Ayawg Undang!

“Dili kita moundang sa pagbuhat kon unsay maayo, kay sa takdang panahon kita moani kon dili kita molunga.”​—GALACIA 6:9.

1, 2. (a) Sa unsang mga paagi ang usa ka leyon mangayam? (b) Kang kinsa ang Yawa ilabinang interesado nga motukob?

ANG usa ka leyon mangayam sa lainlaing mga paagi. Usahay banhigan niini ang iyang tukbonon diha sa mga lanaw o sa kadaplinan sa nabantok nga mga agianan. Apan usahay, nag-ingon ang librong Portraits in the Wild, ang usa ka leyon “mopahimulos lamang sa usa ka situwasyon​—pananglitan, inigkakitag natulog nga nati sa zebra.”

² Ang atong “kontra, ang Yawa,” saysay ni apostol Pedro, “nagasuroysuroy sama sa usa ka leon nga nagangulob, nga nagapangita ug usa nga matukob.” (1 Pedro 5:8) Kay nahibalong hamubo na ang iyang nahibiling panahon, labi pang gipit-osan ni Satanas ang mga tawo aron mapugngan sila sa pag-alagad kang Jehova. Hinuon, kining “nagangulob nga leyon” interesado ilabina nga motukob sa mga alagad ni Jehova. (Pinadayag 12:12, 17) Ang iyang mga paagi sa pagpangayam kaamgid sa mga paagi sa usa ka leyon. Sa unsang paagi matuod kana?

3, 4. (a) Unsang mga paagi ang gigamit ni Satanas sa pagtukob sa mga alagad ni Jehova? (b) Tungod kay karon maoy “makuyawng mga panahon nga lisod sagubangon,” unsang mga pangutana ang gipatungha?

³ Usahay si Satanas mosulay sa pagbanhig​—paglutos o pagsupak nga gipunting sa pagbungkag sa atong integridad aron kita mohunong sa pag-alagad kang Jehova. (2 Timoteo 3:12) Apan, sama sa leyon, sa ubang mga panahon yanong pahimuslan sa Yawa ang usa ka situwasyon. Siya maghulat hangtod nga kita mawad-ag kadasig o maluya, ug unya sulayan niya pagpahimulos ang masulob-on natong kahimtang aron ipahinabo niya nga kita moundang. Kinahanglan nga kita dili mahimong sayon nga tukbonon!

⁴ Ugaling, kita nagapuyo sa labing lisod nga yugto sa tibuok nga kasaysayan sa tawo. Niining “makuyawng mga panahon nga lisod sagubangon,” daghan kanato ang mahimong mawad-ag kadasig o nabug-atan usahay. (2 Timoteo 3:1) Nan, sa unsang paagi makalikay kita nga mahimong luya kaayo nga kita mahimong sayon nga tukbonon sa Yawa? Oo, sa unsang paagi makapamati kita sa dinasig nga tambag ni apostol Pablo: “Dili kita moundang sa pagbuhat kon unsay maayo, kay sa takdang panahon kita moani kon dili kita molunga”?​—Galacia 6:9.

Sa Dihang ang Uban Makapahigawad Kanato

5. Unsay nagpahinabo nga si David naluya, apan unsay wala niya buhata?

⁵ Sa kapanahonan sa Bibliya, bisan ang labing matinumanong mga alagad ni Jehova mahimong mibating nabug-atan. “Ako naluya tungod sa akong pagpanghupaw,” misulat ang salmistang David. “Sa tibuok nga gabii gipahinabo ko nga milangoy ang akong urarayan; tungod sa akong mga luha ang akong higdaanan nabanawan. Gumikan sa kaguol ang akong mata naluya.” Nganong kana ang gibati ni David? “Tungod sa tanan niadtong nagapakitag pagkamabatokon kanako,” saysay niya. Ang makapasilo nga mga lihok sa uban mipahinabog dakong kangutngot sa kasingkasing ni David nga ang iyang mga luha mibuhagay. Bisan pa niana, si David wala motalikod kang Jehova tungod sa gibuhat kaniya sa mga isigkatawo.​—Salmo 6:6-9.

6. (a) Sa unsang paagi kita mahimong maapektahan sa mga pulong o mga lihok sa uban? (b) Sa unsang paagi ang pipila naghimo sa ilang kaugalingon nga sayon nga tukbonon alang sa Yawa?

