Barog nga Bug-os ug May Hugot nga Pagtuo

Mga Kombensiyon—Malipayong mga Pamatuod sa Atong Panag-igsoonay

ANG singkuwenta-anyos nga si Joseph F. Rutherford, nga nagluya human sa halos usa ka tuig nga dili-makataronganong pagkabilanggo, malipayong nag-alagad ingong usa ka bellboy. Madasigon siyang nagbitbit sa mga maleta ug nagtabang sa kaubang mga Kristohanon nga makapahiluna sa ilang mga lawak sa hotel. Duha sa iyang kanhing kaubang mga binilanggo—kaubang mga Estudyante sa Bibliya—nanghatag ug mga asaynment sa lawak ngadto sa usa ka dakong panon nga naghulat ug mga kasak-an. Puliki gihapon sila hangtod gayod sa lapas na sa tungang gabii. Ang makatakod nga espiritu sa kahinam midangat kanilang tanan. Unsa ang okasyon?

Ang tuig maoy 1919, ug ang mga Estudyante sa Bibliya (nga nailhan karon ingong mga Saksi ni Jehova) nagpahiuli pa gikan sa usa ka yugto sa mapintas nga paglutos. Aron mapalig-on ang ilang panag-igsoonay, nagpahigayon sila ug kombensiyon sa Cedar Point, Ohio, T.B.A., gikan sa Septiyembre 1 hangtod sa 8, 1919. Sa kataposang adlaw sa kombensiyon, usa ka malipayon kaayong panon sa 7,000 ang naminaw pag-ayo samtang gidasig ni Brader Rutherford ang matag usa sa mga kombensiyonista niining mga pulonga: “Kamo maoy embahador sa Hari sa mga hari ug Ginoo sa mga ginoo, nga nagapahibalo sa mga tawo . . . sa mahimayaong gingharian sa atong Ginoo.”

Taliwala sa katawhan ni Jehova, ang mga kombensiyon nagsugod panahon pa sa karaang Israel. (Exodo 23:14-17; Lucas 2:41-43) Ang maong mga panagkatigom maoy malipayong mga okasyon, nga nagtabang sa tanang nanambong sa pagsentro sa ilang mga hunahuna diha sa Pulong sa Diyos. Sa susama, ang mga kombensiyon sa mga Saksi ni Jehova sa modernong mga panahon nasentro sa espirituwal nga intereses. Alang sa sinserong mga tigpaniid ang maong malipayong mga panagkatigom nagahatag ug dili-ikalimod nga ebidensiya nga ang mga Saksi nahiusa tungod sa lig-ong mga bugkos sa Kristohanong panag-igsoonay.

Mga Paningkamot sa Pagtambong

Ang modernong-adlaw nga mga Kristohanon nakaamgo nga ang ilang mga kombensiyon maoy mga panahon sa espirituwal nga pagpalagsik ug paghatag ug instruksiyon maylabot sa Pulong sa Diyos. Ilang giisip kining dagkong mga tigom ingong usa ka hinungdanong paagi sa pagtabang kanila nga “makabarog nga bug-os ug may hugot nga pagtuo sa bug-os nga kabubut-on sa Diyos.” (Colosas 4:12) Busa, ang mga Saksi bug-os-kasingkasing nga nagpaluyo niini nga mga panagkatigom, nga naningkamot pag-ayo sa pagtambong niana.

Alang sa uban, ang ila mismong pagtambong sa maong mga kombensiyon nagkinahanglag pagpasundayag ug pagtuo ug pagbuntog sa samag-bukid nga mga babag. Pananglitan, tagda ang tigulang nga Saksi sa Austria. Bisan pag adunay diabetes ug nagkinahanglag mga ineksiyon sa insulin kada adlaw, giseguro niya nga matambongan niya ang tanang adlaw sa usa ka distritong kombensiyon sa iyang nasod. Sa India, usa ka dakong pamilya sa mga Saksi nga nag-ilaid sa tumang kakabos nalisdan pag-ayo sa pagtambong sa kombensiyon. Usa ka membro sa pamilya ang mitaganag tabang. “Kay dili buot nga masayloan ang okasyon,” siya miingon, “akong gibaligya ang akong bulawang mga ariyos aron gastohon sa pagbiyahe. Takos kadto sa sakripisyo, tungod kay ang panag-ubanay ug mga eksperyensiya nagpalig-on sa among pagtuo.”

