Nakakaplag Silag Pakigdait Diha sa Usa ka Gubot nga Kalibotan

ANG ilustrasyon sa hapin niining magasina naghulagway sa usa ka esena sa mainit nga gubat gikan sa Bosnia ug Herzegovina. Mahimo bang molungtad ang kalinaw sa maong dapit? Ikatingala, ang tubag maoy oo. Bisan tuod ang Romano Katoliko, Sidlakang Ortodokso, ug Muslim nga mga katilingban nianang makaluluoyng nasod nag-ilogay ug teritoryo, daghang indibiduwal ang nangandoy sa pakigdait, ug ang pipila nakakaplag niana.

Ang pamilyang Djorem maoy mga molupyo sa Sarajevo, ug sila maoy mga Saksi ni Jehova. Taliwala sa tanang kagubot sa maong siyudad, sila kanunayng nagduaw sa ilang mga silingan aron ipakig-ambit kanila ang maayong balita sa Gingharian sa Diyos. (Mateo 24:14) Ngano? Tungod kay ang pamilyang Djorem nasayod nga kining Ginghariana maoy tinuod, nga kini natukod na sa mga langit, ug nga mao kana ang labing maayo ug bugtong paglaom alang sa pakigdait sa katawhan. Ang mga Saksi ni Jehova adunay bug-os nga pagsalig sa gitawag ni apostol Pablo nga “ang maayong balita sa pakigdait.” (Efeso 2:17) Tungod sa mga tawo nga sama ni Bozo ug Hena Djorem, daghan ang nakakaplag ug pakigdait sa Bosnia ug Herzegovina.

Moabot ang Usa ka Tinuod nga Pakigdait

Aduna pay ikasulti mahitungod sa pamilyang Djorem. Hinuon, una natong hisgotan ang laing magtiayon nga nakabaton ug pagsalig sa Gingharian sa Diyos. Ang ilang mga ngalan maoy Artur ug Arina. Sila ug ang ilang bayongbayong nga mga anak nagpuyo kanhi sa usa ka republika sa teritoryo sa kanhing Unyong Sobyet. Sa dihang mibuto ang sibil nga gubat, si Artur nakig-away dapig sa usa ka kiliran. Apan, sa wala madugay iyang gisukna ang iyang kaugalingon, ‘Nganong nakig-away ako batok niining mga tawhana nga akong kanhing mga silingan?’ Siya mibiya sa nasod ug, human sa daghang kalisdanan, miabot uban sa iyang batan-ong pamilya sa Estonia.

Sa usa ka pagduaw sa St. Petersburg, nahibalag ni Artur ang mga Saksi ni Jehova ug nadani sa iyang nakat-onan mahitungod sa Gingharian sa Diyos. Ang kabubut-on ni Jehova mao nga sa dili madugay ang Gingharian sa Diyos mao na lamang unya ang bugtong pagmando ibabaw sa katawhan. (Daniel 2:44) Unya ang yuta mamahimong malinawong dapit, nga wala nay sibil nga mga gubat o internasyonal nga mga panagbangi. Si Isaias mitagna bahin nianang panahona: “Dili nila pagadaoton ni pagagub-on ang tibuok ko nga bukid nga balaan; kay ang yuta mapuno gayod sa kahibalo kang Jehova ingon sa mga tubig nga nagatabon sa dagat.”​—Isaias 11:9.

Sa pagkamatikod sa hulagway sa tigdibuho bahin sa maong umaabot nga malinawong yuta diha sa usa ka tabang sa pagtuon sa Bibliya nga gipakita sa usa ka Saksi kaniya, si Artur miingon nga kanhi nagpuyo siya sa usa ka dapit nga ingon niana. Apan, karon nadaot kini tungod sa sibil nga gubat. Balik sa Estonia, si Artur ug ang iyang pamilya nakakat-on ug dugang pa mahitungod sa Gingharian sa Diyos pinaagi sa usa ka pagtuon sa Bibliya uban sa mga Saksi ni Jehova.

