Gipasidunggan Mo ba ang Uban Dihang Nagatambag?
PAGKAMAAYO ug pagkamapuslanon ang tambagan nga may kadungganan! “Ang maayo, makonsiderasyon, mahigugmaong tambag mosangpot sa maayong mga relasyon,” matud ni Edward. “Sa dihang mabati nimo nga gipasidunggan ka ug gitahod sa magtatambag pinaagi sa pagpaminaw sa imong kiliran sa estorya, ang tambag mas sayon nga dawaton,” pangangkon ni Warren. “Sa dihang ang magtatambag magtratar kanako nga may pagtahod, dili ako magpanuko sa pagduol kaniya, nga mangayog tambag kaniya,” pahayag ni Norman.
Kinaiyanhong Katungod sa Tawo sa Kadungganan
Ang mainiton, mahigalaon, ug mahigugmaong tambag sa pagkatinuod giabiabi. Ang pagtambag sa uban sa paaging gusto nimo ikaw pagatambagan mapuslanon. (Mateo 7:12) Ang maayong magtatambag mohatag panahon sa pagpaminaw ug maningkamot sa pagsabot sa ginatambagan—sa iyang panghunahuna, iyang kahimtang, ug iyang mga pagbati—inay sawayon ug hukman.—Proverbio 18:13.
Ang mga magtatambag karon, lakip na ang Kristohanong mga ansiano, kinahanglang abtik magpasidungog sa uban sa dihang nagatambag. Ngano? Tungod sa yanong katarongan nga ang nagalungtad nga tinamdan sa sosyedad mao ang pagpakiglabot sa uban sa paagi nga walay pagtahod. Mananakod kini. Sagad kadtong gidahom nimo nga motratar nga matinahuron mao hinuon ang mapakyas sa paghimo niana, propesyonal man sila, relihiyosong mga pangulo, o uban pa. Sa pag-ilustrar, diha sa dapit trabahoan ang pagpapahawa sa trabaho maoy makasakit ug makapabug-at sa amo ug sa kawani. Makadaot kini sa pagtamod sa kaugalingon, ilabina kon ang gipapahawa gitratar nga wala pasidunggi. Ang mga superbisor sa dihang magpapahawa sa empleyado kinahanglang makakat-on kon unsaon pagbungat sa “bug-at nga mensahe aron mahatag kana nga tin-aw, mubo ug propesyonal, ug gimintenar nga wala matibhangi ang dungog sa indibiduwal,” taho sa The Vancouver Sun. Oo, ang tanang tawo takos sa dungganong pagtratar.
Ang Asembliya Heneral sa Hiniusang Kanasoran nagpahayag: “Ang tanang tawo nahimugsong may kagawasan ug may mao rang dungog ug mga katungod. Sila gihatagag pangisip ug tanlag ug kinahanglang magtratar sa usag usa sa espiritu sa panag-igsoonay.” Sanglit ang dungog sa tawo giatake, may maayong katarongan nga ang Karta sa Hiniusang Kanasoran ug ang pasiuna sa Unibersohanong Pahayag sa Tawhanong mga Katungod miila niining hiyasa. Kini naglig-on “sa pagtuo diha sa paninugdang tawhanong mga katungod, sa dungog ug bili sa tawo.”
Si Jehova Naglalang sa Tawo nga May Kinaiyanhong Kadungganan
Si Jehova maoy Diyos sa kadungganan. Ang iyang dinasig nga Pulong haom nga nagpahayag, “Kadungganan ug pagkahalangdon anaa sa atubangan niya,” ug, “[Ang iyang] dungog gisugilon sa ibabaw sa mga langit.”—1 Cronicas 16:27; Salmo 8:1.
Ingong dungganong Diyos ug Unibersohanong Soberano, siya naghatag ug kadungganan sa tanan niyang kalalangan, langitnon ug yutan-on. Talagsaon taliwala niadtong gipasidunggan mao ang iyang hinimaya ug nagamandong Anak, ang Hari, si Kristo Jesus. “Dungog ug pagkahalangdon gibutang mo sa ibabaw niya,” matagnaong gisulat ni David.—Salmo 21:5; Daniel 7:14.
