Pagkaretirado—Usa ka Pultahan Ngadto sa Dugang nga Kalihokan?
1 Daghang kugihan nga mga tawo ang nangandoy sa panahon sa dihang ang pagkaretirado magpagawas kanila gikan sa kabudlay ug mga kapit-os sa sekular nga trabaho. Apan, subsob kaayo nga tungod sa pagkaretirado motungha ang pagbati sa kawalay-kaikag, kapuol, ug ahat nga pagkatigulang. Tungod sa kakulang sa mapuslanong kalihokan, ang hunahuna mahimong malinga sa pagkabalaka sa kaugalingon. Ang usa ka mantalaan sa Brazil nagtaho nga ang retiradong publiko nga mga empleyado nagreklamo bahin sa mga problema gikan sa ‘kawalay-katagbawan, pagkasapoton, kawalay-kasegurohan, ug kawalay-katuyoan ngadto sa depresyon ug ang pagbati nga ang ilang kalibotan walay katuyoan.’
2 Sa kasukwahi, daghang Kristohanon ang naghunahuna niining bahina sa ilang kinabuhi ingong pultahan ngadto sa dugang espirituwal nga kalihokan. Usa ka igsoong lalaki nga nagsugod sa pagpayunir duha ka semana human makaabot sa edad nga 65 nag-ingon: “Wala ko gayod masinati ang yugto sa akong kinabuhi nga tugob kaayo sa mga panalangin sama sa milabayng napulo ka tuig sa pagpayunir.” Usa ka magtiayon misulat: “Ang among tinuod nga bulawanong katuigan nagsugod sa dihang misugod kami sa pagpayunir.” Oo, alang sa daghan, ang pagkaretirado nagtanyag ug bulawanong kahigayonan sa pagpalapad sa ilang ministeryo ug sa pag-ani ug dagayang mga panalangin gikan kang Jehova.
3 Magmapuliki ug Magmabungahon: Daghang retirado na karon ang nagpuyo nga walay mga butang nga makaamot sa kahamugaway nga komon karong adlawa ug nakakat-on sa pagtrabahog maayo sukad sa pagkabata. Bisan tuod wala na kanila ang kusog sa pagkabatan-on, sila maoy mabungahon gihapon kaayong mga mamumuo. Sa usa ka teritoryo sa sangang buhatan, 22 porsiyento sa mga payunir—mga 20,000 ka igsoong lalaki ug babaye—ang labing menos 60 anyos ang edad. Kining maong mga edaran nakahimog dakong amot sa buluhatong pagsangyaw. Ang ilang eksperyensiya ug diyosnong mga hiyas makapauswag sa mga kongregasyon diin sila nag-alagad.—Sant. 3:17, 18.
4 Ang pagkapuliki diha sa Kristohanong ministeryo makaamot sa mas maayong panglawas ug sa maarang-arang nga kalidad sa kinabuhi. Usa ka 84-anyos nga igsoong babaye kinsa nagsugod sa pagpayunir sa dihang miretiro na siya miingon: “Ang pagbaton ug daghang pagtuon sa Bibliya uban sa interesadong mga tawo nakatabang kanako nga magpabiling aktibo sa hunahuna. Ako walay kotse, busa kanunay kong maglakaw. Kana nakatabang kanako nga magpabiling himsog.” Usa ka magtiayong tigulang nga payunir nag-ingon: “Ang pag-alagad nagpahimsog kanamo sa mental ug sa pisikal. Kami kanunay nga magkauban. Kami nagkinataw-anay ug nagakalipay sa kinabuhi.”
5 Pag-alagad Diin May Panginahanglan: Ang pipila ka retiradong mga Kristohanon nga maarang-arang ug pinansiyal nga mga kahimtang mibalhin aron sa pag-alagad diin mas dako ang panginahanglan sa mga magwawali sa Gingharian. Ang uban nagpalapad sa ilang ministeryo pinaagi sa pag-alagad diha sa usa ka langyaw-ug-pinulongan nga natad. Sama kang apostol Pablo, kining maong masiboton nga mga magmamantala “[naghimo] . . . sa tanang butang tungod sa maayong balita, aron [sila] mahimong mag-aambit niini sa uban.”—1 Cor. 9:23.
6 Usa ka magtiayon ang misugod sa pagpayunir human sa pagmatuto sa ilang duha ka anak nga lalaki. Human sa ubay-ubayng katuigan sa pagpayunir, gisulayan nila ang pagkat-on sa pinulongang Ininsek. Karon nga nagpangedaron na silag mga 70 anyos, di pa dugay sila nalipay sa pagkakita sa Insek nga grupo nga ilang gipakig-ubanan nga nahimong kongregasyon. Dako gayong panalangin ang mga magtiayon nga sama niini!
7 Walay Pagkaretirado Gikan sa Ministeryo: Samtang kadaghanan sa mga tawo sa ngadtongadto moretiro gikan sa ilang sekular nga mga trabaho, walay pagkaretirado alang sa tanang Kristohanon gikan sa pag-alagad sa Diyos. Ang tanan kinahanglang magpadayong matinumanon “hangtod sa kataposan.” (Mat. 24:13, 14) Siyempre, tungod kay nagkatigulang, ang uban dili na makahimo sa pagbuhat ug dako sama sa ilang nahimo kaniadto diha sa pag-alagad kang Jehova. Apan pagkamakapadasig ang pagkakita kanila nga nagbuhat sa ilang maarangan sa kinasingkasing nga paagi! Ang Pulong sa Diyos nagpasalig kanila nga si Jehova dili malimot sa ilang buhat ug gugma nga ilang gipakita alang sa iyang ngalan.—Luc. 21:1-4; Heb. 6:10.
8 Kon ikaw anaa na sa pangedaron nga hapit nang moretiro, nganong dili tagdon sa mainampoong paagi kon unsaon nimo paggamit sa bug-os ang imong nagakausab nga mga kahimtang? Uban sa tabang sa Diyos, imong makaplagan nga ang pagkaretirado magbukas kanimo ug usa ka pultahan ngadto sa dugang nga kalihokan nga magdalag kadayeganan kang Jehova ug daghang panalangin.—Sal. 148:12, 13.