Nganong Kahadlokan ang Matuod nga Diyos Karon?

“Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.”​—ECCLESIASTES 12:13.

1, 2. Nganong husto ang angay nga pagkahadlok sa Diyos?

ANG angay ug matahaong kahadlok sa Diyos maayo alang sa tawo. Oo, bisan pag ang kadaghanan sa gikahadlokan sa tawo makapatugaw sa emosyon, makadaot pa sa atong panglawas, dili-angayan, o makadaot, maayo alang kanato nga mahadlok kang Jehova nga Diyos.​—Salmo 112:1; Ecclesiastes 8:12.

² Nasayod ang Maglalalang niini. Tungod sa gugma alang sa iyang kalalangan, iyang gisugo ang tanan nga mahadlok kaniya ug sa pagsimba kaniya. Atong mabasa: “Nakita ko ang laing anghel nga nagalupad sa katung-ang langit, ug siya adunay walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan, nga sa makusog nga tingog nagaingon: ‘Kahadloki ninyo ang Diyos ug ihatag kaniya ang himaya, tungod kay ang takna sa iyang paghukom miabot na, ug busa simbaha ang Usa nga naghimo sa langit ug sa yuta.’”​—Pinadayag 14:6, 7.

3. Unsay gihimo sa Maglalalang alang sa atong unang mga ginikanan?

³ Kinahanglang dili gayod nato isalikway ang Maglalalang sa tanang butang, ang Tuboran sa kinabuhi, tungod kay siya ang tag-iya kanato ug kini nga planeta. (Salmo 24:1) Sa pagpahayag sa iyang dakong gugma, gihatagan ni Jehova ang iyang yutan-ong mga anak ug kinabuhi ug gitagan-an sila ug usa ka kahibulongang dapit nga pagapuy-an​—usa ka matahom nga paraiso. Apan, kining katingalahang gasa may kondisyon. Sa ato pa, usa kini ka butang nga gipiyal. Pagaatimanon sa atong unang mga ginikanan ang ilang puluy-anan ug pasangkaron kini hangtod mapuno nila kini sa ilang mga anak ug mandoan ang tibuok yuta. Sila may mga pribilehiyo ug mga responsibilidad sa mga hayop sa yuta, sa mga langgam, ug sa mga isda​—sa tanang ubang buhing mga linalang nga makauban nila sa yuta ug sa ilang mga anak. Alang niining dakong butang nga gipiyal, ang tawo magapanubag.

4. Unsay nahimo sa tawo diha sa kalalangan sa Diyos?

⁴ Bisan pa nianang kahibulongang sinugdanan, tan-awa kon unsay gihimo sa tawo aron hugawan ang iyang maanindot nga yutan-ong puluy-anan! Sa matamayong pagsalikway sa pagpanag-iya sa Diyos niining mutyaa, gihugawhugawan sa tawo ang yuta. Ang pagkahugaw miabot sa punto nga gipameligro ang paglungtad sa dugang ug dugang nga mga matang sa mga hayop, mga langgam, ug isda. Ang atong matarong ug mahigugmaong Diyos dili makatugot niini hangtod sa hangtod. Ang pagdaot sa yuta nagpangayog usa ka paghusay, usa ka butang nga daghan ang may katarongang mahadlok. Sa laing bahin, alang niadtong matinahorong nagsalig sa Diyos, makapahupay nga masayod kon unsay mahitabo. Si Jehova mangayog usa ka husay, ug ang yuta ipasig-uli. Kini tinuod maoy usa ka makapalipayng mga balita alang sa tanang matarong-ug-kasingkasing sa yuta.

5, 6. Sa unsang paagi mosanong si Jehova sa gibuhat sa tawo sa Iyang kalalangan?

