Kon Nganong ang Uban Nagbag-o sa Ilang Relihiyon

Alang sa daghan, ang relihiyon maoy identipikasyon lamang. Kini magpakita kon asa panagsa moadto ang tawo sa Dominggo, kon asa siya magminyo, ug kon asa siya ilubong. Apan kini dili magpakita kon unsa siyang matanga sa tawo o kon unsay iyang nahibaloan o gituohan. Pananglitan, usa ka surbi nagpakita nga 50 porsiyento sa nag-angkong mga Kristohanon wala mahibalo kon kinsay mihatag sa Wali sa Bukid. Aw, bisan gani ang iladong pangulong lider sa India nga si Mohandas Gandhi, nga usa ka Hindu, nahibalo niana!

KATINGALAHAN bang magpalayo ang mga tawo sa relihiyon sanglit daghan kanila kulag kahibalo mahitungod sa ilang pagtuo? Dili, dili kini katingalahan. Apan, kini usab kalikayan. Kadtong midawat sa tabang sa pagtuon sa Bibliya sagad matingala sa pagkahibalo kon unsa ka dako sa kaayohang nahatag niini kanila. Ang Bibliya mismo nag-ingon: “Ako, si Jehova, ako ang imong Diyos, ang Usa nga nagatudlo kanimo aron makabaton ka ug kaayohan, ang Usa nga nagpalakaw kanimo sa dalan nga angay nimong pagalaktan.”​—Isaias 48:17.

Unsay angay himoon niadtong adunay wala-matagbawng espirituwal nga kagutom? Sila dili angay mohunong sa pag-alagad sa Diyos! Hinunoa, sila angay modangop sa Bibliya ug mosusi kon unsay gitanyag sa Diyos nga ilang mabatonan.

Mga Tubag sa Malisod nga mga Pangutana

Sa edad nga siyete anyos, si Bernd nagtan-aw sa iyang inahan nga namatay.a Sa tibuok niyang katuigan sa pagkabata, siya nahibulong, ‘Hain ang akong inahan? Nganong magdako pa ako nga wala siya?’ Sa tin-edyer pa, si Bernd maoy usa ka aktibong membro sa simbahan. Nabalaka sa pag-antos sa katawhan, siya nangandoy nga mahimong trabahante nga nagatabang sa langyawng nasod. Sa gihapon, siya gitugaw sa mga pangutana nga bahin niini ang iyang simbahan walay makatagbawng mga tubag.

Dayon nakigsulti si Bernd sa usa ka kauban sa tunghaan nga usa sa mga Saksi ni Jehova. Gipakita niining batan-ona kang Bernd gikan sa Bibliya nga ang iyang inahan walay kahibalo, nga natulog diha sa kamatayon. Nakakat-on si Bernd ug daghang bersikulo sa Bibliya nga nagpatin-aw niini, sama sa Ecclesiastes 9:​5: “Mahitungod sa mga patay, sila walay kahibalo sa bisan unsa.” Busa si Bernd walay katarongan nga mabalaka kon ang iyang inahan ba nag-antos sa usa ka matang sa purgatoryo​—o mas grabe pa. Bisan pag ang doktrina sa pagkadili-mamatay sa kalag gitudlo sa kadaghanang relihiyon, nakita ni Bernd diha sa Bibliya nga ang tawhanong kalag maoy usa lamang ka tawo. Inigkamatay sa tawo, ang kalag mamatay. “Ang kalag nga makasala​—kini mismo mamatay.”​—Ezequiel 18:4.

Si Bernd nakakat-on usab sa kahibulongang palaaboton sa mga patay. Nabasa niya sa iyang kaugalingon diha sa basahon sa Bibliya sa Buhat: “Aduna unyay pagkabanhaw sa mga matarong ug sa mga dili-matarong.” (Buhat 24:15) Pagkadako sa iyang kalipay sa pagkahibalo nga kini nga pagkabanhaw mahitabo dinhi sa yuta, nga ipasig-uli sa Diyos ngadto sa usa ka paraiso!​—Salmo 37:​29; Pinadayag 21:​3, 4.

