Si Jehova Magahatag ug Kusog sa Usang Gikapoyan

“Kadtong nagalaom kang Jehova maulian sa kusog. Sila manglupad pinaagi sa mga pako ingon sa mga agila.”​—ISAIAS 40:31.

1, 2. Unsay gihatag ni Jehova ngadto niadtong nagasalig kaniya, ug unsay atong pagahisgotan karon?

ANG mga agila nahilakip sa labing kusgang mga langgam sa kalangitan. Sila makalupad ug lagyong mga distansiya bisag dili ipakapaykapay ang ilang mga pako. Tungod sa mga pako nga ang bukhad mahimong kapig duha ka metros, “ang Hari sa Kalanggaman,” ang bulawanong agila, maoy “usa sa labing kahibulongan sa tanang agila; nga magpaibabaw sa kabungtoran ug kapatagan, [kini] molupad sulod sa daghang takna ibabaw sa usa ka tagaytay, unya mopataas nga magliyoliyo hangtod nga kini morag itom nga puntik sa kalangitan.”​—The Audubon Society Encyclopedia of North American Birds.

² Nga naghunahuna sa mga katakos sa paglupad sa agila, si Isaias misulat: “[Si Jehova] nagahatag ug kusog sa usang gikapoyan; ug sa usang walay dakong kabaskog siya magpadagaya sa bug-os nga gahom. Ang mga batang lalaki kapoyon ug mangaluya, ug ang mga batan-ong lalaki mismo sa walay pakyas mangapandol, apan kadtong nagalaom kang Jehova maulian sa kusog. Sila manglupad pinaagi sa mga pako ingon sa mga agila. Sila manalagan ug dili mangaluya; sila manglakaw ug dili kapoyon.” (Isaias 40:29-31) Pagkamakapahupay ang pagkasayod nga si Jehova magahatag niadtong nagasalig kaniya ug kusog sa pagpadayon, nga samag ginasangkapan sila sa morag dili-kapoyong mga pako sa nagalupad nga agila! Tagda, karon, ang pipila sa mga taganang gihimo niya sa paghatag ug kusog sa usang gikapoyan.

Ang Gahom sa Pag-ampo

3, 4. (a) Si Jesus miawhag sa iyang mga tinun-an sa pagbuhat sa unsa? (b) Unsay atong madahom nga buhaton ni Jehova sa pagtubag sa atong mga pag-ampo?

³ Si Jesus nag-awhag sa iyang mga tinun-an “nga mag-ampo sa kanunay ug dili moundang.” (Lucas 18:1) Ang atong pagpadayag kon unsay anaa sa atong kasingkasing kang Jehova motabang ba gayod nga kita maulian sa kusog ug makalikay nga moundang sa dihang ang mga kapit-osan sa kinabuhi morag bug-at na kaayo? Oo, apan adunay pipila ka butang nga kinahanglang atong ibutang sa hunahuna.

⁴ Kinahanglang magmatinud-anon kita sa atong gidahom nga pagabuhaton ni Jehova ingong tubag sa atong mga pag-ampo. Usa ka Kristohanon nga nahitumpawak sa grabeng depresyon sa ulahi mipahayag: “Sama sa ubang mga sakit, si Jehova dili mohimog mga milagro niining panahona. Apan iya kitang tabangan nga makasagubang ug mamaayo sa sukod nga mahimo nato niining sistemaha.” Sa pagsaysay kon nganong ang iyang mga pag-ampo mahinungdanon, siya midugang: “Sulod sa 24 ka oras sa tibuok adlaw makapangayo ako sa balaang espiritu ni Jehova.” Busa, si Jehova dili manalipod kanato gikan sa mga kapit-osan sa kinabuhi nga mahimong magdat-og kanato, apan siya “magahatag ug balaang espiritu niadtong mangayo kaniya!” (Lucas 11:13; Salmo 88:1-3) Ang maong espiritu maghimo kanatong takos nga mosagubang sa bisan unsang pagsulay o kapit-osan nga tingali atong atubangon. (1 Corinto 10:13) Kon gikinahanglan, kini makapahupong kanato sa “gahom nga labaw sa kasagaran” sa paglahutay hangtod nga ang Gingharian sa Diyos magwagtang sa tanang mabug-at nga mga suliran sa bag-ong kalibotan nga duol na kaayo.​—2 Corinto 4:7.

