Kami Midangop sa Tinubdan sa Matuod nga Pagkamatarong

Sumala sa giasoy ni Erwin Grosse

PILA ka tuig nga miagi, sayo sa buntag ako naa na sa mga ganghaan sa usa ka dakong pandayan sa bapor sa Kiel, Alemanya, nga managtag sa mga pulyeto ug mamaligyag Rote Fahne, ang magasin sa KPD/​ML.a Sa samang panahon ako mosulay sa pagdani sa mga trabahante ug mga aprentis sa mga lantugi. Ang pagsulay sa pagkombinsir kanila sa akong komunistang mga pagtuo maoy usa ka dili-pasalamatang buhat.

Bisan pa niana, wala ko tugoti nga kana makapaluya kanako. Nakadiskobre ako ug tumong sa kinabuhi: ang pagtabang sa pagpatunghag matarong nga mga kahimtang pinaagig ebolusyon sa kalibotan. Sa unsang paagi nahidangat ako sa maong punto de vista Ang mao bang tumong sa kinabuhi makapatagbaw sa akong kagutom sa pagkamatarong?

Pagpangita sa Pagkamatarong

Ang paagi sa kinabuhi sa akong mga ginikanan mao ang pag-agpas ug materyal nga kauswagan, ug kadto wala gayod makapadani kanako. Kaming mga batan-on nangitag mas maayong butang. Ang bag-ong mga estilo sa kinabuhi gisulayan ug gimantala ang bag-ong mga katuyoan sa kinabuhi. Niadtong panahona, ang gubat sa Vietnam ug kagubot sa mga estudyante mao ang mga ulohan sa balita. Alang kanamo mipatim-aw nga ang mga tawong inosente nagbayad pinaagi sa ilang mga kinabuhi sa dakong kabuangan sa mga politiko ug mga kapitalista. Kadtong kahimtanga nakapabug-at sa akong kaisipan, ug misugod ako sa pagdumot sa kapitalistang sistema.

Mitalikod usab ako sa establisadong relihiyon. Ang usa ka kasinatiang nabatonan ko samtang nag-alagad sa armadong kusog sa Kasadpang Alemanya nakatabang nako sa paghimo niining desisyona. Ang mga militaryong maneobra nga among gibuhat baldahon sa usa ka serbisyo diha sa kampo, ug ang mga sundalo gibahin ngadto sa Katoliko ug Protestanteng mga grupo. Sa pagkatapos sa serbisyo, ang mga klerigo sa duha ka denominasyon magbendisyon sa mga kanyon! Ako nakurat. Dili ba kining mga armasa gigama aron mopatay? Ug sa dihang ako gitudloan sa relihiyon sa eskuylahan, dili ba ako gitudloan: “Dili ka mopatay”?​—Exodo 20:13, King James Version.

Gibati ko nga husto si Karl Marx sa gitawag niya ang relihiyon nga “ang opio sa katawhan” kay kana naghimo sa mga tawong walay mahimo atubangan sa intereses sa kapitalismo. Busa sa paggawas sa armi, miluwat ako sa iglesya ug nagbatog regular nga mga leksiyon sa Marxismo-Leninismo. Gibasa usab nako ang mga basahon ni Mao Tse-tung. Kadtong tanan naglig-on sa akong pagtuo nga rebolusyon lamang sa kalibotan ang makalangkat sa pagkadaotan. Pinaagi lamang niana, ako naghunahuna, motungha ang usa ka bag-ong tawhanong katilingban nga tiniman-an sa pagkamatarong.

Gibansay ako sa KPD/​ML sa pagkabig sa mga trabahante pabor sa mga pagtulon-an ni Lenin ug sa pagtanyag kanilag mga pulyeto ug sa Rote Fahne. Nagdala usab akog mga bandera ug nagdrayb ug mga sakyanang may trompa panahon sa mga demonstransyon. Bisan pa niana, ako giisip lang nga usa ka dumadapig sa partido. Una ako dawaton nga membro sa sentral komite, kinahanglang pamatud-an ko ang akong kaugalingon, nga mag-alagad sa partido sa taastaas nga panahon ug magsuportar niana sa panalapi.

Lahi sa Binuhatan​—Mapait nga Kahiubos!

