ug ang pagpakig-ambit niana naghatag kanako ug dugang kalig-on nga akong gikinahanglan.”
Kon kita nagmagul-anon, maayong hinumdoman nga ang pag-ampo maoy usa ka paagi sa pagpakig-away sa kaguol. (Colosas 4:2) Sa pagtubag sa atong mga pag-ampo, mahimong pagabuksan ni Jehova ang pultahan nga motultol sa dugang kalihokan diha sa iyang pag-alagad, o mahimo niyang panalanginan ang atong ministeryo uban ang nagauswag nga pagkamabungahon. (1 Corinto 16:8, 9) Sa bisan hain niana, “ang panalangin ni Jehova—mao ang makapadato, ug wala siyay gidugang nga kasubo niana.” (Proverbio 10:22) Kini tinuod nga makabayaw sa atong mga espiritu.
Naguol Ka ba Tungod sa mga Pagduhaduha?
Usahay, ang usa sa mga alagad ni Jehova dunay mga pagduhaduha. Kon kana mahitabo kanato, kita dili angayng mohinapos dayon nga kita nawad-an sa pag-uyon sa Diyos. Wala isalikway ni Jesus si apostol Tomas tungod sa pagduhaduha sa mga taho sa nakasaksi sa pagkabanhaw sa iyang Agalon. Hinunoa, si Jesus mahigugmaong mitabang kang Tomas nga mawala ang iyang mga pagduhaduha. Ug pagkamalipayon ni Tomas sa dihang iyang naamgohan nga si Jesus buhi gayod diay!—Juan 20:24-29.
Pinaagi sa ilang bakak nga mga pagtulon-an, pagbagulbol, ug uban pa, ang “mga tawong dili-diyosnon” nga nakasulod diha sa Kristohanong kongregasyon sa unang-siglo nagpaturok diha sa pipila ug makapaluyang mga pagduhaduha. Busa, ang tinun-an nga si Judas misulat: “Padayon sa pagpakitag kaluoy ngadto sa pipila nga adunay mga pagduhaduha; luwasa sila pinaagi sa pagsakmit kanila gikan sa kalayo.” (Judas 3, 4, 16, 22, 23) Aron padayong makadawat sa maluloy-ong konsiderasyon sa Diyos, ang mga isigkamagsisimba ni Judas—ilabina ang mga ansiano sa kongregasyon—kinahanglang magpakitag pagkamaluloy-on sa mga maduhaduhaon nga takos alang niana. (Santiago 2:13) Ang ilang walay kataposang kinabuhi ang nameligro, kay sila nameligro “sa kalayo” sa walay kataposang kalaglagan. (Itandi ang Mateo 18:8, 9; 25:31-33, 41-46.) Ug pagkadako sa kalipay ang bation sa dihang ang tabang ihatag nga maluluton ngadto sa mga isigkamagtutuo nga dunay mga pagduhaduha ug sila mahimong malig-on sa espirituwal!
Kon ang grabeng mga pagsulay mopahinabo kanatong magduhaduha nga ang Diyos nagauban kanato, kinahanglan nga magmaespesipiko kita sa atong mga pag-ampo. Ubos sa maong mga sirkumstansiya, kita magpadayon sa pagpangayo kang Jehova ug kaalam. Siya nagahatag nga madagayaon nga walay pagpamuyboy kanato tungod sa kakulang sa kaalam ug nagaampo alang niana. Kita kinahanglang “magpadayon sa pagpangayo diha sa pagtuo, dili gayod magduhaduha,” kay ang maduhaduhaon “sama sa usa ka balod sa dagat nga gituyatuya sa hangin ug gianod-anod” sa tanang direksiyon. Kining tawhana walay makuha gikan sa Diyos tungod kay sila dili-makadesisyon, “dili-makanunayon” sa pag-ampo ug diha sa tanan nilang mga dalan. (Santiago 1:5-8) Busa batonan ta ang pagtuo nga si Jehova motabang kanato sa paglantaw sa atong mga pagsulay sa hustong paagi ug makalahutay niana. Ang mga kasulatan mahimong dalhon sa atong pagtagad pinaagi sa atong mga isigkamagsisimba o sa panahon sa pagtuon sa Bibliya. Ang mga hitabo nga gimaneobra pinaagi sa pagtultol sa Diyos makatabang kanato sa pagkakita kon unsay angay natong buhaton. Ang mga manulonda tingali makigbahin sa pagtultol kanato, o kita mahimong makadawat ug giya pinaagi sa balaang espiritu. (Hebreohanon 1:14) Ang pangunang butang mao ang pag-ampo alang sa kaalam uban ang bug-os nga pagsalig sa atong mahigugmaong Diyos.—Proverbio 3:5, 6.