⁵ Pinaagi sa unsa himoon sa Diyos ang iyang paghukom? Pinaagi kang Jesu-Kristo, nga karon naentrono ingong Hari sa langitnong Gingharian sa Diyos. Pinaagi nianang langitnong Anak, pagataposon ni Jehova ang presenteng mahugaw, rebelyosong sistema. (2 Tesalonica 1:6-9; Pinadayag 19:11) Niini nga paagi hatagan niyag kahupayan kadtong nangahadlok kaniya ug, sa samang panahon, luwason ug ampingan ang atong yutan-ong puluy-anan.

⁶ Sa unsang paagi kini mahitabo? Ang Bibliya naghisgot bahin sa umaabot nga dakong kasakitan nga mosangko sa gubat sa Armageddon. (Pinadayag 7:14; 16:16) Kini mao unya ang paghukom sa Diyos batok niining mahugawng sistema sa mga butang ug sa mga tighugaw niini. Aduna bay mga tawo nga magpabiling buhi? Oo! Sila mao unya kadtong kinsa adunay, dili usa ka mangil-ad, dili-maayong pagkahadlok sa Diyos, kondili usa ka matinahoron, matahaong kahadlok kaniya. Sila pagaluwason.​—Proverbio 2:21, 22.

Usa ka Katingalahang Pagpasundayag sa Gahom

7. Nganong nangilabot ang Diyos alang sa Israel sa mga adlaw ni Moises?

⁷ Kining madulaon nga paglihok ni Jehova nga Diyos gilandongan sa usa ka gamhanang buhat nga iyang gihimo alang sa iyang mga magsisimba mga 1,500 ka tuig una pa sa atong Komong Panahon. Gihimong ulipon sa dakong militaryong gahom sa Ehipto ang mga lalin nga Israelinhong mamumuo niini, gisulayan pa gani ang usa ka paagi sa pagpuo-sa-rasa sa dihang ang magmamando niini, si Paraon, nagsugo sa pagpatay sa tanang bag-ong nangatawong lalaking mga Israelinhon. Ang kadaogan sa Diyos batok sa Ehipto naghatag ug kagawasan sa Israel gikan nianang daogdaogang politikal nga sistema, oo, kagawasan gikan sa usa ka nasod nga nahugawan sa pagsimba sa daghang diyos.

8, 9. Sa unsang paagi misanong si Moises ug ang mga Israelinhon sa pagpangilabot sa Diyos?

⁸ Ang Exodo kapitulo 15 nagtala sa reaksiyon sa mga Israelinhon sa kagawasan gikan sa Ehipto. Ang pagtuki niining maong asoy makatabang kanato sa pagpabili kon sa unsang paagi ang mga Kristohanon pagaluwason gikan niining nahugawan sa espirituwal ug pisikal nga presenteng sistema. Atong hisgotan ang Exodo kapitulo 15, itumong ang pagtagad sa piniling mga bersikulo aron masayran kon nganong angay natong pilion ang pagkahadlok kang Jehova, ang matuod nga Diyos. Magsugod kita sa mga bersikulo 1 ug 2:

⁹ “Niadtong tungora miawit si Moises ug ang mga anak sa Israel niini nga alawiton kang Jehova ug misulti sa mosunod: ‘Paawita ako kang Jehova, kay siya natuboy pag-ayo. Gibanlas niya sa dagat ang kabayo ug ang nagkabayo niini. Si Jah mao ang akong kalig-on ug kusog, sanglit nahimo siya nga akong kaluwasan.’”

10. Unsay nag-agak sa paglaglag sa Diyos sa kasundalohan sa Ehipto?

¹⁰ Ang mga tawo sa tibuok kalibotan pamilyar sa asoy kon giunsa pagluwas ni Jehova ang Israel gikan sa Ehipto. Nagpadala siyag mga hampak nianang dakong gahom sa kalibotan hangtod nga sa kataposan gitugotan ni Paraon ang mga Israelinhon sa pagbiya. Apan unya gigukod sa mga sundalo ni Paraon kining walay depensang katawhan ug daw nakulong sila sa baybayon sa Pulang Dagat. Bisag daw kalit nga mawad-an ang mga anak sa Israel sa ilang bag-ong nabatonang kagawasan, may laing butang ang anaa sa hunahuna ni Jehova. Milagroso niyang gibuksan ang usa ka agianan tabok sa dagat ug gidala ang iyang katawhan sa kahilwasan. Sa dihang misunod ang mga Ehiptohanon, iyang gitak-op ang Pulang Dagat ibabaw kanila ug nalumos si Paraon ug ang iyang puwersa militar.​—Exodo 14:1-31.

