Mga Saksi ni Jehova sa Tibuok Kalibotan—Polandia
SA TINGHUNLAK sa 1989, nagsugod pagkahugno ang mga gobyernong Komunista gikan sa Baltic ngadto sa Black Sea. Samtang ang Kurtinang Puthaw nagkabungkag, ang mga nasod sa Sidlakang Uropa misugod sa pagpangitag ilang kaugalingong mga direksiyon. Lakip kanila mao ang Polandia, usa ka nasod nga puno sa mga bakilid, halapad nga kapatagan, ug nagbansiwag nga kabukiran.a
Ang Polakong mga tawo maoy makugihong mga trabahante, ug ang Polandia nakapatunghag pipila ka ilado sa kalibotan nga mga tawo sa arte ug mga siyentipiko. Labaw pa niana, hinunoa, karon adunay nagtubong panon sa mga magmamantala sa maayong balita sa Gingharian sa Diyos.
Maisog sa Pagladlad sa Kabakakan
Sa Polandia daghan ang buot makakat-on sa kamatuoran gikan sa Bibliya. Apan ang uban napugngan sa ilang mga paryente o mga silingan. Pananglitan, sa duol sa Wrocław, usa ka interesadong babaye mihunong sa pagtuon sa Bibliya uban sa mga Saksi ni Jehova sa dihang gipit-os siya sa pamilya ug mga higala. Bisan pa niana, gibasa sa iyang tin-edyer nga anak nga babaye ang mga seryal sa mga artikulo sa Bantayanang Torre nga nagyagyag sa bakak nga relihiyon. Kini nakapukaw sa interes sa iyang anak nga babaye sa kamatuoran.
Human sa unom ka bulan nga pagtuon sa Bibliya, kini nga dalagita mihukom sa pagputol sa tanan niyang mga kalangkitan sa bakak nga relihiyon. Giduaw niya ang klerigo sa iyang simbahan aron ipahibalo kaniya ang iyang desisyon. Gisultihan siya nga isulat ang mosunod: “Ako, si K—— P——, nagsalikway sa Katolikong pagtuo.”
Sa pagkasunod Dominggo, kini nga pahayag gibasa sa simbahan. Ang apohang lalaki sa dalagita gikuyapan, ug mihilak ang iyang apohang babaye. Hinuon, ang ubang sakop sa parokya nakadayeg ug miingon: “Sa kataposan, may usa na gayod nga may igong kaisog sa pagpadayag nga adunay daghang kabakakan ang atong simbahan.” Kining maisogong tin-edyer karon maoy usa na ka bawtismado igsoong babaye sa espirituwal ug nakasugod ug pito ka pagtuon sa Bibliya diha sa iyang balangay.
Pinaagi sa Ilang mga Bunga’
Ang senemanang basahong Kujawy i Pomorze nagpatik sa taho nga “Pinaagi sa Ilang Bunga Mailhan Ninyo Sila.” Sa bahin, ang artikulo nag-ingon nga ang mga magsisimba sa Kakristiyanohan “sa pagkatinuod wala magtagad nga seryoso kaayo sa relihiyosong mga prinsipyo nga ilang gidawat. Sila lahi kaayo sa mga Saksi ni Jehova kinsa nagapadapat sa ilang ginasangyaw, ug ilang ginasangyaw ang gisugo sa Bibliya.”
Human sa pagtandi sa kalainan sa mga Saksi uban niadtong nag-angkong mga Kristohanon, ang taho nagpadayon: “Ang ulahi lagmit gayod nga wala mahibalo, ug kasagaran dili magpadapat, sa hinungdanong mga kamatuoran ug mga prinsipyo sa ilang pagtuo. . . . Pinaagi sa ilang mga tinamdan, ang mga Saksi ni Jehova nagpasundayag sa panagkauyon sa ilang mga pulong ug mga buhat, sa ingon nagpamatuod nga sila dili mao ang ‘bakak nga mga propeta,’ kondili, sila mailhan pinaagi sa ilang mga bunga. ‘Wala gayoy mga tawo ang mamupo ug ubas gikan sa sampinit o igos gikan sa kudyapa, dili ba?’ (Mateo 7:15-20).”
Usa ka babaye misulat ngadto sa senemanang Przyjaciółka, nga nagmulo nga ang iyang anak nga lalaki mibiya sa Katolikong Iglesya ug nahimong usa sa mga Saksi ni Jehova. Unsay tambag sa editor? “Kon ang imong anak lalaki nakig-uban na sa mga Saksi ni Jehova, nakakat-on ug midawat sa ilang pagtuo, kini maoy iyang desisyon, nga angayng ilhon ug tahoron. . . . Kining maong relihiyosong grupo nailhan pinaagi sa daghang maanindot ug tilinguhaon-sa-katilingban nga mga hiyas, sama sa ilang talagsaong panaghiusa ug dulot nga pagbati, dako nga kamatinud-anon ug suod nga pagsunod sa mga lagda sa katilingban sa katibuk-an, ug sa kataposan, ang katakos sa pagkinabuhi nga uyon sa ilang kamatuoran, nga aktuwal nga nagapadapat sa gipangangkong mga sukdanan. Kini maoy hamiling mga kinaiya.”
[Kahon sa panid 9]
a Alang sa dugang impormasyon, tan-awa ang 1994 Calendar of Jehovah’s Witnesses.
[Kahon sa panid 9]
LARAWAN SA NASOD
1993 Tuig sa Pag-alagad
KINATAS-ANG GIDAGHANONG NAGSANGYAW: 113,551
PROPORSIYON: 1 ka Saksi sa 339
TUMATAMBONG SA MEMORYAL: 235,642
ABERIDS NGA PAYUNIR NGA MGA MAGMAMANTALA: 7,961
ABERIDS NGA MGA PAGTUON SA BIBLIYA: 79,131
GIDAGHANON SA NABAWTISMOHAN: 8,164GID
AGHANON SA MGA KONGREGASYON: 1,397
SANGANG BUHATAN: Nadarzyn
[Hulagway sa panid 9]
Sangang buhatan sa Lodz sa Polandia sa 1948
[Hulagway sa panid 9]
Pagdalag placard nga buluhaton, Hunyo 1948, sa kanhi Sidlakang Prussia
[Hulagway sa panid 9]
Setentay-dos ka membro sa mga trabahante sa Bethel sa Polandia, Enero 1993
[Hulagway sa panid 9]
Ang bag-ong sanga sa Nadarzyn