Sa Dili Madugay​—Usa ka Kalibotan nga Walay Gubat!

SA Disyembre 24, 1914, usa ka batan-on nga Britanikong sundalo nga ginganlag Jim Prince mitabok sa luna tali sa duha ka utlanan aron makigsulti sa usa ka Alemang sundalo. “Ako usa ka Saxon. Ikaw usa ka Anglo-Saxon. Nganong mag-awayay man kita?” ang Aleman nangutana kaniya. Katuigan sa ulahi, si Prince misugid: “Wala gihapon ako mahibalo sa tubag sa maong pangutana.”

Sulod sa usa ka talagsaong semana sa 1914, ang mga sundalong Britaniko ug Aleman naghigalaay, nagdulag saker, ug nagbayloay pa gani ug mga pinaskohan. Ang maong temporaryong paghunong sa pinosilay, siyempre, dili-opisyal. Ang mga heneral dili buot nga ang ilang mga tropa makadiskobre nga ang “kaaway” dili usa ka daotang mangtas nga gilarawan sa mga propaganda sa gubat. Ang Britanikong sundalo nga si Albert Moren sa ulahi nahinumdom: “Kon ang paghunong-sa-gubat mipadayon sa laing semana, malisod na unta kaayong pagasugdan pag-usab ang gubat.”

Kadtong wala planoha nga paghunong sa gubat nagsugyot nga bisan ang daghang nabansay nga mga sundalo nangandoy ug kalinaw kay sa gubat. Ang kadaghanang sundalo nga nasayod sa mga kalisang sa gubat mouyon sa Espanyol nga panultihon: “Paadtoa sa gubat kadtong wala masayod kon unsa ang gubat.” Sa walay duhaduha, ang usa ka tibuok-kalibotan nga surbi sa mga opinyon nga himoon diha sa kinabag-ang katawhan mopadayag nga daghan kaayo ang mopili sa kalinaw inay sa gubat. Apan sa unsang paagi kining tibuok-kalibotang tinguha sa kalinaw pagahimoon nga usa ka kalibotan nga walay gubat?

Sa dili pa mawala ang gubat, ang mga tinamdan kinahanglang usbon. Ang konstitusyon sa UN Educational, Scientific, and Cultural Organization nag-ingon: “Sanglit ang mga gubat nagsugod diha sa mga hunahuna sa mga tawo, diha sa mga hunahuna sa mga tawo nga ang pagpanalipod sa kalinaw kinahanglang tukoron.” Ugaling ang modernong-adlaw nga katilingban, diin kaylap ang kawalay-pagsalig ug pagdumot, labi pang nahimong pintas, dili labing malinawon.

Bisan pa niana, ang Diyos mismo nagsaad nga moabot ra ang adlaw nga ang kalinaw masilsil diha sa hunahuna sa mga tawo nga hilig sa pagkamatarong. Pinaagi sa iyang propeta nga si Isaias, siya miingon: “Siya [Diyos] tinong magapakanaog ug paghukom taliwala sa mga nasod ug magatul-id sa mga butang sa daghang katawhan. Ug ilang pagahimoon ang ilang mga espada nga mga punta sa daro ug ang ilang mga bangkaw nga mga galab. Ang nasod dili na mobakyaw ug espada batok sa laing nasod, ni makakat-on pa sila sa gubat.”​—Isaias 2:4.

Pag-ugmad sa Kalinaw Diha sa Hunahuna

Ang mao bang talagsaong kausaban sa hunahuna mahitabo? Ang mga tawo makakat-on ba gayod sa pag-amping sa kalinaw inay sa paghimaya sa gubat? Tagda ang panig-ingnan ni Wolfgang Kusserow. Niadtong 1942 gipunggotan ug ulo sa mga Nazi kining 20-anyos nga Aleman tungod kay siya ‘dili mokat-on sa gubat.’ Nganong mipili siya nga mamatay? Sa usa ka sinulat nga pahayag, iyang gikutlo ang mga prinsipyo sa Kasulatan sama sa, “Kinahanglang higugmaon nimo ang imong silingan sama sa imong kaugalingon” ug, “Kadtong tanan nga magagamit sa espada mamatay pinaagi sa espada.” (Mateo 22:39; 26:52) Unya siya prangka nga nangutana: “Ang ato bang Maglalalang nagpasulat niini alang sa mga kahoy?”

