Pagpukgo sa Hampak sa Kawalay-Kaangayan

Ang Maglalalang sa dili madugay magpahinabo sa kaangayan nga gitinguha sa mga tawo. Hangtod nianang panahona, labing menos makahimo kitag mga lakang sa pagpukgo sa hampak sa kawalay-kaangayan nga nag-apektar kanato ug sa atong mga pamilya. Sumala sa giingon ni Nelson Mandela, kanhing presidente sa Habagatang Aprika, “ang atong pagpahimulos sa atong nabatonan, dili sa gihatag kanato, ang nagpalahi sa usa ka tawo gikan sa uban.”

ANG kasaysayan nagpamatuod sa iyang mga pulong. Daghang lalaki ug babaye ang diyutay rag nadawat sa dihang gipakatawo apan kinsa, pinaagi sa pagpahimulos sa ilang nabatonan, nakakab-ot ug mga kalamposan nga nagpalahi kanila gikan sa lagmit mas tinugahang mga katalirongan nila. Sa kaatbang, ang ubang mga indibiduwal nga dagayang nakadawat ug mga bentaha sukad sa pagkatawo nag-usik-usik sa ilang nabatonan ug napakyas sa paggamit sa ilang bug-os nga potensiyal.

Pahimusli ang Imong Nabatonan!

Ang mga Saksi ni Jehova interesado kaayo sa pagtabang sa mga tawo nga makabaton ug kahibalo bahin sa mga katuyoan sa Diyos pinaagi sa pagtuon sa Bibliya. Apan, nakaamgo sila nga aron bug-os nga makabenepisyo sa impormasyon sa Bibliya, ang mga tawo kinahanglang makamaong mobasa ug mosulat. Tungod niana, ang mga Saksi ni Jehova nagtudlo sa tinagpulo ka libong tawo sa pagbasa ug pagsulat, lakip sa 23,000 ka tawo (sa tungatunga sa katuigang 1990) sa usa lamang ka nasod sa Kasadpang Aprika. Naghisgot sa talagsaong katilingbanong serbisyo nga gitagana sa mga Saksi ni Jehova, ang San Francisco Examiner nag-ingon: “Mahimo nimong isipon sila ingong modelong mga lungsoranon. Sila makugihong nagbayad ug mga buhis, nag-atiman sa mga masakiton, nakigbisog sa iliterasiya.”

Dugang pa, pinaagi sa progresibong kurso sa pagpakigpulong sa publiko, ang mga Saksi ni Jehova nakabansay ug gatosan ka libong tawo aron mahimong kuwalipikadong mga mamumulong, nga makaarang sa pagsulti nga larino sa publiko. Lakip niining linibo mao ang pipila nga kanhi dunay grabeng mga suliran sa pagsulti. Tagda ang usa ka tawo nga taga-Habagatang Aprika kinsa misulat: “Ang akong pagkanganga hilabihan gayod nga nahimo akong mahunahunaon kaayo sa kaugalingon, nga kasagarang magsalig sa uban sa pagsulti alang kanako. . . . Sa dihang miapil ako sa Tunghaan sa Teokratikanhong Ministeryo ug kinahanglang mobasa sa Bibliya atubangan sa pipila ka mamiminaw . . . , minganga ko pag-ayo nga wala nako mahuman ang asaynment sulod sa gigahin nga panahon. Human sa tigom ang [tigtambag] malulotong mihatag kanako ug praktikal nga tambag. Siya misugyot nga magbansay ako sa pagbasa ug kusog sa akong kaugalingon. Gihimo nako kini, nga migugol ug panahon kada adlaw, nga magbasa ug kusog gikan sa Bibliya ug sa magasing Bantayanang Torre.” Kining tawhana miuswag pag-ayo nga karon nagahatag na siya ug mga pakigpulong publiko sa mga mamiminaw nga moabot ug gatosan, bisan linibo.

Pagtagamtam ug Kaangayan Taliwala sa mga Igsoon

Mahitungod sa edukasyon, pag-atiman sa panglawas, ug kahimtang sa pinansiyal ug sa katilingban, ang mga sirkumstansiya taliwala sa mga Saksi ni Jehova magkalahi kaayo. Kining maong mga kalainan nagsumbalik-silaw lamang sa dili-hingpit nga mga kahimtang sa kalibotan nga atong gipuy-an. Apan kasukwahi sa ubang relihiyosong mga grupo, ang rasanhon, katilingbanon, ug ekonomikanhong mga pagpihig halos napapha gikan sa ilang pundok.

