Pauswaga ang Kalidad sa Imong Pag-ampo Pinaagi sa Pagtuon sa Bibliya
“Ah, Jehova, palihog, himoang matinagdanon ang imong igdulungog sa pag-ampo sa imong alagad.”—NEH. 1:11.
1, 2. Nganong mapuslanon ang pagkonsiderar sa pipila ka pag-ampo nga nasulat sa Bibliya?
ANG pag-ampo ug pagtuon sa Bibliya maoy hinungdanong bahin sa matuod nga pagsimba. (1 Tes. 5:17; 2 Tim. 3:16, 17) Siyempre, ang Bibliya dili usa ka basahon sa pag-ampo. Apan, naundan kini ug daghang pag-ampo, lakip na nianang makaplagan diha sa basahon sa Salmo.
2 Samtang ikaw nagbasa ug nagtuon sa Bibliya, lagmit makakita kag mga pag-ampo nga mohaom sa imong kahimtang. Gani, kon iapil nimo sa imong mga pag-ampo ang mga pulong nga anaa sa Kasulatan, mouswag ang kalidad sa imong mga pag-ampo. Unsay imong makat-onan gikan niadtong kansang mga pag-ampo gitubag ug gikan sa unod sa ilang mga pag-ampo?
Pangayoa ug Sunda ang Giya sa Diyos
3, 4. Unsay gisugo ni Abraham sa iyang sulugoon, ug unsay atong makat-onan gikan sa kalamposan nga gihatag ni Jehova?
3 Sa imong pagtuon sa Bibliya, imong makat-onan nga kinahanglan kang moampo alang sa giya sa Diyos. Tagda kon unsay nahitabo sa dihang gipadala sa patriarkang si Abraham ang iyang kinatigulangang sulugoon—lagmit si Eliezer—sa Mesopotamia aron sa pagpangitag mahinadlokon-sa-Diyos nga asawa para kang Isaac. Samtang ang mga babaye nagkalos ug tubig diha sa usa ka atabay, ang sulugoon nag-ampo: “Jehova . . . , ang mahitabo gayod mao nga ang batan-ong babaye nga akong sultihan, ‘Palihog, ipaubos ang imong banga aron ako makainom,’ ug nga sa pagkatinuod moingon, ‘Uminom ka, ug paimnon ko usab ang imong mga kamelyo,’ kini siya ang imong itudlo alang sa imong alagad, kang Isaac; ug pinaagi niini ipahibalo kanako nga ikaw naghimog maunongong gugma uban sa akong agalon.”—Gen. 24:12-14.
4 Natubag ang pag-ampo sa sulugoon ni Abraham sa dihang gipainom ni Rebeca ang iyang mga kamelyo. Sa wala madugay, si Rebeca miuban kaniya sa Canaan ug nahimong hinigugmang asawa ni Isaac. Siyempre, dili ka makadahom nga hatagan ka sa Diyos ug linaing ilhanan. Bisan pa niana, siya magagiya kanimo kon ikaw mag-ampo ug determinadong magpatultol sa iyang espiritu.—Gal. 5:18.
Ang Pag-ampo Makapamenos sa Kabalaka
5, 6. Nganong talagsaon ang pag-ampo ni Jacob sa dihang hapit na silang magtagbo ni Esau?
5 Ang pag-ampo makapamenos sa kabalaka. Kay nahadlok sa iyang kaluha, nga si Esau, si Jacob miampo: “Oh Jehova, . . . ako dili-takos sa tanang mahigugmaong-kalulot ug sa tanang pagkakasaligan nga imong gipakita sa imong alagad . . . Luwasa ako, ako nagaampo kanimo, gikan sa kamot sa akong igsoon, gikan sa kamot ni Esau, tungod kay nahadlok ako kaniya nga basin siya moanhi ug moatake gayod kanako, inahan uban sa mga anak. Ug ikaw, ikaw nag-ingon, ‘Sa walay duhaduha ako makiglabot nga maayo kanimo ug himoon ko ang imong binhi nga ingon sa mga balas sa dagat, nga dili maihap tungod sa gidaghanon.’”—Gen. 32:9-12.