11. Unsay miresulta gikan sa gihimo sa Diyos batok sa Ehipto?

¹¹ Ang paglaglag ni Jehova sa puwersa militar sa Ehipto nagtuboy kaniya sa mga mata sa iyang mga magsisimba ug nagpabantog sa iyang ngalan. (Josue 2:9, 10; 4:23, 24) Oo, ang iyang ngalan nabayaw ibabaw sa walay-mahimo, bakak nga mga diyos sa Ehipto, nga napamatud-ang dili makaluwas sa ilang mga magsisimba. Ang pagsalig sa ilang mga diyos ug sa mga tawong mamatay ug sa puwersa militar misangpot ug mapait nga kapildihan. (Salmo 146:3) Dili ikahibulong nga napukaw ang mga Israelinhon sa pag-awit ug mga pagdayeg nga nagpabanaag sa maayong pagkahadlok sa Diyos nga buhi, nga sa gamhanang paagi nagluwas sa iyang katawhan!

12, 13. Unsay angay natong makat-onan gikan sa kadaogan sa Diyos sa Pulang Dagat?

¹² Sa susama, angay natong ilhon nga walay bakak nga mga diyos sa atong panahon ug walay gamhanan kaayong nasod, bisag adunay nukleyar nga mga armamento, ang makaparang kang Jehova. Siya makahimo sa pagluwas ug moluwas sa iyang katawhan. “Siya nagabuhat sumala sa iyang kabubut-on taliwala sa panon sa kalangitan ug sa mga pumoluyo sa yuta. Ug walay usa ang makapugong sa iyang kamot o makasulti kaniya, ‘Unsay imong ginabuhat?’” (Daniel 4:35) Sa dihang bug-os natong masabtan kining mga pulonga, kita usab mapukaw sa pag-awit sa iyang mga pagdayeg nga malipayon.

¹³ Ang awit sa kadaogan sa Pulang Dagat nagpadayon: “Si Jehova maoy lakinhong persona sa gubat. Si Jehova mao ang iyang ngalan.” Busa, kining dili mapilding Manggugubat dili usa ka wala-hiilhing bunga sa handurawan sa tawo. Siya adunay ngalan! Siya mao ‘ang Usa nga nagapahinabo,’ ang Dakong Magbubuhat, ang Usa “kansang ngalan mao si Jehova, . . . ang Labing Hataas sa tibuok yuta.” (Exodo 3:14; 15:3-5; Salmo 83:18) Dili ka ba mouyon nga maalamon unta alang sa karaang mga Ehiptohanon nga magbaton ug makataronganon ug matinahorong pagbati sa pagkahadlok sa Labing Gamhanan imbes hagiton siya?

14. Sa unsang paagi napasundayag ang bili sa diyosnong kahadlok sa Pulang Dagat?

¹⁴ Ingong Tigdesinyo sa yuta, ang Magbubuhat sa dagat adunay hingpit nga gahom ibabaw sa mga hawan sa tubig. (Exodo 15:8) Gigamit ang iyang gahom usab ibabaw sa hangin, nahimo niya ang daw imposible. Iyang gibahin ang kahiladman sa tubig sa usa ka dapit ug gipugngan kini sa magkaatbang nga direksiyon aron mapatungha ang pinarilag-tubig nga dalandalan nga kaagian sa iyang katawhan. Handurawa ang talan-awon: milyonmilyong tonelada sa tubig-dagat napundo sa taas magkaatbang nga paril, nga nagsilbing usa ka luwas nga agianan sa pag-ikyas sa Israel. Oo, kadtong nagpakitag angay nga kahadlok sa Diyos gipanalipdan. Dayon gibuhian ni Jehova ang tubig, gipasagdan kini nga mobul-og pagbalik ingong usa ka dakong baha, nga naglamoy sa mga sundalo ni Paraon ug sa tanan nilang kahimanan. Pagkadakong pasundayag sa diyosnong gahom batok sa walay-pulos nga mga diyos ug tawhanong militaryong kusog! Tino, si Jehova mao ang usa nga pagakahadlokan, dili ba?​—Exodo 14:21, 22, 28; 15:8.

