Mga Saksi ni Jehova sa Tibuok Kalibotan—India
INDIA! Kining dako kaayong sub-kontinente maoy pinuy-anan sa 1 matag 6 ka tawo niini nga planeta. Tanantanan, kapin sa 1,000 ka pinulongan ug mga diyalekto ang sinultihan niining yuta sa panagkadaiya. Ang kinabag-an sa mga tawo maoy Hindu, nga 83 porsiento kanila, samtang 11 porsiento maoy mga Muslim, mga Sikh, mga Budhista, mga Jain, ug nangangkong mga Kristohanon nga maoy naglangkob sa nahibilin.
Ang mga Saksi ni Jehova nagpahimulos ug talagsaong kalamposan sa India sa katuigang dili pa dugay. Sila nakakaplag ug samag-karnerong mga tawo kinsa andam sa pagbarog nga malig-on sa kiliran sa Gingharian ni Jehova, bisan pa sa tanang paagi sa pagpiot ug pagsupak.
Pananglitan, usa ka batan-ong babaye sa usa ka ortodoksong Hindu nga pamilya nabakol sa polyo sukad pa sa pagkabata. Ang pag-antos nga iyang naagoman nagpahunahuna kaniya bahin sa Diyos ug sa katuyoan sa kinabuhi. Siya nangitag tubag diha sa daghang relihiyon apan wala makakaplag ug kahupayan. Tungod niini, siya nawad-an ug pagtuo sa relihiyon, apan nagtuo gihapon ug Diyos.
Niining panahona nahibalag sa duha ka Saksi kining batan-on nga babaye diha sa ilang balay-ug-balay nga ministeryo. “Nakahilak ako sa nakadungog kanila nga nagbasa sa Pinadayag 21:4,” siya nahinumdom. Gidawat niya ang daghang publikasyon sa Watch Tower Society ug misugot sa usa ka pagtuon sa Bibliya diha sa balay bisan pag misupak ang iyang inahan. Ang batan-ong babaye naghimog daghang kausaban sa iyang kinabuhi, maisogong giatubang ang pagsupak sa iyang mga paryente, ug nahimong bawtismadong Saksi. Siya miingon: “Dakong kauswagan ang akong nahimo, ug malisod kadto nga paagi. Apan nagauban kanunay kanako si Jehova nga Diyos ug gihatagan ako ug dakong kalinaw ug kalipay.”
Malig-ong Pagbarog Alang sa Putli nga Pagsimba Diha sa Eskuylahan
Usa ka batan-ong sister gipangutana sa iyang magtutudlo sa pag-adto sa Katolikong simbahan uban sa nahibilin sa klase. Ang sister matinahurong mibalibad, nag-ingon nga siya maoy usa sa mga Saksi ni Jehova ug dili mosimba kang bisan kinsa o bisan unsa gawas kang Jehova. Ang magtutudlo miingon nga kon ang tanan moadto sa simbahan, siya kinahanglang moadto usab. Apan ang sister mibarog nga malig-on ug miingon nga sanglit ang nangadto sa simbahan dili man moampo kang Jehova, dili niya makita ang katarongan kon nganong moadto siya.
Tungod sa kalig-on sa batan-ong babaye, ang iyang magtutudlo buot masayod ug dugang pa. Busa sa pagkasunod adlaw gihatagan siya sa sister ug artikulo sa Bantayanang Torre bahin sa pagsimba kang Jehova. Nakadayeg sa iyang nabasa, wala na siya paapila sa magtutudlo sa tanang relihiyosong mga kalihokan sa eskuylahan. Ang sister nakapahimutang ug napulo ka magasin kaniya ug sa ubang mga magtutudlo.
Pagsunod sa Balaod sa Diyos Labot sa Dugo Gigantihan
Dili pa dugay usa ka viral fever mikaylap nga nahimong epidemiya sa pipila ka bahin sa estado sa Kerala. Daoton ug maayo niining sakita ang mga rinyon ug mosangpot sa panginahanglag dialysis. Sagad nga ihatag ang mga pag-abunog dugo. Sa usa ka siyudad 14 ka tawo ang giadmit sa mga ospital nga nagkasakit niini. Usa niining mga pasyenteha maoy usa ka Saksi, usa ka ansiano sa lokal nga kongregasyon. Siya gisultihan nga ang pag-abunog dugo mao lamang ang mabatonang tambal. Gisaysay sa ansiano ang iyang Kasulatanhong mga pagtuo ug lig-ong midumili sa dugo. (Buhat 15:28, 29) Human sa daghang argumento ang mga doktor miingon nga siya mamatay tungod kay dili siya magpaabuno ug dugo.
Ang ubang 13 ka pasyente nakadawat ug dugo. Ikasubo, silang tanan namatay sulod lamang sa pipila ka adlaw. Ang igsoong lalaki mao lamang ang nahibiling buhi! Nahingangha ang mga awtoridad sa ospital. Ang mga empliyado sa ospital nakadayeg kaayo sa regular nga mga pagduaw sa mga sakop sa kongregasyon. Human nga gipagawas siya sa ospital, ang igsoong lalaki miadto sa pagpasalamat sa mga doktor, apan sila miingon: “Nganong pasalamatan man nimo kami? Pasalamati ang imong Diyos, si Jehova. Siya ang Usa nga nagluwas kanimo. Palihog iampo usab kami sa imong Diyos, si Jehova.”
[Kahon sa panid 24]
LARAWAN SA NASOD
1994 Tuig sa Pag-alagad
KINATAS-ANG GIDAGHANONG NAGSANGYAW: 14,271
PROPORSIYON: 1 ka Saksi sa 65,266
TUMATAMBONG SA MEMORYAL: 38,192
ABERIDS NGA PAYUNIR NGA MGA MAGMAMANTALA: 1,780
ABERIDS NGA MGA PAGTUON SA BIBLIYA: 12,453
GIDAGHANON SA NABAWTISMOHAN: 1,312
GIDAGHANON SA MGA KONGREGASYON: 410
SANGANG BUHATAN: LONAVLA
[Hulagway sa panid 25]
Sangang buhatan, Lonavla
[Hulagway sa panid 25]
Pagsangyaw maylabot sa “Walay Kataposang Maayong Balita” nga kombensiyon sa 1963
[Hulagway sa panid 25]
Nagsangyaw sa usa ka tindero gawas sa Red Fort sa Delhi