6 Bisan tuod nanagana si Jacob, natubag ang iyang pag-ampo sa dihang nagkauli sila ni Esau. (Gen. 33:1-4) Basaha pag-ayo ang maong pangaliya, ug imong makita nga si Jacob wala lang mangayog tabang. Siya nagpahayag sa iyang pagtuo sa gisaad nga Binhi ug nagpasalamat sa mahigugmaong-kalulot sa Diyos. Mibati ka bag “kahadlok”? (2 Cor. 7:5) Kon mao, ang pangaliyupo ni Jacob mahimong magpahinumdom kanimo nga ang mga pag-ampo makapamenos sa kabalaka. Apan, kini dili lamang maglakip sa mga hangyo kondili sa mga pahayag usab sa pagtuo.
Pag-ampo Alang sa Kaalam
7. Nganong nag-ampo si Moises alang sa kahibalo sa mga dalan ni Jehova?
7 Ang tinguha nga pahimut-an si Jehova angayng magpalihok kanimo sa pag-ampo alang sa kaalam. Si Moises nag-ampo alang sa kahibalo sa mga dalan ni Jehova. “Tan-awa,” siya mihangyo, “ikaw [Jehova] nag-ingon kanako, ‘Dad-a kining katawhan [gikan sa Ehipto]’ . . . Ug karon, palihog, kon ako nakakaplag ug pabor sa imong mga mata, pahibaloa ako, palihog, sa imong mga dalan, . . . aron ako makakaplag ug pabor sa imong mga mata.” (Ex. 33:12, 13) Sa pagtubag, ang Diyos naghatag kang Moises ug dugang kahibalo bahin sa Iyang mga dalan—kinahanglanon kini sa iyang pagpanguna sa katawhan ni Jehova.
8. Sa unsang paagi makabenepisyo ka sa pagpamalandong sa 1 Hari 3:7-14?
8 Si David miampo usab: “Ipaila kanako ang imong mga dalan, Oh Jehova.” (Sal. 25:4) Ang anak ni David nga si Solomon nangayo sa Diyos ug kaalam nga gikinahanglan sa pagtuman sa iyang katungdanan ingong hari sa Israel. Ang pag-ampo ni Solomon nakapahimuot kang Jehova, kinsa naghatag dili lamang sa iyang gipangayo kondili sa bahandi ug himaya usab. (Basaha ang 1 Hari 3:7-14.) Kon nakadawat kag mga pribilehiyo nga morag bug-at ra para nimo, pag-ampo alang sa kaalam ug ipakita ang pagkamapainubsanon. Dayon ang Diyos motabang kanimo sa pagbaton sa kahibalo ug pagpasundayag sa kaalam nga gikinahanglan sa pag-atiman sa imong mga responsibilidad sa nahiangay ug mahigugmaong paagi.
Mag-ampo nga Kinasingkasing
9, 10. Unsay imong nakat-onan gikan sa paghisgot ni Solomon sa kasingkasing diha sa iyang pag-ampo panahon sa inagurasyon sa templo?
9 Aron dunggon, kinahanglan nga kinasingkasing ang imong pag-ampo. Si Solomon nagtanyag ug sinserong pag-ampo, nga nasulat sa 1 Hari kapitulo 8, atubangan sa panon sa katawhan nga nagtigom sa Jerusalem alang sa inagurasyon sa templo ni Jehova niadtong 1026 W.K.P. Human ipahiluna ang arka sa pakigsaad didto sa Labing Balaang lawak ug napuno sa panganod ni Jehova ang templo, gidayeg ni Solomon ang Diyos.
10 Tun-i ang pag-ampo ni Solomon, ug matikdi ang paghisgot niana sa kasingkasing. Giila ni Solomon nga si Jehova lamang ang nahibalo sa kasingkasing sa tawo. (1 Hari 8:38, 39) Ang maong pag-ampo nagpakita nga adunay paglaom alang sa nakasala nga ‘mobalik sa Diyos sa bug-os niyang kasingkasing.’ Kon mabihag sa mga kaaway ang katawhan sa Diyos, dunggon ang ilang mga pangaliyupo kon bug-os ang ilang kasingkasing ngadto kang Jehova. (1 Hari 8:48, 58, 61) Nan, angayan gayod nga kinasingkasing ang imong mga pag-ampo.
