Hupti ang Integridad ug Mabuhi!

“TUNGLOHA ang Diyos ug magpakamatay ka!” Ang hapin sa atong magasin naghulagway sa asawa ni Job, kinsa nagmakmak kaniya pinaagi nianang mga pulonga. Kadto mga 3,600 ka tuig kanhi. Apan kanang binabang pag-atake sa matinumanong alagad sa Diyos nagpasiugda sa usa ka isyung giatubang sa katawhan hangtod niining adlawa. Ang matinumanong si Job nakasinatig grabeng mga kapildihan​—iyang kahayopan, iyang balay, iyang napulo ka anak. Niadtong panahona ang iyang lawas gitaptan sa usa ka tagdugay nga sakit, nga nagtigi kaniya hangtod sa kinutbanan sa iyang pag-agwanta. Ang hinungdan? Ang pangunang kaaway sa Diyos ug sa tawo, si Satanas nga Yawa, nagpadayon sa hagit nga ang tawo dili makapadayon paghupot sa integridad ngadto sa Diyos ubos sa grabeng pagsulay.​—Job 1:11, 12; 2:4, 5, 9, 10.

Karong adlawa, sama sa adlaw ni Job, “ang tibuok kalibotan nahimutang diha sa gahom sa tuman-kadaotang usa,” si Satanas nga Yawa. (1 Juan 5:19) Sa pagkatinuod, kana labi pang matuod karong adlawa, kay karon “ang usang gitawag nga Yawa ug Satanas, kinsa nagapahisalaag sa tibuok gipuy-ang yuta,” gitambog na nganhi niining yutaa gikan sa mga langit. (Pinadayag 12:9) Kini ang hinungdan sa grabeng mga kaalaotan nga nagsakit sa katawhan sa atong panahon. Ang unang gubat sa kalibotan, nga misilaob niadtong 1914, nagtimaan sa “sinugdanan sa mga kaul-ol sa kasakitan” nga nagpadayon hangtod niining ika-20ng siglo.​—Mateo 24:7, 8.

Niining mapintas, daotang kalibotan, gibati ba nimo sukad nga nahidangat ka sa kinutbanan sa tawhanong pag-agwanta? Ikaw ba sukad naghunahuna, ‘Aduna bay katuyoan ang kinabuhi?’ Tingali gibati kana ni Job, apan wala gayod siya kawad-ig pagtuo sa Diyos, bisan pag siya nakahimog mga sayop. Gipahayag niya ang iyang determinasyon niining mga pulonga: “Hangtod ako mamatay dili ko kuhaon ang akong integridad gikan sa akong kaugalingon!” Siya may pagsalig nga ang Diyos ‘mahibalo sa iyang integridad.’​—Job 27:5; 31:6.

Si Jesu-Kristo, ang kaugalingong Anak sa Diyos, kinahanglan usab nga moagwanta sa mga pagsulay samtang dinhi sa yuta. Si Satanas nag-atake kang Jesus sa lainlaing mga paagi. Gipahimudsan niya ang lawasnong mga panginahanglan ni Jesus ug gisulayan ang Iyang pagsalig sa Pulong sa Diyos, sama sa didto sa bukid diin gitental ni Satanas si Jesus. (Mateo 4:1-11) Gihasi niya si Jesus pinaagi sa pagpahinabo nga ang apostatang mga eskriba ug mga Pariseo ug kadtong nalimbongan nila naglutos kaniya, nagsumbong kaniya sa pasipala, ug nagsabotsabot sa pagpatay kaniya. (Lucas 5:21; Juan 5:16-18; 10:36-39; 11:57) Mas daotan ang gibuhat nila kang Jesus kay sa gibuhat sa tulo ka mini nga mga maglilipay ni Job.​—Job 16:2; 19:1, 2.

Sa tanaman sa Getsemane, samtang si Jesus nagsingabot sa tayuktok sa maong pagsulay, iyang gisultihan ang iyang mga tinun-an: “Dulot nga naguol ang akong kalag, bisan hangtod sa kamatayon.” Unya, “miyukbo siya sa iyang nawong, nga nag-ampo ug nag-ingon: ‘Amahan ko, kon posible man, kuhaa kining kopaha gikan kanako. Apan, dili sumala sa akong pagbuot, kundili sumala sa imohang pagbuot.’” Sa kataposan, didto sa kahoy sa pagsakit, ingong katumanan sa mga pulong sa tagna sa Salmo 22:1, si Jesus misinggit: “Diyos ko, Diyos ko, nganong gitalikdan mo ako?” Apan sa kataposan wala biyai sa Diyos si Jesus tungod kay si Jesus nagpadayon paghupot sa hingpit nga integridad ngadto Kaniya, nga mitagana ug sulundan aron pagasundon sa tanang matuod nga mga Kristohanon. Si Jehova miganti sa paghupot ni Jesus ug integridad pinaagi sa pagbanhaw kaniya ug pagbayaw kaniya ngadto sa kinatas-ang kalangitan. (Mateo 26:38, 39; 27:46; Buhat 2:32-36; 5:30; 1 Pedro 2:21) Gantihan sa Diyos ang tanang uban nga samang naghupot sa integridad ngadto kaniya.

Ang integridad ni Jesus wala lamang maghatag ug bug-os nga tubag sa hagit ni Satanas apan ang halad sa iyang hingpit tawhanong kinabuhi mitagana sa lukat, nga pinasukad niana ang nagahupot-sa-integridad nga mga tawo makabaton ug kinabuhing walay kataposan. (Mateo 20:28) Nahauna, gitigom ni Jesus ang dinihogang “gamayng panon” nga mahimong kaubang mga manununod niya sa Gingharian sa mga langit. (Lucas 12:32) Human niana, ang “usa ka dakong panon” gitigom aron makalabang-buhi sa “dakong kasakitan,” nga mogula niana aron panundon ang kinabuhing walay kataposan sa dominyo sa Gingharian sa Diyos sa yuta.​—Pinadayag 7:9, 14-17.

Ang nagahupot-sa-integridad nga si Job mahiapil sa bilyonbilyong mga patay nga pagabanhawon unya aron mahimong bahin nianang malinawong “bag-ong yuta” nga katilingban. (2 Pedro 3:13; Juan 5:28, 29) Sumala sa gihulagway sa luyong hapin sa atong magasin, si Job gigantihan sa iyang integridad sa dihang si Jehova “nagpanalangin sa kataposan ni Job . . . nga labaw pa kay sa iyang sinugdanan.” Nabatonan niya ang espirituwal nga kusog sama sa usa nga “wala makasala pinaagi sa iyang mga ngabil.” Gilugwayan sa Diyos ang iyang kinabuhi ug dugang 140 ka tuig. Sa materyal nga paagi, gihatagan niya si Job ug doble sa tanang iyang naangkon sa nangagi, ug si Job “nakabaton ug pito ka anak lalaki ug tulo ka anak babaye,” nga ang mga anak babaye giisip nga labing maanyag sa tibuok yuta. (Job 2:10; 42:12-17) Apan ang maong tanang kadagaya usa lamang ka pasiuna sa mga panalangin nga mapahimuslan sa mga tighupot sa integridad sa Paraiso sa “bag-ong yuta.” Ikaw usab makaambit sa maong kalipay, sumala sa isaysay sa sunod nga mga panid!

[Hulagway sa panid 4]

Gihatag ni Jesus ang hingpit nga panig-ingnan ingong tighupot sa integridad