Isalikway ang Kalibotanong mga Panghanduraw, Tinguhaa ang mga Kamatuoran sa Gingharian
“Nan, padayong pangitaa pag-una ang gingharian ug ang iyang pagkamatarong, ug ang tanang ubang mga butang igadugang ra kaninyo.”—MATEO 6:33.
1. Unsang pasidaan ang gihatag sa Pulong sa Diyos labot sa mahulagwayong kasingkasing, ug unsa ang usa sa pangunang mga paagi nga kini nagalimbong kanato?
“LABAW sa tanan nga angayng pagaampingan, ampingi ang imong kasingkasing, kay gikan niini mao ang mga tuboran sa kinabuhi.” (Proverbio 4:23) Nganong kinahanglang ihatag sa maalamong Haring Solomon kining pasidaana? Tungod kay “ang kasingkasing malimbongon labaw sa tanan ug nawad-an ug paglaom.” (Jeremias 17:9) Usa sa pangunang mga paagi nga ang atong mahulagwayong kasingkasing makalimbong kanato maoy pinaagi sa pagtukmod kanato sa pagpakigbahin sa kalibotanong mga panghanduraw. Apan unsa man kining mga panghanduraw? Kini maoy dili-tinuod nga mga imahinasyon, magpangdamgo, mga paglatagaw sa hunahunang walay opisyo. Sa dihang kining mga damgoha mahimong kalibotanong mga panghanduraw, kini dili lamang pag-usik ug panahon apan usab makadaot pag-ayo. Busa, atong isalikway kini sa bug-os. Sa pagkatinuod, kon atong dumtan ang pagkadaotan sama sa gibuhat ni Jesus, kita nagabantay sa atong kasingkasing batok sa pagpakigbahin sa kalibotanong mga panghanduraw.—Hebreohanon 1:8, 9.
2. Unsa ang kalibotanong mga panghanduraw, ug nganong atong isalikway sila?
2 Apan unsa ang kalibotanong mga panghanduraw? Kini maoy mga panghanduraw nga kinaiyahan niining kalibotana nga anaa sa gahom ni Satanas. Mahitungod niini, si apostol Juan misulat: “Ang tanan sa kalibotan—ang pangibog sa unod ug ang pangibog sa mga mata ug ang mapagawalong pagpasundayag sa panginabuhian sa usa—wala magagikan sa Amahan, apan nagagikan sa kalibotan.” (1 Juan 2:16; 5:19) Nganong kinahanglang isalikway sa mga Kristohanon ang kalibotanong mga panghanduraw? Tungod kay ang maong mga panghanduraw mopukaw ug mahakogong mga pangibog sa hunahuna ug kasingkasing. Ang pagpangdamgo sa pagbuhat ug daotan sa pagkamatuod maoy pag-ensayo diha sa hunahuna kon unsay aktuwal nga buhaton sa usa ka tawo. Ang tinun-ang si Santiago nagpasidaan: “Ang matag usa matintal sa diha nga madaldal ug mahaylo siya sa iyang kaugalingong pangibog. Unya ang pangibog, sa makapanamkon na, magapahimugsog sala; ug ang sala inigkagulang na, manganak ug kamatayon.”—Santiago 1:14, 15.
Mga Panig-ingnang Pasidaan
3. Labot sa kang kinsang kaso ang nagahatag sa labing dakong pasidaang panig-ingnan sa pagkadaotan sa mahakogong mga panghanduraw?
3 Atong tagdon ang mga panig-ingnan nga nagpakita kon nganong ang kalibotanong mga panghanduraw kinahanglang isalikway. Ang kaso ni Satanas nga Yawa nagataganag labing dakong panig-ingnan sa kadaot nga mosangpot sa mahakogong pagpanghanduraw. Iyang gitugotang maugmad ang mga pagbati sa pagpabili-sa-kaugalingon diha sa iyang kasingkasing sa sukod nga siya nasina sa talagsaong posisyon ni Jehova ingong Magmamando sa Uniberso ug nagtinguha nga pagasimbahon. (Lucas 4:5-8) Usa ba ka dili-tinuod nga panghanduraw? Tino gayod! Kana unya kapamatud-an sa bug-os sa dihang si Satanas pagagapuson sulod sa usa ka libo ka tuig ug ilabina gayod sa dihang siya igatambog ngadto “sa linaw nga kalayo,” ang ikaduhang kamatayon.—Pinadayag 20:1-3, 10.
