Pagpangita sa Yawi sa Inigsoong Pagbati
“Idugang sa inyong . . . diyosnong debosyon ang inigsoong pagbati.”—2 PEDRO 1:5-7.
1. Unsa ang usa sa pangunang mga katarongan kon nganong ang mga panagkatigom sa katawhan ni Jehova maoy malipayong mga okasyon?
KAS-A usa ka doktor nga dili Saksi ni Jehova mitambong sa graduwasyon sa iyang anak nga babaye gikan sa Watch Tower Bible School of Gilead, diin ang iyang anak gibansay sa pagkamisyonarya. Siya nakadayeg kaayo sa malipayong panon nga tungod niana siya nakaingon nga segurado diyutay lang ang adunay sakit taliwala niining mga tawhana. Unsay hinungdan nga ang maong panon malipayon man kaayo? Bahin niana, unsay nakapahimo sa tanang tigom sa katawhan ni Jehova, sa mga kongregasyon, sa sirkitong mga asembliya, ug sa distritong mga kombensiyon, nga malipayong mga okasyon? Dili ba ang inigsoong pagbati nga ilang gipakita alang sa usag usa? Walay duhaduha, ang inigsoong pagbati maoy usa ka katarongan kon nganong gikaingon nga walay laing pundok sa relihiyon ang may ingong kangaya, kalipay, ug katagbawan gumikan sa relihiyon sama sa gitagamtam sa mga Saksi ni Jehova.
2, 3. Unsang duha ka Gregong pulong ang may kalabotan sa kon unsay angay natong bation maylabot sa usag usa, ug unsay ilang lahi nga mga kinaiyahan?
2 Kita makadahom nga makakaplag sa maong inigsoong pagbati tungod sa mga pulong ni apostol Pedro diha sa 1 Pedro 1:22: “Karon nga naulay na ninyo ang inyong mga kalag pinaagi sa inyong pagkamasinugtanon sa kamatuoran alang sa dili-salingkapaw inigsoong pagbati, maghigugmaay kamo sa usag-usa nga mainiton.” Usa sa paninugdang kahulogan sa Gregong pulong nga gihubad dinhi ug “inigsoong pagbati” mao ang phi·liʹa (pagbati). Ang kahulogan niini maoy duol kaayo sa kahulogan sa a·gaʹpe, ang pulong nga kasagarang gihubad ug “gugma.” (1 Juan 4:8) Bisan pag sagad mabaylobaylo ug gamit ang inigsoong pagbati ug gugma, kini adunay espesipikong mga kinaiyahan. Kinahanglang dili nato saypon ang usa sa usa niini, ingon sa gihimo sa daghang maghuhubad sa Bibliya. (Niining artikuloha ug ang mosunod, atong tagdon ang kada usa niining mga pulonga.)
3 Mahitungod sa kalainan niining duha ka Gregong pulong, usa ka iskolar miingon nga ang phi·liʹa maoy “sa tino usa ka pulong sa kainit ug kasuod ug pagbati.” Sa laing bahin, ang a·gaʹpe may kalabotan sa hunahuna. Mao nga samtang kita gisugo sa paghigugma (a·gaʹpe) sa atong mga kaaway, kita walay pagbati alang kanila. Nganong wala? Tungod kay “ang daotang panagkauban makadaot sa maayong pamatasan.” (1 Corinto 15:33) Dugang nagpaila sa kalainan mao ang mga pulong ni apostol Pedro: “Idugang sa inyong . . . inigsoong pagbati ang gugma.”—2 Pedro 1:5-7; itandi ang Juan 21:15-17.a
