Pagretiro—Usa ba ka Bukas nga Pultahan Alang sa Teokratikanhong Kalihokan?
PAGRETIRO—alang sa daghan kini maoy kataposan sa hataas nga yugto sa tensiyon ug kalagot. Human magapos sa mabudlay ug puliki nga rutina, daghan ang nagpaabot sa pagretiro ingong higayon sa mga tuig sa kaharuhay ug personal nga kagawasan. Apan, sagad usab, kana nga pultahan motultol sa kalaay ug kaluya. Ang lulinghayaw ug mga pasatiempo dili gayod makahatag ug pagbati nga may bili sa kaugalingon kay sa ikahatag sa trabaho.
Alang sa mga Saksi ni Jehova, ang pagretiro makabukas ug “dakong pultahan nga motultol sa kalihokan.” (1 Corinto 16:9) Bisag ang pagkatigulang may iyang mga problema ug mga limitasyon, ang ubang mga tigulang nakakaplag nga pinaagi sa tabang ni Jehova sila makapauswag sa ilang pag-alagad kaniya. Tagda ang mga kasinatian sa pipila ka tigulang nga mga Kristohanon sa Netherlands. Sa 1995 nga tuig sa pag-alagad, 269 sa kapin sa 1,223 ka payunir (bug-os panahong mga magmamantala sa Gingharian) maoy 50 anyos o kapin pa. Niini, 81 ang 65 anyos ang edad o labaw pa.
Ang uban nakapayunir lamang pinaagi sa pagpadayon sa puliki nga paso sa pagkinabuhi nga natukod nila samtang sila nagtrabaho pa. (Itandi ang Filipos 3:16.) Usa ka retiradong Kristohanon nga ginganlag Karel nahinumdom: “Sa nagtrabaho pa ako sa akong sekular nga trabaho, sagad magsugod ako sa pagtrabaho sa mga alas 7:30 s.b. Sa nagdawat na ako sa akong pensiyon, mihukom ako sa pagpadayon sa mao gihapong rutina. Sugdan nako ang adlaw pinaagi sa pag-apod-apod ug magasin sa pagsangyaw sa dalan atubangan sa estasyon sa tren kada alas siyete sa buntag.”
Ang maayong pagplano hinungdanon usab aron molampos. (Proverbio 21:5) Pananglitan, ang uban nakatigom ug igoigong pondo sa pagsuportar sa ilang kaugalingon diha sa ilang ministeryo. Ang uban mihukom nga menosan ang personal nga mga gastos ug magbatog dili bug-os panahong trabaho. Palandonga si Theodore ug si Ann. Nagsugod sila sa kinabuhing minyo ingong mga payunir hangtod nga ang mga obligasyon sa pamilya nagpahunong kanila sa pagpayunir. Apan ang ilang espiritu sa pagpayunir nagpabiling buhi! Samtang nagdako ang ilang mga anak nga babaye, sila kanunayng gidasig sa pagpayunir. Labawng hinungdanon, si Theodore ug Ann nagpakitag maayong panig-ingnan, nga subsob nga nag-alagad ingong mga oksilyare payunir. Samtang nagkaedaran ang mga batang babaye, gimenosan ni Theodore ug Ann ang ilang sekular nga trabaho aron may dugang panahon sa pag-alagad sa kanataran.
Human misulod ang ilang mga anak nga babaye sa bug-os panahong ministeryo ug mibiya sa balay, si Ann nagsugod sa pagpayunir. Usa ka adlaw gidasig niya si Theodore sa paghunong sa trabaho. “Kitang duha makapayunir,” siya misugyot. Gipahibalo ni Theodore ang iyang amo sa iyang mga hunahuna. Sa iyang kakurat ang iyang amo mitanyag sa pagtabang pinaagi sa paghatag kaniya ug dili bug-os panahong trabaho, nga nag-ingon: “Seguro buot nimong magtrabaho nga bug-os panahon sa imong amo sa itaas [sa langit].” Si Theodore ug Ann karon malipayong nagkauban sa pagpayunir.
Ang uban nagsugod ug payunir sa pagsanong sa mga kahimtang nga nahitabo sa ilang mga kinabuhi. Ang masakit nga kamatayon sa ilang anak nga babaye ug apo nga babaye nakapalandong pag-ayo sa usa ka edarang magtiayon sa paagi sa paggamit nila sa ilang nahibiling katuigan. (Ecclesiastes 7:2) Imbes nga nagpalumos sa kasubo, misulod sila sa bug-os-panahong pag-alagad, nga ilang gikalipayan karon sulod na sa kapin ug walo ka tuig!
