Mga Magmamantala sa Gingharian Nagtaho
Pagbuntog sa mga Hagit sa “Yuta sa Wala-Damhang mga Butang”
SI APOSTOL Pablo nangutana sa unang-siglong mga Kristohanon sa Corinto: “Kon ang trompeta nagapatingog ug dili-pihong tawag, kinsa may mangandam alang sa gubat? Sa samang paagi usab, gawas kon kamo pinaagi sa dila magbungat ug pamulong nga daling masabtan, unsaon man pagkahibalo kon unsay ginapamulong?”—1 Corinto 14:8, 9.
Sa Papua New Guinea, nga usahay gitawag ug Yuta sa Wala-Damhang mga Butang, ang mga Saksi ni Jehova nakaengkuwentrog makapaluyang mga kakulian sa pagpalanog sa tin-awng mensahe sa Bibliya. Sila nagsangyaw ngadto sa katawhan nga nagsultig kapin sa 700 ka lainlaing pinulongan ug nga dunay nagkadaiya kaayong mga kostumbre. Ang mga Saksi nakigbisog usab sa bukirong yuta, kakulang sa mga dalan, ug nag-uswag nga krimen. Gawas niini nga mga kalisdanan, anaa ang pagsupak gikan sa pipila ka relihiyosong mga grupo ug, usahay, gikan pa sa mga opisyales sa eskuylahan.
Walay sapayan, ang maayong espirituwal nga instruksiyon ug ang nagkadakong librarya sa mga tabang sa pagtuon sa Bibliya diha sa lokal nga mga pinulongan ang nagsangkap sa mga Saksi aron ipasabot ang maayong balita ingong pihong tawag sa trompeta. Subsob nga positibo ang pagsanong, sama sa gipakita sa mosunod nga taho:
• Sa pagsugod sa usa ka bag-ong tuig sa pag-eskuyla, usa ka magtutudlo ang buot masayod kon nganong ang mga anak sa mga Saksi ni Jehova dili mosaludar sa bandera o moawit sa nasodnong awit. Iyang gipunting ang iyang pangutana ngadto kang Maiola, usa ka 13-anyos nga estudyante nga bawtismadong Saksi. Si Maiola mihatag ug klaro, pinasukad-sa-Bibliya nga pagpatin-aw. Ang magtutudlo midawat sa iyang pangatarongan tungod kay gikan kini sa Bibliya. Ang iyang pagpatin-aw gipaambit usab sa uban nga mga opisyales sa eskuylahan.
Sa ulahi, sa dihang ang mga estudyante gipahimog mugbong mga sinulat, si Maiola mipili sa ulohan nga Trinidad. Ang iyang mubong sinulat nakadawat sa kinatas-ang marka sa klase, ug ang magtutudlo nangutana kaniya kon diin niya nakaplagan ang impormasyon. Iyang gipakita kaniya ang librong Ikaw Mabuhing Walay Kataposan sa Paraiso sa Yuta sa Ingles nga pinulongan. Ang magtutudlo mipresentar sa libro ngadto sa tibuok klase, ug daghan ang buot nga makabaton ug kaugalingong kopya. Pagkasunod adlaw, si Maiola nakapahiluna ug 14 ka libro ug 7 ka magasin sa iyang mga eskolmet, ug tulo kanila ang iyang nasugdan ug mga pagtuon sa Bibliya. Ang tumong ni Maiola mao ang pagkahimong tibuok-panahong ministro.
• Ang usa ka nahilaing grupo sa mga Saksi ni Jehova sa usa ka balangay sa baybayon duol sa Port Moresby nag-atubang ug pagsupak sukad niadtong sayong bahin sa katuigang 1970. Apan, niining bag-o pa, sila nakadawat ug tabang gikan sa wala-damhang tinubdan. Ang obispo sa United Church didto, nga usa ka lumad sa Papua New Guinea nga naedukar sa laing nasod, midapit ug mga pangutana gikan sa mga mamiminaw sa simbahan usa ka adlaw. Nangutana ang usa ka lalaki: “Dunay duha ka relihiyon sa among balangay—ang United Church ug ang mga Saksi ni Jehova. Unsay among buhaton kon duawon kami sa mga Saksi?” Human sa dugay nga paghunong, ang obispo mitubag: “Abi ninyo, wala gayod ko masayod kon unsay isulti kaninyo. Niining bag-o pa, duha ka batan-ong Saksi ang miduaw kanako. Duna silay gipangutana kanako, ug bisan sa tanang pagbansay nga akong nabatonan sa unibersidad, wala ako mahibalo sa tubag. Apan sayon ra kaayo nilang gitubag kini gikan sa Bibliya. Busa dili ko kamo sultihan kon unsay buhaton—kamo ray mag-igo. Dili kamo kinahanglang maminaw kon dili ninyo gusto, apan ayaw mog pagpamintas kanila.”
Usa ka nagapanawng hawas sa Watch Tower Society nga miduaw sa ulahi niining grupo sa mga Saksi mitaho: “Halos tanan sa balangay ang naminaw sa mga Saksi sa dihang sila misangyaw. Ang uban midapit pa gani kanila nga modayon sa ilang mga puy-anan. Usa na kini karon ka paraiso sa pagsangyaw.”