Mga Pananglitan sa Linain Gayod nga Inigsoong Pagbati
4. Nganong si Jesus ug si Juan may linaing pagbati alang sa usag usa?
4 Ang Pulong sa Diyos naghatag kanato ug daghang maayong panig-ingnan sa linain gayod nga inigsoong pagbati. Kining linaing pagbati dili maoy resulta sa usa ka kagustohan kondili gipasukad sa apresasyon sa talagsaong mga hiyas. Walay duhaduha ang labing-iladong panig-ingnan mao ang pagbati ni Jesu-Kristo alang kang apostol Juan. Sa walay duhaduha, si Jesus may inigsoong pagbati alang sa tanan niyang matinumanong mga apostoles, ug kana adunay maayong katarongan. (Lucas 22:28) Usa ka paagi nga iyang gipakita kini maoy pinaagi sa paghugas sa ilang mga tiil, sa ingon nagtudlo kanila sa pagkamapainubsanon. (Juan 13:3-16) Apan si Jesus may linaing pagbati alang kang Juan, nga subsob nga gihisgotan ni Juan. (Juan 13:23; 19:26; 20:2) Maingon nga si Jesus may katarongan sa pagpasundayag sa pagbati alang sa iyang mga tinun-an ug sa iyang mga apostoles, malagmit nga si Juan mihatag ug hinungdan kang Jesus aron magbaton ug linaing pagbati alang kaniya tungod sa iyang mas lalom nga pagpabili kang Jesus. Atong makita kini diha sa mga sinulat ni Juan, diha sa iyang Ebanghelyo ug sa dinasig niyang mga sinulat. Pagkadaghang higayon niyang gihisgotan ang gugma sa maong mga sinulat! Ang mas dakong pagpabili ni Juan sa espirituwal nga mga hiyas ni Jesus makita diha sa iyang gisulat sa Juan mga kapitulo 1 ug 13 hangtod 17, ug sa iyang subsob nga paghisgot sa una-tawhanong paglungtad ni Jesus.—Juan 1:1-3; 3:13; 6:38, 42, 58; 17:5; 18:37.
5. Unsay ikasulti mahitungod sa linaing pagbati ni Pablo ug Timoteo alang sa usag usa?
5 Sa susama, dili nato angayng kalimtan ang linain kaayong inigsoong pagbati ni apostol Pablo ug sa iyang Kristohanong kauban nga si Timoteo alang sa usag usa, nga, sa tino, maoy gipasukad sa pag-apresyar sa mga hiyas sa usag usa. Ang mga sinulat ni Pablo naundan sa maayong mga komento mahitungod kang Timoteo, sama sa: “Kay wala akoy lain nga sama kaniya nga may tinuod nga kahingawa alang sa inyong kaayohan. . . . Nasayod kamo sa pamatuod nga gihatag niya sa iyang kaugalingon, ingon nga anak nga kauban sa amahan nag-alagad siya uban kanako alang sa kauswagan sa maayong balita.” (Filipos 2:20-22) Daghang personal nga paghisgot diha sa iyang mga sulat ngadto kang Timoteo nga nagpadayag sa mainitong pagbati ni Pablo alang kang Timoteo. Pananglitan, matikdi ang 1 Timoteo 6:20: “Oh Timoteo, bantayi ang mga butang nga gisalig kanimo.” (Tan-awa usab ang 1 Timoteo 4:12-16; 5:23; 2 Timoteo 1:5; 3:14, 15.) Sa partikular kon itandi ang mga sulat ni Pablo ngadto kang Timoteo sa iyang sulat ngadto kang Tito kini nagpadayag ug linaing pagbati ni Pablo alang niining batan-ong lalaki. Hayan mao usab kanay gibati ni Timoteo labot sa ilang panaghigala, ingon sa mamatikdan gikan sa mga pulong ni Pablo sa 2 Timoteo 1:3, 4: “Wala ko gayod ikaw hikalimti diha sa akong mga pag-ampo, . . . nangandoy ako sa pakigkita kanimo, sa mahinumdoman ko ang imong mga luha, aron mapuno ako sa kalipay.”
6, 7. Unsa ang pagbati ni David ug Jonathan alang sa usag usa, ug ngano?