Ang Pulong sa Diyos, nga natala diha sa Bibliya, “naghatag ug gahom” ug nagtukmod niining batan-ong Saksi ni Jehova sa pagtinguha sa kalinaw, bisan unsa pay dangatan. (Hebreohanon 4:12; 1 Pedro 3:11) Apan si Wolfgang Kusserow dili lang mao ang nagtinguha sa kalinaw. Sa librong The Nazi Persecution of the Churches 1933-45, si J. S. Conway naghisgot sa opisyal nga mga dokumento sa Nazi nga nagpamatuod nga ang mga Saksi ni Jehova ingong usa ka pundok midumili sa pagdalag armas. Sumala sa gipunting ni Conway, ang maong maisogong baroganan sa pagkatinuod nagkahulogan ug pagpirma sa ilang kaugalingong hukom sa kamatayon.

Ang mga Saksi ni Jehova karong adlawa nagpadayon sa pagtinguha sa kalinaw, bisan unsa pay ilang rasa o nasyonalidad. Ngano? Tungod kay ilang nakat-onan gikan sa Bibliya nga ang tinuod nga mga alagad sa Diyos kinahanglang maghimo sa ilang mga espada nga mga punta sa daro. Si Alejandro, usa ka batan-ong lalaki nga taga-Argentina nga milalin ngadto sa Israel niadtong 1987, sa personal makapamatuod niini nga kamatuoran.

Sa tulo ka tuig si Alejandro nagpuyo sa komunidad sa mga lalin samtang nagtungha sa unibersidad ug nagtrabaho sa lainlaing mga hotel ug mga restawran. Sulod niining panahona, siya misugod sa pagbasa sa Bibliya ug nangita sa katuyoan sa kinabuhi. Labaw sa tanan, siya nangandoy nga makakita ug usa ka kalibotan diin ang katawhan makapuyo diha sa kalinaw ug hustisya. Si Alejandro​—usa ka Hudiyo—​nagtrabaho uban sa mga Hudiyo ug mga Arabo apan mipili sa dili pagdapig sa bisan haing kiliran.

Niadtong 1990 usa ka higala nga nagtuon sa Bibliya uban sa mga Saksi ni Jehova nagdapit kang Alejandro ngadto sa usa ka adlaw nga asembliya sa Haifa. Natingala sa pagkakitag 600 ka Hudiyo ug mga Arabo nga malipayong nag-uban diha sa asembliya, siya nagpalandong, ‘Kini mao ang hustong paagi nga magkinabuhi ang katawhan.’ Sulod sa unom ka bulan, siya mismo nahimong Saksi ug karon nagagugol sa dakong bahin sa iyang panahon sa pagsangyaw sa mensahe sa Bibliya sa kalinaw.

Kon sa Unsang Paagi ang Diyos Magdalag Kalinaw

Bisan makapatandog kini nga mga panig-ingnan, sila maoy mga eksepsiyon inay komon nga kahimtang sa kalibotan karon. Bisan tuod ang presenteng sistema maghisgot ug kalinaw sa pulong lamang, kini nagapasiugda ug gubat. Buot ka bang mopuyo sa usa ka dalan diin ang mga molupyo nagagasto ug 7 hangtod sa 16 porsiento sa ilang mga kinitaan diha sa mga pusil ug mga gamit sa pagpanalipod sa ilang mga balay? Sa pagkatinuod, mao kanay ginahimo sa mga nasod pinaagi sa mga galastohan sa militar sa dili pa dugayng katuigan. Dili ikatingala, ang tagna ni Isaias nagpadayag nga ang katawhan sa katibuk-an dili gayod mohimo sa ilang mga espada nga mga punta sa daro hangtod ang Diyos ‘magatul-id sa mga butang sa daghang katawhan.’ Unsaon niya paghimo kana?

Ang pangunang paagi sa pagtul-id sa mga butang mao ang Gingharian ni Jehova nga Diyos. Ang propetang Daniel nagtagna nga ‘ang Diyos sa langit magatukod ug usa ka gingharian nga dili gayod malumpag.’ Kini nga Gingharian, siya midugang, “magadugmok ug magaut-ot niining tanang gingharian [kalibotanong mga gobyerno], ug kini mismo molungtad sa walay kataposan.” (Daniel 2:44) Kining mga pulonga nagpadayag nga ang Gingharian sa Diyos lig-ong magatukod sa pagmando niini ibabaw sa tibuok yuta. Pinaagi sa pagwagtang sa mga utlanan sa nasod, ang Gingharian magawagtang sa mga panag-indigay. Dugang pa, sanglit ang mga ginsakpan niini maoy “mga tawo nga natudloan ni Jehova,” ang ilang kalinaw “dagaya.” (Isaias 54:13) Dili ikahibulong nga gisugo kita ni Jesus sa pag-ampo ngadto sa Diyos: “Paanhia ang imong gingharian”!​—Mateo 6:10.

