Mga Magmamantala sa Gingharian Nagtaho
Espirituwal nga Liberasyon sa Colombia
SUKAD sa panahon sa mga mananakop nga Espanyol, ang Katolisismo mituok sa relihiyon sa Habagatang Amerika. Sa Colombia dugay na kining opisyal nga relihiyon sa Estado. Sulod sa milabayng 105 ka tuig, ang Batikano may kasabotan uban sa kagamhanan sa Colombia nga nagpanalipod sa simbahan ug naghatag niana ug espesyal nga mga pribilehiyo diha sa mga natad sa edukasyon ug kaminyoon.
Niadtong Disyembre 1990 ang mga taga-Colombia nagpili ug usa ka komisyon sa paglaraw ug bag-ong batakang-balaod, nga natapos sa tungatunga sa 1991. Ang bag-ong batakang-balaod nag-usob sa relihiyosong kahimtang sa Colombia. Ang tanang relihiyon sa pagkakaron may samang mga katungod nga sumala sa balaod, ug ang relihiyosong instruksiyon dili na ikapugos sa mga bata diha sa publikong mga tunghaan. Ang kasabotan uban sa Batikano rebisahonon na sa paghunahuna niining mga kausaban sa batakang-balaod.
Kining dako-dakong relihiyosong kagawasan mopakunhod sa impluwensiya sa Katolikong Simbahan, nga magpasayon alang sa matinud-anon ug kasingkasing nga mga tawo sa pagbaton ug kahibalo sa Bibliya ug makakab-ot sa espirituwal nga kagawasan.
Sa pagpaabot niining espirituwal nga liberasyon, ang 51,000 nga mga Saksi ni Jehova diha sa nasod nagapangandam na sa pag-atiman alang sa espirituwal nga mga kagiw. Ang ilang bag-ong mga tinukod sa sanga uban sa pinadako nga mga pasilidad, nga naglakip sa high-speed upat-ug-kolor nga offset press, hapit nang matapos. Gipadalhan ug temporaryong mga espesyal payunir ang gagmayng mga lungsod aron pangitaon ang nawala nga karnero ni Jehova ug nakalampos ug tagsaong edukasyonal nga buluhaton sa Bibliya. Sa 63 ka mga lungsod, nga kada usa may mga 10,000 ka lungsoranon, 47 ka bag-ong mga kongregasyon ug mga grupo ang naporma.
Samtang ang espiritu ni Jehova padayon nga nagapalihok sa matinud-anon-ug-kasingkasing nga mga tawo, daghang mga batan-on usab ang nagasanong. Ang publikasyon nga Mga Pangutanang Gisukna sa mga Batan-on—Mga Tubag nga Mosaler napamatud-an nga usa ka bililhong tabang alang sa mga batan-on ug sa ilang mga ginikanan. Samtang namalaybalay, usa ka Saksi nakahibalag ug usa ka tawo nga nakabasa sa mga bahin niining libroha, nga gipahulam kaniya sa usa ka silingan. Siya nakadayeg pag-ayo sa praktikal nga kaalam nga gipasundayag niini sa paghisgot sa mga suliran sa pamilya. Ang kapitulo 4, “Nganong Nagbulag si Papa ug si Mama?” sa linain nakadani kaniya, kay siya ug ang iyang asawa hapit nang magbulag. Siya nag-ingon nga ang libro nagluwas kaniya gikan sa usa ka dakong trahedya. Karon siya ug ang iyang pamilya nagatuon na sa Bibliya uban sa mga Saksi ni Jehova ug tigtambong na sa tanang mga tigom sa kongregasyon. Sila mapasalamaton pag-ayo tungod sa praktikal nga kaalam nga gitagana ni Jehova pinaagi sa Bibliya ug sa iyang organisasyon.
Kining kasinatiana nag-ilustrar sa espirituwal nga liberasyon nga nagakahitabo sa Colombia samtang ang mga Saksi ni Jehova nagatabang sa mga gigutom sa espirituwal sa pagkat-on sa kahibulongang mga katuyoan ni Jehova ug sa iyang bag-ong kalibotan, nga karon haduol na.—2 Pedro 3:13.