6 Ang Hebreohanong Kasulatan naghatag usab ug maayong mga panig-ingnan, sama niadtong kang David ug kang Jonathan. Atong mabasa nga human patya ni David si Goliat, “Ang kalag ni Jonathan nabugkos sa kalag ni David, ug si Jonathan nahigugma kaniya sama sa iyang kaugalingong kalag.” (1 Samuel 18:1) Ang pagpabili sa panig-ingnan ni David sa kasibot alang sa ngalan ni Jehova ug sa iyang pagkamaisogon sa pagpakig-atubang sa higanteng si Goliat sa walay duhaduha nakatukmod kang Jonathan sa pagbaton ug linaing pagbati alang kang David.
7 May ingon niana nga pagbati si Jonathan alang kang David nga iyang gipameligro ang iyang kaugalingong kinabuhi sa pagpanalipod kang David batok kang Haring Saul. Wala gayoy higayon nga nasuko si Jonathan nga gipili ni Jehova si David aron mahimong sunod nga Hari sa Israel. (1 Samuel 23:17) Si David may samang lalom nga pagbati alang kang Jonathan, nga tin-aw gikan sa iyang gisulti sa dihang nagbangotan sa kamatayon ni Jonathan: “Naguol ako tungod kanimo, igsoon ko nga Jonathan, nakapahimuot gayod ikaw kanako. Labaw nga katingalahan ang imong gugma kanako kay sa gugma sa mga babaye.” Sa pagkamatuod, ang lalom nga pagpabili nagtimaan sa ilang relasyon.—2 Samuel 1:26.
8. Unsa ang linaing pagbati nga gipakita sa duha ka babaye alang sa usag usa, ug ngano?
8 Kita may maayo usab nga pananglitan sa Hebreohanong Kasulatan labot sa linaing pagbati mahitungod sa duha ka babaye, si Naomi ug ang iyang biyuda nga umagad nga si Ruth. Hinumdomi ang mga pulong ni Ruth ngadto kang Naomi: “Ayaw paghangyo nako nga biyaan ko ikaw, sa pagtalikod gikan sa pagsunod kanimo; kay bisan asa ikaw moadto, ako moadto; ug bisan asa ikaw matulog didto ako matulog. Ang imong katawhan mahimong akong katawhan, ug ang imong Diyos akong Diyos.” (Ruth 1:16) Dili ba kita makahinapos nga si Naomi, pinaagi sa iyang panggawi ug iyang paghisgot bahin kang Jehova, nakatabang sa pagpukaw niining mapabilhong pagsanong sa bahin ni Ruth?—Itandi ang Lucas 6:40.
Ang Panig-ingnan ni Apostol Pablo
9. Unsay nagpakita nga si Pablo maoy panig-ingnan sa inigsoong pagbati?
9 Sumala sa ato nang nakita, si apostol Pablo may linain nga inigsoong pagbati alang kang Timoteo. Apan siya usab naghatag ug talagsaong pananglitan sa pagpahayag sa mainitong pagbati alang sa iyang mga igsoon sa katibuk-an. Iyang giingnan ang mga ansiano gikan sa Efeso nga “sulod sa tulo ka tuig, sa gabii ug sa adlaw, [siya] wala moundang sa pagpahimangno sa usag usa uban sa mga luha.” Mainitong inigsoong pagbati? Walay duhaduha niana! Ug mao usab kanay ilang gibati diha kang Pablo. Sa dihang nakadungog sila nga dili na nila siya makita, “nanghilak silang tanan, ug gigakos nila si Pablo sa liog ug malumong gihalokan siya.” (Buhat 20:31, 37) Inigsoong pagbati ba pinasukad sa apresasyon? Oo! Ang iyang inigsoong pagbati makita usab sa iyang mga pulong diha sa 2 Corinto 6:11-13: “Ang among baba gibuksan alang kaninyo, mga taga-Corinto, ang among kasingkasing gipadako. Kamo wala makulangi ug dapit sa among kahiladman, apan kamo nakulangan sa inyong kaugalingong malumong mga pagbati. Busa, agig balos—ako nagasulti sama ug ngadto sa mga anak—kamo, usab, magpadako.”