Nabansay ako ingong engineering draftsman, apan ako mas interesado sa arte sa sosyalistang mga pintor, ug nanghinaot ako nga ako mapuliji sa pagkamamugnaon sama kanila. Busa, miaplay ako alang sa usa ka dapit sa West Berlin College of Art. Ako nadawat ug misugod sa pagtuon sa arte niadtong Pebrero 1972.

Dinhi gikontak ko na usab ang partido ug sa wala madugay nagtindog na sa atubangan sa mga ganghaan sa pabrika nga nagbaligyag Rote Fahne. Nagdesinyo usab akog mga plakard ug nagdibuho sa mga hulagway ni Marx, Engels, Lenin, ug Mao Tse-tung diha sa pulang mga bandera.

Determinado ako nga dili gayod magminyo​—nga mao, hangtod nahibalag ko si Linda. Akong nakaplagan nga naangkon niya ang talagsaong mga hiyas, ang pagkamatinumanon, ug kadto nakapausab sa akong hunahuna. Lima ka bulan sa ulahi kami maoy bana ug asawa, nga nagsugod sa mahimong usa ka may-harmoniyang panagtiayon.

Sa nangagi, ako nagpuyo ipon sa usa ka grupo sa mga batan-on nga nagtuo sa nagkadaiyang mga sentimentong leftist. Kami may nagkadaiya kaayong mga panaghisgot, apan may panagbingkil usab ug pagkontrahanay. Kadto susama gayod sa lainlaing komunistang mga partido. Ang matag usa nagtuo nga ang tanan nga uban wala makasabot sa komunistang ideya ug angay moduyog sa “matuod” nga partido. Nabadlisan na ang mga linya sa panggubatan!

Sulod sa akong partido mismo, ang mga pakigbisog tali sa wala ug tuo nga mga pundok maoy kasagaran. Ang iladong mga membro nagsulay sa pagpalagpot sa usag usa. Gilaayan ako sa mga away ug mga insulto, ug kadto mitultol sa inanay kong pagbugto sa tanang koneksiyon sa partido. Nasabot ko nga dili maalamaon ang pagkalangkit sa butang nga sa kamatuoran dili makapatunghag kausaban. Ang komunistang mithi napamatud-ang dili makab-ot sa buhat! Apan sa akong kasingkasing ako nagpabiling Marxista.

Gisultihan ako ni Linda Bahin sa Diyos

Usa ka gabii, samtang nagdrayb gikan sa Kiel paingon sa Berlin, gipakuratan ako ni Linda. Miingon siya: “Kombinsido ako nga adunay Diyos, ug sa kahiladman, ako nagtuo kaniya.” Kana ang kataposang butang gidahom ko nga madungog! Gisuportahan ni Linda ang akong mga mithing Marxista.

Ang mainitong panaglalis bahin sa dialectical materialism ug Marxismo misunod. Ang Marxismo nagapresentar sa teoriya nga ang tawo nagakuha sa katibuk-an niyang espirituwal, intelektuwal, ug moral nga kinabuhi gikan sa iyang sosyal nga silinganan. Ingong resulta, ang “bag-ong” tawo mogula ingong resulta sa edukasyon sa komunistang ideolohiya ug sa positibong kausaban sa silinganan. Hinuon, si Linda usa ka nabansay nga teknisyan sa laboratoryo, ug mas nasayod siya! Siya makapamatuod nga ang kagawian sa tawo maimpluwensiyahan usab sa iyang genetikanhong kahulmahan. Giputol namo ang among panaghisgot aron malikayan ang away.

Panahon sa usa ka biyahe sa ulahi, gibati na usab ni Linda ang tinguha nga makigsulti kanako bahin sa Diyos. Sa akong pagtuo, ang teoriya sa ebolusyon naglig-on nga ang tanan naggikan sa materyal nga mga butang ug mao ang resulta sa lunsay nga sulagma. Gihisgotan ni Linda ang mga prinsipyo sa thermodynamics, ang balaod sa inertia, ug ubang pisikal nga balaod sa pagpamatuod nga nagalungtad gayod ang intelihenteng tagmugna sa kinabuhi. Mihawid ako sa akong mga opinyon. Hinuon, ang pilosopiya ko sa kinabuhi ug akong mga mithi nagusbat na!