⁶ Sa susama, ang mga pulong o mga lihok sa uban tingali magpahinabo nga kita maluya tungod sa dakong kangutngot sa kasingkasing. “Adunay usa nga nagasulti nga dili-mahunahunaon ingon nga pinaagi sa mga hansak sa usa ka espada,” matod sa Proverbio 12:18. Sa dihang ang usang dili-mahunahunaon maoy Kristohanong igsoong lalaki o babaye, ang ‘samad sa paghansak’ mahimong lalom kaayo. Ang tawhanong kiling mahimong mao ang pagkasilo, nga tingali maghambin ug kayugot. Kini ilabinang tinuod kon atong gibati nga kita gitratar sa dili-maluluton o dili-makataronganong paagi. Basin kita malisdan nga makigsulti sa tagsala; basin sa tinuyo siya atong likayan. Kay nabug-atan sa kayugot, ang pipila nangundang ug nanghunong sa pagtambong sa Kristohanong mga tigom. Ikasubo, sa ingong paagi sila “naghatag ug luna sa Yawa” sa pagpahimulos kanila ingong sayon nga tukbonon.​—Efeso 4:27.

7. (a) Sa unsang paagi makalikay kita nga mahulog ngadto sa mga kamot sa Yawa sa dihang ang uban makapahigawad o makapasilo kanato? (b) Nganong angay nga atong wagtangon ang kayugot?

⁷ Sa unsang paagi makalikay kita nga mahulog ngadto sa mga kamot sa Yawa sa dihang ang uban makapahigawad o makapasilo kanato? Kinahanglang kita maningkamot nga dili maghambin ug kayugot. Sa kapulihay, mouna kita sa paglihok aron makigdait o mahusay ang suliran sa labing madali. (Efeso 4:26) Ang Colosas 3:13 nag-aghat kanato: “Padayon . . . nga magpinasayloay sa usag usa kon ang usa may hinungdan sa pagreklamo batok sa lain.” Ang pagpasaylo ilabinang haom kon ang usang nakapasilo modawat sa sayop ug tinuod nga magbasol. (Itandi ang Salmo 32:3-5 ug Proverbio 28:13.) Hinuon, matabangan kita kon atong ibutang sa hunahuna nga ang pagpasaylo wala magpasabot sa pagkonsentir o pagbale-wala sa mga daotang buhat nga nahimo sa uban. Ang pagpasaylo naglakip sa pagwagtang sa kayugot. Ang kayugot maoy bug-at nga pas-anon. Mahimong mookupar kini sa atong mga kaisipan, nga mahikawan kitag kalipay. Maapektahan pa niini ang atong panglawas. Sa katugbang, ang pagpasaylo, kon nahiangay, makapaayo kanato. Hinaot nga kita, sama kang David, dili gayod moundang ug magpalayo gikan ni Jehova tungod sa nasulti o nabuhat sa ubang mga tawo kanato!

Sa Dihang Kita Adunay Kakulangan

8. (a) Nganong ang pipila mobati ilabina sa pagkasad-an usahay? (b) Unsay kapeligrohan sa pagkamalumsan sa pagbati sa pagkasad-an nga kita mawad-ag paglaom sa atong kaugalingon?

⁸ “Kitang tanan mangapandol man sa makadaghan,” matod sa Santiago 3:2. Sa dihang mapandol kita, natural lamang ang pagbati sa pagkasad-an. (Salmo 38:3-8) Ang mga pagbati sa pagkasad-an mahimong kusog ilabina kon kita nagapakigbisog sa usa ka kahuyangan sa unod ug nakasinatig panapanahong mga pagsugmat.a Usa ka Kristohanong nagsagubang sa maong pakigbisog misaysay: “Dili ko na gusto nga mabuhi pa, kay wala masayod kon nakahimo ba ako sa salang dili-mapasaylo o wala. Gibati ko nga mas maayo pang dili ko na hagoon ang akong kaugalingon diha sa pag-alagad kang Jehova tungod kay lagmit nga wala na akoy paglaom.” Sa dihang mahupngan kita sa pagbati sa sala nga kita mawad-ag paglaom, atong gihatagag higayon ang Yawa​—ug basin siya mopahimulos dayon niini! (2 Corinto 2:5-7, 11) Ang mas timbang nga panghunahuna bahin sa sala basin mao ang gikinahanglan.