Pakigdait Taliwala sa Kagubot

Ang Salmo 37:37 nag-ingon: “Timan-i ang tawong hingpit ug tan-awa ang matarong, kay ang umaabot sa maong tawo maoy malinawon.” Sa pagkatinuod, ang kalinaw sa usa nga hingpit ug matarong sa mga mata sa Diyos dili lamang sa iyang umaabot. Iya kanang mapahimuslan karon. Sa unsang paagi kana posible? Tagda ang kasinatian sa usa ka tawo nga ginganlag Paul.

Si Paul nagpuyo sa usa ka hilit nga kampo sa mga kagiw sa habagatan-kasadpang Etiopia, bisan tuod siya sa pagkatinuod naggikan sa sikbit nga nasod. Didto sa iyang nasod, nakahibalag siya ug usa sa mga Saksi ni Jehova kinsa nagtrabaho sa usa ka kompaniya sa aseite, ug kining tawhana naghatag niya ug usa ka giya sa pagtuon sa Bibliya, nga Ang Kamatuoran nga Motultol sa Kinabuhing Dayon.a Wala na gayod makita pag-usab ni Paul ang maong Saksi, apan iyang gitun-an pag-ayo ang libro. Ang sibil nga gubat nag-abog kaniya ngadto sa usa ka kampo sa mga kagiw sa Etiopia, ug didto iyang gisulti sa uban ang iyang nakat-onan. Usa ka gamayng grupo ang midawat niini ingong kamatuoran. Pinasikad sa ilang nakat-onan, sa wala madugay gisangyawan nila ang uban diha sa kampo.

Si Paul misulat sa hedkuwarter sa Watch Tower Society nga nangayog tabang. Usa ka ministro nga gipadala gikan sa Addis Ababa natingala sa pagkakita sa 35 ka tawo nga nagpaabot kaniya, nga andam mokat-on ug dugang bahin sa Gingharian sa Diyos. Ang mga kahikayan gihimo aron ikahatag ang tabang sa regular nga paagi.

Sa unsang paagi ikaingon nga ang mga tawong sama kang Paul nakapahimulos ug pakigdait? Ang ilang mga kinabuhi dili sayon, apan sila may pagtuo sa Diyos. Sa dihang naapektahan sa kagubot niining kalibotana, ilang gipadapat ang tambag sa Bibliya: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos.” Ingong resulta, sila nakabaton ug katagbawan nga talagsaon karong adlawa. Ang mga pulong ni apostol Pablo ngadto sa kongregasyon sa Filipos mapadapat kanila: “Ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” Sa pagkatinuod, ilang gibati ang suod nga relasyon uban kang Jehova, “ang Diyos sa kalinaw.”​—Filipos 4:6, 7, 9.

Presenteng Pakigdait

Ang naentronong Hari sa Gingharian sa Diyos mao si Jesu-Kristo, nga gitawag sa Bibliya nga “Prinsipe sa Pakigdait.” (Isaias 9:6) Bahin kaniya ang karaang propeta nag-ingon: “Sa pagkatinuod magasulti siya mahitungod sa pakigdait ngadto sa mga nasod; ug ang iyang pagmando maoy gikan sa dagat ngadto sa dagat ug gikan sa Suba ngadto sa kinatumyan sa yuta.” (Zacarias 9:10) Ang dinasig nga mga pulong sama niini adunay dakong epekto sa kinabuhi sa usa ka tawo nga ginganlag José.

Sa usa ka panahon si José nabilanggo. Siya maoy usa ka terorista ug gidakop samtang nangandam sa pagbomba sa kuwartel sa mga polis. Siya naghunahuna nga ang kapintasan lamang ang magpugos sa gobyerno sa pagpauswag sa mga kahimtang sa iyang nasod. Samtang didto siya sa bilanggoan, ang mga Saksi ni Jehova misugod pagtuon sa Bibliya uban sa iyang asawa.

