Nganong Kitang Tanan Angayng Magdayeg sa Diyos?

ALELUYA! Kining pulonga ilado kaayo sa kadaghanang tigsimba sa Kakristiyanohan. Ang pipila kanila kusog nga magsinggit niini sa ilang mga serbisyo sa ma-Dominggo. Apan, pilay nahibalo kon unsa gayoy kahulogan nianang pulonga? Sa pagkatinuod, kini maoy Hebreohanon alang sa “Dayega si Ja!” Kini maoy mangayaon, malanog nga pagdayeg sa Maglalalang, kansang ngalan maoy Jehova.a

Ang pulong “Hallelujah” o Aleluya kanunayng makita sa Bibliya. Ngano? Tungod kay adunay daghan kaayong katarongan sa pagdayeg sa Diyos. Si Ja (Jehova) mao ang Maglalalang ug Tigsustento sa labihan ka dakong uniberso. (Salmo 147:​4, 5; 148:​3-6) Siya ang nagmugna sa mga kahikayan sa ekolohiya nga nagpaposible sa kinabuhi sa yuta. (Salmo 147:​8, 9; 148:​7-10) Ug siya sa linain nagmaikagon sa katawhan. Kon buhaton nato ang iyang kabubut-on, siya magapanalangin ug magasuportar kanato niining kinabuhia ug maghatag kanato sa tinong paglaom sa labi pang maayong kinabuhi sa umaabot. (Salmo 148:​11-14) Si Ja (Jehova) mao ang nagdasig sa mga pulong: “Ang mga matarong mismo magapanunod sa yuta, ug sila magapuyo niini sa walay kataposan.”​—Salmo 37:29.

Busa, ang awhag gitumong sa tanan: “Aleluya!” “Dayega ninyo si Ja!” (Salmo 104:​35; potnot) Ikasubo, hinunoa, dili tanan gustong mosanong. Karong adlawa, ang katawhan nag-antos. Daghan ang gigutom, masakiton, o gidaogdaog. Daghan ang nag-antos ug dakong kasub-anan tungod sa pag-abusar sa mga droga o sa alkoholikong ilimnon o sa mga sangpotanan sa ilang imoralidad o pagrebelde. Aduna bay katarongan nganong sila angayng magdayeg sa Diyos?

‘Si Jehova Lamang ang Nakahatag Kanakog Paglaom’

Oo, aduna. Gidapit ni Jehova ang tanan nga walay nahigawas sa pag-ila kaniya, pagkat-on sa pagbuhat sa iyang kabubut-on, ug pagtagamtam sa mga panalangin nga tungod niana ang mga tawo gustong magdayeg kaniya. Ug daghan ang misanong. Pananglitan, anaa si Adriana sa Guatemala. Sa dihang siyete anyos si Adriana, ang iyang inahan namatay. Wala madugay human niadto gibiyaan siya sa iyang amahan. Sa dihang siya diyes anyos na, siya misugod pagpanarbaho alang sa pangabuhi. Sanglit giingnan siya sa iyang inahan nga alagaron ang Diyos ug ang simbahan, si Adriana nakig-uban sa lainlaing Katolikong mga grupo, apan sa panahong siya 12 anyos na, siya nahigawad ug miduyog sa usa ka hanib sa kalye. Misugod siya pagpanigarilyo, paggamit ug mga droga, ug pagpangawat. Nganong ang usa ka dalagitang sama kaniya gustong modayeg sa Diyos?

Ang igsoong babaye ni Adriana misugod pagtuon sa Bibliya uban sa mga Saksi ni Jehova, apan gikataw-an siya ni Adriana. Unya ang ilang iyaan namatay. Panahon sa paglubong sa iyang iyaan, si Adriana gihasol sa makapatugawng mga pangutana. Hain mopaingon ang iyang iyaan? Tua ba siya sa langit? Miadto ba siya sa kalayong impiyerno? Makalilibog kaayo kadto, ug si Adriana miadto sa kapilya sa sementeryo aron moampo alang sa tabang, nga gigamit ang ngalan sa Diyos nga Jehova, sumala sa gitudlo kaniya sa iyang igsoong babaye.

Sa wala madugay nagtuon siya sa Bibliya uban sa mga Saksi ni Jehova ug nagtambong sa ilang Kristohanong mga tigom. Kadto naghatag kaniyag bug-os nga bag-ong panglantaw sa kinabuhi, ug sa maisogon mihunong siya sa pagpakig-uban sa mga hanib sa kalye. Si Adriana, nga niadtong tungora mga 25 anyos na, nag-ingon: “Ang gugma lamang alang kang Jehova ang nagpabulag nako sa maong daotan kaayong pagkinabuhi. Si Jehova lamang ang nakahatag kanako sa paglaom sa kinabuhing walay kataposan tungod sa iyang dakong kaluoy.” Si Adriana, bisan pa sa lisod niyang sinugdanan sa kinabuhi, may labing maayong mga katarongan sa pagdayeg sa Diyos.