5. (a) Aron mahimong epektibo ang atong mga pag-ampo, unsang duha ka butang ang hinungdanon? (b) Sa unsang paagi kita makaampo kon kita nagapakigbisog sa usa ka kahuyangan sa unod? (c) Unsay ipasundayag sa atong malugoton ug espesipikong mga pag-ampo kang Jehova?

⁵ Ugaling, aron ang atong mga pag-ampo mahimong epektibo, kinahanglang kita magmalugoton, ug kinahanglang kita mahimong espesipiko. (Roma 12:12) Pananglitan, kon ikaw usahay maluya tungod kay nagapakigbisog ka sa usa ka kahuyangan sa unod, sa sinugdan sa matag adlaw, hangyoa si Jehova nga tabangan ka sa paglikay nga dag-on sa maong tino nga kahuyangan sulod sa adlaw. Pag-ampo sa susamang paagi sa tibuok adlaw ug sa dili pa matulog kada gabii. Kon ikaw mapakyas, pangaliyupo kang Jehova alang sa iyang kapasayloan, apan pakigsulti usab kaniya bahin sa kon unsay mitultol sa pagkapakyas ug kon unsay mahimo nimong buhaton aron kalikayan ang maong mga kahimtang sa umaabot. Ang maong malugoton ug espesipikong mga pag-ampo magpasundayag ngadto sa “Tigpatalinghog sa pag-ampo” sa katim-os sa imong tinguha nga makadaog sa pakigbugno.​—Salmo 65:2; Lucas 11:5-13.

6. Nganong kita tukmang makadahom nga pamation ni Jehova ang atong mga pag-ampo bisan pag kita mahimong mobati nga dili takos nga moampo?

⁶ Hinuon, usahay kadtong nangaluya tingali mobati nga dili na takos aron mag-ampo. Usa ka Kristohanong babayeng mibati niana miingon sa ulahi: “Kana maoy makuyaw kaayong panghunahuna tungod kay nagpasabot kini nga gipangako na nato sa atong kaugalingon ang paghukom sa atong kaugalingon, apan ang maong paghukom dili ato.” Sa pagkatinuod, “ang Diyos mismo mao ang Maghuhukom.” (Salmo 50:6) Ang Bibliya nagpasalig kanato nga bisan pag “ang atong mga kasingkasing mahimong maghusga kanato . . . , ang Diyos mas labaw kay sa atong mga kasingkasing ug nahibalo sa tanang butang.” (1 Juan 3:20) Makalilipay gayod ang pagkasayod nga sa dihang tingali maghukom kita sa atong kaugalingon ingon nga dili takos nga mag-ampo, mahimong dili kana ang gibati ni Jehova bahin kanato! Siya “nahibalo sa tanang butang” bahin kanato, lakip ang mga kahimtang sa atong kinabuhi nga mahimong maoy nagpahinabo nga kita mobati nga dili gayod takos. (Salmo 103:10-14) Ang iyang kaluoy ug giladmon sa pagkamasinabtanon magtukmod kaniya nga pamatian ang mga pag-ampo gikan sa “usa ka kasingkasing nga gun-ob ug dugmok.” (Salmo 51:17) Nganong makaako man siya sa dili pagpamati sa atong mga pagtuaw alang sa panabang sa dihang siya mismo magahukom “kang bisan kinsa nga nagasampong sa iyang igdulungog gikan sa pagtuaw sa usang timawa”?​—Proverbio 21:13.

