Malipayon Diha sa Walay-Kalipay nga Kalibotan
“SA LABING daotan nga kahimtang niini, kini mao ang siglo ni Satanas,” nagsugod ang usa ka editoryal sa The New York Times sa Enero 26, 1995. “Wala pa gayod sukad nga ang mga tawo nagpakitag dako kaayong hilig, ug gana, sa pagpamatay ug milyonmilyon pang mga tawo tungod sa rasa, relihiyon o klase.”
Ang ika-50ng anibersaryo sa kagawasan sa inosenteng mga biktima nga nabilanggo sa mga kampo sa kamatayon sa Nazi nakapukaw sa mga editoryal sama sa nahisgotan na. Ugaling, ang samang matang sa linuog nga pagpamatay nagakahitabo gihapon diha sa mga bahin sa Aprika ug Silangang Uropa.
Ang organisadong mga pagpamatay, pagpuo sa netibo, pagpinatyanay sa tribo—bisag unsa pay pagtawag niini—mosangpot ug dakong kasub-anan. Apan, sa tunga niini nga kapintasan adunay nagalanog nga mga tingog sa kalipay. Pananglitan, atong tan-awon ang Alemanya sa katuigang 1930.
Sa Abril 1935, gidid-an ni Hitler ug sa iyang partidong Nazi ang mga Saksi ni Jehova sa tanang trabaho sa gobyerno. Ang mga Saksi usab giaresto, gibilanggo, ug gipadala ngadto sa mga kampo konsentrasyon tungod sa paghupot nila sa Kristohanong neyutralidad. (Juan 17:16) Sa hinapos sa Agosto 1936, gipangdakop ang daghang mga Saksi ni Jehova. Libolibo kanila ang gipadala sa mga kampo konsentrasyon, diin ang kadaghanan kanila nagpabilin hangtod sa 1945 kon sila mabuhi. Nan, unsay reaksiyon sa mga Saksi sa linuog nga pagtratar nga gipahamtang kanila diha sa mga kampo? Bisan pag katingad-an, nagpabilin silang malipayon bisan pa sa ilang walay-kalipay nga mga palibot.
“Usa ka Bato Diha sa Lapok”
Giinterbiyu sa Britanikong historyador nga si Christine King ang usa ka babayeng Katoliko kinsa diha sa mga kampo. “Siya migamit ug mga pulong nga dili gayod nako makalimtan,” matod ni Dr. King. “Detalyado kaayo niyang giasoy ang bahin sa kalisang sa kinabuhi, ang mangilngig nga mga kahimtang nga iyang gikinabuhian. Ug siya miingon nga siya nahibalo sa mga Saksi, ug kadtong maong mga Saksi maoy usa ka bato diha sa lapok. Sama silag malig-ong lugar nianang tanan nga kalapokan. Miingon siya nga sila lamang ang mga tawong dili manuhi iniglabay sa mga guwardiya. Sila lamang ang mga tawo nga wala magsagubang niining tanan pinaagi sa kayugot kondili pinaagi sa gugma ug paglaom ug sa pagbati nga may usa ka katuyoan.”
Unsay nagpahimo sa mga Saksi ni Jehova nga ‘mga bato diha sa lapok’? Ang dili-matarog nga pagtuo kang Jehova nga Diyos ug sa iyang Anak, si Jesu-Kristo. Busa, napakyas ang mga paningkamot ni Hitler sa pagdaot sa ilang Kristohanong gugma ug kalipay.
Pamati samtang isugilon sa duha ka nakalabang-buhi sa kampo ang lima ka dekadang miagi human nga malamposon nilang nalabang kining pagsulay sa pagtuo. Matod sa usa: “Ako nalipay gayod sa pagkasayod nga ako nakabaton ug talagsaong pribilehiyo sa pagpamatuod sa akong gugma ug pagkamapasalamaton kang Jehova ubos sa labing mabangis nga mga sirkumstansiya. Walay nagpugos kanako sa pagbuhat niini! Sa kasukwahi, ang mga tawong misulay sa pagpugos kanamo mao ang among mga kaaway nga misulay pinaagi sa mga paghulga aron sugton namo si Hitler labaw kay sa Diyos—apan wala molampos! Dili lamang malipayon ako karon apan, tungod sa usa ka maayong tanlag, ako malipayon bisan niadtong nabilanggo pa.”—Maria Hombach, 94 anyos.
Ang laing Saksi nag-ingon: “Ginapalandong ko ug balik nga mapasalamaton ug malipayon ang akong mga adlaw sa pagkabilanggo. Ang katuigang nagugol ubos ni Hitler diha sa mga bilanggoan ug mga kampo konsentrasyon maoy malisod ug puno sa mga pagsulay. Apan dili ko buot nga malibre niini, kay nagtudlo kini kanako sa pagsalig kang Jehova sa bug-os.”—Johannes Neubacher, 91 anyos.
“Pagsalig kang Jehova sa bug-os”—mao kanay sekreto sa kalipay nga naagian sa mga Saksi ni Jehova. Busa, sila malipayon, bisan pag sila gilibotan sa walay-kalipay nga kalibotan. Ang ilang kalipay nakita diha sa “Malipayong mga Magdadayeg” Distritong mga Kombensiyon sa mga bulang dili pa dugay. Atong sublion makadiyut kining malipayong mga panagtigom.
[Hulagway sa panid 4]
Si Maria Hombach