Mga Magmamantala sa Gingharian Nagtaho
Pagpasidlak sa Ilang Kahayag sa India
ANG maayong balita sa Gingharian ginawali sa India sa 11,524 ka masadyaong mga Saksi. (Mateo 24:14) Ang 1,066 nga nabawtismohan sulod sa 1991 tuig sa pag-alagad maoy mga magmamantala sa Gingharian, nga nagapasidlak sa ilang kahayag ngadto sa uban. Pagkamalipayon sa tanan sa pagkakitang 28,866 mingtambong sa saulog sa Memoryal sa kamatayon ni Kristo!
◻ Daghan unang nakahibalo sa paglaom sa Gingharian pinaagi sa impormal nga pagsangyaw. Pananglitan, usa ka Saksi nakigsulti bahin sa Gingharian ngadto sa iyang mga kauban sa trabaho, kinsa mga panday usab. Usa ka kauban sa trabaho misanong ug misugod sa pagpasidlak sa iyang kahayag ngadto sa iyang pamilya ug mga higala. Kini sila sa kamalipayon nagpasa niining kahibulongang mensahe sa Gingharian ngadto sa uban. Sumala sa mga taho, sa pila ra ka tuig, ‘kapin sa 30 ka tawo nagdawat sa kamatuoran.’ Si Jehova nagpanalangin kaniya ug sa iyang bag-ong espirituwal nga mga igsoon tungod sa pagpasidlak sa ilang kahayag.
◻ Usa ka batan-ong brader sa laing kongregasyon nagpasidlak sa iyang kahayag pinaagi sa pagsangyaw nga impormal ngadto sa kaubang mga estudyante sa eskuylahan. Pipila kanila nainteres sa paglaom sa Gingharian, ug siya makadaghan nagpatin-aw sa Bibliya ngadto kanila hangtod sa lapas sa tungang gabii. Ang usa, nga usa ka Katoliko, mibarog nga malig-on sa kamatuoran bisan pag gipasidan-an sa pari sa daotang sangpotanan kon mopadayon siya sa pagpakig-uban sa Saksi. Bisan pa niana, ang estudyante kombinsido nga siya nakakat-on sa kamatuoran sa Bibliya gikan sa mga Saksi, ug siya nagpadayon sa pagbaton ug kahibalo. Sa kadugayan siya nabawtismohan ug karon nagaalagad ingong ministeryal nga alagad diha sa kongregasyon. Siya nagkalipay sa paglaom nga sangpotanan sa kahibulongang kahayag sa kamatuoran!—Roma 12:12.
◻ Ang lain nga namati niining batan-ong Saksi maoy ilado nga estudyante, usa ka ateyista, kinsa tigtamay niadtong nangangkon sa pagtuo sa Diyos, apan usa ka adlaw miapil siya sa panaghisgot ug nangutanag daghang pangutana. Siya natingala sa diha nga iyang nabatonan ang makataronganong mga tubag sa tanan niyang pangutana ug nahidangat sa konklusyon nga ang Bibliya maoy Pulong sa Diyos. Siya miuswag sa kahibalo sa Bibliya ug sa kataposan nabawtismohan. Ang iyang Hindu nga amahan misupak kaniya sa punto nga gipapahawa siya gikan sa iyang balay. Bisan pa niana, ang lig-ong pagbarog sa kamatuoran niining maong ulitawo gigantihan sa dihang duha sa iyang mga igsoong lalaki sa unod ug duha sa iyang mga higala mingdawat sa kamatuoran ug nabawtismohan. Usa sa iyang mga igsoon karon nagaalagad sa sangang buhatan sa India.
◻ Usa ka organisador sa estudyante miapil usab sa mga panaghisgot uban sa batan-ong Saksi. Siya labihan ka hinabako ug kusog moinom. Sa usa ka panahon, buot niyang bukbokon ang duha ka kaubang estudyante nga nakakat-on sa kamatuoran gikan sa Saksi. Tungod sa pagdawat sa kamatuoran, sila mingdumili sa pagduyog sa usa ka welga sa kolehiyo ug dili usab modonar ug dugo panahon sa kampanya sa pagpangolektag dugo nga gipangunhan sa organisador sa estudyante. Kining batan-ona karon malipayon nga nahimong usa ka magdadala-sa-kahayag nga Saksi ni Jehova.
◻ Tanantanan, ang estudyante nga unang nagpasidlak sa iyang kahayag nakatabang ug 15 sa iyang mga isigkaingon ngadto sa pagpahinungod ug bawtismo pinaagi sa pagsangyaw nga impormal kanila.
Makalipay ang pagtan-aw nga daghan nianang labihan ka dakong yuta nagdawat sa paglaom sa Bibliya sa bag-ong kalibotan sa Diyos ug miduyog sa tibuok-kalibotan nga pag-igsoonay nga ginatigom ni Jehova nga Diyos aron mabuhing walay kataposan ubos sa iyang Gingharian.