Ang Kamainiton sa Panag-igsoonay

7. (a) Unsay laing tagana nga gihimo ni Jehova sa pagtabang kanato nga maulian sa kusog? (b) Ang pagkahibalo sa unsa bahin sa atong panag-igsoonay ang mahimong makapalig-on kanato?

⁷ Ang laing tagana nga gihimo ni Jehova sa pagtabang kanato nga maulian sa kusog mao ang atong Kristohanong panag-igsoonay. Pagkabililhong pribilehiyo ang pagkahimong bahin sa tibuok-kalibotang pamilya sa mga igsoong lalaki ug mga babaye! (1 Pedro 2:17) Sa dihang mabug-atan kita sa mga kapit-osan sa kinabuhi, ang kamainiton sa atong panag-igsoonay makatabang kanato nga maulian sa kusog. Sa unsang paagi? Ang pagkasayod nga kita wala mag-inusara sa pag-atubang sa lisod nga mga hagit makapalig-on mismo. Taliwala sa atong mga igsoong lalaki ug mga babaye, sa walay duhaduha adunay pipila nga nag-atubang sa susamang mga kapit-osan o mga pagsulay ug nakasinati sa mga pagbati nga sama sa ato. (1 Pedro 5:9) Makapalig-on ang pagkahibalo nga ang atong nasinati maoy kasagaran ug ang atong mga pagbati dili talagsaon.

8. (a) Unsang mga panig-ingnan ang nagpakita kon sa unsang paagi mahimong makaplagan nato ang gikinahanglan kaayong hinabang ug kahupayan diha sa atong panag-igsoonay? (b) Sa unsang paagi ikaw sa personal natabangan o nahupay sa “usa ka matuod nga kauban”?

⁸ Diha sa kamainiton sa panag-igsoonay kita makakaplag ug ‘matuod nga mga kauban’ kinsa, sa dihang kita may kagul-anan, makatagana sa gikinahanglan kaayong tabang ug kahupayan. (Proverbio 17:17) Kasagaran, ang pila ka malulutong mga pulong o mahunahunaong mga lihok mao lamang ang gikinahanglan. Usa ka Kristohanong nakigbisog sa mga pagbati sa pagkawalay-kapuslanan nahinumdom: “Dihay mga higala nga naghisgot kanako sa positibong mga butang bahin sa akong kaugalingon nga nakatabang kanako nga mabuntog ang negatibong mga panghunahuna nga akong nabatonan.” (Proverbio 15:23) Human mamatay ang iyang batang babaye, usa ka igsoong babaye sa sinugdan nalisdan nga moawit sa mga alawiton sa Gingharian panahon sa mga tigom sa kongregasyon, ilabina sa mga awit nga naghisgot sa pagkabanhaw. “Usa ka panahon,” siya nahinumdom, “usa ka igsoong babayeng naglingkod sa atbang nga lumbay ang nakakita kanako nga naghilak. Miduol siya, miagbay kanako, ug miawit sa nahibiling bahin sa awit kauban nako. Ako nahupong gayod sa gugma alang sa mga igsoong lalaki ug mga babaye ug malipayon kaayo nga nakatambong kami sa mga tigom, kay nakaamgo nga atua didto ang among panabang, didto sa Kingdom Hall.”

9, 10. (a) Sa unsang paagi kita makaamot ngadto sa kamainiton sa atong panag-igsoonay? (b) Kinsa ilabina ang nagkinahanglag makapalig-ong panag-uban? (c) Unsay atong mahimo sa pagtabang niadtong nagkinahanglag pagdasig?