9. Nganong angay nga kita magbatog pagsalig sa kaluoy sa Diyos?

⁹ Sa dihang kita makasala angay nga kita mobati sa usa ka sukod sa pagkasad-an. Ugaling, may panahong ang mga pagbati sa pagkasad-an magpadayon tungod kay ang usa ka Kristohanon mobati nga dili gayod siya takos sa kaluoy sa Diyos. Bisan pa, ang Bibliya masibotong nagpasalig kanato: “Kon atong isugid ang atong mga sala, siya kasaligan ug matarong aron sa pagpasaylo kanato sa atong mga sala ug sa paghinlo kanato gikan sa tanang pagkadili-matarong.” (1 Juan 1:9) Aduna bay maayong katarongan sa pagtuo nga dili kana buhaton sa Diyos sa atong kaso? Hinumdomi, diha sa iyang Pulong, si Jehova nag-ingon nga siya “andam sa pagpasaylo.” (Salmo 86:5; 130:3, 4) Sanglit siya dili makabakak, iyang buhaton ang sumala sa gisaad diha sa iyang Pulong, basta kita moduol kaniya uban ang mahinulsolong kasingkasing.​—Tito 1:2.

10. Unsang makapalipay nga pasalig ang gipatik sa unaunang Bantayanang Torre mahitungod sa pagbuntog sa usa ka kahuyangan sa unod?

¹⁰ Unsay imong buhaton kon nagapakigbisog ka sa usa ka kahuyangan ug makaagom sa pagsugmat? Ayawg undang! Ang usa ka pagsugmat wala gayod magpapas sa pag-uswag nga nahimo na nimo. Ang Pebrero 15, 1954, nga isyu niining magasina mihatag niining makapalipay nga pasalig: “Kita [basin] nakadiskobre nga kita napandol ug napukan sa makadaghan tungod sa usa ka daotang batasan nga mas nakagamot sa atong kanhing hulad sa pagkinabuhi kay sa atong naamgohan. . . . Ayawg kaguol. Ayaw ihinapos nga nakahimo ka na sa dili-mapasaylong sala. Kana mao gayod ang gusto ni Satanas nga imong ipangatarongan. Ang kamatuoran nga mibati kag kaguol ug naglagot sa imong kaugalingon maoy pamatuod mismo nga wala ka pa mahilayo kaayo. Ayaw kapuol sa pagdangop sa Diyos nga mapaubsanon ug sa katim-os, nga magtinguha sa iyang pagpasaylo ug paghinlo ug panabang. Duol kaniya sama sa usa ka bata nga moduol sa iyang amahan kon adunay suliran, bisan kon kapila bahin sa samang kahuyangan, ug si Jehova sa pagkamaayohon mohatag kanimo sa tabang tungod sa iyang dili-takos nga kalulot ug, kon sinsero ka, iyang ipaamgo kanimo ang usa ka nahinloan nga konsensiya.”

Kon Gibati Nato nga Kulang ang Atong Ginabuhat

11. (a) Unsay angay nga atong bation bahin sa pagpakigbahin sa buluhatong pagwali sa Gingharian? (b) Unsang mga pagbati bahin sa pagpakigbahin sa ministeryo ang gipakigbisogan sa pipila ka Kristohanon?

¹¹ Ang buluhatong pagwali sa Gingharian maoy usa ka hinungdanong bahin sa kinabuhi sa usa ka Kristohanon, ug ang pagbuhat niini magdalag kalipay. (Salmo 40:8) Hinuon, ang pila ka Kristohanon mobating sad-an kaayo tungod kay dili makabuhat ug labaw diha sa ministeryo. Ang maong pagbati sa pagkasad-an makawala gani sa atong kangaya ug magpahinabo nga kita moundang, kay maghunahuna nga gibati ni Jehova nga kulang gayod ang atong ginabuhat. Tagda ang mga pagbati nga gipakigbisogan sa pipila.

“Nasayod ka ba kon unsa ka gastosog panahon ang kakabos?” misulat ang usa ka Kristohanong igsoong babaye nga uban sa iyang bana nagapadako ug tulo ka anak. “Kinahanglan nga ako magdaginot diin ako makahimo. Nagpasabot kini nga mogugol ug panahon sa pagsiksik sa mga tindahan sa baratilyo, mga estante sa mga tindang ubos ug prisyo, o pagtahi pag sinina. Gugolon ko usab ang usa o duha ka takna kada semana sa paghipos sa mga kupon [sa diskuwento sa pagkaon]​—paggunting, pagpayl, ug pagpabaylo niini. Usahay mobati akog dakong sala sa paghimo niining mga butanga, kay maghunahunang angay unta nga akong gugolon kanang panahona sa pagsangyaw sa kanataran.”