Ikasubo, kining paninugdang tawhanong katungod giyatakan ug maayo latas sa kasaysayan. Usa ka kusganong manulonda, kinsa pinaagi sa iyang mga lihok nahimong Satanas nga Yawa, mihagit sa pagkamakataronganon, pagkamatarong, ug katakos sa soberanya sa Diyos. Sa paghimo niini iyang gipakita ang kawalay pagtahod kang Jehova ug nagpasipala sa Iyang dungganong ngalan samtang naghagit sa Iyang katungod sa pagmando. Gipangangkon niya ang hilabihang kadungganan sa iyang kaugalingon. Sama sa Yawa, ang gamhanang tawhanong mga hari, sama kang Nabucodonosor sa kapanahonan sa Bibliya, nangandak sa ilang ‘gahom ug ilang kahalangdon.’ Ilang giatake ang dungog ni Jehova, nga naghatag ug dili makataronganong kadungganan sa ilang kaugalingon. (Daniel 4:30) Ang madaogdaogong pagmando ni Satanas, nga gipahamtang sa kalibotan sa katawhan, miatake ug padayong nagaatake sa kadungganan sa tawo.
Ang imo bang dungog nadaot? Sa dihang gitambagan, ikaw ba gipabati nga hilabihan kasad-an, gipakaulawan, giayran, o gipakaubos? “Ako wala mobatig kabalaka, pagbati, ug kadungganan. Gipabati ako nga wala akoy hinungdan,” pangangkon ni André, nga midugang: “Kini mitultol sa mga pagbati sa kahigawad ug kabalaka, gani depresyon.” “Lisod dawaton ang tambag gikan sa usa nga gibati nimong walay pagtagad sa imong kaayohan,” matud ni Laura.
Tungod niini, ang Kristohanong mga magtatan-aw giawhag sa pagtratar sa panon sa Diyos uban ang pagtahod ug pasidungog. (1 Pedro 5:2, 3) Kon mobangon ang mga kahimtang diin kinahanglanon ug mapuslanon ang pagtambag sa uban, sa unsang paagi nimo ampingan ang imong kaugalingon gikan sa panghunahuna ug panggawi sa kalibotanong tawo nga, sa walay pagpanagana, moatake sa dungog sa uban? Unsay makatabang kanimo sa pagpreserbar sa dungog sa isigka-Kristohanon, ingon man sa imoha?—Proverbio 27:6; Galacia 6:1.
Mga Prinsipyo nga Magpreserbar sa Kadungganan
Ang Pulong sa Diyos may ikasulti niining ulohana. Ang hanas nga magtatambag mosalig sa tambag sa Pulong sa Diyos, inay molantaw sa kaalam niining kalibotana. Ang Sagradong mga Sinulat naundan sa bililhong tambag. Dihang sundon, kini magpasidungog sa magtatambag ug sa usa nga ginatambagan. Sa ingon, ang tambag ni Pablo sa Kristohanong magtatan-aw nga si Timoteo mao: “Ayawg sawaya sa mahigpiton ang usa ka tigulang nga lalaki. Sa kasukwahi, mahangyoong magatambag kaniya ingon sa usa ka amahan, sa mas batan-ong mga lalaki ingong igsoong mga lalaki, sa magulang nga mga babaye ingong mga inahan, sa mas batan-ong mga babaye ingong igsoong mga babaye uban sa bug-os nga kaputli.” (1 Timoteo 5:1, 2) Pagkadakong kasubo, mga kasakit, ug kaulawan ang malikayan pinaagi sa pagsunod niining mga sukdanan!