⁹ Siyempre, matag usa kanato adunay responsabilidad nga makaamot sa pagkamainiton sa Kristohanong panag-igsoonay. Busa, ang atong mga kasingkasing angay nga “mapaluag” aron ilakip ang tanan natong mga igsoong lalaki ug mga babaye. (2 Corinto 6:13) Makapasubo kaayo alang niadtong nangaluya nga mobati nga ang gugma sa kaigsoonan alang kanila nabugnaw na! Bisan pa niana, gitaho sa pila ka Kristohanon nga sila maoy mamingawon ug pinasagdan. Usa ka igsoong babaye kansang bana maoy supak sa kamatuoran nangaliyupo: “Kinsay dili gusto ug magkinahanglan sa makapalig-ong mga panaghigala, pagdasig, ug mahigugmaong panag-uban? Palihog pahinumdomi ang atong mga igsoong lalaki ug mga babaye nga amo silang gikinahanglan!” Oo, ilabina kadtong kinsa nabug-atan sa ilang mga kahimtang sa kinabuhi​—kadtong adunay dili-magtutuong mga kapikas, nag-inusarang mga ginikanan, kadtong adunay nakadukot nang mga sakit, mga tigulang, ug uban pa​—nagkinahanglag makapalig-ong panag-uban. Ang pipila kanato kinahanglan bang pahinumdoman niana?

¹⁰ Unsay atong mahimo sa pagtabang? Atong paluagan ang atong pagpahayag sa atong gugma. Sa dihang magpakitag kamaabiabihon, dili nato hikalimtan kadtong nagkinahanglag pagdasig. (Lucas 14:12-14; Hebreohanon 13:2) Inay sa pagpangagpas nga ang ilang mga kahimtang nagpugong kanila nga modawat, nganong dili man sila imbitahon gihapon? Unya sila maoy atong pahukmon. Bisan pag dili sila makadawat, sa walay duhaduha madasig sila nga mahibalo nga ang uban naghunahuna kanila. Basin kana mao lamay ilang gikinahanglan aron maulian sa kusog.

11. Kadtong nabug-atan mahimong nagkinahanglan ug tabang sa unsang mga paagi?

¹¹ Kadtong nabug-atan tingali nagkinahanglag tabang sa ubang mga paagi. Pananglitan, usa ka dalagang inahan tingali nagkinahanglag usa ka hamtong nga igsoong lalaki aron magpakitag interes sa iyang walay-amahan nga batang lalaki. (Santiago 1:27) Ang usa ka igsoong lalaki o igsoong babaye nga may grabeng sakit basin nagkinahanglag tabang sa pagpamalit o sa mga buluhaton sa balay. Ang usa ka tigulang basin mangandoy ug panag-uban o nagkinahanglag tabang aron makasangyaw sa kanataran. Sa dihang adunay mapinadayonong panginahanglan sa maong tabang, kini mahimong usa ka dakong ‘pagsulay sa pagkatiunay sa atong gugma.’ (2 Corinto 8:8) Inay magpalayo sa mga nagkinahanglan tungod sa panahon ug kahagong nalangkit, hinaot makapasar kita sa pagsulay sa Kristohanong gugma pinaagi sa pagkasensitibo ug kamasanongon sa mga panginahanglan sa uban.

Ang Gahom sa Pulong sa Diyos

12. Sa unsang paagi ang Pulong sa Diyos nagtabang kanato nga maulian sa kusog?

¹² Ang usa ka tawo nga mohunong sa pagkaon sa dili madugay mawad-an sa iyang kusog, o gahom. Busa, ang laing paagi nga si Jehova maghatag kanato ug kusog sa pagpadayon mao ang pagtino nga kita mapakaon ug maayo sa espirituwal nga paagi. (Isaias 65:13, 14) Unsang espirituwal nga pagkaon ang iyang gitagana? Labaw sa tanan, ang iyang Pulong, ang Bibliya. (Mateo 4:4; itandi ang Hebreohanon 4:12.) Sa unsang paagi makatabang kini kanato nga maulian sa kusog? Sa dihang ang mga kapit-osan ug mga suliran nga atong giatubang mosugod pag-ut-ot sa atong kusog, kita makakuhag kusog gikan sa pagbasa mahitungod sa mga pagbati ug sa tinuod-kinabuhing mga pakigbisog sa matinumanong mga lalaki ug mga babaye sa kapanahonan sa Bibliya. Bisan pag talagsaong mga panig-ingnan sa integridad, sila maoy mga tawo “nga may mga pagbati nga sama sa atoa.” (Santiago 5:17; Buhat 14:15) Ilang giatubang ang mga pagsulay ug mga kapit-osan nga sama sa atoa. Tagda ang pipila ka pananglitan.