Tapos mapagawas si José, siya usab nagtuon sa Bibliya, ug sa wala madugay ang mga pulong sa Salmo 85:8 sugod nga napadapat kaniya: “Magpatalinghog ako sa igasulti sa matuod nga Diyos nga si Jehova, kay siya magasulti ug pakigdait sa iyang katawhan ug sa iyang mga maunongon.” Hinunoa, ang maong bersikulo natapos sa usa ka pasidaan: “Ayaw sila pabalika sa pagsalig sa kaugalingon.” Busa, ang usa nga mangita sa pakigdait ni Jehova dili mangahas sa paglihok nga independente o supak sa Iyang kabubut-on.

Karong adlawa, si José ug iyang asawa maoy Kristohanong mga ministro. Ilang gitultolan ang uban ngadto sa Gingharian ni Jehova ingong solusyon sa mga suliran nga gisulayan kanhi ni José sa pagsulbad pinaagi sa hinimo-sa-balay nga mga bomba. Sila andam nga mosalig sa Bibliya, nga nag-ingon: “Si Jehova, sa iyang bahin, magahatag kon unsay maayo.” (Salmo 85:12) Sa pagkatinuod, si José ning bag-o pa miduaw sa kuwartel nga giplanohan niyang gun-obon. Ngano? Aron mosulti ngadto sa mga pamilya didto bahin sa Gingharian sa Diyos.

Malinawong Katawhan

Sa Salmo 37:10, 11, ang Bibliya nag-ingon: “Hamubo na lang ang panahon, ug ang mga daotan mangawala; ug pagasusihon mo gayod ang iyang dapit, ug siya mawala diha. Apan ang mga maaghop mismo makapanunod sa yuta, ug sa pagkatinuod makakaplag sila ug tumang kalipay tungod sa kadagaya sa pakigdait.” Pagkamahimayaong kalaoman!

Matikdi, hinunoa, nga ang pakigdait ni Jehova maoy alang lamang sa “mga maaghop.” Kadtong mangita sa pakigdait tingali kinahanglang makakat-on nga mahimong makigdaiton. Mao kini ang kahimtang ni Keith, kinsa nagpuyo sa New Zealand. Si Keith gibatbat ingong “kusgan ug isogon, agresibo, ug makilalison.” Siya maoy membro sa usa ka gang ug nagpuyo sa usa ka balay nga usa gayod ka salipdanan, nga may mga tanaman nga gipatrolyahan sa tulo ka guwardiyang mga iro aron walay mangahas pagsulod. Ang iyang asawa, ang inahan sa iyang unom ka anak, nakigdiborsiyo kaniya.

Sa dihang si Keith nakahibalag sa mga Saksi ni Jehova, ang maayong balita adunay dakong epekto kaniya. Sa wala madugay siya ug ang iyang mga anak nagtambongan sa mga tigom uban sa mga Saksi. Iyang gitupihan ang iyang tagahawak nga buhok ug misugod sa pagsulti bahin sa Gingharian sa Diyos ngadto sa iyang kanhing mga kauban. Ang pipila niini misugod usab sa pagtuon sa Bibliya.

Sama sa minilyong matarong-ug-kasingkasing nga mga tawo sa tibuok kalibotan, si Keith misugod sa pagpadapat sa mga pulong ni apostol Pedro: “Siya nga buot mahigugma sa kinabuhi ug makakitag maayong mga adlaw, . . . pabiyai kaniya ang daotan ug ipabuhat ang maayo; ipapangita kaniya ang pakigdait ug pangagpason kini.” (1 Pedro 3:10, 11) Ang kanhing asawa ni Keith miuyon sa pagpakigminyo pag-usab kaniya, ug siya karon nagatuon sa ‘pagpangita sa pakigdait ug pangagpason kini.’