Pagpasundayag sa Atong Kahadlok sa Diyos

15. Unsay angay natong reaksiyon sa gamhanang mga buhat sa Diyos sa pagluwas?

¹⁵ Kon nagtindog kita nga luwas uban ni Moises, tino nga napukaw kita sa pag-awit: “Kinsa sa mga diyos ang sama kanimo, Oh Jehova? Kinsa ang sama kanimo, nga nagpamatuod sa imong kaugalingon nga gamhanan sa pagkabalaan? Ang Usa nga pagakahadlokan sa mga alawiton sa pagdayeg, ang Usa nga nagabuhat ug mga katingalahan.” (Exodo 15:11) Ang maong mga pagbati gipalanog sa kasiglohan sukad niadto. Diha sa kataposang basahon sa Bibliya, gihubit ni apostol Juan ang usa ka grupo sa matinumanon dinihogang mga alagad sa Diyos: “Sila nagaawit sa awit ni Moises nga ulipon sa Diyos ug sa awit sa Kordero.” Unsa kining bantogang awit? “Dako ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari sa kadayonan. Kinsa ba gayod ang dili mahadlok kanimo, Jehova, ug magahimaya sa imong ngalan, tungod kay ikaw lamang ang maunongon?”​—Pinadayag 15:2-4.

16, 17. Unsang katingalahang hitabo ang nakita nato nga nagakahitabo karon?

¹⁶ Busa karon usab adunay nakabatog kagawasan nga mga magsisimba nga nakaapresyar dili lamang sa mamugnaong mga buhat sa Diyos kondili usab sa iyang kabalaoran. Ang mga tawo gikan sa tanang kanasoran sa espirituwal nga paagi nakabatog kagawasan, nahimulag gikan niining mahugawng kalibotan tungod kay ilang giila ug gituman ang matarong nga kabalaoran sa Diyos. Tuigtuig, gatosan ka linibo ang nangalagiw gikan niining dunot nga kalibotan aron magpuyo diha sa mahinlo, matul-id nga organisasyon sa mga magsisimba ni Jehova. Sa dili madugay, human ipahamtang ang nagkalayo nga mga paghukom sa Diyos batok sa bakak nga relihiyon ug sa nahibilin niining daotang sistema, sila mabuhing walay kataposan diha sa usa ka matarong bag-ong kalibotan.

¹⁷ Sumala sa Pinadayag 14:6, 7, ang katawhan karon nagpakadungog sa pasidaang mensahe bahin sa paghukom nga gipahayag sa mga Saksi ni Jehova ubos sa pagtultol sa manulonda. Sa kapin sa 230 ka kayutaan sa miaging tuig, duolan sa lima ka milyong mga Saksi ang nagmantala sa maayong balita sa Gingharian sa Diyos ug sa takna sa iyang paghukom. Sa pag-edukar sa ilang isigkatawo alang sa kaluwasan, naghimog regular nga pagduaw ang mga Saksi sa kabalayan sa mga tawo, nga nagdumalag libreng mga pagtuon sa Bibliya. Gatosan ka linibo tuigtuig sa ingon nakakat-on ug igo sa pagkahadlok sa matuod nga Diyos sa maalamong paagi, nagpahinungod sa ilang mga kinabuhi kaniya, ug nagpabawtismo. Pagkadakong kalipay nga ang mga ingon nahadlok sa matuod nga Diyos!​—Lucas 1:49-51; Buhat 9:31; itandi ang Hebreohanon 11:7.