Wala magdugay ang espirituwal nga mga panginahanglan ni Bernd natagbaw pinaagi sa tinuod nga kahibalo sa Bibliya. Si Bernd wala motalikod sa relihiyon. Hinunoa, iyang gibiyaan ang simbahan nga dili makatagbaw sa iyang kagutom ug midawat ug usa ka matang sa pagsimba nga lig-ong gipasukad sa Bibliya. Siya miingon: “Kana maoy sa miaging 14 ka tuig na, ug wala gayod ako magbasol sa maong lakang. Karon ako nahibalo nga ang Maglalalang dili mao ang nagpahinabo sa pag-antos. Si Satanas mao ang diyos niini nga sistema, ug siya ang mabasol sa mga kahimtang nga naglibot kanato. Apan ang Diyos sa dili madugay magtul-id sa tanang kadaot nga nahimo sa kalibotan ni Satanas. Ang akong inahan usab mobalik diha sa pagkabanhaw. Pagkasadya unya niana!”

Lain pay ato, nakab-ot ni Bernd ang iyang tinguha nga magtrabaho sa gawas sa nasod sa pagtabang sa uban. Siya nagtrabaho sa usa ka langyawng nasod sa pagtabang sa uban nga makakat-on bahin sa Gingharian sa Diyos, ang tinuod nga solusyon sa ilang kaguol. Sama kang Bernd, minilyon ang nakakat-on nga sa dili madugay taposon sa Diyos ang tawhanong pag-antos. Sila nalipay sa pagkakaplag nga adunay usa ka relihiyon nga makatagbaw sa ilang espirituwal nga mga panginahanglan.​—Mateo 5:3.

Unsa ang Katuyoan sa Kinabuhi?

Samtang ang Kasadpang kalibotan dugang ug dugang nahimong kalibotanon, daghan ang nangutana, ‘Unsay katuyoan sa kinabuhi?’ Ang tubag makita diha sa Bibliya, ingon sa nadiskobrehan ni Michael. Sa tungatunga sa tuig 1970, si Michael nagtinguha sa pag-anib sa usa ka teroristang grupo. Usa lamang ang iyang tumong sa kinabuhi​—ang paggukod sa mga tawo nga iyang gilantaw nga maoy responsable sa mga inhustisya sa kapitalistang sistema. “Dili gayod ako mobiya sa balay nga walay akong pusil,” siya miingon. “Nagplano ako sa pagpatay ug daghang pangunang mga politiko ug mga kapitalista kon mahimo. Ihalad ko unta ang akong kinabuhi alang sa kawsa.”

Hinimba si Michael, apan walay usa sa iyang simbahan ang makapatin-aw sa tinuod nga katuyoan sa kinabuhi. Busa sa dihang ang mga Saksi ni Jehova miduaw sa iyang balay ug nagpakita kaniya sa mga tubag sa Bibliya sa iyang mga pangutana, namati pag-ayo si Michael. Siya misugod sa pagtambong sa mga tigom sa pagsimba diha sa lokal nga Kingdom Hall sa mga Saksi ni Jehova.

Ang mga higala ni Michael mausisaon kaayo bahin sa iyang bag-ong napalgang kaikag sa Bibliya. “Uban sa miting karong Dominggo,” giawhag sila ni Michael. “Pabilin makadiyot. Kon dili kamo makaangay sa inyong madungog, nan pauli.” Tinuod man, human sa 45-minutos nga binase-sa-Bibliya nga pakigpulong, ang kadaghanan sa iyang mga higala nanggawas sa tigomanan. Apan usa​—si Susan​—nagpabilin. Kining batan-ong babaye naikag sa iyang nadunggan. Si Michael ug Susan sa ulahi nagpakasal ug gibawtismohan ingong mga Saksi ni Jehova. “Karon ako nahibalo kon nganong ania kita dinhi sa kalibotan,” miingon si Michael. “Kita gilalang ni Jehova. Ang atong tinuod nga katuyoan sa kinabuhi mao ang pagkahibalo kaniya ug ang pagtuman sa iyang kabubut-on. Kana ang makahatag ug tinuod nga katagbawan!”

Minilyon ang adunay pagtuo nga sama kang Michael. Tim-os nilang gipatalinghogan ang mga pulong sa Bibliya: “Ang kataposan sa butang, ang tanang butang nga nadungog na, mao: Kahadloki ang matuod nga Diyos ug bantayi ang iyang mga sugo. Kay kini mao ang tibuok nga katungdanan sa tawo.”​—Ecclesiastes 12:13.

Pagsagubang sa mga Problema sa Kinabuhi

Kitang tanan nakasinati sa katumanan sa tagna nga makita sa 2 Timoteo 3:​1: “Sa kataposang mga adlaw moabot ang makuyaw nga mga panahong lisod sagubangon.” Walay usa ang makaikyas sa mga problema niining “makuyaw nga mga panahon.” Apan ang Bibliya nagtabang kanato sa pagsagubang niini.

