Pakig-indig ba ang Yawi sa Kalamposan?
“ANG pagdaog dili labing bililhon, kini lang ang bililhon.” Karong adlawa daghan ang nagkinabuhi nga nahiuyon niining mga pulonga, nga sagad gipasangil sa usa ka coach sa Amerikanhong potbol, si Vince Lombardi. Karon, ang kanhi-Komunistang mga nasod mingduyog sa pagdayeg sa prinsipyo sa pakig-indig. Ang pagpailaila sa pakig-indig nganha sa ilang mga baligyaan giingon nga maoy gikinahanglan sa pagkab-ot sa kabahandianon. Sa Oriente daghang ginikanan ang nagpahinabo nga ang ilang mga anak makig-indig sa uban ug magpaeskuyla kanila sa pribadong mga tunghaan sa makadiyut intensibong pagpanudlo aron tudloan sila sa kahanas sa pagkapasar sa mga pasulit sa entrante. Ang labihan ka mabalak-ong mga ginikanan kombinsido nga ang pagsulod sa usa ka madungganong tunghaan mao ang yawi sa umaabot nga kauswagan.
Ang pakig-indig, daghan ang lig-ong nagtuo, mao ang yawi sa kalamposan. Sumala sa pagtuo nila, ang mga tawo nagmauswagon pinaagi sa pagpakig-indig sa usag usa. “Ang pakig-indig aron moasenso mao ang tinubdan sa kalagsik sa Hapones nga mga korporasyon,” matud sa 65.9 porsiento sa mga ehekutibo sa dagkong mga korporasyon nga gisurbi sa Pederasyon sa Ekonomikanhong mga Organisasyon sa Hapon. Ug mopatim-aw nga ang Hapones nga mga kompaniya nagmalamposon sa taastaas nga panahon. Bisan pa niana, ang pakig-indig mao ba gayod ang yawi sa kalamposan?
Tinuod Bang Magantihon?
Ang mga tawo nga makig-indig batok sa uban nagpadayag ug hakog, ako-ang-una nga tinamdan. Sila malipay sa dihang dili maayo ang kahimtang sa uban, kay naghunahunang kini sa baylo mopadayag nga ang nalampos nila mismo labaw pang maayo nga tan-awon. Alang sa ilang kaugalingong hinakog nga kaayohan, sila mogamit tingalig mga taktika nga makadaot sa uban. Asa ba mosangko ang maong pangagpas sa kalamposan? Si Yasuo, kinsa mihatag sa iyang bug-os nga panahon sa lumba sa pagkahimong ilado sa iyang kompaniya, nahinumdom sa iyang nangaging dalan ug nag-ingon: “Kay nahupong sa maindigong espiritu ug mahiligon-ug-promosyon nga panghunahuna, gitandi ko ang akong kaugalingon sa uban ug mibati nga labaw. Sa dihang ang maong mga tawo ibutang sa posisyon nga labaw kanako, ako moreklamo kada adlaw mahitungod sa tagdumala sa mga kawani sa kompaniya. Wala akoy mga higala sa tinuod nga kahulogan sa pulong.”
Ang maindigong espiritu mahimong mosangpot usab sa wala-sa-panahon nga pagkamatay. Sa unsang paagi? Ang Mainichi Daily News sa Hapon naglangkit sa karoshi, o pagkamatay gumikan sa sobrang trabaho, ngadto sa tipo-A nga panggawi. Ang tipo nga A naghubit sa sumbanan sa panggawi nga makasagubang sa hingaping paghunahuna sa episyenteng paggamit sa panahon, pagkamaindigon, ug pagkamabatokon. Ang Amerikanong mga kardiologong si Friedman ug si Rosenman naglangkit sa tipo-A nga panggawi ngadto sa coronary heart disease o hinayng agos sa dugo agi sa mga arteriya sa kasingkasing. Oo, ang maindigong espiritu mahimong makapatay.
Ang pakig-indig diha sa dapit-trabahoan mahimong mosangpot sa ubang mga kadaot sa lawas ug sa hunahuna. Usa ka pananglitan mao si Keinosuke, kinsa mao ang kinalabwang ahente sa usa sa dagkong mga kompaniyag kotse sa Hapon. Siya nakahimog talagsaong rekord sa pagbaligya ug katibuk-ang gidaghanon nga 1,250 ka kotse. Ang iyang letrato gikuwadro ug gibitay diha sa lawak nga gigamit sa hunta sa mga direktor sa hedkuwarter sa kompaniya. Bisan pag wala siya makaangay nga gamiton ang iyang mga kauban ingong mga tungtonganan aron moasenso, ang kompaniya nagduso kaniya nga makig-indig. Ingong sangpotanan, sa usa ka tuig siya nagsakit sa ulser nga gastrik ug duodenal. Niadtong tuiga mismo, 15 ka ehekutibo sa iyang kompaniya ang naospital, ug usa ang naghikog.
Sa balay, ang tinamdan nga makig-indig sa silingan moduso sa mga tawo nga magpasigarbo sa ilang pangabuhian diha sa walay-pagkatapos nga pakig-indig. (1 Juan 2:16) Ang komersiyalismo lamang ang mabenepisyohan niini, nga magbutang ug salapi nganha sa mga kamot sa mga magpapatigayon sa yuta.—Itandi ang Pinadayag 18:11.
Bisan pag ang pakig-indig ug maindigong espiritu tingali magpatunghag kahanas sa trabaho, dili katingad-an nga si Haring Solomon mipahayag: “Ako mismo nakakita sa tanang kahago ug tanang kahanas sa buluhaton, nga kini nagkahulogan sa pakig-indig sa usag usa; kini usab kakawangan ug paggukod sa hangin.” (Ecclesiastes 4:4) Busa sa unsang paagi kita padayong makahupot sa kalinaw sa hunahuna samtang nagkinabuhi sa maindigong katilingban? Aron masusi, atong tan-awon una kon diin nagsugod ang ideya sa pakig-indig.