Kon Kanus-a Nila Ginabasa Kini ug sa Unsang Paagi Sila Nakabenepisyo
Sayo sa Buntag:
Usa ka magtiayon, nga parehong nagtrabaho gawas sa ilang balay, mihukom nga mobangon ug napulo ka minutos nga mas sayo kada buntag ug gamiton kanang panahona sa pagbasa nga duyog sa Bibliya una magdali sa pagbiya sa balay. Ang ilang gibasa nagtagana ug usa ka pasikaranan alang sa maayong kolokabildo human sila mobiya sa balay.
Usa ka ansiano sa Nigeria nagagamit sa eskedyul nga gilaraw alang sa Tunghaan sa Teokratikanhong Ministeryo ingong basehanan sa pagbasa sa Bibliya sa pamilya sa iyang panimalay. Ilang basahon ang usa ka bahin niana kada adlaw human sa ilang paghisgot sa inadlaw nga teksto, kasagaran sa buntag. Ang kabataan hangyoon nga magpulipuli pagbasa sa pipila sa giasayn nga seksiyon. Unya sila hangyoon nga mangutana bahin sa mga bersikulo nga nabasa.
Usa ka asawa sa Hapon nakabasa sa enterong Bibliya kas-a sa usa ka tuig sukad niadtong 1985. Ang iyang eskedyul mao ang pagbasa sulod sa 20 ngadto sa 30 minutos sugod sa alas 5:00 s.b. matag adlaw. Mahitungod sa mga benepisyo, siya miingon: “Ang akong pagtuo napalig-on. Kini nakatabang kanako sa paghikalimot sa akong balatian ug pagtunong sa pagtagad sa paglaom sa Paraiso.”
Usa ka igsoong babaye nga nahimong payunir sulod sa 30 ka tuig apan kang kansang bana dili Saksi mobangon sa alas singko kada buntag sa pagbasa sa Bibliya. Ang iyang eskedyul nagkinahanglan nga mobasa ug mga upat ka panid gikan sa Hebreohanong Kasulatan, usa ka kapitulo gikan sa Kristohanong Gregong Kasulatan, ug usa ka bersikulo gikan sa mga Proverbio. Nabasa niya ang enterong Bibiya matag tuig sukad niadtong 1959. Siya miingon: “Ingong resulta sa akong pagbasa, ako mibating gihigugma ni Jehova . . . Ako nakadawat ug pagdasig, kahupayan, ug pagtul-id.” Siya midugang: “Sa pagbasa sa Bibliya sama ra nga gipalagsik ako ni Jehova matag adlaw.”
Usa ka igsoong babaye nga nakakat-on sa kamatuoran diha sa usa ka nasod diin ang kalihokan sa mga Saksi ni Jehova gidili aduna usab ing bana nga supak sa iyang mga gituohan. Siya nakaarang sa paghimo sa iyang pagbasa sa Bibliya gikan sa Lunes hangtod sa Biyernes, tali sa alas 6:00 ug alas 7:00 s.b. Kini nakahatag kaniya ug sulodnong kalig-on. Sa paghinumdom kon sa unsang paagi ang iyang pagbasa nakaapektar kaniya, siya miingon: “Kami nakakat-on sa paghigugma kang Jehova ug kang Jesus ug sa pagkinabuhi nga malipayon, bisan sa mga suliran ug mga kalisdanan, kay nasayod nga ang mga saad ni Jehova dili mapakyas.”
Usa ka igsoong babaye nga nakatambong sa Tunghaan sa Payunir nga Pag-alagad determinadong molihok sumala sa tambag nga gihatag didto nga himoon ang pagbasa sa Bibliya nga adlaw-adlaw nga batasan. Sa sinugdan, siya nakahimo niana tali sa alas 5:00 ug alas 6:00 s.b. Sa dihang ang usa ka kausaban sa trabaho mibalda niana, siya mibalhin sa oras tali sa alas 9:00 ug alas 10:00 s.g. Sa dihang mitungha ang ubang malisod nga mga kahimtang, siya miingon, “Kanunay nakong gipasibo ang akong eskedyul sumala sa mga kahimtang.”
Sa Hapon:
Duha ka managsoon sa unod nga mga babaye nga mga membro sa pamilyang Bethel sa Brazil nagbatasan sa pagbasa nga duyog sa Bibliya sulod sa 20 ka minutos matag adlaw human sa paniudto. Nabasa na nila ang enterong Bibliya sa mga 25 ka beses; bisan pa niana sila misulat: “Kanunay kaming makakaplag ug bag-ong butang, busa ang pagbasa sa Bibliya wala gayod mahimong makapuol.”
Usa ka dalagang igsoon sa Hapon nakaamgo nga bisan tuod gimatuto nga Saksi, wala kaayo siya masinati sa Kasulatan; sa dihang siya nahimong payunir, gihukom niyang basahon ang Bibliya sa regular. Karon siya nagabasa alang sa Tunghaan sa Teokratikanhong Ministeryo samtang nagabiyahe ngadto sa ospital alang sa pagpatambal usa ka adlaw matag semana. Sa ulahi, sa balay, mohimo siya ug dugang nga panukiduki. Sa maghinapos ang semana, mobasa pa siya ug dugang sa Bibliya, nga nagapili ug mga basahon sumala sa han-ay sa pagkasulat niini.