4. Sa unsang paagi nalimbongan ni Satanas si Eva?
4 Kita dunay laing panig-ingnan nga pasidaan diha sa kaso sa unang babaye, si Eva. Sa paningkamot ni Satanas aron makab-ot ang iyang ambisyon, iyang gihaylo si Eva pinaagi sa pagpresentar ngadto sa iyang hunahuna ug handurawan nga kon siya mokaon sa gidili nga bunga sa kahoy, siya dili mamatay kondili mahisama sa Diyos, mahibalo sa maayo ug sa daotan. Ang mao bang panghanduraw dili-tinuod, mahakogon? Tino, segun sa atong makita gikan sa paghukom ni Jehova kang Eva ug sa iyang bana, si Adan, sa dihang gihusay ug gisilotan sila ni Jehova. Ingong resulta, nawad-an sila sa katungod nga mabuhi diha sa Paraiso alang sa ilang kaugalingon ug alang sa tanan nilang dili-hingpit nga kaliwat.—Genesis 3:1-19; Roma 5:12.
5. Unsay nakaingon sa pagkahulog sa pipila ka manulondang mga anak sa Diyos, ug uban sa unsang resulta kanila?
5 Kita usab adunay panig-ingnan nga pasidaan sa pipila ka manulondang mga anak sa Diyos. (Genesis 6:1-4) Imbes matagbaw sa mga panalangin nga ilang gitagamtam didto sa langitnong presensiya ni Jehova, nagpanghanduraw sila mahitungod sa mga babaye sa yuta ug sa kalipay sa pagpakigrelasyon sa sekso uban kanila. Tungod kay gibuhat kining maong mga panghanduraw, ang masupilong mga manulonda karon gibilanggo diha sa espirituwal nga kangitngit sa Tartarus, nga nagapaabot sa ilang kalaglagan sa kataposan sa Usa ka Libo ka Tuig nga Pagmando ni Jesu-Kristo.—2 Pedro 2:4; Judas 6; Pinadayag 20:10.
Isalikway ang Kalibotanong mga Panghanduraw
6, 7. Nganong ang kalibotanong mga panghanduraw bahin sa materyal nga bahandi makadaot ug malimbongon?
6 Ato karong tagdon ang usa sa labing komun ug peligrosong mga panghanduraw nga gipasiugda ni Satanas. Pinaagi sa tanang matang sa palumagian sa balita, kita matintal sa kalibotanong mga pagpanghanduraw. Kini sagad ipahinabo pinaagi sa usa ka pangibog sa bahandi. Sa iyang kaugalingon, dili daotan ang pagbatog bahandi. Ang diyosnong si Abraham, Job, ug Haring David maoy mga adunahan kaayo, apan sila wala mangandoy ug materyal nga bahandi. Ang materyalistikong mga panghanduraw modasig sa mga tawo sa paghago ug trabaho sa daghang tuig aron makabatog bahandi. Ang maong panghanduraw motukmod usab kanila sa pagpakigbahin sa tanang matang sa sugal, sama sa pagpusta sa lumba sa kabayo ug sa pagpalit ug mga tiket sa loteriya. Dili nato abiabihon ang bisan unsang ilusyon mahitungod sa bahandi. Kon atong gihunahuna nga ang materyal nga bahandi makahatag ug kasegurohan, palandonga kining tinuod nga sanglitanan: “Ang bahandi dili magapulos sa adlaw sa kaligutgot, apan ang pagkamatarong nagaluwas sa tawo gikan sa kamatayon.” (Proverbio 11:4) Sa pagkamatuod, ang materyal nga bahandi dili magpulos aron maluwas sa “dakong kasakitan.”—Mateo 24:21; Pinadayag 7:9, 14.
7 Ang materyal nga bahandi dali nga makalimbong kanato. Mao nga kita gisultihan: “Ang bahandi sa usa ka adunahan nga tawo maoy iyang malig-on nga siyudad, ug nga kini ingon sa hataas nga kuta sa iyang kaugalingong hunahuna.” (Proverbio 18:11) Oo, diha lamang “sa iyang hunahuna,” kay ang materyal nga bahandi walay ikahatag nga panalipod sa mga panahong dili makontrolar ang implasyon, pagkahapay sa ekonomiya, kagubot sa politika, o makamatay nga sakit. Si Jesu-Kristo nagpasidaan batok sa kabuangan sa pagsalig sa materyal nga bahandi. (Lucas 12:13-21) Kita usab dunay mapasidan-ong mga pulong ni apostol Pablo: “Ang gugma sa salapi maoy gamot sa tanang makadaot nga mga butang, ug pinaagi sa pagpangab-ot nianang gugmaha ang pipila nahimulag hinoon gikan sa pagtuo ug ginaduslak ang ilang kaugalingon sa daghang kasakitan.”—1 Timoteo 6:10.
