Ang mga Iglesya Miangkon sa Sala

“Gihusay sa Papa ang Iglesya.” “Inkwisisyon ug Batok-Hudiyo​—Ang Iglesya Nangandam sa Iyang Mea Culpa.”a “Mea Culpa Alang sa Holocaust.” “Mga Metodista Nangayog Pasaylo sa mga Indian sa Halayong Kasadpan.”

NAKABASA ka na ba ug mga ulohan nga sama niini? Mopatim-aw nga nagkasubsob, ang mga iglesya miangkon sa sayop ug nangayog pasaylo sa ilang nahimo sa daghang kasiglohang nangagi. Kanunayng gihisgotan sa palaumagian sa balita ang bag-ong mga mea culpa o pag-admitir sa papa sa sala.

Sa Dihang ang Papa Nangayog Pasaylo

Tali sa 1980 ug 1996, si Juan Paulo II ‘midawat sa makasaysayanhong mga sala sa Iglesya o nangayog pasaylo’ labing menos 94 ka higayon, nag-ingon ang komentarista sa Batikano nga si Luigi Accattoli diha sa iyang librong Quando il papa chiede perdono (Sa Dihang ang Papa Nangayog Pasaylo). Sumala kang Accattoli, “diha sa Iglesya Katolika, ang papa lamang ang may katungod sa pag-admitir sa sala nga nahimo.” Ug kini iyang nahimo, nga nagpasabot sa labing kontrobersiyal nga mga panid sa kasaysayang Katoliko​—ang mga Krusada, mga gubat, pagsuportar sa diktatoryal nga mga pagmando, panagbahinbahin sa mga iglesya, batok-Hudiyo, ang mga Inkwisisyon, ang Mafia, ug rasismo. Diha sa usa ka memorandum nga gipadala niadtong 1994 ngadto sa mga kardinal (nga giisip sa pipila nga mao ang labing hinungdanong dokumento sa opisina sa papa), si Juan Paulo II nagsugyot ug “pangatibuk-an ug milenyal nga pagkumpisal sa mga sala.”

Daghang obispo misunod sa panig-ingnan sa papa. Niadtong Disyembre 1994 ang Italyanong mantalaang Il Giornale nagtaho: “Daghang obispong Amerikano nagpakita sa telebisyon ug sa dayag nangayog pasaylo.” Alang sa unsa? Sa pagpakamenos sa problema sa mga pari nga nagaabuso ug mga bata, sa kadaot sa daghang batang mga biktima. Niadtong Enero 1995 ang mantalaang La Repubblica nagtaho bahin sa “usa ka buhat nga wala pa mahitabo sukad sa kasaysayan sa presenteng-adlawng Katolisismo”​—ang suliran sa pagpakahilom ni Papa Pio XII labot sa Holocaust gihisgotan. Niadtong Enero 1995 ang mao gihapong mantalaan nagtaho nga ang kaobispohang Aleman nangayog pasaylo sa “daghang kasal-anan” sa mga Romano Katoliko kinsa misuportar sa mga krimen sa mga Nazi. Nagkalainlaing Protestanteng mga iglesya usab nagpailalom mismo sa pagsaway-sa-kaugalingon.

Ngano?

Ang Bibliya nagdasig kanato sa pagpangayog pasaylo kon kita makasala, ug daghan ang modayeg sa mga iglesya kon sila magpailalom mismo sa pagsaway-sa-kaugalingon. (Santiago 5:16) Apan nganong gihimo kini sa mga iglesya? Sa unsang paagi kini makaapektar sa atong paglantaw kanila?

[Footnote]