Ang pakigdait ni Jehova maoy nagluwas sa daghan, lakip ang kanhing atleta nga natawo sa kanhing U.S.S.R. Kining tawhana nakadaog ug mga medalya sa indigay sa Olimpiada, apan nahigawad siya ug midangop sa mga droga ug alkoholikong ilimnon. Tapos sa makahuloganong 19 ka tuig nga naglakip sa tulo-ka-tuig nga sentensiya sa usa ka kampo sa silot nga trabaho sa Siberia, pagsakay sa barko ingong nagtago nga pasahero padulong sa Canada, ug duha ka pag-ungaw sa kamatayon tungod sa iyang bisyo sa droga, siya miampo sa Diyos alang sa tabang aron makakaplag ug tinuod nga katuyoan sa kinabuhi. Ang usa ka pagtuon sa Bibliya uban sa nagsultig-Rusong mga Saksi ni Jehova nakatabang kaniya sa pagkaplag sa tubag sa iyang mga pangutana. Karong adlawa kining tawhana, sama sa minilyong uban pa, nakakaplag ug pakigdait uban sa Diyos ug uban sa iyang kaugalingon.

Ang Paglaom sa Pagkabanhaw

Sa kataposan, hisgotan nato pag-usab si Bozo ug Hena Djorem sa Sarajevo. Kining maong magtiayon may singko-anyos nga anak babaye, si Magdalena. Niadtong Hulyo, silang tulo mibiya sa balay aron sa pagpakig-ambit sa makausa pa sa ilang kalihokang pagsangyaw sa dihang silang tanan namatay gumikan sa mibuto nga granada. Komosta ang pakigdait nga ilang gisangyaw ngadto sa uban? Ang granada ba nga mihunos sa ilang mga kinabuhi nagpakita nga dili kini tinuod nga pakigdait?

Dili gayod! Niining sitemaha sa mga butang, mahitabo ang mga trahedya. Ang mga tawo mamatay gumikan sa mga bomba o mga granada. Ang uban mangamatay gumikan sa sakit o sa mga aksidente. Daghan ang mamatay gumikan sa katigulangon. Kadtong nagpahimulos sa pakigdait sa Diyos dili kay dili maapil sa maong mga hitabo, apan ang posibilidad sa maong mga hitabo wala magbiya kanila nga walay paglaom.

Si Jesus misaad sa iyang higala nga si Marta: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi.” (Juan 11:25) Ang pamilyang Djorem nagtuo niini, maingon man ang tanang Saksi ni Jehova. Ug ang pamilyang Djorem nagtuo nga kon sila mamatay, sila pagabanhawon ngadto sa usa ka yuta nga mahimo unyang tinuod nga malinawong dapit. Si Jehova nga Diyos ‘magapahid sa matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.’​—Pinadayag 21:4.

Una pa siya mamatay, gisultian ni Jesus ang iyang mga sumusunod: “Ako nagahatag kaninyo sa akong kalinaw. . . . Ayaw tugoti nga ang inyong mga kasingkasing masamok.” (Juan 14:27) Kami nanagmaya uban sa pamilyang Djorem kinsa may ingong pakigdait ug seguradong makapahimulos niana sa bug-os sa pagkabanhaw. Kami nalipay alang niadtong tanang nagasimba kang Jehova, ang Diyos sa pakigdait. Ang maong mga tawo adunay pakigdait sa hunahuna. Ilang mapahimuslan ang pakigdait uban sa Diyos. Ilang giugmad ang pakigdait sa uban. Ug sila may pagsalig sa usa ka malinawong umaabot. Oo, ilang nakaplagan ang pakigdait, bisan tuod sila nagkinabuhi sa usa ka kalibotan nga magubot. Sa pagkatinuod, ang tanan nga mosimba sa Diyos uban sa espiritu ug kamatuoran makapahimulos sa pakigdait. Hinaot nga ikaw usab makakaplag sa maong pakigdait.

[Footnote]

[Hulagway sa panid 7]

Ilang nakaplagan ang pakigdait bisan nagkinabuhi diha sa magubot nga kalibotan