8. Unsa ka kaylap ang kalibotanong mga panghanduraw may kalabotan sa sekso, ug unsang mga kapeligrohan ang ginahatag niini?
8 Ang laing mga panghanduraw nalangkit sa gidili nga sekso. Ang sukod sa pagkagusto sa makasasalang kinaiyahan sa tawo sa pagpanghanduraw labot sa sekso makita diha sa popularidad sa mahugaw nga sinultihan nga mabatonan pinaagi sa pagdayal sa pila ka mga numero sa telepono ug sa pagpamati sa pornograpikong mga mensahe. Sa Tinipong Bansa, ang pornograpikong mga serbisyo nga mabatonan pinaagi sa telepono maoy usa ka multi-bilyong dolyar nga negosyo. Kon tugotan natong papuy-on ang atong mga hunahuna nga maghanduraw sa gidili nga sekso, dili ba kita mga salingkapaw, nagapadayag nga daw hinlong mga Kristohanon? Ug wala bay kapeligrohan nga ang maong panghanduraw mahimong motultol sa imoral nga relasyon? Kini nahitabo ug maoy hinungdan nga ang pipila gipalagpot gikan sa Kristohanong kongregasyon tungod kay nakapakighilawas o nakapanapaw. Tungod sa mga pulong ni Jesus diha sa Mateo 5:27, 28, dili ba ang tanan nga nagapadayon sa pagpanghanduraw sad-an sa pagpanapaw diha sa ilang mga kasingkasing?
9. Unsang maayong tambag ang makita sa Kasulatan nga nagpasidaan kanato batok sa kalibotanong mga panghanduraw?
9 Aron mabuntog ang kiling sa atong makasasalang mga kasingkasing sa maong pagpanghanduraw, angay natong hinumdoman ang pasidaan ni Pablo: “Walay binuhat nga natago sa panan-aw sa [Diyos], apan ang tanang butang binuksan ug dayag sa mga mata niya kang kinsa magahatag ra unya kitag husay.” (Hebreohanon 4:13) Kita sa tanang panahon buot nga mahisama kang Moises, kinsa “nagpadayong malig-on ingon sa daw nakakita sa Usa nga dili-makita.” (Hebreohanon 11:27) Oo, kinahanglang padayon natong sultihan ang atong kaugalingon nga ang kalibotanong mga panghanduraw dili-makapahimuot kang Jehova ug moresulta lamag kadaot sa atong kaugalingon. Kita kinahanglang mabalak-on bahin sa pag-ugmad sa tanang bunga sa balaang espiritu sa Diyos, ilabina ang pagpugong sa kaugalingon, kay dili nato kalikayan ang kamatuoran nga kon kita magapugas sa unod, kita magaanig pagkadunot sa unod.—Galacia 5:22, 23; 6:7, 8.
Ang mga Kamatuoran sa Gingharian
10, 11. (a) Unsang mga kamatuoran ang nagpamatuod sa pagkatinuod sa Maglalalang? (b) Unsa ang pamatuod nga ang Bibliya sa pagkatinuod maoy Pulong sa Diyos? (c) Unsa ang ebidensiya sa pagkatinuod sa Hari sa Gingharian sa Diyos?