Ang labi pang di-masaarong kahimtang gitaho gikan sa Ukraine. Usa ka lalaki naglingkod sulod sa prisohan nga nagpaabot nga patyon. Naluoy ba siya sa iyang kaugalingon? Nasubo sa hilabihan? Wala, sa kaatbang. Kay nakontak di pa dugay sa mga Saksi ni Jehova ug nakabaton ug diyutayng kahibalo bahin kang Jehova, iyang gihangyo sila nga kontakon ang iyang inahan. Niadtong tungora siya nagsulat kanila tungod kay iyang nabatian nga ilang gituman ang iyang hangyo. Matod niya: “Salamat sa pagduaw sa akong inahan. Kadto ang labing makapalipayng balita nga akong nadawat sa miaging tuig.”

Sa paghisgot bahin sa iyang kaugalingon ug sa mga kauban sa atob nga iyang gisangyawan, siya misulat: “Karon kami may pagtuo na sa Diyos ug naningkamot nga magkinabuhi sumala sa among pagtuo.” Iyang gitapos ang iyang sulat: “Salamat sa pagtabang kanamo sa pagkat-on kon unsay gugma ug pagbaton ug pagtuo. Kon ako magpabiling buhi, motabang usab ako ninyo. Salamat sa Diyos nga kamo anaa ug nagtabang kamo sa uban sa paghigugma sa Diyos ug pagtuo kaniya.” Kining tawhana nag-apelar sa iyang silot nga kamatayon. Apan kon kaha siya patyon o siya mogugol ug daghang tuig sa prisohan, tin-awng siya adunay katarongan sa pagdayeg sa Diyos.

‘Bisan Pag Ako Buta, Ako Makakita’

Tagda, karon, ang usa ka abtikon nga dalagita nga kalit nawad-an sa iyang panan-aw. Kini ang nahitabo kang Gloria, kinsa nagpuyo sa Argentina. Si Gloria kalit nga nabuta sa dihang siya 19 anyos, ug wala na gayod siya makakita pag-usab. Sa edad nga 29 siya nakig-ipon-ipon sa usa ka lalaki ug sa wala madugay namabdos. Sa maong panahon iyang gibati nga ang iyang kinabuhi may bili. Apan sa dihang namatay ang iyang anak, siya nagsugod sa pagsukna ug mga pangutana. Siya nahibulong, ‘Nganong kini nagakahitabo man kanako? Unsa bay akong nahimo? Tinuod bang nagalungtad ang Diyos?’

Niadtong tungora, duha ka Saksi ni Jehova ang mianha sa iyang pultahan. Gisugdan niya ang pagtuon sa Bibliya ug nasayran ang saad niini nga sa bag-ong kalibotan, ang buta makakita na pag-usab. (Isaias 35:5) Pagkakahibulongang palaaboton alang kang Gloria! Nalipay kaayo siya, ilabina sa dihang ang iyang bana misugot nga ipalegal nila ang ilang kaminyoon. Dayon ang iyang bana naaksidente ug nainutil, nga anaa na lang sa silyang may ligid. Karong adlawa kining maong buta nga babaye kinahanglang maghago aron may pangabuhi. Gawas pa, siya ang nagbuhat sa tanang buluhaton sa balay, ingon man nag-atiman sa iyang bana. Bisan pa niana ginadayeg ni Gloria si Jehova! Uban sa tabang sa iyang Kristohanong mga igsoong lalaki ug babaye, siya nagtuon sa Braille nga Bibliya, ug nadasig siya pag-ayo sa Kristohanong mga tigom diha sa Kingdom Hall. Matod niya: “Lisod nga ipatin-aw, apan bisan pag ako buta, kini samag ako makakita.”

Usahay ang mga tawo pagalutoson sa dihang sila magdayeg sa Diyos. Usa ka babaye sa Croatia nalipay sa dihang siya nakakat-on bahin sa Diyos, apan supak ang iyang bana sa iyang bag-ong-kaplag nga pagtuo ug nagsalikway kaniya, nga nagdala sa ilang usa-ka-tuig ang edad nga batang babaye. Kay walay mapuy-an, nga gibiyaan sa bana ug pamilya, nga walay balay, trabaho, o bisan iyang anak, siya sa sinugdan nahugno. Apan ang iyang gugma alang sa Diyos nagpalig-on kaniya, bisan pag siya may limitado lang nga pagkontak sa iyang anak babaye hangtod nga ang bata midako. Kining bayhana nakakaplag sa “mutya nga dakog bili” ug dili niya buot buhian kini. (Mateo 13:​45, 46) Giunsa niya pagpadayon paghupot ang iyang kangaya latas sa maong lisod nga kapanahonan? Matod niya: “Ang kangaya maoy usa ka bunga sa espiritu sa Diyos. Kini maugmad nga bulag sa gawasnong mga kahimtang, sama ra nga ang mga tanom makatubo diha sa greenhouse bisan kon unsa pay panahon sa gawas.”