Hinumdomi nga si Jehova Nagahatag ug Paglipay
Si Pablo mainampoon nga misalig kang Jehova ug nahibalo nga siya mao ang Tuboran sa paglipay. Ang apostol misulat: “Dalayegon ang Diyos ug Amahan sa atong Ginoong Jesu-Kristo, ang Amahan sa malumong kaluoy ug ang Diyos sa tanang paglipay, nga nagalipay kanato sa tanan natong kasakit, aron kita makalipay usab niadtong anaa sa bisan unsang kasakit pinaagi sa kalipay diin kita gilipay usab sa Diyos.”—2 Corinto 1:3, 4.
Ang Diyos sa tanang paglipay nahibalo sa kaguol nga nasinati sa iyang mga alagad ug buot nga mohatag kanilag kahupayan. Sa kahimtang sa kabalaka ni Pablo sa mga taga Corinto, ang kahupayan miabot pinaagi sa iyang Kristohanong kauban nga si Tito. Kini maoy usa ka paagi nga kita pagahupayon karong adlawa. Kon kita magul-anon, dili gayod kita magpalain sa atong kaugalingon. (Proverbio 18:1) Ang pakig-uban sa kaubang mga Kristohanon maoy usa sa mga paagi nga kita lipayon sa Diyos. Kita hayan maghunahuna: ‘Ako naguol pag-ayo nga ako walay igong kalig-on nga mahiuban sa akong Kristohanong mga higala.’ Bisan pa, atong pakigbisogan ang maong pagbati ug dili hikawan ang atong kaugalingon sa paglipay nga mahimong ikahatag sa atong mga isigkamagtutuo.
Ayawg Surender!
Ang pipila kanato tingali wala makasinatig pagsulay nga grabe kaayo ang epekto nga tungod niana kita nag-antos sa hilabihang kaguol. Apan ang makapaluyang sakit, ang kamatayon sa usa ka kapikas, o laing masulayon kaayong kahimtang mahimong magdalag kaguol sa emosyon. Kon kana mahitabo, dili kita mohinapos nga kita nagmasakiton sa espirituwal. Ang usa ka tawong nagmagul-anon hayan kuwalipikado kaayo alang sa pag-alagad sa Diyos, makahimo gani sa pagtabang sa uban sa espirituwal. Si Pablo nag-agda sa mga igsoon sa “pagdasig sa nagmagul-anong mga kalag,” dili matahapong maghunahuna nga sila dunay nabuhat nga daotan ug masakiton sa espirituwal. (1 Tesalonica 5:14) Bisag ang kaguol usahay nalangkit sa kasal-anan ug pagkasad-an, kana dili mao ang kahimtang niadtong nag-alagad sa Diyos nga may putling kasingkasing. Ang ilang pagsimba, tingali gihimo uban ang grabe nga kalisod, dalawaton kang Jehova. Siya nahigugma kanila ug motabang kanila uban ang gikinahanglang tabang ug paglipay.—Salmo 121:1-3.
Kadtong naglangkob sa nahibilin sa espirituwal nga Israel naguol kaayo sa mga pagsulay sa tuig 1918. (Itandi ang Galacia 6:16.) Ang ilang organisasyon sa pagsangyaw halos nabungkag, ang pipila kanila sayop nga gibilanggo, ug daghan sa ilang mga kauban kanhi nahimong dili-maunongon, masinupakong mga apostata. Dugang pa, ang matinumanong mga dinihogan wala makasabot kon nganong gitugot sa Diyos nga mahitabo kining tanan. Sa daghang panahon ‘sila nagpugas ug binhi uban ang mga luha,’ apan sila wala mosurender. Sila nagpadayon sa pag-alagad kang Jehova ug usab nagsusi sa ilang kaugalingon. Ang resulta? Sila ‘miabot uban ang singgit sa kalipay, nga dinala ang ilang mga binangan.’ (Salmo 126:5, 6) Karon ang mga dinihogan nakaamgo nga gitugot sa Diyos ang maong mga pagsulay aron sa pagputli kanila alang sa ilang nagakahiduol internasyonal nga buluhatong pagpangani.
Kon kita maguol man gayod tungod kay nahupngan sa nagkalainlaing mga pagsulay, kita makabatog kaayohan gikan sa kasinatian sa dinihogang nahibilin. Imbes mohunong, magpadayon kita sa pagbuhat kon unsay matarong, bisan kon kinahanglang buhaton nato kana samtang nagahilak. Sa kapulihay, may paagi nga kita makalingkawas gikan sa atong mga pagsulay, ug kita unya ‘moabot uban ang singgit sa kalipay.’ Oo, kalipay—usa ka bunga sa balaang espiritu sa Diyos—atong maangkon tungod sa paglahutay sa atong mga pagsulay. Alang kanato, si Jehova mapamatud-ang “ang Diyos sa tanang paglipay.”