Kon sa Unsang Paagi ang Salmo Makapauswag sa Kalidad sa Imong mga Pag-ampo
11, 12. Unsay imong nakat-onan gikan sa pag-ampo sa usa ka Levihanon nga dili pa makaadto sa sangtuwaryo sa Diyos?
11 Ang pagtuon sa Salmo makapauswag sa kalidad sa imong mga pag-ampo ug motabang kanimo sa paghulat nga tubagon kana sa Diyos. Tagda ang pagkamapailobon sa usa ka Levihanon nga nabihag. Bisan tuod dili pa siya makaadto sa sangtuwaryo ni Jehova, siya miawit: “Nganong nawad-an ka ug paglaom, Oh kalag ko, ug nganong gubot ka sa sulod nako? Paghulat sa Diyos, kay pagadayegon ko pa siya ingon nga akong dakong kaluwasan ug ingon nga akong Diyos.”—Sal. 42:5, 11; 43:5.
12 Unsay imong makat-onan gikan sa maong Levihanon? Kon dili nimo makauban ang imong mga isigkamagtutuo diha sa ilang dapit sa pagsimba kay nabilanggo ka tungod sa pagkamatarong, mapailobong maghulat sa Diyos nga molihok alang kanimo. (Sal. 37:5) Palandonga ang kalipay nimo kaniadto sa pag-alagad sa Diyos, ug pag-ampo nga makalahutay ka samtang ‘naghulat’ nga makauban nimo pag-usab ang iyang katawhan.
Pag-ampo Uban ang Pagtuo
13. Kaharmonya sa Santiago 1:5-8, nganong angay kang mag-ampo uban ang pagtuo?
13 Bisag unsa pay imong kahimtang, kanunayng mag-ampo uban ang pagtuo. Kon nag-atubang kag pagsulay sa imong integridad, sunda ang tambag sa disipulo nga si Santiago. Duol kang Jehova pinaagi sa pag-ampo, ug ayaw pagduhaduha nga makahatag siya kanimog kaalam nga gikinahanglan sa pagsagubang sa imong pagsulay. (Basaha ang Santiago 1:5-8.) Ang Diyos nahibalo kon dunay nakapatugaw kanimo, ug siya makagiya ug makahupay kanimo pinaagi sa iyang espiritu. Ipahayag kaniya ang imong pagbati uban ang bug-os nga pagtuo, nga “dili gayod magduhaduha,” ug dawata ang paggiya sa iyang espiritu ug ang tambag sa iyang Pulong.
14, 15. Nganong ikaingon nga si Ana nag-ampo ug milihok uban ang pagtuo?
14 Si Ana, nga usa sa duha ka asawa ni Elkana nga Levihanon, nag-ampo ug milihok uban ang pagtuo. Ang apuli nga si Ana gibiaybiay sa laing asawa, nga si Penina, kinsa daghag anak. Didto sa tabernakulo, si Ana nanaad nga kon siya manganak ug batang lalaki, ihatag niya kana kang Jehova. Tungod kay nagkibotkibot ang iyang ngabil samtang nag-ampo, nagtuo ang hataas nga saserdoteng si Eli nga siya nahubog. Sa pagkahibalo nga dili diay hubog si Ana, si Eli miingon: “Hinaot ang Diyos sa Israel maghatag kanimo sa imong gipangaliya kaniya.” Bisan tuod wala mahibalo si Ana kon unsa gayoy mahitabo, nagtuo siya nga tubagon ang iyang pag-ampo. Busa, “ang iyang nawong wala na magmabalak-on.” Wala na siya maguol.—1 Sam. 1:9-18.
15 Human malutas si Samuel, gitanyag siya ni Ana kang Jehova aron mag-alagad sa tabernakulo. (1 Sam. 1:19-28) Ang paggahin ug panahon sa pagpamalandong sa iyang pag-ampo niadtong tungora makapauswag sa kalidad sa imong mga pag-ampo. Kini motabang usab kanimo sa pagsabot nga bisan ang kaguol nga imong gibati tungod sa usa ka bug-at nga problema mahimong mabuntog kon ikaw masaligong mag-ampo nga tubagon ka ni Jehova.—1 Sam. 2:1-10.
16, 17. Unsay nahitabo tungod kay si Nehemias nag-ampo ug milihok uban ang pagtuo?