Sa Papua New Guinea, usa ka grupo sa dili bawtismado, interesado nga mga tawo determinadong motambong sa usa ka distritong kombensiyon sa kaulohan. Giduol nila ang usa ka lalaki sa ilang baryo nga adunay pasaheroang sakyanan ug gipangutana kon pilay ipabayad niya sa paghatod kanila ngadto sa kombensiyon. Sanglit ang kantidad nga iyang gisukot dili nila maarangan, mihimo silag kahikayan sa pagtrabaho diha sa balay sa lalaki, nga mag-ayo sa iyang kosina. Busa nakatambong sila sa distritong kombensiyon ug nakabenepisyo gumikan sa pagtambong sa enterong programa.

Ang gilay-on dili kay dili-mabuntog nga suliran alang sa mga Saksi ni Jehova nga determinadong motambong sa mga kombensiyon. Sa 1978, aron makatambong sa kombensiyon sa Lille, Pransiya, usa ka batan-ong delegado nga taga-Polandia mibiyaheg 1,200 kilometros pinaagig bisikleta sulod sa unom ka adlaw. Sa ting-init sa 1997, duha ka Saksi nga taga-Mongolia mipanaw ug 1,200 kilometros aron makatambong sa usa ka Kristohanong panagkatigom sa Irkutsk, Rusya.

Tinuod nga Panag-igsoonay Nagalihok

Ang panaghiusa ug panag-igsoonay nga gipasundayag sa mga Saksi diha sa ilang mga kombensiyon maoy dayag kaayo alang sa dili-mapihigong mga tigpaniid. Daghan ang nakadayeg nga walay pagpihig taliwala sa mga kombensiyonista ug nga ang tim-os nga kainit naglungtad bisan taliwala niadtong nagkita sa una pa lamang nga higayon.

Panahon sa dili pa dugayng internasyonal nga kombensiyon sa Australia, usa ka giya sa tour nga mikuyog sa nagaduaw nga mga delegado sa kombensiyon sulod sa usa ka semana buot nga mouban kanila sa mas taastaas nga panahon aron makapahimulos sa ilang panag-ubanay. Kay nakadayeg sa ilang gugma ug panaghiusa, dili siya makatuo nga sila magkasinabot pag-ayo, sanglit kadaghanan kanila maoy mga estranghero. Sa dihang miabot na ang panahon nga mobiya na siya, iyang gitawag sila. Nagtawag kanila nga “mga brader ug mga sister,” misugod siya sa pagpasalamat kanila apan dili siya makatapos pagsulti, kay siya natuk-an tungod sa kakusganon sa iyang gibati ug mihilak.

Sa 1997, ang Sri Lanka nagpahigayon sa unang tulo-ka-pinulongang kombensiyon niini diha sa usa ka dakong estadyum. Ang tibuok programa gipresentar nga dungan sa Iningles, Sinhalese, ug Tamil. Sa kalibotan diin nagakagrabe ang panagbangi sa mga minoriya, ang maong panagkatigom sa tulo ka pinulongan nga mga grupo namatikdan gayod. Usa ka polis nangutana sa usa ka igsoong lalaki: “Kinsay nagdumala niini nga kombensiyon—ang mga Sinhalese, ang mga Tamil, o ang mga Ingles?” “Walay grupo nga nagdumala sa kombensiyon,” mitubag ang igsoon. “Kaming tanan duyog nga nagabuhat niini.” Ang polis dili makatuo. Sa dihang ang tulo ka pinulongan nga mga grupo miduyog sa paniklop nga pag-ampo ug ang hiniusang “Amen” milanog sa tibuok estadyum, ang mga kombensiyonista dungang namalakpak. Nanglugmaw ang mga luha sa nanambong. Oo, sa pagkatinuod ang mga kombensiyon maoy malipayong mga pamatuod sa atong panag-igsoonay.—Salmo 133:1.a

[Footnote]