Milabay ang usa ka tuig. Usa ka buntag sa Dominggo si Linda kalit nagkuha sa usa ka bagang libro ug misugod sa pagbasa gikan niana ngari kanako. Kadto ang estorya sa usa ka tawo nga nagputol sa usa ka kahoy, naggamit sa katungan niana sa paggamag walay-kinabuhing diyosdiyos ug dayon nangaliyupo niana: “Luwasa ako.” Kadtong talagsaong kabatbatan sa relihiyon nakapahingangha kaayo nako. Tiaw na ang akong katingala sa pagkahibalo nga kadto naggikan sa Bibliya.​—Isaias 44:14-20.

Gihangyo ko ang akong asawa nga suginlan akog dugang. Gihimo niya kana sulod sa lima ka oras​—sugod sa pagkahulog sa tawo sa Eden ug natapos sa pagpasig-uli sa Paraiso nga gibatbat diha sa basahong Pinadayag. Si Linda gikapoy kaayo tungod niadto, apan gibati ko nga daw nangataktak ang mga himbis gikan sa akong mga mata ug nga daw ako nakakitag tin-aw sa unang panahon. Natural lamang, buot kong masayran kon diin nakat-onan ni Linda kadtong tanan.

Giingnan niya ako nga sa 14 anyos pa siya, nagtuon siya sa Bibliya uban sa mga Saksi ni Jehova sa Berlin ug sa ulahi nabawtismohan pa. Sa 18 anyos na siya, siya mibalhin ug layo kaayo tungod sa iyang trabaho, ug ikasubong isulti, mibiya siya sa dalan sa kamatuoran. Dayon sa pagbalik niya sa Berlin, siya nalangkit sa leftist nga politika. Ang kalipay nga karon nasinati niya sa among kaminyoon nagtukmod kaniya sa pagpangita na usab sa Diyos. Apan siya mopasaylo kaha niya tungod sa iyang mga kasaypanan? Nasayod siya nga ang bugtong paagi sa pagpreserbar sa among mga kinabuhi ug sa kalipay sa among kaminyoon mao ang mahinulsolong pagbalik sa Diyos. Apan ako wala pa nianang puntoha. Gikinahanglan ko po ang dugang panahon.

Pagliso sa Hustong Direksiyon

Usa ka gabii sa ting-init, kami nagsud-ong sa bulawanong pagsalop sa adlaw ibabaw sa siyudad. Si Linda miingon: “Tingali makapahimulos kita niining mga butanga sa kadiyut, Erwin. Apan luwason kaha kita sa Diyos inigbalda niya? Unsang hinungdan ang atong ginahatag kaniya aron kita luwason?” Kadto nakapabalik kanako sa maayong panimuot. May nakat-onan ako bahin kang Jehova apan dili igo ang katin-aw. Busa ako tinong mihukom sa pagdangop kaniya.

Wala madugay tapos niadto, kami didto sa tiyanggihan sa dihang nakita namo ang usa ka tigulang nga babayeng naglingkod sa silyang may ligid nga nagkupot sa Bantayanang Torre. Amo siyang gisukna bahin sa mga oras sa mga tigom sa lokal nga Kingdom Hall, ug ang iyang mga mata misidlak. Gikuptan niya ang among mga kamot: “Ako nalipay nga ang mga batan-ong sama kaninyo buot masayod sa Bibliya,” miingon siya nga balikbalik. Kay nalipay sa labihan, siya milingkod nga tul-id sa iyang silyang may ligid ug gigakos si Linda. Midawat kamig pila ka madasin ug misaad nga motambong sa sunod nga tigom.

Nakaabot kami sa hapit nang magsugod. Ako taas ug buhok ug bungoton ug nagsul-ob ug jeans ug T-shirt. Si Linda nagsul-ob sa 30-anyos nga sinina sa kasal sa iyang tiya nga dugom asul. Nakakita akog lalaki nga nagsul-ob ug jacket ug korbata nga nagtindog sa entrada ug naghunahuna: ‘Karaan kaayo! Talagsaon nga pagsugod!’ Bisan pa niana, siya mahigalaon ug miingon: “Nagpaabot kami ninyo.” Ako nakurat apan miingon kaniya: “Buot namong magtuon sa Bibliya.” Bisan kana wala makapatingala kaniya. “Nahikay na kana,” mitubag siya. Nga napikal ug diyutay, kami misulod.

