Mga Magmamantala sa Gingharian Nagtaho
Gikan sa Baba sa Gagmayng mga Bata
SI Jesus miingon nga “gikan sa baba sa mga gagmayng bata ug mga masuso gihatod mo ang nahingpit nga pagdayeg.” (Mateo 21:16) Nakitang matuod kini diha sa tres-anyos nga batang babaye sa Guadeloupe kansang inahan maoy usa sa mga Saksi ni Jehova. Ang batang babaye kanunayng ibilin sa apohang babaye kon magtrabaho ang inahan sa bata, ug sangyawan sa bata ang iyang apohan.
Ang inahan miingon: “Kanunayng monunotnunot ang akong anak sa iyang apohan, samokon siya sa pagtuon sa librong Akong Basahon sa mga Estorya sa Bibliya uban kaniya.” Ang kanunay tubag mao: “Pasensiya, nasayod ka nga nagdali ako ug wala akoy panahon niana, trabahoon ko pa ang buluhaton sa imong inahan.” Apan sa usa ka adlaw niana ang tres-anyos nga bata miinsister nga makigtuon, iyang gibuksan ang libro ug misugod sa pagbatbat sa mga hulagway nga pinasukad sa Bibliya ngadto sa iyang apohan. Natingala sa kahibalo sa iyang apo, gikuha sa babaye ang libro ug misugod sa pagbasa niini. Naamgohan niya sa ulahi nga husto ang gisulti sa gamayng bata. Napukaw ang iyang interes, ug mibasa siya ug dugang.
Sa ulahi niana, ang apohan miingon sa inahan sa bata: “Sa nangagi, dili kaayo ko mamati sa imong isulti kanako mahitungod sa Pulong sa Diyos. Apan dili na ako makaingon niana, sanglit gibasa na nako ang Balaang Kasulatan karon.”
Giawhag sa bata ang iyang apohan sa pagtambong sa mga tigom sa mga Saksi ni Jehova, ug misugot ang babaye aron sa pagpahimuot sa bata. Naikag kaayo siya sa iyang nadunggan. Karon, ang apohan maoy usa na ka dedikado bawtismadong Saksi ni Jehova.
Sa pagkatinuod, gikan sa baba sa gagmayng mga bata gitagana ni Jehova ang pagdayeg. Unsa ka malipayon nilang tulo karon nga sila nag-alagad kang Jehova sa tingob!
◻ Laing eksperyensiya sa usa ka bata nagagikan sa Nigeria. Dihay pagtuon sa Bibliya nga gihimo sa pamilya apil sa amahan, inahan ug duha ka batang babaye. Namatay ang amahan, ug nawad-ag interes ang inahan ug mibalik sa iyang kanhing simbahan. Iyang gipugos ang batang mga babaye, 7 ug 12, sa pag-uban kaniya. Gilabanan pag-ayo sa mga bata ang pagtuo, nakiglalis pa ngani sa mga pangulo sa simbahan lakip sa pastor. Sanglit napildi sa kamatuoran sa Bibliya, mihunong siya sa pagduaw sa ilang balay. Tungod kay ang siyete-anyos dili man mouban sa iyang inahan sa iyang simbahan, dili hatagan sa babaye ug pagkaon ang bata.
Sa usa ka adlaw niana, miadto ang bata sa Kingdom Hall sa mga Saksi ni Jehova, apan walay tawo didto, sanglit nangadto man ang mga Saksi sa kombensiyon. Apan bisan pa niana, mikanta ang bata, nag-ampo ug nagtuon ingon nga siya anaa sa regular nga tigom.
Sa balay nianang gabhiona, matinahuron kaayo ang bata sa iyang inahan. Nakadayeg kaayo ang iyang inahan sa maong batasan ug nakatabang sa pagpabalik sa iyang interes sa kamatuoran. Mibalik siya sa iyang pagtuon sa Bibliya uban sa mga Saksi, mitambong sa mga tigom ug mipadayon sa pag-uswag sa kahibalo sa Bibliya. Karon ang inahan maoy usa na ka dedikado, bawtismadong alagad ni Jehova ug ang siyete-anyos maayog lakat sa kamatuoran.
Gipanalanginan ni Jehova ang baroganan niining siyete anyos nga maghuhupot sa integridad. Pagkadako sa iyang kalipay karon sa pagtan-aw sa iyang inahan nga usa na ka bawtismadong Saksi! Ug unsa ka mapasalamaton sa inahan nga ang iyang bata nagpabilin sa iyang integridad kang Jehova!