Mga Magmamantala sa Gingharian Nagtaho

Ang Pagkalig-on Magdalag Dagayang Ganti

SI Jesus mitagna nga ang iyang mga sumusunod pagalutoson, ug mao man usab si apostol Pablo, sumala sa giingon sa 2 Timoteo 3:12: “Sa pagkatinuod, kadtong tanan nga nagtinguha sa pagkinabuhi uban sa diyosnong debosyon diha kang Kristo Jesus pagalutoson usab.” Apan ang pagkalig-on sa pag-alagad kang Jehova nga Diyos magdalag dagayang ganti.

◻ Kini matuod diha sa usa ka lungsod sa amihan-sidlakang baybayon sa Malaysia. Bisan siya debotadong Budhista nga hilabihang mangasaba sa iyang mga anak, ang amahan wala makapugong sa iyang tulo ka anak babaye ug tulo ka anak lalaki sa pagtuon sa Bibliya uban sa mga Saksi ni Jehova. Bisan ang iyang asawa nagpakitag interes sa kamatuoran. Unya usa ka adlaw usa ka silingan nagbiaybiay kaniya: “Nganong wala ka man makapugong sa imong mga anak ug gitugotan sila nga mahimong Saksi ni Jehova? Ang tanan kong mga anak nagpabilin uban kanako ug sa relihiyong Budhista sa among katigulangan. Makaluluoy ka!”

Ang amahan mipauli dayon ug mihulga nga kulatahon ang igsoong babaye nga nagdumala sa pagtuon uban sa iyang mga anak. Ugaling, ang mga anak nagpakalma kaniya ug mipadayon sa pagtuon sa Bibliya uban sa mga Saksi ni Jehova ug sa pagtambong sa mga tigom nga may pagpaluyo sa ilang inahan.

Hinuon, sa kataposan gipaatubang sa amahan ang tibuok pamilya kaniya. “Pagpili,” matud niya, “tali kanako ug magpabilin sa balay ug mahimong mga Kristohanon ug mobiya sa balay.” Ang kamagulangang anak lalaki, usa ka malumo-manulti nga batang lalaki, dihadiha misugod pag-impaki aron mobiya. “Ayaw!” misinggit ang amahan. “Sanglit kamong tanan masinupakong mga anak, mas maayo pang mamatay ako.” Unya siya migula sa balay, nga gisundan sa pamilya, kinsa naghangyo kaniya nga dili magpakamatay. Kay nadani sa ilang pangaliyupo, siya mipauli.

Milabay ang panahon. Ang amahan nagsugod sa pagmatikod sa maayong epekto sa kamatuoran sa Bibliya diha sa kinaiya sa iyang mga anak. Usa ka adlaw nahibalag niya ang iyang mabiaybiayong higala, nga niadtong tungora usa ka masulob-ong tawo, kinsa nag-ingon: “Ako nahigawad kaayo sa akong mga anak. Ila akong gitikasan ug gikawatan.” Apan ang amahan kang kansang mga anak nagtuon uban sa mga Saksi ni Jehova nag-ingon: “Ay, ang akong mga anak lahi! Sila maluluton kaayo kanako ug mitabang pa gani kanako sa pagbayad sa giutang nakong kotse samtang ako walay trabaho.”

Karon, ang tulo ka anak babaye ug ang inahan bawtismado na. Ang usa ka anak lalaki usa ka espesyal payunir. Ug ang kanhi debotado ug nasukong amahan? Mahigalaon na siya karon ug nakatambong na sa Memoryal.

Si Jehova nagganti sa anak lalaki ug sa iyang tulo ka igsoong babaye maingon man sa ilang inahan gumikan sa ilang pagkalig-on ngadto Kaniya. Sila karon maoy madasigong mga magwawali sa Gingharian, nga nagalipay sa kasingkasing ni Jehova.​—Proverbio 27:11.