Mga Magmamantala sa Gingharian Nagtaho
Tabang Alang sa “Gipang-uhaw” nga mga Tawo sa Rusya
“MALIPAYON kadtong gipanggutom ug gipang-uhaw sa pagkamatarong, sanglit pagabusgon sila,” matod ni Jesus. (Mateo 5:6) Ang mosunod nga mga kasinatian nag-ilustrar kon sa unsang paagi ang mga Saksi ni Jehova nagatabang sa pagtagbaw sa espirituwal nga kauhaw sa daghan didto sa Rusya, diin ang relihiyosong kagawasan napugngan sulod sa kapig 70 ka tuig.
▪ Usa ka babaye nga ginganlag Valentina may ugdang nga mga pangutana bahin sa Bibliya nga wala matubag sa daghang tuig. Pananglitan, siya nahibulong: ‘Kang kinsa nag-ampo si Jesus?’ Siya nangatarongan nga si Jesus miampo gayod sa usa nga mas taas kay kaniya ug nahibulong bahin sa ngalan nianang Usa.
Siya miduaw sa Rusyanhong Ortodoksong Iglesya. Apan, sa maong relihiyon wala siya makakaplag ug mga tubag sa iyang mga pangutana. Kay wala matagbaw, siya miadto sa usa ka simbahan sa Protestante apan sa makausa pa wala makakaplag ug tin-awng mga tubag. Kay wala masayod kon asa moadto, si Valentina misugod sa pagbasa sa Bibliya, nga misulay sa pagpangita sa mga tubag sa iyang kaugalingon—nga walay mga resulta. Miampo siya alang sa tabang.
Pipila ka panahon sa ulahi ang mga Saksi ni Jehova mituktok sa iyang pultahan. Gipakitaan niya sila gikan sa Bibliya nga ang ngalan sa Diyos mao si Jehova. Sa kataposan, siya nakahibalo kon kinsay giampoan ni Jesus! Misugod siya sa pagtuon sa Bibliya nga regular uban sa mga Saksi. Subsob siyang magpulaw sa pagbasa sa literatura nga gipatik sa Watch Tower Society ug pagpangita sa mga teksto sa Bibliya. Sa wala madugay si Valentina mihinapos nga siya nakakaplag sa kamatuoran. Sulod sa tulo ka bulan siya misugod sa pagpakig-ambit sa buluhatong pagsangyaw, ug duha ka bulan sa ulahi human niana, siya nabawtismohan. Ang iyang mainampoong pagpangita sa kamatuoran gigantihan.
▪ Usa ka Saksi mibiyahe sakay sa bus aron mosangyaw sa usa ka hilit nga dapit. Panahon sa biyahe nakigsulti siya sa usa ka batan-ong babaye mahitungod sa mga saad sa Bibliya, apan ang batan-ong babaye dili interesado. Duha ka bulan sa ulahi ang Saksi mibiyahe pag-usab ngadto sa samang dapit aron mopahayag ug pakigpulong publiko. Human sa pakigpulong iyang giduol ang usa ka bisita ug gipangutana siya: “May nakigsulti na ba kanimo mahitungod sa maayong balita gikan sa Bibliya?” Ang tawo mitubag, “Oo, ikaw naghimo niana.” Ang Saksi nagtuo nga siya nagkomedya. Apan ang batan-ong lalaki misaysay nga duha ka bulan una niana siya nakadungog sa kabildohay tali sa Saksi ug sa batan-ong babaye, panahon sa pagbiyahe sa bus. “Buot kong masayod ug dugang pa, apan nanaog ka sa bus, ug akong gihunahuna nga dili na gayod nako makita pag-usab ang mga Saksi ni Jehova. Unya sa akong trabahoan nahimamat nako ang usa ka tawo nga nagtuon sa Bibliya uban sa mga Saksi. Ug busa ania ako!”
Ang tawo ug ang iyang asawa misugod sa pagtuon sa Bibliya. Human sa mubo kaayong panahon, nasabtan niya nga ang iyang trabaho kasumpaki sa mga prinsipyo sa Bibliya. Kay buot maghupot ug maayong tanlag atubangan sa Diyos, iyang giilisan ang iyang trabaho. Karon siya nakigsulti sa uban mahitungod sa Gingharian sa Diyos sa tanang higayon. Ang iyang asawa nagauswag usab sa iyang pagtuon sa Bibliya.
Ang mga Saksi ni Jehova sa dakong teritoryo sa Rusya nalipay nga nakig-ambit sa pag-ingon ngadto sa tanang sinserong katawhan: “‘Umari ka!’ Ug si bisan kinsa nga giuhaw paaria; ang si bisan kinsa nga buot pakuhaa sa tubig sa kinabuhi nga libre.”—Pinadayag 22:17.