Nganong Nahupngan sa Kahadlok ang Kalibotan?
KINSAY gustong magkinabuhi diha sa kahadlok? Ang kasarangang tawo nagatinguhag kasegurohan, nga walay hulga sa iyang kinabuhi o sa mga kabtangan. Busa, daghan ang namalhin gikan sa daghag-krimen nga mga dapit. Bisan pa, ang mga hinungdan sa kahadlok naglungtad bisan asa.
Ang mga hulga gikan sa aksidente sa nukleyar nga mga hinagiban ug sa reaktor nakapukaw ug kahadlok sa pagkalaglag sa katawhan. Ang nagsulbong nga kabangisan nagapalambo sa kahadlok. Daghan ang nangahadlok nga ang AIDS mahimo unyang labing makamatay nga epidemiya sa siglo. Ang pagkadaot sa atong kalikopan maoy lakip sa mga hinungdan sa kahadlok. Kini ba nga mga kahadlok sa linain adunay kahulogan? Ug kita ba makalaom pa nga mabuhi diha sa usa ka kalibotan nga walay ingon niana nga kahadlok?
Tibuok-Kalibotang Kahadlok Adunay Kahulogan
Ang kaylap nga kahadlok karong adlawa adunay kahulogan tungod sa gitagna diha sa Bibliya. Diha sa iyang tagna bahin sa kataposang mga adlaw, si Jesu-Kristo mikutlo ug mga kahimtang nga makapukaw ug kahadlok. Siya miingon: “Nasod motindog batok nasod ug gingharian batok gingharian, ug aduna unyay mga kakulang sa pagkaon ug mga linog sa usa ka dapit human sa laing dapit.” Si Jesus naghisgot usab bahin sa “pag-uswag sa kalapasan.” Sukad sa 1914, ang walay-sama nga mga gubat, mga gutom, mga linog, ug kalapasan misangpot ug dakong kahadlok ug kapildihan sa kinabuhi.—Mateo 24:7-14.
Bisan ang mga tinamdan sa mga tawo nakapukaw ug kahadlok karong adlawa. Diha sa 2 Timoteo 3:1-4, atong mabasa ang matagnaong mga pulong ni apostol Pablo: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos.” Sanglit gilibotan man kita niining matanga sa mga tawo niining kataposang mga adlaw, dili ikahibulong nga adunay daghan kaayong kahadlok!
Kon Unsay Mapaabot Niining Kalibotana
Gitandi ni Jesus kining yugtoa sa kataposang mga adlaw sa kalibotan sa panahon ni Noe. Tino, grabe ang kahadlok sa maong panahon, kay ang rekord sa kasaysayan sa Bibliya nag-ingon: “Ang yuta nadaot sa panan-aw sa matuod nga Diyos ug ang yuta puno sa kabangisan.” Busa, “miingon ang Diyos kang Noe: ‘Ang kataposan sa tanan nga unod ania na sa atubangan nako, kay ang yuta puno sa kabangisan.’” (Genesis 6:11, 13) Ang maong daotang kalibotan mabangis kaayo nga gitapos kadto sa Diyos pinaagi sa Lunop sa tibuok kalibotan. Hinunoa, tungod sa gugma, giluwas ni Jehova nga Diyos ang matarong nga si Noe ug ang iyang pamilya.—2 Pedro 2:5.
Busa unsay mapaabot sa presenteng mabangis nga kalibotan? Aw, gidumtan sa Diyos ang mabangis nga pagkawalay-pagtagad sa kaayohan sa uban. Kini makita diha sa mga pulong sa salmista: “Si Jehova mismo nagasusi sa usa nga matarong ingon man sa usa nga daotan, ug ang si bisan kinsa nga nagahigugma sa kabangisan ginadumtan sa Iyang kalag.” (Salmo 11:5) Gitapos ni Jehova ang mabangis nga kalibotan sa mga adlaw ni Noe. Nan, dili ba kita makapaabot nga taposon sa Diyos kining kalibotana nga gihampak sa makapukaw-ug-kahadlok nga kabangisan?
