Dihang Gusto Na Nimong Mamatay

“Magbalikbalik ni nga pagbati,” miangkon si Adriana nga taga-Brazil. “Maong nakahunahuna ko nga mas maayo pang taposon ang akong kinabuhi.”

MIBATI ka na ba sukad nga gusto na nimong mamatay? Lagmit nakasabot ka sa gibati ni Adriana. Siya nag-antos sa grabeng kabalaka ug kasubo ug mibati nga wala na siyay paglaom. Si Adriana nadayagnos nga may clinical depression.

Ang Hapon nga si Kaoru, nga nag-atiman sa iyang masakiton ug tigulang nang ginikanan, miingon: “Niadtong panahona, napresyur kaayo ko sa akong trabaho. Anam-anam nga nawala ang akong gana sa pagkaon ug dili na ko makatulog ug tarong. Nakahunahuna ko nga mas maayo pang mamatay.”

Ang Nigerian nga si Ojebode miingon, “Pirme kong masulub-on ug maghilak, maong nangita kog paagi sa pagtapos sa akong kinabuhi.” Maayo na lang kay wala maghikog si Ojebode, Kaoru, ug Adriana. Pero kada tuig, gatosan ka libo ang maghikog.

KON ASA MAKAKITAG TABANG

Sagad mga lalaki ang maghikog, ug daghan kanila maulaw mangayog tabang. Si Jesus miingon nga ang mga masakiton nagkinahanglag doktor. (Lucas 5:31) Busa kon naghunahuna ka sa pagtapos sa imong kinabuhi, ayawg kaulaw sa pagpangayog tabang. Daghang na-depress ang natabangan dihang mikonsulta silag doktor. Si Ojebode, Kaoru, ug Adriana nakadawat ug medikal nga tabang maong nakasagubang sila sa ilang depresyon.

Aron matambalan ang depresyon, ang mga doktor moresetag tambal o mosugyot ug talk therapy. Gikinahanglan sab sa mga na-depress ang pagsabot, suporta, pailob, ug pag-atiman sa ilang pamilya ug mga higala. Ang pinakamaayong persona nga mahimo nimong suod nga higala mao si Jehova nga Diyos, kay siya nagtaganag epektibong tabang pinaagi sa iyang Pulong, ang Bibliya.

NAA BAY PERMANENTENG SOLUSYON?

Kadtong nag-antos sa depresyon sagad nagkinahanglag medikal nga tabang sa taas nga panahon ug angayng mag-usab sa ilang paagi sa pagkinabuhi aron masagubang ang depresyon. Pero kon nag-antos ka sa depresyon, makalaom ka ug malipayong kaugmaon, sama ni Ojebode. Siya miingon: “Eksayted na ko nga matuman ang tagna sa Isaias 33:24, dihang wala nay moingon nga ‘Masakiton ko.’” Aron mahupayan ka sama ni Ojebode, salig sa saad sa Diyos sa usa ka “bag-ong yuta” diin wala nay “kasakit” pa. (Pinadayag 21:1, 4) Apil niana nga saad ang pagwala sa tanang mental ug emosyonal nga kasakit. Ang imong depresyon mawala na hangtod sa hangtod. Ang imong sakit nga mga pagbati dili na nimo mahinumdoman, “ug dili na kini motungha sa [imong] kasingkasing.”—Isaias 65:17.

Teksto sa Bibliya nga Makatabang

Ang Diyos nakasabot sa imong gibati.

“Ako, si Jehova nga imong Diyos, nagahawid sa imong tuong kamot, . . . [ug] nag-ingon kanimo, ‘Ayawg kahadlok. Ako motabang kanimo.’”—Isaias 41:13.

Si Jehova mas nakasabot sa atong gibati kay ni bisan kinsa, ug gusto niyang tabangan ta.

Palandonga ang Pulong sa Diyos.

“[Si Elias] mihangyo nga mamatay na unta. Siya miingon: ‘ . . . Kuhaa na karon, Oh Jehova, ang akong kinabuhi.’”—1 Hari 19:4.

“Nakatabang nako ang pagpamalandong sa Bibliya,” miingon si Ojebode. “Nakita nako nga gibati pod diay ni propetang Elias ang akong gibati.”

Pagkat-on sa mga ehemplo sa Bibliya.

“Nangamuyo ko [Jesus] sa Diyos nga unta ang imong [Pedro] pagtuo dili moangka.”—Lucas 22:32.

Human ilimod ni apostol Pedro si Jesus sa tulo ka higayon, siya mihilak pag-ayo tungod sa grabeng kaguol. Si Kaoru miingon: “Akong nakita sa kasinatian ni Pedro nga naay pagtagad si Jehova ug si Jesus sa pagbati ni Pedro. Nakadasig ni nako.”

Ang imong sakit nga mga pagbati dili na nimo mahinumdoman, “ug dili na kini motungha sa [imong] kasingkasing.”—Isaias 65:17