18. Unsay nagpakita nga ang mga manulonda nalangkit sa atong pagsangyaw?

¹⁸ Tinuod ba nga ang mga manulonda nalangkit niining buluhaton sa pagsangyaw? Aw, daw matin-aw nga ang pagtultol sa manulonda sagad nag-agak sa mga Saksi ni Jehova ngadto sa balay diin adunay nagmagul-anong kalag nga nangandoy, nag-ampo pa, alang sa espirituwal nga tabang! Pananglitan, duha ka mga Saksi ni Jehova nga may uban nga usa ka batang lalaki nagsangyaw sa maayong balita sa isla sa Caribbean. Sa dihang hapit nang mag-udto, ang duha ka hamtong nakahukom sa pagpauli. Apan sa pagkatalagsaon ang bata gusto pang moduaw sa sunod nga balay. Sa dihang nakita niya nga dili na gusto ang mga hamtong sa pagbuhat niana niadtong higayona, nag-inusara siyang miadto ug nanuktok. Gibuksan sa usa ka batan-ong babaye ang pultahan. Sa nakita kini sa mga hamtong, sila miduol ug nakigsulti kaniya. Iyang gipadayon sila, nga miingon nga sa panahon mismo nga nakadungog siya ug tuktok sa pultahan, siya nag-ampo nga magpadala ang Diyos kaniya ug mga Saksi nga motudlo kaniya sa Bibliya. Gihimo ang kahikayan sa pagtuon sa Bibliya.

19. Unsa ang atong ikatudlo ingong kaayohan gikan sa pagkahadlok sa Diyos?

¹⁹ Samtang matinumanon natong ginahatod ang mensahe sa paghukom sa Diyos, ginatudlo usab nato ang iyang matarong nga kabalaoran. Sa dihang ipadapat kini sa kinabuhi sa mga tawo, moresulta kinig pisikal ug espirituwal nga mga panalangin. Pananglitan, tin-aw kaayo ang Bibliya sa pagsaway niini sa tanang seksuwal nga imoralidad. (Roma 1:26, 27, 32) Karon ang diyosnong mga sukdanan kaylap nga gisalikway sa kalibotan. Unsay resulta? Nagkabungkag ang mga kaminyoon. Nag-usbaw ang delingkuwensiya. Ang makadaot nga mga sakit nga mapasa sa pagpakigsekso, nga nahimong dakong epidemiya niining ika-20ng siglo. Tinuod, ang makahahadlok nga sakit nga AIDS sa dakong bahin mokaylap pinaagi sa seksuwal nga imoralidad. Apan dili ba ang matinahorong kahadlok sa Diyos napamatud-ang usa ka dakong panalipod alang sa matuod nga mga magsisimba?​—2 Corinto 7:1; Filipos 2:12; tan-awa usab ang Buhat 15:28, 29.

Mga Resulta sa Pagkahadlok sa Diyos Karon

20. Unsay nagpakita nga nasayod ang uban sa dungog sa mga Saksi ni Jehova?

²⁰ Dagaya ang mga panalangin alang niadtong may kahadlok sa Diyos ug nagsunod sa iyang kabalaoran. Palandonga ang usa ka hitabo nga nagpakita sa nagdakong pag-ila sa kamatuoran nga gilangkoban ang mga Saksi ni Jehova ug usa ka malinawong panag-igsoonay sa mga Kristohanon nga may matul-id nga moral. Ubay-ubayng mga Saksi, nga mga delegado sa usa ka internasyonal nga kombensiyon sa Habagatang Amerika, nagsaka sa usa ka hotel nga gigamit usab sa usa ka gabii alang sa usa ka dili-Saksi nga panagtigom diin ang modiskurso mao ang presidente sa nasod. Samtang gidalidali sa usa ka grupo sa guwardiya ang presidente sa pagpasakay sa elebitor, usa ka Saksi nga wala mahibalo kon kinsa ang anaa sa elebitor misulod, sa kakurat sa mga guwardiya! Nakaamgo sa iyang nahimo, ang Saksi nangayog pasaylo tungod sa pagsulod. Iyang gipakita ang iyang badge sa kombensiyon nga nagpaila kaniya ingong usa ka Saksi ug miingon nga dili siya hulga sa presidente. Mipahiyom, usa ka guwardiya miingon: “Kon ang tanang tawo sama pa sa mga Saksi ni Jehova, dili na namo kinahanglan kining matanga sa seguridad.”​—Isaias 2:2-4.