Sa Pinlandia, ang sayis-anyos nga si Markus narekonosir nga may sakit sa unod sa kusog nga dili na maayo pa. Sa wala madugay siya diha na lang sa silyang may ligid. Pila ka tuig sa ulahi, gidala siya sa iyang inahan ngadto sa usa ka Pentekostal nga gibaniog nga makaayo ug mga masakiton. Apan walay milagrosong pagkaayo. Busa si Markus nawad-ag interes sa Diyos ug nagpadayon sa pagtuon sa siyensiya ug ubang sekular nga mga natad. Unya mga lima ka tuig kanhi, usa ka babayeng anaa lang sa silyang may ligid nga inubanan sa usa ka batan-ong lalaki nakaadto sa balay nga gipuy-an ni Markus. Sila mga Saksi ni Jehova. Si Markus sa maong panahon maoy ateyista, apan dili siya tutol sa paghisgot sa relihiyon ug gipadayon sila.

Sa ulahi, usa ka magtiayon ang miduaw kaniya, ug nasugdan ang pagtuon sa Bibliya. Sa ngadtongadto, ang gahom sa kamatuoran sa Bibliya nag-usob sa panglantaw ni Markus sa mga butang, ug naamgohan niya nga bisan pa sa iyang pagkainutil, siya may mga katarongan gayod sa pagdayeg sa Diyos. Siya miingon: “Malipayon kaayo ako tungod kay nakaplagan nako ang kamatuoran ug ang organisasyon nga gigamit ni Jehova. Ang akong kinabuhi karon adunay direksiyon ug kahulogan. Ang laing karnerong nawala nakaplagan ug dili na gustong mobiya sa panon ni Jehova!”​—Itandi ang Mateo 10:6.

‘Ipadayeg si Ja’ sa Tanan

Kini pipila lamang sa di-maihap nga mga kasinatian nga ikaasoy sa pagpakita nga ang mga tawo karong adlawa, bisan pag unsay ilang mga kahimtang, mahimong adunay katarongan sa pagdayeg sa Diyos. Gipatin-aw kini ni apostol Pablo niining paagiha: “Ang diyosnong pagkamahinalaron mapuslanon sa tanang butang, kay nagahupot kini ug saad sa kinabuhi karon ug nianang sa umaabot.” (1 Timoteo 4:8) Kon buhaton nato ang kabubut-on sa Diyos, iyang tumanon ang “saad sa kinabuhi karon.” Hinuon, niining sistemaha sa mga butang dili niya himoon ang kabos nga dato o ang masakiton nga himsog. Apan ihatag niya ang iyang espiritu ngadto niadtong nag-alagad kaniya aron sila makakaplag ug kalipay ug katagbawan bisan unsa man ang ilang gawasnong kahimtang. Oo, bisan “sa kinabuhi karon,” ang masakiton, ang dinaogdaog, ug ang kabos mahimong adunay katarongan sa pagdayeg sa Diyos.

Apan komosta man ang kinabuhi “nianang sa umaabot”? Aw, ang paghunahuna mismo niini angay nga magpadayeg kanato sa Diyos uban ang kinalabwang kasibot! Malipay kita sa paghunahuna sa panahon sa dihang ang kakabos dili na hisayran; sa dihang “walay molupyo ang moingon: ‘Ako masakiton’”; ug sa dihang si Jehova nga Diyos ‘magapahid sa matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang mitaliwan na.’ (Isaias 33:​24; Pinadayag 21:​3, 4; Salmo 72:​16) Unsay imong pag-isip niining mga saara gikan sa Diyos?

Usa ka batan-ong lalaki sa El Salvador midawat ug usa ka tract sa Bibliya nga nagpatin-aw sa pipila niining mga butanga. Siya miingon ngadto sa Saksi nga mihatag niini kaniya, “Misis, ang gisulti niini nga tract maayo kaayo nga kini dili matuman.” Daghan ang mosanong sa maong paagi. Bisan pa niana, kini mao ang mga saad sa Usa nga maoy naglalang sa uniberso, kinsa maoy nagpalihok sa kinaiyanhong mga siklo sa atong yuta, ug nagtabang bisan sa kabos ug sa masakiton sa pagkaplag ug kalipay. Makatuo kita sa iyang giingon. Ang gihisgotan-sa-itaas nga batan-ong lalaki nagtuon sa Bibliya uban sa mga Saksi ni Jehova ug nakadiskobre nga matuod kini. Kon wala pa nimo himoa kini, gidasig ka namo sa pagbuhat niana. Unya, hinaot nga ikaw atua didto sa dihang kining sistema sa mga butang karon miagi na, ug ang tanang linalang moduyog sa pagsinggit: “Aleluya!” “Dayega ninyo si Ja!”​—Salmo 112:​1; 135:1.

[Footnote]

[Hulagway sa panid 5]

Hinaot nga ikaw atua didto sa dihang ang tanang linalang moduyog sa pagsinggit: “Aleluya!”