13. Unsang Kasulatanhong mga panig-ingnan ang nagpakitang ang matinumanong mga lalaki ug mga babaye sa kapanahonan sa Bibliya nakabaton ug mga pagbati ug mga kasinatian nga sama kaayo sa atoa?

¹³ Ang patriarkang si Abraham naguol pag-ayo tungod sa pagkamatay sa iyang asawa bisan pag siya nagtuo sa pagkabanhaw. (Genesis 23:2; itandi ang Hebreohanon 11:8-10, 17-19.) Ang mahinulsolong si David mibati nga tungod sa iyang mga sala siya dili na takos nga mag-alagad kang Jehova. (Salmo 51:11) Si Moises mibati sa pagkawalay-katakos. (Exodo 4:10) Si Epaprodito naguol sa dihang nasayran nga tungod sa usa ka grabeng sakit limitado na ang iyang mahimo diha sa “buluhaton sa Ginoo.” (Filipos 2:25-30) Si Pablo kinahanglang makigbisog sa makasasalang unod. (Roma 7:21-25) Si Euodia ug Sintique, duha ka dinihogang mga igsoong babaye sa kongregasyon sa Filipos, lagmit wala magkasinabtanay. (Filipos 1:1; 4:2, 3) Makapalig-on gayod ang pagkahibalo nga ang maong matinumanong mga tawo may mga pagbati ug mga kasinatian nga sama sa atoa, apan sila wala mangundang! Ni gibiyaan sila ni Jehova.

14. (a) Unsang instrumento ang gigamit ni Jehova sa pagtabang kanato nga makakuhag kusog gikan sa iyang Pulong? (b) Nganong ang mga magasing Bantayanang Torre ug Pagmata! adunay mga artikulo bahin sa katilingbanon, pamilyahanon, ug emosyonal nga mga isyu?

¹⁴ Sa pagtabang kanato nga makakuhag kusog gikan sa iyang Pulong, gigamit ni Jehova ang matinumanon ug mabuot nga ulipon aron magtagana kanato sa makanunayon nga agos sa “pagkaon sa hustong panahon.” (Mateo 24:45) Ang matinumanong ulipon dugay nang naggamit sa mga magasing Bantayanang Torre ug Pagmata! sa paglaban sa kamatuoran sa Bibliya ug pagmantala sa Gingharian sa Diyos ingong bugtong paglaom sa tawo. Sa miaging pila ka dekada ilabina, kining mga magasina adunay tukma-sa-panahong Kasulatanhong mga artikulo bahin sa katilingbanon, pamilyahanon, ug emosyonal nga mga hagit nga nasinati bisan sa pipila sa katawhan sa Diyos. Sa unsang katuyoan nga gipatik ang maong impormasyon? Sa tino aron pagtabang niadtong nasinati niining mga hagita aron makakuhag kusog ug pagdasig gikan sa Pulong sa Diyos. Apan ang maong mga artikulo motabang usab kanatong tanan sa pagbaton ug mas tin-awng pagsabot sa mahimong nahiagoman sa pipila sa atong mga igsoong lalaki ug mga babaye. Sa ingon kita masangkapang mas maayo sa pagpamati sa mga pulong ni Pablo: “Pamulong nga mahupayon sa magul-anong mga kalag, buligi ang mga maluya, magmataas-ug-pailob sa tanan.”​—1 Tesalonica 5:14.