Matikdi nga ang yawi sa malamposong tambag maoy haom nga pagtahod alang sa laing tawo ug sa iyang katungod nga pagatrataron sa dungganon, matinagdanong paagi. Ang Kristohanong mga ansiano, lakip sa nagapanawng mga magtatan-aw, naningkamot pagsunod niini nga tambag. Ilang gisulayan pagsabot kon nganong ang usa nga nanginahanglag mga pagpasibo naghunahuna ug naglihok sa ingong paagi. Gusto nilang madunggan ang iyang panghunahuna. Ilang gipaningkamotan gayod nga dili mapakaulawan, mapaubos, o matamay ang ginatambagan.
Ingong ansiano, pasabta ang imong igsoon nga nahangawa ka kaniya ug buot kang motabang kaniya sa iyang mga suliran. Mao kanay ginahimo sa doktor sa dihang magpakonsulta ka. Ang paghanduraw sa paghubo sulod sa usa ka dili-madanihon, walay kinabuhi nga lawak mahimong magpabati kanimo sa kahiubos ug kaulaw. Gidayeg gayod nimo ang usa ka doktor nga sensitibo sa imong pagtamod sa kaugalingon ug magpasidungog kanimo samtang siya nagahimo sa gikinahanglang paghiling aron tinoon ang hinungdan sa imong sakit! Sa susamang paagi, ang Kristohanong magtatambag nga magpakitag haom nga pagtahod alang sa indibiduwal maoy maluloton ug lig-on, apan nagpasidungog sa ginatambagan. Sa kasukwahi, ang tambag nga binagis, walay pagsapayan, ug walay pagbati daw susama sa ikaw masambingayong gihuboan nga bation nimo ang kaulaw, pagkatinamay, ug gikuhaan sa imong dungog.
Ang mga magtatan-aw sa Tunghaan sa Teokratikanhong Ministeryo ilabinang mag-amping sa pagtambag uban ang pagpasidungog. Sa dihang magtambag sa mga edaran, ilang ipabanaag ang samang gugma nga ilang gipakita sa ilang unodnong mga ginikanan. Sila mahunahunaon, mahigalaon, ug mainiton. Ang maong pagkasensitibo kinahanglanon. Kini mopatunghag kahimtang nga makatabang sa haom nga paghatag ug pagdawat ug tambag.
Mga ansiano, hinumdomi nga ang praktikal nga tambag makapabayaw, makapadasig, makapalig-on, ug positibo. Ang Efeso 4:29 nagpahayag: “Ayaw pagulaa ang usa ka dunot nga sulti gikan sa inyong baba, kundili ang unsa mang sulti nga maayo alang sa pagpalig-on sumala sa gikinahanglan, aron makahatag kini ug unsay paborable sa mga tigpaminaw.”
Dili kinahanglang mogamit ug hait nga mga pulong, o pangatarongan. Inay, ang pagtahod sa ubang tawo ug ang tinguha nga mapreserbar ang iyang mga pagbati o pagpabili ug pagtamod sa kaugalingon magtukmod kanimo sa pagpresentar sa mga butang diha sa positibo, makapalig-ong paagi. Pasiunahi ang matag komento ug sinsero, tinuoray nga komendasyon alang sa iyang maayong mga punto o mga hiyas, inay ipasiugda ang mga hunahuna nga magpahigawad ug magpabati kaniyang walay hinungdan. Kon ikaw nag-alagad ingong ansiano, gamita ang imong ‘awtoridad sa pagpalig-on ug dili sa paglumpag.’—2 Corinto 10:8.
Oo, ang epekto sa bisan unsang tambag gikan sa Kristohanong mga ansiano kinahanglang makahatag ug gikinahanglang pagdasig, sa pagpaambit kon unsay makatabang. Kinahanglang dili kini makapaluya o “makapalisang.” (2 Corinto 10:9) Bisan ang usa nga nakahimog seryosong kasaypanan nagkinahanglang hatagan ug usa ka sukod sa pagtahod sa kaugalingon ug kadungganan. Ang tambag kinahanglang timbang uban sa malulot, apan lig-on, nga mga pulong sa pagsaway aron mapalihok siya sa paghinulsol.—Salmo 44:15; 1 Corinto 15:34.