“Akong gihunahuna nga kulang kaayo ang paghigugma ko kang Jehova,” saysay sa usa ka igsoong babaye nga upat ug anak ug may dili-magtutuong bana. “Busa ako naningkamot sa akong pag-alagad kang Jehova. Nanlimbasog gayod ako pag-ayo, apan wala gayod ako mobati nga igo na kadto. Abi ninyo, wala ako mobatig pagpabili-sa-kaugalingon, busa ako dili makahunahuna nga si Jehova makadawat sa akong pag-alagad kaniya.”

Ang usa ka Kristohanon nga kinahanglang mobiya sa bug-os-panahong pag-alagad miingon: “Dili ako makatugot sa ideya nga napakyas ako sa akong panaad sa pag-alagad kang Jehova sa bug-os nga panahon. Dili ka makahanduraw sa pagkadako sa akong kahigawad! Ako naghilak karon nga nahinumdom niini.”

12. Nganong ang pila ka Kristohanon mobating sad-an kaayo bahin sa dili pagbuhat ug labaw pa diha sa ministeryo?

¹² Kinaiyanhon lamang ang pagtinguha sa pag-alagad kang Jehova nga bug-os kutob sa mahimo. (Salmo 86:12) Apan, nganong ang pipila mobati sa dakong sala bahin sa pagkadili-makabuhat ug labaw? Alang sa pipila, mopatim-aw nga kana naglakip sa katibuk-ang pagbati sa pagkawalay-bili, nga maoy sangpotanan tingali sa mapait nga mga kaagi sa kinabuhi. Sa ubang mga kaso, ang dili-tukmang pagbati sa sala tingali maoy resulta sa dili-matinud-anon nga panghunahuna bahin sa gidahom ni Jehova gikan kanato. “Gibati ko nga gawas kon kapoyon ka na, ang imong ginabuhat kulang pa,” miangkon ang usa ka Kristohanong babaye. Ingong resulta, siya nagbutang ug labihan ka tag-as nga mga sukdanan alang sa iyang kaugalingon​—ug unya mibati sa mas dakong sala sa dihang wala niya kana makab-ot.

13. Unsay gidahom ni Jehova kanato?

¹³ Unsay gidahom ni Jehova kanato? Sa yanong pagsulti, gidahom ni Jehova nga ato siyang alagaron sa tibuok kalag, nga buhaton kon unsay itugot sa atong mga kahimtang. (Colosas 3:23) Hinunoa, mahimong adunay dakong kalainan tali sa kon unsay gusto natong buhaton ug kon unsay matinud-anong maarangan nato sa pagbuhat. Mahimong limitado kita sa mga butang nga sama sa edad, panglawas, lawasnong agwanta, o pamilyahanong mga responsabilidad. Bisan pa niana, kon buhaton nato ang tanan natong maarangan, mahimong magmasaligon kita nga ang atong pag-alagad kang Jehova maoy tibuok-kalag​—dili labaw ug dili menos sa iya sa usa kansang panglawas ug mga kahimtang magtugot niya sa pagsulod sa bug-os-panahong ministeryo.​—Mateo 13:18-23.

14. Unsay imong mahimo kon nagkinahanglan ka ug tabang sa pagtino kon unsay matinud-anon nimong madahom sa imong kaugalingon?

¹⁴ Nan, sa unsang paagi makatino ka kon unsay matinud-anon nimong madahom sa imong kaugalingon? Basin buot nimong hisgotan kana uban sa usa ka sinaligan, hamtong nga Kristohanong higala, tingali usa ka ansiano o usa ka eksperyensiyadong igsoong babaye, kinsa nahibalo sa imong mga katakos, imong mga limitasyon, ug imong mga responsabilidad sa pamilya. (Proverbio 15:22) Hinumdomi nga sa mga mata sa Diyos ang imong bili ingong usa ka tawo wala sukda pinaagi sa kon unsa ka dako ang imong mabuhat diha sa ministeryo sa kanataran. Ang tanang alagad ni Jehova maoy bililhon alang kaniya. (Haggeo 2:7; Malakias 3:16, 17) Ang imong ginahimo sa buluhatong pagwali mahimong labaw o menos kay sa ginahimo sa uban, apan basta kini nagrepresentar sa imong kinamaayohan, si Jehova mahimuot, ug dili kinahanglan nga mobati ka sa pagkasad-an.​—Galacia 6:4.

