Mga Magmamantala sa Gingharian Nagtaho

Teokratikanhong Pag-uswag sa Namibia

ANG maayong balita sa Gingharian sa Diyos unang miabot sa Namibia sa ulahing katuigan sa 1920. Sukad niadtong panahona, ginatos sa matinud-anog-kasingkasing nga mga tawo ang misanong sa mensahe sa Diyos bahin sa kaluwasan. Ang mosunod nga mga eksperyensiya nagpakita kon sa unsang paagi ginatigom ni Jehova kining tilinguhaong mga tawo ngadto sa iyang panon.​—Hageo 2:7.

◻ Si Paulus, usa ka mag-uuma nga nagpuyo sa amihanan-sidlakan sa Namibia, unang nakontak sa mga Saksi ni Jehova sa dihang siya miduaw sa Windhoek, ang kaulohang siyudad. Nakombinsir dayon si Paulus nga iyang nakaplagan ang kamatuoran. Mipauli siya nga dala ang librong Ikaw Mabuhing Walay Kataposan sa Paraiso sa Yuta. Dayon, sa usa ka biyahe paingon sa Rundu, ang kinadul-ang lungsod nga may Kingdom Hall, nakaplagan ni Paulus ang mga Saksi ug mihangyo kanila sa pagduaw kaniya.

Ugaling lang, ang distansiya layo kaayo alang sa mga Saksi sa pag-adto ug pagdumalag senemanang pagtuon sa Bibliya uban kang Paulus. Wala malugda, si Paulus misugod sa pagtuon sa Bibliya nga siya ra. Dugang pa, siya masibotong nagsangyaw ngadto sa uban bahin sa mga butang nga iyang nakat-onan. Sa ngadtongadto, usa ka grupo sa pagtuon sa Bibliya ang naporma. Sa dihang ang gamayng grupo nakadungog pinaagig radyo nga may usa ka asembliya sa mga Saksi ni Jehova nga pagahimoon sa Rundu, ilang gitapo ang ilang gagmayng kinitaan ug gihikay ang transportasyon aron makatambong.

Pagkamakapalipayng kasinatian alang kanila nga makauban ang mga Saksi ni Jehova sa unang higayon! Wala madugay gihimo ang mga kahikayan aron ang kuwalipikadong mga igsoong lalaki regular nga makaduaw niining grupoha. Karong adlawa, adunay unom ka magmamantala diha sa balangay nga gipuy-an ni Paulus.

◻ Ang interes ni Johanna sa ngalan sa Diyos napukaw sa dihang nakadungog siyag usa ka tawo nga nagdaot sa mga Saksi ni Jehova. Siya nahinumdom: “Sa una gayod nga higayon nga akong nadungog ang ngalang Jehova, kini natisok pag-ayo sa akong panumdoman, ug nagsugod ako sa paghunahuna kon kinsa si Jehova. Nagpuyo ako uban sa akong bana duol sa Walvis Bay sa baybayon sa Namibia. Usa ka higayon niana nangadto kami sa lungsod, ug nakita ko ang pipila ka Saksi nga nanagtag ug magasing Bantayanang Torre diha sa dalan. Mikuha kog usa ka kopya ug mihangyo alang sa usa ka pagtuon sa Bibliya, sanglit daghan kog mga pangutana. Mihilak ako sa dihang ila akong gipahibalo nga wala sila makaadto tungod kay naguba ang ilang sakyanan. Wala madugay human niana namatay ang akong bana, ug mipuyo ako sa Keetmanshoop. Usa ka espesyal payunir (bug-os-panahong ebanghelisador) ang giasayn sa pagsangyaw didto, ug mikuha ako kaniya sa librong Ang Kamatuoran nga Motultol sa Kinabuhing Dayon. Sa sinugdanan pa, ako nang nailhan ang tagingting sa kamatuoran.

“Sa ngadtongadto, gidapit ako sa pagpakigbahin sa buluhatong pagsangyaw, apan gidaog ako sa kahadlok sa tawo. Samtang namalaybalay, miampo ako kang Jehova nga tugotan na lang niya akong mamatay kay sa pasangyawon ako. Sa akong unang pagpakigbahin sa pagsangyaw sa kadalanan, mitago ako sa usa ka hiktin nga pasilyo, nga naglaom nga walay makakita kanako. Sa kataposan, nakabaton akog igong kaisog sa pagtunol ug magasin ngadto sa usa ka lumalabay, ug nianang higayona lamang ako nakasugakod sa pagsulti. Nianang adlawa, sa tabang ni Jehova, ako nakapaambit sa akong binase-sa-Bibliya nga paglaom ngadto sa daghang tawo.

“Karon, 12 ka tuig na ang milabay, bisan pag naglisod sa materyal nga paagi, gipakabahandi ko gihapon ang payunir nga pag-alagad ug nagpadayon sa pagbatog dili masukod nga kalipay tungod sa pagpaambit sa kamatuoran sa Gingharian ngadto sa uban.”