Mahinungdanon, ang Balaod sa Diyos sa Israel naglakip niining mga prinsipyoha. Kini nagtugot sa tambag ug gani pisikal nga pagbadlong, samtang sa samang higayon gipreserbar ang katungod sa indibiduwal sa usa ka sukod sa personal nga kadungganan. Ang paglatos “sa gidaghanon nga tumbas sa daotang buhat” gitugot, apan kini dili maghingapin. May limiti ang gidaghanon sa latos nga ipahamtang aron nga ang mamumuhat ug daotan dili “sa pagkatinuod pakamenoson.”—Deuteronomio 25:2, 3.
Ang pagtagad alang sa mga pagbati sa mahinulsolong mga mamumuhat ug daotan mao usab ang hiyas ni Jesus. Labot kaniya, si Isaias nagtagna: “Walay nabun-og nga tangbo nga iyang gupokon, ug walay nagbaga nga pabilong lino nga iyang palongon. Sa kamatinuoron iyang ipahamtang ang hustisya.”—Isaias 42:3; Mateo 12:17, 20; Lucas 7:37, 38, 44-50.
Sa pagpasiugda pa sa panginahanglan alang sa empatiya mao ang mga pulong ni Jesus sa Sermon sa Bukid: “Busa, ang tanang butang nga buot ninyo nga buhaton sa mga tawo nganha kaninyo, kamo usab kinahanglang magbuhat sa ingon ngadto kanila.” (Mateo 7:12) Pagkahinungdanon niining prinsipyoha sa pagtuboy sa maayong mga relasyon nga kana sagad nga nailhang Bulawanong Lagda. Ingong Kristohanong ansiano, sa unsang paagi kana makatabang kanimo sa pagtratar sa uban nga may kalulot ug pagpasidungog sa dihang nagatambag?
Hupti sa hunahuna nga ikaw usab makahimog mga sayop. Ingon sa gipahayag ni Santiago, “ang tanan mangapandol man sa makadaghan.” (Santiago 3:2) Ang paghinumdom niini makatabang sa pagpaigoigo sa imong mga komento ug sa pagkontrolar sa imong mga pagbati sa dihang kinahanglanon nga makigsulti sa uban mahitungod sa ilang mga kakulangan. Ilha ang ilang mga pagbati. Kini motabang kanimo nga makalikay sa hinobrang pagsaway, nga magdala sa pagtagad ngadto sa ginagmayng mga sayop o mga kahuyangan. Si Jesus nagpasiugda niini sa dihang siya miingon: “Hunong na sa pagpanghukom aron dili kamo pagahukman; kay sa unsa mang hukom nga inyong ginahukom, kamo pagahukman; ug sa sukod nga inyong ginasukod, sila magasukod nganha kaninyo.”—Mateo 7:1, 2.
Pasidunggi ang Uban—Sukli ang Yawa
Ang mga taktika ni Satanas gidesinyo sa pagkuha sa imong dungog, sa pagpatunghag mga pagbati nga gidaogdaog, kawalay hinungdan, ug kasubo. Matikdi kon sa unsang paagi niya gigamit ang tawhanong ahente aron pukawon ang negatibong mga emosyon sa matinumanong si Job. Ang salingkapawng si Eliphaz nangangkon: “Sa iyang mga alagad siya [Jehova] walay pagsalig, ug sa iyang mga mensahero [balaang mga manulonda] siya namasangil ug kasaypanan. Unsa pa kaha niadtong nagpuyo sa mga balay nga lapok [makasasalang mga tawo], kansang mga patukoranan anaa sa abog! Ang usa dali rang magadugmok kanila kay sa usa ka anunugba.” (Job 4:18, 19) Busa sumala kaniya, alang sa Diyos si Job sama rag bili sa usa ka anunugba. Sa pagkatinuod, ang tambag ni Eliphaz ug sa iyang mga kauban, nga dili gayod makapalig-on, mihikaw kang Job bisan sa handumanan sa maayong mga panahon. Sa ilang hunahuna ang iyang pagkamaunongon sa miagi, pagbansay sa pamilya, relasyon sa Diyos, ug mga gasa sa kaluoy walay bili.