Sa Dihang Daghan ang Pangayoon Kanato

15. Sa unsang mga paagi daghan ang gipangayo gikan sa mga ansiano sa kongregasyon?

¹⁵ “Ang matag usa nga gihatagan ug daghan,” matod ni Jesus, “daghan ang pugsanong pangayoon kaniya.” (Lucas 12:48) Tinong ‘daghan ang pangayoon’ niadtong nagaalagad nga mga ansiano sa kongregasyon. Sama kang Pablo naghago sila alang sa kongregasyon. (2 Corinto 12:15) Kinahanglan nga sila mag-andam ug mga pakigpulong, maghimog mga pagduaw isip magbalantay, maghusay ug mga kasong hudisyal​—kanang tanan himoon nga dili mapasagdan ang ilang kaugalingong mga pamilya. (1 Timoteo 3:4, 5) Ang pila ka ansiano puliki usab sa pagtabang sa pagtukod sa mga Kingdom Hall, pag-alagad sa mga Hospital Liaison Committee, ug pagboluntaryo sa panahon sa mga asembliya ug mga kombensiyon. Sa unsang paagi kining makugihon, mahinalarong mga lalaki makalikay nga maluya tungod sa gibug-aton sa maong mga responsabilidad?

16. (a) Unsang praktikal nga solusyon ang gitanyag ni Jetro kang Moises? (b) Unsang hiyas ang makapaarang sa usa ka ansiano sa pagpakigbahin sa nahiangayng mga responsabilidad sa uban?

¹⁶ Sa dihang si Moises, usa ka makasaranganon ug mapaubsanong tawo, naghago sa iyang kaugalingon sa pag-atiman sa mga suliran sa uban, ang iyang ugangang-lalaki, si Jetro, mitanyag ug praktikal nga solusyon: ipakigbahin ang pila ka responsabilidad sa ubang mga lalaking may katakos. (Exodo 18:17-26; Numeros 12:3) “Ang kaalam maoy uban sa mga makasaranganon,” matod sa Proverbio 11:2. Ang pagkamakasaranganon nagkahulogan nga ilhon ug dawaton ang imong mga limitasyon. Ang tawong makasaranganon dili magpanuko sa pagdelegar ngadto sa uban, ni siya mahadlok nga siya mawad-ag pagkontrol pinaagi sa pagpakigbahin sa nahiangayng mga responsabilidad ngadto sa ubang mga lalaking may katakos.b (Numeros 11:16, 17, 26-29) Hinunoa, siya maikagon sa pagtabang kanila nga mouswag.​—1 Timoteo 4:15.

17. (a) Sa unsang paagi ang mga membro sa kongregasyon makapagaan sa lulan sa mga ansiano? (b) Unsang mga sakripisyo ang gihimo sa mga asawa sa mga ansiano, ug sa unsang paagi ikapakita nato kanila nga wala nato kana ibale-wala?

¹⁷ Ang mga membro sa kongregasyon dakog mahimo sa pagpagaan sa lulan sa mga ansiano. Kay nakasabot nga ang mga ansiano adunay ilang kaugalingong mga pamilya nga atimanon, ang uban dili maghingapin sa pag-okupar sa panahon ug pagtagad sa mga ansiano. Sila usab dili magpakaway-bili sa kinabubut-ong mga sakripisyo nga ginahimo sa mga asawa sa mga ansiano samtang sa pagkadili-mahakogon sila nagapakigbahin sa panahon sa ilang mga bana uban sa kongregasyon. Usa ka inahan nga tulog anak kansang bana nag-alagad nga usa ka ansiano misaysay: “Usa ka butang nga dili gayod ako moreklamo mao ang ekstrang lulan nga akong kinabubut-ong gipas-an diha sa panimalay aron ang akong bana makaalagad nga usa ka ansiano. Ako nahibalo nga dako ang panalangin ni Jehova diha sa among pamilya tungod sa iyang pag-alagad, ug dili ko ireklamo ang panahon ug kusog nga iyang gihatag. Apan, sa matinud-anon, subsob nga kinahanglan nga mas daghan ang akong trabaho sa lagwerta ug mas dako ang akong gihimo sa pagdisiplina sa among mga anak kay sa angay unta nga akong himoon tungod kay ang akong bana puliki man.” Ikasubo, kining maong igsoong babaye nakadiskobre nga ang pipila, inay pabilhan ang iyang ekstrang lulan, nagpahayag ug dili-mabinationg mga komento sama sa, “Nganong wala ka man magpayunir?” (Proverbio 12:18) Pagkalabi pang maayo ang pagdayeg sa uban tungod sa ilang ginabuhat inay kay sawayon sila tungod sa wala nila maarangi sa pagbuhat!​—Proverbio 16:24; 25:11.

