Mga Magmamantala sa Gingharian Nagtaho

Kanhing mga Magkaaway Nahiusang Nag-alagad Kang Jehova

“ANG unang higayon nga nakadungog ako bahin sa mga Saksi ni Jehova maoy samtang nag-alagad ako ingong armadong guwardiya sa Bosnia,” misaysay si Branko.a

Si Branko nagguwardiya sa ospital diin ang mga samdan ginatambalan. Usa sa mga doktor nagtuon sa Bibliya uban sa mga Saksi, ug panahon sa relyebo sa gabii, daghan siyag gisaysay kang Branko bahin sa iyang nakat-onan sa Bibliya.

Ang nadungog ni Branko niadtong gabhiona nakatandog pag-ayo kaniya nga dihadiha iyang gisurender ang iyang mga armas. Nakigkita siya sa mga Saksi, nga buot masayod ug dugang pa. Pila ka panahon sa ulahi, human mobalhin sa laing Uropanhong nasod, nangita si Branko ug Kingdom Hall ug mitambong sa usa ka tigom sa Yugoslavianhong kongregasyon sa mga Saksi ni Jehova. Didto nahimamat ni Branko si Slobodan.

Si Slobodan taga-Bosnia usab ug nag-alagad ingong boluntaryo sa samang gubat sama kang Branko​—apan sa kaatbang nga kampo. Si Slobodan nakig-away dapig sa mga Serb batok sa mga Croat. Pagkita sa duruha, si Slobodan bawtismado nang Saksi ni Jehova. Mitanyag siya nga magtuon sa Bibliya uban kang Branko, ang iyang kanhing kaaway. Samtang nagpadayon ang pagtuon, si Branko nakakat-on ug dugang pa bahin kang Jehova, ug ang iyang gugma alang sa Diyos mitubo. Kini nagtukmod kang Branko sa pagpahinungod sa iyang kinabuhi ngadto sa Maglalalang. Niadtong Oktubre 1993 iyang gisimbolohan ang iyang pahinungod pinaagi sa pagpabawtismo sa tubig.

Sa unsang paagi si Slobodan nahimong usa sa mga Saksi ni Jehova? Mibiya siya sa natad panggubatan sa Bosnia nga sayosayo pa. Nabasa niya ang pipila ka publikasyon sa mga Saksi, apan sa pagduaw lamang sa duha ka Saksi sa iyang balay sa sayong bahin sa 1992 nga ang iyang interes sa Pulong sa Diyos mitubo. Kinsay nagduaw kang Slobodan, nga nagtanyag nga magtuon sa Bibliya uban kaniya? Si Mujo, nga taga-Bosnia usab apan gimatuto ingong usa ka Muslim. Samtang nagpadayon ang pagtuon sa Bibliya, si Mujo ug Slobodan, nga kanhing magkaaway, naggugol ug pila ka panahon matag adlaw nga magkauban aron sa pagpalig-on sa pagtuo sa usag usa.

Ang gubat sa kanhing Yugoslavia nagkalas sa kinabuhi sa ginatos ka libong tawo. Apan si Branko, Slobodan, ug Mujo karon nag-alagad ingong bug-os-panahong mga magwawali sa maayong balita sa samang kongregasyon sa mga Saksi ni Jehova. Ilang nabuntog ang etniko ug rasanhong pag-awayay, ug karon naningkamot sa pagpakigdait samtang nagpasakop sa Maglalalang, si Jehova.

Apan unsay nagpahinabo sa maong mga kausaban? Mao ang ilang gugma kang Jehova, ilang pagtahod sa Bibliya, ug ilang kamadasigon sa pagpadapat sa mga kamatuoran sa Bibliya diha sa ilang mga kinabuhi. Sumala sa giingon sa Balaang Kasulatan, “ang pulong sa Diyos buhi ug gamhanang nagalihok . . . ug arang makaila sa mga hunahuna ug mga tuyo sa kasingkasing.”​—Hebreohanon 4:12.

[Footnote]