Susama karong adlawa, ang mahinulsolong mga mamumuhat ug daotan ilabinang tandogon sa maong mga pagbati, ug sila nameligro nga ‘lamyon sa hilabihang kamasulob-on.’ Ang mga ansiano, sa dihang magtambag sa mga ingon, ‘magpanghimatuod sa ilang gugma’ alang kanila pinaagi sa pagtugot kanila sa pagpreserbar sa usa ka sukod sa kadungganan. (2 Corinto 2:7, 8) “Ang trataron nga walay pagpasidungog magpalisod sa pagdawat sa tambag,” angkon ni William. Kini hinungdanon sa pagpalig-on sa ilang pagtuo nga sila bililhon sa mga mata sa Diyos. Ipahinumdom kanila nga si Jehova ‘dili usang dili-matarong nga kalimtan ang [ilang] buhat ug ang gugma nga [ilang] gipakita alang sa iyang ngalan’ sa nangaging katuigan sa matinumanong pag-alagad.—Hebreohanon 6:10.
Unsang dugang mga hinungdan ang makatabang kanimo sa pagpasidungog sa uban sa dihang nagatambag? Ilha nga ang tanang tawo nagbaton ug kinaiyanhong katungod sa kadungganan, sanglit kay sila gilalang sumala sa dagway sa Diyos. Sila gipabilhan ni Jehova nga Diyos ug ni Jesu-Kristo; ang mga tagana sa lukat ug sa pagkabanhaw magpamatuod nianang kamatuorana. Si Jehova midugang pag kadungganan sa mga Kristohanon pinaagig “pagtudlo kanila alang sa usa ka ministeryo,” nga migamit kanila sa paghangyo sa daotang kaliwatan nga makigdait uban sa Diyos.—1 Timoteo 1:12.
Mga ansiano, hinumdomi nga ang kadaghanan sa inyong Kristohanong mga igsoon maoy umaabot nga mga membro sa pundasyon sa bag-ong tawhanong katilingban diha sa nahinloang yuta. Ingong gipakahamili ug bililhong mga indibiduwal, sila takos nga pasidunggan. Dihang magtambag, hinumdomi kon sa unsang paagi si Jehova ug si Jesus nagpakitag konsiderasyon alang kanila, ug padayon sa pagbuhat sa inyong bahin sa pagtabang sa inyong mga igsoon sa pagpreserbar sa pagbati sa kadungganan ug pagpabili sa kaugalingon sa atubangan sa mga hagit ni Satanas.—2 Pedro 3:13; itandi ang 1 Pedro 3:7.
[Kahon sa panid 29]
Tambag nga Nagapasidungog
(1) Paghatag ug tinuoray ug sinserong komendasyon. (Pinadayag 2:2, 3)
(2) Mahimong maayong tigpaminaw. Sa tin-aw ug sa kamaluloton ilha ang suliran ug ang hinungdan alang sa tambag. (2 Samuel 12:1-14; Proverbio 18:13; Pinadayag 2:4)
(3) Ipasikad ang imong tambag sa Kasulatan. Magmapositibo, rasonable, ug makapadasig, ug magpakitag empatiya. Hupti nga dili matibhangan ang kadungganan ug pagpabili sa kaugalingon sa ginatambagan. (2 Timoteo 3:16; Tito 3:2; Pinadayag 2:5, 6)
(4) Pasaligi ang ginatambagan nga moabot ang mga panalangin gumikan sa pagdawat ug pagpadapat sa tambag. (Hebreohanon 12:7, 11; Pinadayag 2:7)
[Hulagway sa panid 26]
Ang Kristohanong mga ansiano kinahanglang magpasidungog sa uban sa dihang nagatambag