Sa pagkatinuod, nagkinahanglag tinuod nga determinasyon ang pagpabilin diha sa bug-os panahong ministeryo. Pananglitan, si Ernst ug iyang asawa, si Riek, nagsugod sa pagpayunir samtang mibiya na sa balay ang ilang mga anak. Wala magdugay human niadto ang kanhing kauban sa negosyo nagtanyag kang Ernst ug dakog-kita nga trabaho. Si Ernst mitubag: “Kami may labing maayong amo sukad, ug dili kami gusto nga mohunong sa pag-alagad kaniya!” Tungod kay si Ernst ug iyang asawa nagpabiling “empliyado” ni Jehova, ang ubang mga pribilehiyo sa pag-alagad nabuksan alang kanila. Sila nag-alagad sa sirkitong buluhaton kapin na sa 20 ka tuig ug nagpadayon ingong mga payunir hangtod niining adlawa. Nagbasol ba sila sa ilang nagasakripisyo-sa-kaugalingong dalan? Pipila ka tuig nga miagi ang magtiayon misulat: “Kon kabubut-on ni Jehova, sa tulo ka bulan nagpaabot kami sa pagsaulog sa among ika-50 ka tuig sa kaminyoon, nga sagad gitawag ug bulawanong anibersaryo. Apan uban sa bug-os nga pagtuo among ikasulti nga ang among tinuod nga bulawanong katuigan nagsugod sa dihang misulod kami sa pagpayunir.”
Daghan ang nakakaplag nga ang pultahan nga motultol sa nagdugang nga kalihokan motultol usab sa nagdugang nga kalipay! Usa ka brader nga misugod sa pagpayunir duha ka semana human makaabot sa edad nga 65 nag-ingon: “Ikasulti ko gayod nga wala ko masinati ang yugto sa akong kinabuhi nga tugob kaayo sa mga panalangin sama sa milabayng napulo ka tuig sa pagpayunir.” Usa ka magtiayon nga nagpayunir sa kapin na sa pito ka tuig nag-ingon: “Unsa pa bay laing buhaton sa usa ka magtiayon nga sama kanamog edad ug mga sirkumstansiya? Sagad namong makita ang sama kanamog kahimtang diha sa teritoryo—komportable nga nagpuyo lang sa balay, nagkatambok, nagkatigulang, ug nagkaluya. Ang pag-alagad nagpahimsog kanamo sa mental ug sa pisikal. Kami kanunay nga magkauban. Kami nagkinataw-anay ug nagakalipay sa kinabuhi.”
Siyempre, dili tanang tigulang ang may mga sirkumstansiya nga motugot kanila sa pagpayunir. Kini nga mga Kristohanon makasalig nga si Jehova nagpabili sa bisan unsay mahimo nila sa iyang pag-alagad. (Itandi ang Marcos 12:41-44.) Pananglitan, usa ka baldadong igsoong babaye nagsaka sa balay nga amomahan. Bisan pa, ang pultahan sa kalihokan bukas gihapon alang kaniya! Usa ka doktor nangutana kaniya kon sa unsang paagi gigamit niya ang dakong bahin sa iyang panahon. Siya miasoy: “Gisultihan ko siya nga ako wala kaayoy daghang panahon. Wala niya hisabti kini. Ako siyang gisultihan nga tungod kini kay ang akong mga adlaw puno sa makapatagbaw nga mga kalihokan. Wala ako mingawa, apan ginapangita ko ang uban nga gimingaw ug sultihan sila kon unsay gitagana sa Diyos alang sa katawhan.” Iyang gisuma ang mga butang pinaagi sa pag-ingon: “Gikan sa usa nga halos 80 anyos na, ang usa dili makadahom ug dako. Iampo ako aron maagak ko pa ang daghan ngadto kang Jehova.”
Ikaw ba anaa na sa retiradong edad? Ang pultahan sa kaharuhay tingalig makaiikag kaayo, apan kini dili mao ang pultahan alang sa espirituwal nga panalangin. Hatagig mainampoon nga pagpamalandong ang imong mga sirkumstansiya. Lagmit mahimo ka nga makasulod sa pultahan nga motultol sa mas dakong kalihokan sa pag-alagad kang Jehova.
[Hulagway sa panid 25]
Ang pagretiro motultol sa nagdugang nga kalihokan diha sa ministeryo