Kon Unsaon Pagpakitag Pagmahal

Samtang molabay ang mga tuig, ang ubang magtiayon dili na kaayo magpakitag pagmahal sa usag usa. Kon kini ang inyong kahimtang, angay ka bang mabalaka?

• Ang angay nimong mahibaloan

• Ang imong mahimo

Ang angay nimong mahibaloan

Importante ang pagpakitag pagmahal aron molig-on ang kaminyoon. Sama nga importante ang regular nga pagkaon ug pag-inom ug tubig aron pirmeng lig-on ug himsog ang lawas, ang kanunayng pagpakitag pagmahal magpalig-on sab sa kaminyoon. Bisag pipila ka dekada nang minyo, kinahanglan nga pirmeng pasaligan sa mga magtiayon ang ilang kapikas nga sila gihigugma ug gipangga pag-ayo.

Ang tinuod nga gugma dili hakog. Gitinguha niini ang kalipay sa kapikas. Busa, imbes magpakita rag pagmahal kon ganahan, ang mahunahunaong kapikas makamatikod kon ang iyang bana o asawa kinahanglang pakitaag pagmahal ug maningkamot nga ihatag kana.

Kasagaran, ang mga asawa mas kinahanglang pakitaag pagmahal kay sa mga bana. Tingali gimahal gyod sa bana ang iyang asawa. Pero kon iya lang ipakita ang iyang gugma sa sinugdan ug kataposan sa adlaw o una lang ang seksuwal nga relasyon, basig magduda ang iyang asawa kon gimahal ba gyod siya. Mas maayong ipakita kanunay ang pagmahal sa tibuok adlaw.

Ang imong mahimo

Ipakita ang pagmahal pinaagig mga pulong. Ang simpleng mga ekspresyon sama sa “I love you” o “Importante kaayo ka nako” makapabati sa imong kapikas nga siya gimahal.

Prinsipyo sa Bibliya: “Gikan sa kadagaya sa kasingkasing ang baba mosulti.”​—Mateo 12:34.

Tip: Gawas sa pagpakita sa imong pagmahal sa sinultihan, puwede pod nimo ning isulat pinaagig mga note, e-mail, o text message.

Ipakita ang pagmahal sa buhat. Ang paggakos, paghalok, o ang simpleng paggunit sa kamot magpakita nga sinsero ang pag-ingon nimog “I love you.” Mapakita pod ang tinuod nga pagpangga pinaagi sa paghapohap, mahigugmaong tinan-awan, o talagsang paghatag ug regalo. Ug puwede sab nimong tabangan ang imong asawa​—tingali sa pagbitbit sa iyang mga dala, pag-abli sa pultahan, paghugas ug plato, paglaba, o pagluto. Para sa daghan, dili lang ni basta pagtabang kondili pagmahal nga gipakita sa buhat!

Prinsipyo sa Bibliya: “Maghigugmaay kita, dili [lang] pinaagi sa pulong ni sa dila, kondili sa buhat.”​—1 Juan 3:18.

Tip: Tratara ang imong kapikas sa mahigugmaong paagi parehas niadtong trato pa mo.

Paggahin ug panahon sa usag usa. Ang pag-ubanay nga kamo rang duha magpalig-on sa inyong kaminyoon ug magpabati sa imong kapikas nga malipayon ka nga kauban siya. Siyempre, lisod ang paggahin ug panahon kon naa moy mga anak o daghan mog kinahanglang atimanon ug hisgotan kada adlaw. Basin puwede mong magplano ug simpleng mga butang sama sa paglakawlakaw nga kamo rang duha.

Prinsipyo sa Bibliya: ‘Tinoa ang mas hinungdanong mga butang.’​—Filipos 1:10.

Tip: Ang ubang magtiayon nga busy naggahig panahon para sa mga “date night” o “date weekend” nga sila rang duha.

Ilha pag-ayo ang imong kapikas. Kon bahin sa pagpakitag pagmahal, lainlain ang panginahanglan sa matag usa. Hisgoti ninyong duha kon unsang klase sa pagmahal ang gusto ninyo ug kon kanus-a kana ilabinang ipakita. Dayon, paningkamoti nga mapakita kana. Hinumdomi nga importante ang pagpakitag pagmahal sa lig-ong kaminyoon.

Prinsipyo sa Bibliya: “Ang gugma . . . dili mangita sa kaugalingong kaayohan.”​—1 Corinto 13:4, 5.

Tip: Imbes moinsistir nga pakitaan kag pagmahal, pangutan-a ang kaugalingon, ‘Unsa kahay akong himoon aron mas panggaon ko sa akong kapikas?’