Usa ka 13-anyos nga nakabasa na sa enterong Bibliya tulo ka beses sa pagkakaron nagabasa ug usa ka kapitulo matag adlaw sa dihang mopauli siya gikan sa tunghaan. Matud niya, kini nakatabang kaniya “sa pagbati ug labaw pang gugma kang Jehova.”
Usa ka Saksi nga may puliki kaayo nga eskedyul ingong nagatrabahong lalaki, usa ka ansiano, usa ka bana, ug usa ka amahan mamati sa mga audiocassette sa Bibliya samtang nagabiyahe paingon sa trabaho sakay sa tren. Unya sa balay siya magahimog personal nga pagtuon sa samang materyal.
Dugang pa sa iyang personal nga pagbasa, usa ka payunir sa Pransiya mamati sa mga audiocassette sa Bibliya samtang nagaluto, sa dihang nagadrayb, sa dihang nagaantos ug malisod nga mga panahon, o alang sa kalingawan lamang.
Usa ka 21-anyos nga payunir sa Hapon nahinumdom nga ang iyang inahan miinsister nga siya mopasulod ug espirituwal nga butang kada adlaw, ug siya nagabasa sa Bibliya matag adlaw, bisan tuod dili kanunay sa samang panahon, sukad nga siya tres anyos pa. Tapos niya mabasa ang bahin nga iyang gipili sa maong adlaw, iyang tinoon nga balikon niya pagbasa ang pangunang mga bersikulo, ug dayon siya mogugol ug pipila ka minutos sa pagsubli diha sa hunahuna kon unsay iyang nabasa.
Ang laing Saksi, nga usa ka payunir, nakabasa sa enterong Bibliya mga napulo ka beses sa milabayng 12 ka tuig. Ang iyang bana dili magtutuo, busa siya nag-eskedyul sa iyang pagbasa sa hapon.
Sa Gabii:
Usa ka ansiano ug regular nga payunir sa Hapon nga nagabasa sa iyang Bibliya matag gabii sa dili pa matulog naghimo niini sulod sa milabayng walo ka tuig. Siya miingon: “Ako sa linain nakagusto sa mga kasulatan nga nagpakita kon sa unsang paagi si Jehova naghunahuna, kon unsay iyang mga pagbati bahin sa mga butang, ug sa unsang paagi gidumala niya ang mga kahimtang. Pinaagi sa pagpalandong niining maong mga kasulatan, natabangan ako sa pagbaton sa panghunahuna ni Jehova ug sa pag-abag sa akong Kristohanong mga igsoong lalaki ug babaye ug sa mga membro sa akong pamilya.”
Usa ka ansiano sa Pransiya nagabasa sa Bibliya sulod sa usa ka oras kada gabii sukad niadtong 1979. Kasagaran aduna siyay lima o unom ka hubad nga gibutang sa iyang atubangan aron itandi. Siya miingon nga ang iyang mainampingong pagbasa nakatabang kaniya sa pagsabot “kon unsaon pagpadapat ang kahibalo sa Bibliya sa adlaw-adlaw nga mga kahimtang.” Kini nakapaarang usab kaniya nga mahimong mas epektibo sa dihang nagahatag ug tambag gikan sa Kasulatan.
Sulod sa milabayng 28 ka tuig, usa ka igsoong lalaki sa Nigeria naghimong batasan sa pagbasa sa gabii sa teksto sa Kasulatan nga gitagana sa Pagsusi sa Kasulatan sa Adlaw-Adlaw aron hisgotan pagkabuntag. Duyog niana, basahon niya ang enterong kapitulo sa Bibliya diin gikuha ang teksto. Human siya maminyo, gipadayon niya ang batasan, nga nagabasa ug nagahisgot sa materyal uban sa iyang asawa.
Usa ka tin-edyer kansang mga ginikanan dili mga Saksi nagbatasan sa pagbasa sulod sa lima ngadto sa napulo ka minutos matag gabii sa dili pa matulog. Kadto maoy bililhong mga minutos alang kaniya, ug siya mag-ampo una ug human sa pagbasa. Ang iyang tumong mao ang pagkahibalo sa mensahe nga gisugo ni Jehova nga irekord sa matag usa sa mga magsusulat sa Bibliya.
Usa ka minyong igsoong lalaki, nga nag-alagad sa Bethel, nag-ingon nga iyang nabasa ang Bibliya kas-a sa usa ka tuig sulod sa milabayng walo ka tuig. Siya nagabasa sulod sa 20 ngadto sa 30 minutos sa dili pa mopahulay sa gabii. Bisan pag siya gikapoy kaayo, iyang nakaplagan nga kon siya matulog nga wala makabasa, siya dili makatulog. Kinahanglang mobangon siya ug atimanon ang maong espirituwal nga panginahanglan.