Mga Ansiano nga Maoy “Dapit nga Tagoanan Gikan sa Hangin”

15. Unsay gitagna ni Isaias mahitungod niadtong nagaalagad ingong mga ansiano, ug unsang responsabilidad ang gipahamtang niini diha kanila?

¹⁵ Si Jehova nagtaganag laing butang sa pagtabang kanato sa dihang kita maluya​—ang mga ansiano sa kongregasyon. Bahin kanila si propeta Isaias misulat: “Ang matag usa kinahanglang magpamatuod nga sama sa usa ka dapit nga tagoanan gikan sa hangin ug usa ka dapit nga salipdanan gikan sa bagyo, sama sa mga sapa sa tubig diha sa walay-tubig nga dapit, sama sa landong sa usa ka dakong bato sa usa ka umaw nga yuta.” (Isaias 32:1, 2) Ang mga ansiano, diay, adunay responsabilidad nga makatuman kon unsay gitagna ni Jehova mahitungod kanila. Sila “kinahanglang magpamatuod” nga mga tinubdan sa kahupayan ug represko sa uban ug maandam nga “magpadayon sa pagpas-an sa mga kabug-at [o, “mga butang nga makapasamok”; sa literal, “bug-at nga mga butang”] sa usag usa.” (Galacia 6:2, potnot) Sa unsang paagi makahimo sila niini?

16. Unsay mahimo sa mga ansiano sa pagtabang sa usa nga mobating dili takos moampo?

¹⁶ Sumala sa gihisgotan na, usahay ang tawong naluya tingali mobati nga dili takos moampo. Unsay mahimo sa mga ansiano? Sila makaampo uban ug alang sa maong tawo. (Santiago 5:14) Ang yano nga paghangyo kang Jehova, nga madungog sa usang naluya, nga tabangan siya sa pagsabot kon unsa ka dako ang paghigugma ni Jehova kaniya ug sa uban tinong makapahupay. Ang pagkadungog sa mainiton, kinasingkasing nga pag-ampo sa usa ka ansiano makatabang sa pagpalig-on sa pagsalig sa usa ka magul-anong tawo. Siya matabangan sa pagpangatarongan nga kon ang mga ansiano masaligon nga si Jehova magatubag sa mga pag-ampo alang kaniya, nan mahimong mobati usab siya sa maong pagkamasaligon.

17. Nganong ang mga ansiano kinahanglang mahimong mabinationg mga mamiminaw?

¹⁷ “Ang matag usa kinahanglan nga magmaabtik sa pagpaminaw, magmahinay sa pagsulti,” matod sa Santiago 1:19. Sa pagtabang sa mga naluya nga maulian sa kusog, ang mga ansiano kinahanglan usab nga mahimong mabinationg mga mamiminaw. Sa pila ka kahimtang ang mga sakop sa kongregasyon mahimong nagpakigbisog sa mga suliran o mga kapit-osan nga dili masulbad niining sistemaha sa mga butang. Nan, ang gikinahanglan tingali nila dili mao ang solusyon aron masulbad ang ilang suliran kondili ang pagpakig-estorya lamang sa usa ka maayong mamiminaw​—usa nga dili mosulti kanila kon unsay angay nilang bation kondili maminaw nga dili mahimong mahukmanon.​—Lucas 6:37; Roma 14:13.

18, 19. (a) Sa unsang paagi ang pagkaabtik sa pagpaminaw makatabang sa usa ka ansiano sa paglikay sa paghimong mas bug-at sa lulan sa usang naluya? (b) Unsay mosangpot sa dihang ipakita sa mga ansiano ang “pagkamabination”?