10 Ang labing maayong paagi sa pagsalikway sa kalibotanong mga panghanduraw mao ang pagpadayon sa pagtinguha sa mga kamatuoran sa Gingharian. Ang mga kamatuoran sa Gingharian nga gipatungha sa Diyos nagabarog nga lahi sa kalibotanong mga panghanduraw. Ang Diyos ba usa ka kamatuoran? Walay pagduhaduha bahin sa iyang paglungtad. Ang makitang mga kalalangan nagapamatuod nianang kamatuorana. (Roma 1:20) Kita gipahinumdoman sa ginaingon sa kapin nag usa ka gatos ka tuig nga miagi diha sa librong The Divine Plan of the Ages, nga gipatik sa Watch Tower Society. Kini nag-ingon: “Siya nga makatan-aw sa langit pinaagig teleskopyo, o bisan sa iyang kinaiyanhong mata lamang, ug makakita didto sa kadako sa iyang kalalangan, sa pagkaangay niini, sa katahom, kahusay, kaharmoniya ug panagkadaiya, ug magduhaduha gihapon nga ang Maglalalang niini labaw kaayo ug kaalam ug gahom, o kinsay makahunahuna sa daklit nga ang maong kahusay sulagmang mitungha, nga walay usa ka Maglalalang, sa dakong sukod nawad-an o way-pagbalibali sa gahom sa pangisip nga tukmang malantaw sumala sa pagtawag sa Bibliya kaniya, nga usa ka buang (usa nga way-pagbalibali o kulang ug pangisip).”—Salmo 14:1.
11 Kita nakakat-on sa tanan mahitungod sa Gingharian diha sa Balaang Bibliya. Ang Bibliya ba sa tinuod mao ang sinulat nga Pulong sa Diyos? Tino gayod, ingon sa atong makita gikan sa panag-uyonay niini, sa katukma sa siyensiya niini, ug sa gahom niini sa pag-usab sa mga kinabuhi sa mga tawo ug ilabina sa mga katumanan sa mga tagna niini.a Komosta ang bahin sa Hari sa Gingharian sa Diyos, si Jesu-Kristo? Siya ba tinuod gayod nga naglungtad? Ang mga asoy sa Ebanghelyo ug ang dinasig sa Diyos nga mga sulat sa Kristohanon Gregong Kasulatan matin-aw ug kusganong nagpamatuod sa pagkamakasaysayanhon ni Jesu-Kristo. Mahitungod sa pagkamakasaysayanhon ni Jesus, adunay pamatuod usab ang Hudiyohanong Talmud, nga naghisgot kaniya ingong usa ka tawo. Maingon man ang mga historyador nga Hudiyohanon ug Romanhon sa unang siglo K.P.
12, 13. Unsang mga kamatuoran ang nagpamatuod sa kamatuoran sa Gingharian sa Diyos?
12 Komosta ang bahin sa kamatuoran sa Gingharian? Kini wala panumbalinga sa Kakristiyanohan, sama sa gipakita niini nga reklamo sa usa ka iladong Presbyteriano: “Kapin nag katloan ka tuig sukad nga ako nakabatig usa ka ministro nga misulay sa pagpatin-aw sa iyang mga tawo sa kamatuoran sa Gingharian kanila.” Apan, ang pagbalaan sa ngalan ni Jehova pinaagi sa Gingharian mao ang tema sa iyang Pulong. Ang Diyos mismo ang mihatag sa unang saad sa Gingharian, nga nag-ingon: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magasamad kanimo sa ulo ug ikaw magasamad kaniya sa iyang tikod.” (Genesis 3:15) Ang Gingharian gilandongan sa nasod sa Israel, ilabina sa panahon sa pagmando ni Haring Solomon. (Salmo 72) Dugang pa, ang Gingharian mao ang tema sa pagsangyaw ni Jesus. (Mateo 4:17) Iyang gilakip kini diha sa kadaghanan sa iyang mga ilustrasyon, sama nianang sa Mateo kapitulo 13. Gisultihan kita ni Jesus nga mag-ampo alang sa Gingharian ug magpadayon sa pagpangita niini pag-una. (Mateo 6:9, 10, 33) Sa pagkamatuod, ang Gingharian sa Diyos gihisgotan sa halos 150 ka beses diha sa Kristohanon Gregong Kasulatan.
13 Ang Gingharian maoy tinuod nga kagamhanan, nga may gahom ug awtoridad, ug kini magatuman sa tanang matarong nga mga ginapaabot. Kini adunay hugpong sa mga balaod, nga makita diha sa Bibliya. Ang Gingharian nakatuman na sa daghang mga butang. Kini adunay maunongong mga sakop—kapin sa 4,000,000 ka mga Saksi ni Jehova. Diha sa 211 ka nasod sila nagasangyaw sa maayong balita sa Gingharian sa Diyos, ingon nga katumanan sa Mateo 24:14. Sulod sa ilang 1991 tuig nga pag-alagad, sila migugol ug 951,870,021 ka oras sa pagsangyaw sa mensahe sa Gingharian. Kini nga kalihokan nagapatunghag tinuod, malungtarong mga resulta samtang daghan ang nagpakakat-on sa “putling pinulongan” sa kamatuoran sa Bibliya—Sofonias 3:9.