Ilang nakab-ot kini pinaagi sa paghimo sa labing maayo nga ilang maarangan sa pagtuman sa ilang nakat-onan gikan sa Bibliya. Sila tibuok-kasingkasing nga misagop sa mga prinsipyo sa Bibliya sama sa: “Ang pagtan-aw sa tawo dili sama sa pagtan-aw sa Diyos, tungod kay ang tawo nagatan-aw sa kon unsay makita sa iyang mga mata; apan alang kang Jehova, siya nagatan-aw sa kasingkasing.” (1 Samuel 16:7) “Ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” (Buhat 10:34, 35) “Ngadto kang bisan kinsa ayaw balosig daotan ang daotan. Pagtaganag maayong mga butang diha sa panan-aw sa tanang tawo. Kon posible, kutob sa nagaagad kaninyo, magmadaiton sa tanang tawo.”​—Roma 12:17, 18; tan-awa usab ang 1 Timoteo 6:17-19; Santiago 2:5, 9.

Nga nagatuman gayod niining mga prinsipyo sa Bibliya nga nagpasiugda ug panaghiusa, ang mga Saksi ni Jehova dili motugot sulod sa ilang pundok sa bisan unsang pagpakitag kawalay-kaangayan pinasikad sa rasanhon, katilingbanon, o pinansiyal nga kalainan. Kining mga kahimtanga walay bahin, pananglitan, sa paghukom kon kinsay tagaan ug mga pribilehiyo sa pag-alagad diha sa Kristohanong kongregasyon. Ang responsableng mga posisyon, sama sa pagtudlo ug pagdumala, gihatag lamang pinasikad sa espirituwal nga mga kuwalipikasyon.​—1 Timoteo 3:1-13; Tito 1:5-9.

Alang sa mga indibiduwal nga nag-antos ilalom sa kawalay-kaangayan sa mapihigong kalibotan, pagkamakapadasig nga dunay ubang tawo nga magtratar kanila ingong mga igsoong lalaki ug babaye uban ang managsamang baroganan atubangan sa ilang Maglalalang! Si Martina makapamatuod niini. Human ang iyang amahan mibiya sa pamilya, gimatuto siya diha sa kabos, usay-ginikanan nga panimalay. Siya kasagarang trataron ingong sinalikway sa katilingban, diyutay rag pagsalig sa kaugalingon, ug nalisdan sa pagpakigsinabtanay sa uban. Naugmad niya ang dili-mabinationg tinamdan. Apan, nausab ang mga kahimtang human siya magtuon sa Bibliya ug nahimong usa sa mga Saksi ni Jehova. Matod niya: “Kinahanglan ko pang pakigbisogan ang negatibong panghunahuna, apan karon mas makaarang ako sa pagsagubang sa suliran. Ang akong pagtahod sa kaugalingon miarang-arang, ug ako mosulti uban ang mas dakong pagsalig. Ang kamatuoran naghatag kanako ug pagbati sa responsabilidad. Karon ako nahibalo nga si Jehova nahigugma kanako ug nga takos ang pagkinabuhi.”

Ingong internasyonal nga grupo sa mga Kristohanon, ang mga Saksi ni Jehova sa kapin sa 230 ka nasod nagtagamtam ug usa ka sukod sa kaangayan nga talagsaon gayod sa kalibotan karon. Makahimo ba ug susamang pangangkon ang ubang relihiyosong mga organisasyon ug paluyohan kana sa mga pamatuod?

Siyempre, ang mga Saksi ni Jehova realistikanhon. Sila andam modawat nga sanglit mitungha gikan sa dili-hingpit nga palibot, sila dili makaarang sa pagpapas sa kawalay-kaangayan sa tawo sama sa uban kinsa sulod sa kasiglohan naningkamot sa paghimo niana​—ug napakyas. Bisan pa niana, sila nagmaya nga sulod sa ilang pundok, dako silag nahimo sa pagpukgo niining makamatay nga hampak. Ug uban sa lig-ong pagtuo sa saad sa Diyos, sila nagpaabot sa usa ka bag-ong kalibotan sa pagkamatarong diin ang kawalay-kaangayan sa walay kataposan mahimong butang nga nangagi.

Oo, ang tanang matinumanong katawhan sa dili madugay mapasig-uli sa kaangayan “sa dignidad ug sa mga katungod” nga maoy katuyoan sa ilang Maglalalang nga matagamtam nila sa sinugdan. Pagkaanindot nga ideya! Ug niining panahona kini tinuod nang mahitabo!

[Hulagway sa panid 7]

Ang mga Saksi ni Jehova nakigbisog sa iliterasiya pinaagi sa pagtudlo sa tinagpulo ka libong tawo nga makabasa ug makasulat

[Hulagway sa panid 8]

Ang kamatuoran sa Bibliya motabang sa pagpapha sa rasanhon, katilingbanon, ug pinansiyal nga mga pagpihig