21. Unsang mga dalan sa paglihok ang bukas sa katawhan karon?

²¹ Mao kini ang matang sa mga tawo nga ginatigom karon ni Jehova ug ginaandam nga ‘makagawas sa dakong kasakitan’ nga motapos niining sistemaha. (Pinadayag 7:9, 10, 14) Ang maong pagkalabang-buhi dili mahimong sulagma. Aron makalabang-buhi, ang usa ka tawo kinahanglang mahadlok kang Jehova, ilhon siya ingong may katungod nga Soberano, ug magpahinungod kaniya. Apan, ang tinuod mao, daghan ang dili mougmad sa matang sa kahadlok nga takos sa panalipod. (Salmo 2:1-6) Sumala sa tanang mabatonang ebidensiya, ang pinili ni Jehova nga Magmamando, si Jesu-Kristo, nagmando na ingong Hari sukad sa hinungdanong tuig 1914. Kini nagkahulogan nga ang nanghibiling panahon kusog nga nagkahurot alang sa mga indibiduwal sa pag-ugmad ug sa pagpasundayag sa maayo nga pagkahadlok kang Jehova. Sa gihapon, gitugotan sa atong Maglalalang ang mga indibiduwal, bisan kadtong dagko ug mga katungdanan, sa pagsanong: “Karon, Oh mga hari, magmaalamon kamo; magpatudlo kamo; Oh mga maghuhukom sa yuta. Alagara si Jehova nga may kahadlok ug magmasadyaon nga may pagkurog. Hagki ang anak, aron Siya dili masuko ug dili kamo mangawala sa dalan, kay dali mosilaob ang iyang kasuko. Malipayon ang tanan nga modangop kaniya.”​—Salmo 2:7-12.

22. Unsa ang palaaboton alang niadtong may kahadlok sa Diyos karon?

²² Hinaot nga makaapil kita niadtong modayeg sa atong Maglalalang ingong Usa nga nagluwas kanato. Kini nagkinahanglan kanato, hinunoa, sa pagkahadlok sa matuod nga Diyos karon! (Itandi ang Salmo 2:11; Hebreohanon 12:28; 1 Pedro 1:17.) Kinahanglang magpadayon kita sa pagtuon sa iyang matarong nga kabalaoran ug tumanon kana. Ang awit ni Moises ug sa Kordero, nga natala sa Pinadayag 15:3, 4, makaabot sa kinapungkayan sa dihang laglagon ni Jehova ang tanang pagkadaotan sa yuta ug sugdan ang pagpang-ayo sa tawo ug sa iyang yutan-ong puluy-anan gikan sa makahugawng mga epekto sa sala. Dayon, uban sa tibuok natong kasingkasing, kita magaawit: “Dako ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari sa kadayonan. Kinsa ba gayod ang dili mahadlok kanimo, Jehova, ug magahimaya sa imong ngalan?”

Nahinumdom Ka Ba?

◻ Nganong takos si Jehova sa atong maayo nga kahadlok?

◻ Unsay gipakita sa gihimo sa Diyos diha sa Pulang Dagat?

◻ Unsang mga kaayohan ang moabot gikan sa atong matinahorong pagkahadlok kang Jehova?

◻ Unsa ang palaaboton alang niadtong may kahadlok sa Diyos karon?