Si apostol Pedro gidasig sa Diyos sa pagpadayag bahin sa presensiya ni Kristo ug sa pagtagna sa katalagman alang sa presenteng daotang kalibotan. Siya misulat: “Sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa kaugalingon nilang mga tinguha ug manag-ingon: ‘Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.’” Unya gigamit ni Pedro ang terminong “mga langit” sa paghawas sa sistema sa dili-hingpit nga pagmando sa katawhan ug ang pulong “yuta” alang sa dili-matarong nga tawhanong katilingban. “Kay,” matud pa niya, “sumala sa buot nila, ilang nasayloan pagmatikod kining hitaboa, nga dihay mga langit gikan sa kakaraanan ug usa ka yuta nga lig-ong nagbarog gikan sa tubig ug taliwala sa tubig pinaagi sa pulong sa Diyos; ug pinaagi kanila ang kalibotan niadtong panahona [panahon ni Noe] nakaagom sa kalaglagan sa dihang gilunopan kini sa tubig. Apan pinaagi sa mao ra nga pulong ang mga langit ug ang yuta nga mao karon gikatagana alang sa kalayo ug gikagahin sa adlaw sa paghukom ug sa kalaglagan sa mga tawong dili-diyosnon.”—2 Pedro 3:3-7.
Sa susama nga hunahuna, si Pablo naghisgot nga si Kristo ug ang iyang gamhanang mga manulonda “magapanimalos kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus. Kini sila mismo makaagom sa hudisyal nga silot sa kalaglagang walay-kataposan.” (2 Tesalonica 1:6-9) Ang kataposang basahon sa Bibliya naghisgot bahin sa pagtigom sa mga nasod alang sa “gubat sa dakong adlaw sa Diyos nga Labing Makagagahom” ug nagpasalig kanato nga si Jehova “magalaglag niadtong nagalaglag sa yuta.”—Pinadayag 11:18; 16:14-16.
Usa ka Panahon sa Kalipay, Dili Kahadlok
Imbes mahadlok sa gitagna sa Bibliya alang niining kalibotana, ang mga tawong matul-id adunay katarongan nga malipay. Taposon sa dili madugay ni Jehova kining daotang kalibotan, apan kini pagahimoon alang sa kaayohan niadtong nahigugma sa pagkamatarong. Unsay mosunod sa pagtapos sa Diyos niining presenteng sistema sa mga butang? Aw, usa ka bag-ong sistema ilalom sa langitnong Gingharian sa Diyos, nga maoy gitudlo ni Jesus sa iyang mga sumusunod nga iampo! Siya miingon: “Mag-ampo kamo niining paagiha: ‘Amahan namo sa mga langit, balaana ang imong ngalan. Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.’” (Mateo 6:9, 10) Unsa nga mga kausaban ang mapaabot sa dihang matuman na ang kabubut-on sa Diyos dinhi sa yuta?
Ang mga gubat ug ang mga kalisang niini matapos na unya. Ang Salmo 46:9 nag-ingon: “Siya [Jehova nga Diyos] magapahunong sa gubat hangtod sa kinatumyan sa yuta. Ang pana iyang balion ug ang bangkaw iyang putolputolon; ang mga karro [sa gubat] iyang sunogon sa kalayo.” Unya ang mga tawo “manglingkod, ang matag usa ilalom sa iyang parras ug ilalom sa iyang kahoyng igos, ug wala na unyay magpakurog kanila.”—Miqueas 4:4.
Ang makamatay nga mga sakit dili na unya mopukaw ug kahadlok ug magapildig mga kinabuhi. Ang saad sa Diyos mao: “Wala na unyay molupyo nga moingon: ‘May sakit ako.’” (Isaias 33:24) Pagkadako nga hinungdan sa pagkalipay!
Ang mga kahadlok nga nalangkit sa krimen ug kabangisan mahimo na unyang mga butang sa nangagi. Ang Salmo 37:10, 11 nagsaad: “Sa dili madugay, ug ang usa nga daotan mawala na; ug pagasusihon mo sa dakong kakugi ang iyang dapit, ug siya mawala diha. Apan ang mga maaghop magapanunod sa yuta, ug makakaplag ug tugob nga kalipay diha sa kadagaya sa pakigdait.”
Sa unsang paagi ang mga kahadlok karong adlawa pagapulihan sa matuod nga pakigdait ug kasegurohan? Pinaagi sa usa ka matarong nga kagamhanan—Gingharian sa Diyos. Mahitungod sa atong panahon, ang Daniel 2:44 nag-ingon: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug ang gingharian mismo dili igapasa ngadto sa lain nga katawhan. Kini magadugmok ug magaut-ot niining tanang mga gingharian, ug kini molungtad sa walay kataposan.” Ang tinudlong Hari ni Jehova, si Jesu-Kristo, ‘kinahanglang magmando hangtod ibutang sa Diyos ang tanang mga kaaway ilalom sa iyang mga tiil.’ (1 Corinto 15:25) Ang Usa ka Libo ka Tuig nga Pagmando ni Kristo magatuman sa orihinal nga katuyoan sa Diyos sa pagpatunghag usa ka paraisong yuta nga pagapuy-an sa walay kataposan sa malipayong mga katawhan.—Lucas 23:43; Pinadayag 20:6; 21:1-5.
