Nganong Nagahimo Sila Niana?

MATAG tuig ang mga Saksi ni Jehova sa tibuok kalibotan magtigom nga linibo panahon sa mga kombensiyon. Didto, sila magpahimulos sa panag-ubanay ug mamati ug ekselenteng programa sa instruksiyon sa Bibliya. Ang pipila mihimog dakong mga paningkamot aron sa pagtambong niining mga kombensiyona. Pananglitan, sa miaging tuig sa Malawi usa ka magtiayon nga nagpanuigon ug mga 65, duyog sa ilang anak nga lalaki ug sa iyang asawa ug bata, mibiyahe ug 80 kilometros pinaagig bisikleta aron pagtambong sa usa ka kombensiyon. Migikan sila sa ilang balangay sa alas sayis sa buntag ug miabot sa kombensiyonan 15 ka oras sa ulahi.

Sa Mozambique, usa ka grupo ang mibiyahe ug tulo ka adlaw pinaagig bisikleta aron makaadto sa usa ka kombensiyon. Usa ka gabii, samtang nagkampo sila sa gawas, nakadungog silag mga leyon nga nagangulob sa duol. Bisan tuod galabay silag sugnod sa direksiyon sa mga hayop, ang mga leyon nagpabilin sa palibot hangtod pagbanagbanag. Ang laing Saksi nga mibiyahe ngadto sa samang kombensiyon nakahibalag ug leyon diha sa dalan. Mitindog siya sa hilom nga wala molihok hangtod nakalakaw ang leyon. Didto sa kombensiyon kining maong mga Saksi malipayong nag-asoy kon sa unsang paagi sila “gipahigawas gikan sa baba sa leyon.”​—2 Timoteo 4:17.

Daghang Saksi ni Jehova ang mihimog dakong mga paningkamot sa pagtambong sa mga kombensiyon o bisan sa senemanang mga tigom alang sa pagsimba. Ngano? Ang mosunod nga mga artikulo motabang kanimo sa pagsabot kon nganong ang panagkatigom hinungdanon kaayo.