Tagda si Steven ug Olive, usa ka magtiayon. Sa nagsugod sila sa pagtuon sa Bibliya uban sa mga Saksi ni Jehova, sila, sama sa daghan pang uban, adunay mga problema sa kaminyoon. “Kami anam-anam nga nagkalayo,” miingon si Steven. “Lahi kami ug mga tumong ug mga intereses.” Unsay nakatabang kanila sa pag-ipon ug puyo? “Gipakitaan kami sa mga Saksi ni Jehova kon unsaon namo pagpadapat sa mga prinsipyo sa Bibliya diha sa among mga kinabuhi,” nagpadayon si Steven. “Sa unang higayon, kami nakakat-on kon unsay kahulogan sa pagkahimong dili-hakog ug matinagdanon. Ang pagpadapat sa mga prinsipyo sa Bibliya nagpahiusa kanamong duha. Karon gitagamtam namo ang usa ka malipayon, malig-ong kaminyoon.”

Usa ka Suod nga Relasyon Uban sa Diyos

Sumala sa usa ka dili pa dugayng surbi nga gihimo sa Gallup, 96 porsiyento sa mga Amerikano nagtuo ug Diyos, ug kadaghanan kanila nag-ampo kaniya. Apan, usa ka lahi nga surbi nagpakita nga ang tumatambong sa simbahan ug sinagoga karon mao ang kinaubsan sa tunga sa siglo. Duolan sa 58 porsiyento sa mga Amerikano nag-ingon nga sila mosimba kas-a sa usa ka bulan o menos pa. Matin-aw, ang relihiyon wala magpasuod kanila sa Diyos. Ug kining problemaha dili iya sa Tinipong Bansa lamang.

Si Linda nagdako sa Bavaria. Usa siya ka aktibong Katoliko ug nag-ampo kanunay. Sa samang higayon, siya nahadlok sa umaabot. Wala gayod siyay alamag bahin sa katuyoan sa Diyos alang sa tawo. Sa 14 anyos pa lamang siya, nakahibalag si Linda ug mga Saksi ni Jehova, ug siya nagtaho: “Makaiikag ang ilang gisulti, busa gidawat nako ang duha ka tabang sa pagtuon sa Bibliya ug gibasa dayon kini.” Sa milabay ang duha ka tuig, si Linda nagsugod sa pagtuon sa Bibliya uban sa mga Saksi ni Jehova. “Ang tanan nga akong nakat-onan bahin sa Diyos gikan sa Bibliya makataronganong pamation,” matod pa niya. Miluwat si Linda sa iyang simbahan ug gibawtismohan ingong Saksi ni Jehova sa edad 18.

Unsay nagpalihok kang Linda sa pagbag-o sa iyang relihiyon? Siya mipatin-aw: “Ang akong relihiyon nagtabang kanako sa pagkakita nga adunay Diyos, ug ako nakakat-on sa pagtuo kaniya. Apan siya dili persona ug halayo. Ang akong pagtuon sa Bibliya wala lamang naglig-on sa akong pagtuo sa Diyos kondili nagtabang usab kanako sa pagkaila ug paghigugma kaniya. Ako karon adunay usa ka hamiling personal nga relasyon uban sa Diyos, usa ka butang nga mas bililhon kay sa bisan unsa pang butang.”

Matuod nga Relihiyon Mapuslanon!

Ang imo bang relihiyon naghatag kanimo ug espirituwal nga pagtultol ug nagpakita kanimo kon sa unsang paagi ang Bibliya makatabang kanimo sa pagsagubang sa mga problema sa kinabuhi? Nagtudlo ba kini sa paglaom sa Bibliya alang sa umaabot? Naghatag ba kini kanimo ug suod, personal nga relasyon uban sa Maglalalang, pinasukad sa tukmang kahibalo sa Bibliya? Kon wala, ayaw pagsurender. Imbes mobiya sa relihiyon, pangita ug matang sa pagsimba nga lig-ong gipasukad sa Bibliya. Nan ikaw mahisama niadtong gitagna bahin sa Bibliya sa basahon sa Isaias: “Mao kini ang giingon sa Soberanong Ginoong Jehova: ‘Tan-awa! Ang akong kaugalingong mga alagad magakaon . . . Ang akong kaugalingong mga alagad magainom . . . Ang akong kaugalingong mga alagad magakalipay . . . Ang akong kaugalingong mga alagad mosinggit sa kalipay tungod sa maayong kahimtang sa kasingkasing.’”​—Isaias 65:​13, 14.

[Mga footnote]

[Mga hulagway sa panid 4, 5]

Ang Bibliya nagtabang kanato sa pagkaila ug paghigugma sa diyos