10. Unsang kakulang sa inigsoong pagbati ang mitultol sa pag-asoy ni Pablo sa iyang mga pagsulay diha sa 2 Corinto kapitulo 11?
10 Tin-aw, daghan sa mga taga-Corinto kulang ug mapabilhong inigsoong pagbati alang kang apostol Pablo. Mao nga, ang pila kanila mireklamo: “Ang iyang mga sulat bug-at ug puwersado, apan ang iyang pagkatawo mahuyang ug ang iyang pakigpulong walay-bili.” (2 Corinto 10:10) Mao nga gihisgotan ni Pablo ang ilang “hawod nga mga apostoles” ug natukmod sa pagsulti mahitungod sa mga pagsulay nga iyang giantos, sama sa narekord diha sa 2 Corinto 11:5, 22-33.
11. Unsa ang pamatuod sa pagbati ni Pablo alang sa mga Kristohanon sa Tesalonica?
11 Ang mainit nga pagbati ni Pablo alang niadtong iyang gialagaran ilabinang makita gikan sa iyang mga pulong sa 1 Tesalonica 2:8: “Kay may malumong pagbati alang kaninyo, kami nalipay kaayo sa pagpaambit kaninyo, dili lamang sa maayong balita sa Diyos, kondili sa among kaugalingong mga kalag usab, tungod kay kamo nahimo man nga among minahal uyamot.” Sa pagkatinuod, siya may ingon nga pagbati alang niining bag-ong mga igsoon nga sa dihang siya dili na makahulat pa—siya naghinamhinam gayod nga mahibalo kon sa unsang paagi giantos nila ang paglutos—iyang gipadala si Timoteo, nga nagdalag maayong taho nga nakapahupay ug dako kang Pablo. (1 Tesalonica 3:1, 2, 6, 7) Kini maayong pagkabatbat diha sa Insight on the Scriptures: “Usa ka suod nga bugkos sa inigsoong pagbati ang gibati ni Pablo ug sa mga tawong iyang gialagaran.”
Pagpabili—Ang Yawi sa Inigsoong Pagbati
12. Unsa ang mga katarongan alang sa atong pagpakitag mainitong pagbati alang sa atong mga igsoon?
12 Walay duda, ang yawi sa inigsoong pagbati mao ang pagpabili. Dili ba ang tanang dedikadong mga alagad ni Jehova adunay mga hiyas nga atong giapresyar, nga makapukaw sa atong pagbati, nga nagapamahal kanato kanila? Kitang tanan nagapangita pag-una sa Gingharian sa Diyos ug sa iyang pagkamatarong. Kitang tanan maisogong nakig-away batok sa atong tulo ka kaaway: si Satanas ug iyang mga demonyo, ang daotang kalibotan ubos sa pagkontrolar ni Satanas, ug ang napanunod hakog nga mga kiling sa makasasalang unod. Dili ba angayng hunahunaon nato kanunay nga ang atong mga igsoon nagahimo sa ilang labing maarangan sumala sa mga kahimtang? Ang tanang tawo sa kalibotan mahimong anaa sa kiliran ni Jehova o kaha sa kiliran ni Satanas. Ang atong dedikadong igsoong mga lalaki ug babaye anaa sa kiliran ni Jehova, oo, sa atong kiliran, ug busa takos sa atong inigsoong pagbati.
13. Nganong angay kitang magbaton ug mainitong pagbati alang sa mga ansiano?
13 Komosta na man ang pagpabili sa atong mga ansiano? Dili ba angay natong mahalon sila tungod sa paagi sa ilang pagkugi alang sa kaayohan sa kongregasyon? Sama kanatong tanan, sila kinahanglang magatagana alang sa ilang kaugalingon ug sa ilang mga pamilya. Sila usab may samang mga obligasyon sama sa nahibilin kanato sa paghimog personal nga pagtuon, pagtambong sa mga tigom sa kongregasyon, ug sa pagpakig-ambit sa pag-alagad sa kanataran. Dugang pa, may obligasyon sila sa pagpangandam sa mga bahin sa programa alang sa mga tigom, sa paghatag ug mga pakigpulong publiko, ug sa pag-atiman sa mga suliran nga motungha diha sa kongregasyon, nga usahay nagkinahanglag daghang oras sa hudisyal nga mga husay. Sa pagkatinuod, buot natong “mahalon ang ingon nianang matanga sa mga tawo.”—Filipos 2:29.