Diha niana nga Paraisong yuta, adunay usa ka maayo nga kahadlok. Kini mao “ang kahadlok kang Jehova.” (Proverbio 1:7) Sa pagkamatuod, angay nga aduna kita niining kahadloka bisan karon, tungod kay kini maoy halalom nga pagtahod ug kataha nga inubanan sa kahadlok nga mapasuko ang Diyos tungod kay gipabilhan nato ang iyang mahigugmaong-kalulot ug pagkamaayo. Kini nga kahadlok nagkinahanglan ug bug-os nga pagsalig kang Jehova ug matinumanong pagsugot kaniya.—Salmo 2:11; 115:11.
Ang makahahadlok nga mga hitabo nagtimaan niini ingong kataposang mga adlaw. Hinunoa, kon atong pamatud-an ang atong gugma sa Diyos, kita malipay inay mahadlok. Ang mga tagna sa Bibliya nagpakita nga ang pagtapos sa Diyos niining kalibotana haduol na. Kini pagapulihan pinaagi sa gisaad ni Jehova nga Diyos nga bag-ong kalibotan sa pagkamatarong. (2 Pedro 3:13) Sa pagkamatuod, ilalom sa pagmando sa Gingharian aduna unyay usa ka kalibotan nga walay dili-maayo nga kahadlok.
[Kahon sa panid 6]
ANG GAHOM SA USA KA KOPYA
SI Tomasz, usa ka batan-ong ulitawo gikan sa Polandia, nagkaproblema sa balaod nga nagpahinabo kaniya sa pagbiya sa nasod. Sulod sa unom ka bulan iyang gitabok ang Uropa pinaagi sa pagsakayg libre, matulog diha sa tolda ug nagtrabaho sa bisan unsang mga trabaho. Kasamtangan, usa ka pangutana ang anaa kanunay sa iyang hunahuna: Unsa ang katuyoan sa kinabuhi?
Gitubag ang pangutana ni Tomasz sa dihang siya gihatagag usa ka kopya sa Ang Bantayanang Torre sa Polako. Gibasa niya kini sa makadaghan ug nakasabot nga kining magasina naundan sa kamatuoran nga iyang gipangita. Si Tomasz misakayg-libre sa 200 kilometros ngadto sa sangang buhatan sa Watch Tower sa Selters/Taunus, Alemanya. Miabot sa gabii sa Lunes, iyang giisa ang iyang magasin nga Bantayanang Torre ug miingon: “Gusto ko nga adunay mopatin-aw ug dugang bahin sa sulod niining magasina. Unsa ang kinahanglan kong buhaton?”
Niadtong gabhiona, duha ka Saksi ni Jehova ang nakigsulti kang Tomasz mahitungod sa katuyoan sa kinabuhi, gigamit ang Bibliya ingong basehanan alang sa ilang panagsultiay. Maikagon nga makakat-on ug dugang, si Tomasz mibalik sa sangang buhatan kada adlaw niadtong semanahona, nagtuon sa Bibliya ug sa librong Ikaw Mabuhing Walay Kataposan sa Paraiso sa Yuta.
Mihukom si Tomasz sa pagbalik sa Polandia, bisag makaatubang siyag mga problema didto. Busa, sa Biyernes, human sa upat lamang ka adlaw nga miabot sa sangang buhatan sa Selters, si Tomasz mipauli sa iyang yutang natawhan. Misugod dayon siya sa pagtuon uban sa mga Saksi ni Jehova sa Polandia. Tulin nga miuswag si Tomasz ug madasigong misugod sa pagpakigsulti sa uban mahitungod sa iyang nakat-onan. Sa Oktubre 1993, upat ka bulan lamang human sa iyang unang pagduaw sa Selters, siya gibawtismohan ingong usa sa mga Saksi ni Jehova.
Usa ka kopya lamang sa Ang Bantayanang Torre ang nakatabang niining batan-ong ulitawo aron masusi ang katuyoan sa kinabuhi!
[Hulagway sa panid 7]
Ilalom sa pagmando sa Gingharian ni Jesu-Kristo, ang kalibotan dili na gayod unya mahupngan pag-usab sa kahadlok