Pagkuha sa Relihiyosong mga Kababagan

Ang Diyos magkuha usab sa relihiyosong mga kababagan sa kalinaw. Ang relihiyon maoy hinungdan sa labing dugayng armadong panag-away sa kasaysayan​—ang mga Krusada, o “Balaang mga Gubat,” nga gisugdan ni Papa Urbano II niadtong 1095 K.P.a Sa atong siglo ang klero nahimong ilado sa paghulhog ug pagdani sa popular nga pagpaluyo sa gubat, bisan sa bug-os sekular nga mga gubat.

Nagtumong sa papel sa nag-angkong mga Kristohanon nga mga iglesya panahon sa Gubat sa Kalibotan I, ang historyanong si Paul Johnson misulat: “Ang mga klerigo wala-makahimo, ug sa kinadak-ang bahin dili-andam, sa pagbutang sa Kristohanong pagtuo nga una kay sa nasyonalidad. Ang kadaghanan mipili sa mas sayon nga dalan ug gipakasama ang Kristiyanidad sa patriotismo. Ang Kristohanong mga sundalo sa tanang mga pundok sa relihiyon giawhag sa pagpatay sa usag usa sa ngalan sa ilang Manluluwas.”

Labaw pa ang nahimo sa relihiyon sa pagpukaw ug gubat kay sa pagdasig sa kalinaw. Sa pagkamatuod, ang Bibliya naglarawan sa bakak nga relihiyon ingong “bigaon” nga nakigrelasyon sa mga magmamando sa kalibotan. (Pinadayag 17:1, 2) Ang Diyos nagpahayag kaniya nga mao ang pangunang tagsala nga maoy responsable sa pag-ula sa dugo niadtong tanang gipamatay sa yuta. (Pinadayag 18:24) Ingong sangpotanan, pagawagtangon ni Jehova nga Diyos kini nga babag sa kalinaw sa walay kataposan.​—Pinadayag 18:4, 5, 8.

Bisag mawala pa ang maong makapabahing mga elemento sama sa politika ug bakak nga relihiyon, ang kalinaw dili gayod maseguro kon dili kuhaon ang labing dakong tigpasiugdag gubat​—si Satanas nga Yawa. Mao kana ang kataposang buluhaton nga pagahimoon sa Gingharian sa Diyos sa programa niini sa pagdala ug bug-os nga kalinaw sa yuta. Ang basahon sa Bibliya nga Pinadayag nagsaysay nga si Satanas “pagadakpon” ug “pagagaposon” ug “itambog . . . ngadto sa bung-aw” aron “dili na gayod siya makapahisalaag sa kanasoran.” Human niana siya bug-os nga pagalaglagon.​—Pinadayag 20:2, 3, 10.

Ang saad sa Bibliya bahin sa kataposan sa gubat dili usa ka walay pulos nga damgo. Ang kahikayan ni Jehova nga Diyos alang sa kalinaw gisugdan na. Ang iyang Gingharian natukod na sa langit ug andam sa pagpatuman sa dugang pang mga paagi aron sa pagseguro sa tibuok-yutang kalinaw. Kasamtangan, minilyong Saksi ni Jehova, nga nagapaluyo niining langitnong kagamhanan, nakakat-on sa pagkinabuhi diha sa kalinaw.

Nan, tin-aw nga kita adunay maayong mga katarongan sa pagtuo nga ang mga gubat dili kay dili-kalikayan. Labi pang maayo, kita makalantaw sa adlaw nga haduol na sa dihang si Jehova magpahunong sa panaggubat sa walay kataposan. (Salmo 46:9) Tinoon niya nga sa dili madugay aduna unyay usa ka kalibotan nga walay gubat.

[Mga footnote]

[Hulagway sa panid 7]

Makapuyo ka sa usa ka bag-ong kalibotan nga walay gubat