Pagpakita sa Inigsoong Pagbati
14. Unsang mga teksto ang nagsugo kanato sa pagpakitag inigsoong pagbati?
14 Aron mapahimut-an si Jehova, kinahanglang ipakita nato ang mainiton inigsoong pagbati alang sa atong isigka-magtutuo, maingon nga gipakita kini ni Jesu-Kristo ug ni Pablo. Atong mabasa: “Sa [inigsoong pagbati] magbaton kamo ug malumong pagbati sa usag usa.” (Roma 12:10, Kingdom Interlinear) “Mahitungod sa [inigsoong pagbati], kamo dili na kinahanglang sulatan pa namo, kay kamo mismo gitudloan na sa Diyos sa paghigugma sa usag usa.” (1 Tesalonica 4:9, Int) “Tugoting magpadayon ang inyong [inigsoong pagbati].” (Hebreohanon 13:1, Int) Tino nga malipay gayod ang atong langitnong Amahan kon atong ipasundayag ang inigsoong pagbati alang sa iyang yutan-ong mga anak!
15. Unsa ang pila ka paagi sa pagpakita sa inigsoong pagbati?
15 Sa kapanahonan sa mga apostoles nahimong batasan sa mga Kristohanon ang pagpangomosta sa usag usa pinaagi sa “usa ka balaang halok” o “usa ka halok sa gugma.” (Roma 16:16; 1 Pedro 5:14) Tinuod gayod nga usa ka pagpasundayag sa inigsoong pagbati! Karon, sa daghang bahin sa yuta, ang mas haom nga pagpasundayag mahimong usa ka tim-os mahigalaong pahiyom ug usa ka hugot nga paglamano. Sa Latin nga kayutaan, sama sa Mexico, ang paghalog maoy usa ka porma sa pagpangomosta, sa pagkatinuod usa ka pagpasundayag sa pagbati. Kining mainit nga pagbati sa bahin niining mga igsoona mahimong usa sa mga hinungdan sa dakong mga pag-uswag nga nagakahitabo sa ilang kayutaan.
16. Unsa pa ang mga higayon nga kita makapakitag inigsoong pagbati diha sa atong mga Kingdom Hall?
16 Sa dihang mosulod kita sa Kingdom Hall, naningkamot ba kita sa pagpakitag inigsoong pagbati? Kini motukmod kanato sa pagsultig makapadasig nga mga pulong, ilabina niadtong daw nagmagul-anon. Kita gisugo sa “paglipay sa mga kalag nga nagmagul-anon.” (1 Tesalonica 5:14) Kana sa tino maoy usa ka paagi diin atong ikapahayag ang mainiton inigsoong pagbati. Laing maayong paagi mao ang pagpahayag ug apresasyon alang sa usa ka maayong pakigpulong publiko, sa usa ka maayong pagkahatag nga bahin sa programa, sa maayong paningkamot sa estudyanteng mamumulong sa Tunghaan sa Teokratikanhong Ministeryo, ug uban pa.
17. Sa unsang paagi naangkon sa usa ka ansiano ang pagbati sa kongregasyon?
17 Komosta ang bahin sa pagdapit sa nagkalainlaing mga igsoon diha sa atong mga balay alang sa usa ka pangaon o tingali sa pagmeryenda human sa tigom kon may panahon pa? Dili ba angay tugotan natong mangibabaw ang tambag ni Jesus diha sa Lucas 14:12-14? Kas-a usa ka kanhi misyonaryo gitudlo ingong nagadumalang magtatan-aw sa usa ka kongregasyon diin ang tanang magmamantala lahi ug rasa. Iyang namatikdan ang kakulang sa inigsoong pagbati, busa mihimo siyag lakang aron matul-id ang kahimtang. Sa unsang paagi? Matag Dominggo, modapit siyag usa ka pamilya alang sa pagpangaon. Sa pagkatapos sa tuig, ang tanan nagapakitag mainiton inigsoong pagbati diha kaniya.