Tungod kay Wala pa Moabot ang Kataposan

18, 19. (a) Nganong dili karon panahon sa paghunong sa pagdalagan sa lumba alang sa kinabuhing walay kataposan? (b) Unsang tukma-sa-panahong tambag ang gihatag ni apostol Pablo ngadto sa mga Kristohanon sa Jerusalem?

¹⁸ Sa dihang ang usa ka maglulumba nahibalo nga duol na siya sa kataposan sa usa ka taas nga lumba, siya dili moundang. Ang iyang lawas mahimong anaa na sa kinutbanan sa agwanta niini​—nga gikapoy, nasobrahan sa kainit, ug nawad-ag tubig​—apan ang pagkaduol kaayo sa dag-anan maoy panahon nga dili moundang sa pagdalagan. Sa susama, ingong mga Kristohanon kita apil sa usa ka lumba alang sa ganting kinabuhi, ug kita duol na kaayo sa dag-anan. Dili karon panahon nga kita moundang sa pagdalagan!​—Itandi ang 1 Corinto 9:24; Filipos 2:16; 3:13, 14.

¹⁹ Ang mga Kristohanon sa unang siglo nag-atubang ug susamang situwasyon. Sa mga 61 K.P., si apostol Pablo misulat ngadto sa mga Kristohanon sa Jerusalem. Ang panahon talitapos na​—ang tuman-kadaotang “kaliwatan,” ang apostatang Hudiyonhong sistema sa mga butang, hapit nang “mahanaw.” Ang mga Kristohanon sa Jerusalem ilabina nga kinahanglang magmaigmat ug magmatinumanon; kinahanglang sila mopahawa sa siyudad inigkakita nila nga kini giliyokan na sa nagkampong kasundalohan. (Lucas 21:20-24, 32) Nan, tukma sa panahon ang inspiradong tambag ni Pablo: ‘Ayaw pagkahimong gikapoy ug maluya sa inyong mga kalag.’ (Hebreohanon 12:3) Si apostol Pablo migamit dinhi ug duha ka tin-awng mga berbo: “pagkahimong gikapoy” (kaʹmno) ug “pagkaluya” (e·klyʹo·mai). Sumala sa usa ka eskolar sa Bibliya, kining Gregong mga pulong “gigamit ni Aristotle langkit sa mga maglulumba nga magrelaks ug malusno human sila makalabang sa dag-anang linya. Ang mga magbabasa [sa sulat ni Pablo] diha pa sa lumba. Kinahanglang sila dili moundang nga dili pa panahon. Kinahanglang dili nila itugot nga sila makuyapan ug malusno tungod sa kakapoy. Sa makausa pa anaa ang awhag nga molahutay atubangan sa kalisdanan.”

20. Nganong ang tambag ni Pablo maoy tukma sa panahon alang kanato karong adlawa?

²⁰ Pagkatukma sa panahon ang tambag ni Pablo alang kanato karong adlawa! Atubangan sa nagdagkong mga kapit-osan, mahimong adunay mga panahon nga mobati kitang sama sa gikapoy nga maglulumba kansang mga batiis hapit nang malusno. Apan kay duol na kaayo sa dag-anang linya, kinahanglang dili kita moundang! (2 Cronicas 29:11) Kana mao gayoy gusto sa atong Kontra, ang “nagangulob nga leyon,” nga atong buhaton. Salamat, si Jehova naghimog mga tagana nga maghatag “ug kusog ngadto sa usang gikapoy.” (Isaias 40:29) Kon unsa kining maong mga tagana ug kon sa unsang paagi makapahimulos kita niini pagahisgotan sa sunod nga artikulo.

[Mga footnote]

Unsa ang Imong Tubag?

◻ Sa unsang paagi makalikay kita sa pag-undang sa dihang ang uban makapahigawad o makapasilo kanato?

◻ Unsang timbang nga panghunahuna bahin sa pagkasad-an ang mopugong kanato sa pag-undang?

◻ Unsay gidahom ni Jehova kanato?

◻ Sa unsang paagi ang pagkamakasaranganon makatabang sa mga ansiano sa kongregasyon sa paglikay nga maluya?

◻ Nganong ang tambag ni Pablo sa Hebreohanon 12:3 maoy tukma sa panahon alang kanato karong adlawa?