Tinguhaa ang mga Kamatuoran sa Gingharian
14. Sa unsang paagi atong mapalig-on ang atong pagpabili sa kamatuoran sa Gingharian?
14 Nan, sa unsang paagi atong tinguhaon ang mga kamatuoran sa Gingharian? Ang atong paglaom kinahanglang lig-ong gipasukad diha sa malig-ong pagtuo. Ang gisaad sa Diyos nga bag-ong kalibotan kinahanglang tinuod gayod alang kanato. (2 Pedro 3:13) Ug kita kinahanglang dunay pagtuo diha sa saad nga ang Diyos “magapahid sa tanang luha gikan sa [atong] mga mata, ug ang kamatayon mawala na, wala na usab unyay pagbalata ni paghilak ni kasakit pa.” (Pinadayag 21:4) Sa unsang paagi kita makaseguro nga kini dili panghanduraw? Kini tinong mahitabo sa gitakdang panahon sa Diyos, kay siya dili gayod mamakak. (Tito 1:1, 2; Hebreohanon 6:18) Kinahanglang atong palandongon ang maong mga saad. Ang paghulagway sa atong kaugalingon diha sa bag-ong kalibotan sa Diyos ug nagatagamtam sa mga panalangin niini dili kay usa ka dili tinuod nga panghanduraw kondili nagahatag ug pamatuod sa pagtuo. Ingon sa paghubit ni Pablo niini, “ang pagtuo mao ang pasalig sa mga butang nga atong ginapaabot, ang makitang kapasundayagan sa mga kamatuoran bisag wala pa nato makita.” (Hebreohanon 11:1) Atong palig-onon ang atong pagtuo pinaagi sa regular nga pagkaon sa Pulong sa Diyos ug sa Kristohanong mga publikasyon nga motabang kanato sa pagsabot ug sa pagpadapat niana. Ug kon mas daghang panahon ang atong magugol sa pagsulti sa uban mahitungod sa Gingharian, sa pormal ug di-pormal nga paagi, mas dugang nga atong ginapalig-on ang atong pagtuo ug ginapasanag ang atong paglaom diha niana.
15. Unsa ang atong obligasyon labot sa Kristohanong ministeryo?
15 Kinahanglang molihok usab kita uyon sa mga kamatuoran sa Gingharian pinaagi sa pagpauswag sa kalidad sa atong ministeryo. Sanglit dako pa man ang pagabuhaton pa, sa unsang paagi atong mahimo kini? (Mateo 9:37, 38) Ang panultihon maoy tinuod walay usa nga tigulang na aron sa pagkat-on. Bisag daghan nang katuigang nagapakig-ambit kita sa buluhatong pagsangyaw, kita makapauswag pa. Pinaagi sa pagkahimong mas epektibo sa paggamit sa Pulong sa Diyos, kita mas makatabang pa sa uban nga makapatalinghog sa tingog sa Hari, si Jesu-Kristo. (Itandi ang Juan 10:16.) Sa dihang atong palandongon nga ang walay kataposang mga dulnganan sa mga tawong nalangkit, atong bug-os nga kobrehan ang atong mga teritoryo aron kahatagan sila sa balik-balik nga mga higayon sa pagpasundayag kon asa sila mobarog, kon kaha ingong “mga karnero” o ingong “mga kanding.” (Mateo 25:31-46) Siyempre, kana nagpasabot sa paghupot ug maayong rekord sa mga tawong wala sa balay ug ilabina sa interesado sa mensahe sa Gingharian.
Padayong Tinguhaa ang Gingharian
16. Kinsa ang naghatag ug usa ka maayong panig-ingnan sa pagtinguha sa mga kamatuoran sa Gingharian, ug sa unsang paagi ilang “gisakmit” ang Gingharian?