18. Sa unsang paagi atong ikapakita ang inigsoong pagbati alang sa atong masakitong mga igsoong lalaki ug babaye?
18 Kon ang usa ka igsoong lalaki o babaye magkasakit, sa balay man o sa ospital, ang inigsoong pagbati motukmod kanato sa pagpahibalo sa nagkasakit nga kita may kahingawa. O komosta man kadtong nagpuyo sa mga nursing home? Nganong dili duawon sa personal, tawgan sa telepono, o padad-an ug usa ka kard nga nagapahayag ug mainitong mga pagbati?
19, 20. Sa unsang paagi ikapakita nato nga atong napadako ang atong inigsoong pagbati?
19 Kon magapakita sa inigsoong pagbati, kita makahimo sa pagpangutana sa atong kaugalingon, ‘Ang ako bang inigsoong pagbati may pinalabi? Ang pamanit ba, edukasyon, o kahimtang sa pangabuhi nakaimpluwensiya sa akong pagpasundayag sa inigsoong pagbati? Gikinahanglan ko pa bang magpadako sa akong inigsoong pagbati, ingon sa gidasig ni apostol Pablo nga pagahimoon sa mga Kristohanon sa Corinto?’ Ang inigsoong pagbati motukmod kanato nga lantawon ang atong mga igsoon sa positibong paagi, nga apresyahon sila alang sa ilang maayong mga bahin. Ang inigsoong pagbati motabang usab kanato sa pagkalipay sa espirituwal nga kauswagan sa atong igsoon inay masina niana.
20 Ang inigsoong pagbati angay usab nga magpaigmat kanato sa pagtabang sa atong mga igsoon diha sa ministeryo. Kini angay mahimong sama sa pagkapahayag niana diha sa usa sa atong awitonon (Numero 92):
“Magmalulot sa mga luya,
Ug magmaisog usab sila.
Di kalimtan ang kabataan,
Pahamtongon sila ug tabangan.”
21. Unsang pagsanong ang atong madahom kon kita magpakitag inigsoong pagbati?
21 Busa dili nato kalimtan nga sa pagpakita sa inigsoong pagbati, ang prinsipyo nga gipahayag ni Jesus diha sa iyang Wali sa Bukid mapadapat: “Bansaya ninyo ang pagpanghatag, ug kamo pagahatagan. Ang takos nga pinaugdo, dinasok ug tinantan, ug magaawas, igabutang ra diha sa inyong sabakan. Kay ang takos nga inyong igahatag mao usab unya ang takos nga inyong pagadawaton.” (Lucas 6:38) Makadawat kitag kaayohan sa dihang magpakita kitag inigsoong pagbati, nga magapakitag pagtahod sa mga alagad ni Jehova maingon usab kanato. Sa pagkatinuod malipayon kadtong nagakalipay sa pagpasundayag sa inigsoong pagbati!
[Footnote]
a Tan-awa ang sunod nga artikulo: “Gugma (Agape)—Kon Unsay Dili Ipasabot ug Ipasabot Niini.”
Unsaon Nimo Pagtubag?
◻ Unsang Gregong mga pulong ang nalangkit sa atong mga emosyon, ug sa unsang paagi kana nagkalahi?
◻ Unsa ang yawi sa inigsoong pagbati?
◻ Unsa ang atong Kasulatanhong mga panig-ingnan labot sa inigsoong pagbati?
◻ Nganong kinahanglang magbaton kitag mainitong pagbati alang sa atong mga igsoon ug sa mga ansiano?
[Hulagway sa panid 15]
Giawhag ni apostol Pedro ang iyang mga igsoon sa pagdugang sa inigsoong pagbati diha sa ilang pagtuo ug sa ubang Kristohanong mga hiyas