Panahon sa tigom, gibati ko sa makadaghan nga daw ang mamumulong nakigsulti kanako sa personal. Ug ang pipila sa kongregasyon natingala sa gipagawas ni Linda ang Bantayanang Torre nga iya nang giandam daan alang sa pagtuon. Tapos sa duha ka oras, ang tigulang nga igsoong babaye miduol ug mihalog kanamo, nga ang iyang nawong masilakon sa kalipay. Siya mao ang nagpakaylap sa balita nga kamo moanha. Gihimo ang kahikayan alang sa regular nga pagtuon sa Bibliya uban sa igsoong lalaki nga maoy nag-abiabi kanamo, ug siyam ka bulan sa ulahi, sa Abril 4, 1976, gisimbolohan ko ang akong pahinungod kang Jehova pinaagi sa bawtismo sa tubig.

Pagkadako sa akong kalipay nga nakaila sa Usa nga nagsaad: “Tan-awa! Ginabag-o ko ang tanang butang”! (Pinadayag 21:5) Ug sa unsang paagi ipatungha sa Maglalalang ang matuod nga pagkamatarong? Ang Proverbio 2:21, 22 nagahatag sa tubag: “Kay ang mga matul-id mao ang magapuyo sa yuta, ug ang mga walay-ikasaway mao ang mahibilin ibabaw niini. Mahitungod sa mga daotan, sila pagaputlon gikan sa yuta mismo; ug mahitungod sa maluibon, sila pagalangkaton gikan niini.”

Samtang sa nangagi ako nagbarog nga may Rote Fahne sa atubangan sa mga ganghaan sa pabrika, karon ako nagbarog sa ma-Sabado sa Karl Marx Street sa Berlin-Neukölln uban ang Bantayanang Torre. Karon ako makahisgot bahin sa butang dili ikatanyag sa ginamag-tawong sistema: ang kinabuhing walay kataposan. (Juan 17:3) Akong nasayran sa unsang paagi “ang mga matul-it” bisan karon ginabansay sa pagsul-ob sa ilang kaugalingon sa “bag-ong pagkatawo, nga pinaagi sa tukmang kahibalo ginabag-o.” (Colosas 3:10) Kining pagtudlo alang sa usa ka bag-ong kalibotan dili mapakyas!

Bahin kang Linda, siya karon determinado nga dili na gayod mopahilayo sa Tinubdan sa matuod nga pagkamatarong. Si Peter ug Reni, kinsa nagtudlo kanamo sa mga dalan ni Jehova, nakaila kon unsay gikinahanglan niya sa espirituwal nga paagi ug nagtabang niya nga mouswag.

Bag-ong mga Tumong sa Dalan sa Pagkamatarong

Sa kolehiyo, may dayag nga pagsupak sa mga pagtuo nga niadto madasigon kaayo nakong gidawat. Ang akong propesor sa klase, usa ka iladong pintor, nagpaila nga kinahanglang mohukom ako tali sa arte ug sa bag-o kong pagtuo. Busa gibiyaan ko ang pagdibuho ug nangitag trabaho nga makatabang namo sa pagkab-ot sa bag-o namong tumong: ang payunir nga pag-alagad. Uban niini sa hunahuna, si Linda ug ako balikbalik nga naghisgot sa among tinguha ngadto kang Jehova sa pag-ampo. Gipadala namo ang among mga aplikasyon tunga sa tuig nga abante sa giplano namong petsa sa pagsugod, ang Septiyembre 1, 1977.

Aw, kadto dili sayon, apan sa tabang ni Jehova nakab-ot namo ang among tumong. Kasamtangan, sukad sa Enero 1, 1985, si Linda ug ako nag-alagad nga espesyal nga mga payunir​—busa ang laing mainitong tinguha natuman. Ang paggamit sa bug-os namong kusog sa pagtabang sa mga tawo nga makakat-on sa dalan sa matuod nga pagkamatarong nagatagbaw namo pag-ayo.

Ug komosta ang akong pangandoy sa pagkamatarong? Natagbaw ba kana? Oo. Karong adlawa nasayod ako sa tinuod nga kahulogan sa mga pulong ni Jesus sa Mateo 5:6: “Malipayon kadtong gigutom ug giuhaw sa pagkamatarong, sanglit sila pagabusgon.”

[Footnote]