¹⁸ Mga ansiano, ang pagkamaabtik sa pagpaminaw makatabang kaninyo sa paglikay nga mas makapabug-at nga dili-tinuyo sa lulan sa usang naluya. Pananglitan, kon ang usa ka igsoong lalaki o babaye nakapalta sa pila ka tigom o naghinayhinay sa pagsangyaw sa kanataran, siya ba tinuod nga nagkinahanglan ug tambag bahin sa dugang nga pagsangyaw o pagkahimong mas regular sa mga tigom? Tingali. Apan nasayod ka ba sa tibuok nga kahimtang? Duna bay nagdako nga suliran sa panglawas? Nausab ba ang pamilyahanong mga responsabilidad sa dili pa dugay? Duna bay ubang mga kahimtang o mga kapit-osan nga nagapabug-at kaniya? Hinumdomi, ang maong tawo basin mibati na nga sad-an kaayo tungod kay wala makahimog mas dako.

¹⁹ Nan, sa unsang paagi makatabang ka sa igsoong lalaki o babaye? Sa dili ka pa mopahayag ug mga konklusyon ug mohatag sa tambag, paminaw! (Proverbio 18:13) Pinaagi sa mailahong mga pangutana ‘kalosa’ ang mga pagbati sa kasingkasing sa tawo. (Proverbio 20:5) Hatagig pagtagad ang maong mga pagbati​—ilha kana. Ang usang naluya mahimong nagkinahanglan nga pasaligan nga si Jehova may pagtagad kanato ug nakasabot nga ang atong mga kahimtang usahay mahimong maglimite kanato. (1 Pedro 5:7) Sa dihang ipakita sa mga ansiano ang maong “pagkamabination,” ang mga naluya ‘makakaplag ug represko alang sa ilang mga kalag.’ (1 Pedro 3:8; Mateo 11:28-30) Sa dihang makakaplag sila sa maong pagrepresko, sila dili na kinahanglang sultian nga mobuhat ug dugang pa; ang ilang mga kasingkasing magtukmod kanila nga buhaton ang tanan nilang maarangan sa pag-alagad kang Jehova.​—Itandi ang 2 Corinto 8:12; 9:7.

20. Tungod kay duol na kaayo ang kataposan niining tuman-kadaotang kaliwatan, angay nga kita mahimong determinado sa pagbuhat sa unsa?

²⁰ Sa pagkatinuod kita nagkinabuhi sa labing lisod nga panahon sa tibuok nga kasaysayan sa tawo. Ang mga kapit-osan sa pagkinabuhi sa kalibotan ni Satanas nagdugang samtang kita nagkalalom na sa panahon sa kataposan. Hinumdomi, samag usa ka leyon nga nagapangayam, ang Yawa nagpaabot nga kita maluya ug moundang aron kita mapahimudsan niya ingong sayon nga tukbonon. Pagkamapasalamaton nato nga si Jehova magahatag ug kusog sa usang gikapoyan! Hinaot kita bug-os nga magpahimulos sa mga tagana nga iyang gihimo sa paghatag kanato sa kusog sa pagpadayon, nga samag gisangkapan niya kitag kusgang mga pako sa usa ka nagalupad nga agila. Tungod kay duol na kaayo ang kataposan niining tuman-kadaotang kaliwatan, karon dili mao ang panahon sa paghunong pagdalagan diha sa atong lumba alang sa ganti​—ang kinabuhing walay kataposan.​—Hebreohanon 12:1.

Unsa ang Imong Tubag?

◻ Unsay atong madahom nga buhaton ni Jehova sa pagtubag sa atong mga pag-ampo?

◻ Sa unsang mga paagi kita makakuhag kusog gikan sa atong Kristohanong panag-igsoonay?

◻ Sa unsang paagi ang Pulong sa Diyos nagtabang kanato nga maulian sa kusog?

◻ Unsay mahimo sa mga ansiano sa pagtabang sa mga naluya nga maulian sa kusog?

[Hulagway sa panid 17]

Sa dihang magpakitag pagkamaabiabihon, dili nato hikalimtan kadtong nagkinahanglag pagdasig

[Hulagway sa panid 18]

Ang mga ansiano makahangyo kang Jehova sa pagtabang sa mga naluya sa pagsabot kon unsa ka dako nga sila gihigugma