16 Ang tim-os nga paningkamot maoy gikinahanglan aron makapadayon sa pagpangita sa mga kamatuoran sa Gingharian. Wala ba kita madasig sa masibotong panig-ingnan sa nahibiling dinihogang mga Kristohanon? Sila nagatinguha sa mga kamatuoran sa Gingharian sa daghang mga dekada. Kini nga pagtinguha gihubit sa mga pulong ni Jesus: “Gikan sa mga adlaw ni Juan Bawtista hangtod karon ang gingharian sa mga langit mao ang tumong nga gipakigbisogan sa mga tawo, ug gisakmit kini niadtong nagapakigbisog niini.” (Mateo 11:12) Dinhi ang ideya maoy dili labot sa mga kaaway nga nagasakmit sa Gingharian. Hinunoa, kining may kalabotan sa kalihokan niadtong nahilinya alang sa Gingharian. Ang usa ka eskolar sa Bibliya miingon: “Ingon niini nga paagi gihubit kanang kahinangop, dili-kapugngang paningkamot ug pakigbisog alang sa nagsingabot Mesiyanikong gingharian.” Ang mga dinihogan naningkamot pag-ayo nga mailaha ang Gingharian. Ang susamang kusganong mga paningkamot gikinahanglan sa “ubang mga karnero” aron sila mahimong takos ingong yutan-ong mga sakop sa langitnong Gingharian sa Diyos.—Juan 10:16.
17. Unsa unyay sangpotanan niadtong nagatinguha sa kalibotanong mga panghanduraw?
17 Sa pagkamatuod, kita nagakinabuhi na diha sa usa ka linaing yugto sa kahigayonan. Kadtong kinsa nagatinguha sa kalibotanong mga panghanduraw sa umaabot makaamgo unya sa kamatuoran. Ang ilang bahin maayong pagkahubit niining mga pulonga: “Sama sa mahitabo sa usa ka tawong gigutom nga nagdamgo nga siya nagkaon; ug nahigmata siya nga ang iyang kalag gigutom gihapon; sama sa usa ka tawong giuhaw nga nagdamgo nga siya nag-inom, ug siya nahigmata nga luya ug ang iyang kalag giuhaw.” (Isaias 29:8) Sa pagkatinuod, ang mga panghanduraw sa kalibotan dili makahatag kang bisan kinsa ug katagbawan ug kalipay.
18. Tungod sa kamatuoran sa Gingharian, unsang dalan ang angay natong subayon, uban sa unsang palaaboton?
18 Ang Gingharian ni Jehova maoy kamatuoran. Kini aktibo nang nagamando, samtang kining daotang sistema sa mga butang nagaatubang sa usa ka nagakaduol, dumalayong kalaglagan. Busa, ibutang sa kasingkasing ang tambag ni Pablo: “Dili kita mangatulog, sama sa ginabuhat sa uban, hinunoa managtukaw kita ug magmahusay sa hunahuna.” (1 Tesalonica 5:6) Hinaot nga ang atong mga kasingkasing ug mga hunahuna padayong nagatutok sa mga kamatuoran sa Gingharian ug busa makatagamtam sa dayon nga mga panalangin. Ug hinaot unta nga mahimong atong bahin nga makabati sa Hari niana nga Gingharian nga moingon kanato: “Umari kamo, nga gipanalanginan sa akong Amahan, panunda ninyo ang gingharian nga giandam alang kaninyo sukad pa sa pagkatukod sa kalibotan.”—Mateo 25:34.
[Footnote]
a Tan-awa ang librong Ang Bibliya—Pulong ba sa Diyos o sa Tawo? nga gipatik sa Watchtower Bible and Tract Society of New York, Inc.
Unsaon Nimo Pagtubag?
◻ Unsa ang kalibotanong mga panghanduraw, ug nganong angay natong isalikway sila?
◻ Unsang mga panig-ingnan ang nagpakita sa kabuangan sa kalibotanong mga pagpanghanduraw?
◻ Unsang mga kamatuoran ang nagpamatuod sa pagkatinuod sa Maglalalang, sa iyang sinulat nga Pulong, ug ni Jesu-Kristo, ug sa iyang Gingharian?
◻ Sa unsang paagi atong mapalig-on ang atong pagtuo sa mga kamatuoran sa Gingharian?
[Hulagway sa panid 15]
Ang kalibotanong mga panghanduraw sagad ipahinabo pinaagi sa pagtinguha ug materyal nga bahandi
[Hulagway sa panid 16]
Ang pagsangyaw sa maayong balita maoy usa ka paagi sa pagtinguha sa mga kamatuoran sa Gingharian
[Hulagway sa panid 17]
Ikaw ba nagatinguha sa mga kamatuoran sa Gingharian pinaagi sa masibotong pagtuon sa Pulong sa Diyos?