16 Ang matarong nga tawong si Nehemias nga nabuhi sa ikalimang siglo W.K.P. nag-ampo ug milihok uban ang pagtuo. Siya nangaliyupo: “Ah, Jehova, palihog, himoang matinagdanon ang imong igdulungog sa pag-ampo sa imong alagad ug sa pag-ampo sa imong mga alagad nga nahimuot sa pagkahadlok sa imong ngalan; ug, palihog, ihatag ang kalamposan sa imong alagad karong adlawa ug himoang kaluy-an siya sa atubangan niining tawhana.” Kinsa ‘kining tawhana’? Kadto mao si Haring Artajerjes sa Persia, nga gialagaran ni Nehemias ingong magtitiing.—Neh. 1:11.
17 Si Nehemias masaligong nag-ampo sulod sa daghang adlaw human niya mahibaloi nga ang mga Hudiyo nga nakagawas gikan sa pagkabihag sa Babilonya “anaa sa daotan kaayong kahimtang ug sa kaulawan; ug ang paril sa Jerusalem nalumpag.” (Neh. 1:3, 4) Ang mga pag-ampo ni Nehemias gitubag nga labaw pa sa iyang gidahom sa dihang gitugotan siya ni Haring Artajerjes nga moadto sa Jerusalem ug tukoron pag-usab ang paril niini. (Neh. 2:1-8) Wala madugay naayo ang paril. Ang mga pag-ampo ni Nehemias gitubag tungod kay gisentro niya kini sa matuod nga pagsimba ug gitanyag uban ang pagtuo. Ingon ba usab niana ang imong mga pag-ampo?
Hinumdomi ang Pagdayeg ug Pagpasalamat
18, 19. Nganong ang usa ka alagad ni Jehova angayng magdayeg ug magpasalamat kaniya?
18 Sa pag-ampo, hinumdomi ang pagdayeg ug pagpasalamat kang Jehova. Daghan kaayog rason nga buhaton kana! Pananglitan, si David maikagon sa pagdayeg sa pagkahari ni Jehova. (Basaha ang Salmo 145:10-13.) Ang imo bang mga pag-ampo nagpakita nga imong gipabilhan ang pribilehiyo sa pagmantala sa Gingharian ni Jehova? Ang gipamulong sa mga salmista makatabang usab kanimo sa pagpahayag ngadto sa Diyos sa imong kinasingkasing nga pagpasalamat sa Kristohanong mga tigom, asembliya, ug mga kombensiyon.—Sal. 27:4; 122:1.
19 Ang imong pagkamapasalamaton sa imong bililhong relasyon uban sa Diyos mahimong magtukmod kanimo sa pag-ampo nga kinasingkasing pinaagig mga pulong nga sama niini: “Pagadayegon ko ikaw taliwala sa mga katawhan, Oh Jehova; magaawit ako ug mga pagdayeg kanimo taliwala sa nasodnong mga pundok. Kay ang imong mahigugmaong-kalulot dako sangko sa mga langit, ug ang imong kamatinud-anon abot sa kalangitan. Mabayaw ka unta ibabaw sa mga langit, Oh Diyos; ang imong himaya magpaibabaw unta sa tibuok nga yuta.” (Sal. 57:9-11) Makapadasig gayod nga mga pulong! Dili ka ba mouyon nga ang maong makapatandog nga mga pulong gikan sa Salmo makaapektar ug makapauswag sa kalidad sa imong mga pag-ampo?
Pangaliyupo sa Diyos Uban ang Halalom nga Pagtahod
20. Giunsa pagpahayag ni Maria ang iyang debosyon sa Diyos?
20 Ang halalom nga pagtahod sa Diyos kinahanglang madayag sa imong mga pag-ampo. Ang matinahorong mga pulong ni Maria human niya masayri nga mahimo siyang inahan sa Mesiyas maoy susama nianang kang Ana sa dihang iyang gitanyag ang batang si Samuel aron mag-alagad sa tabernakulo. Ang halalom nga pagtahod ni Maria sa Diyos madayag diha sa iyang mga pulong: “Pagapadakoon sa akong kalag si Jehova, ug ang akong espiritu dili makapugong sa pagkalipay sa hilabihan sa Diyos nga akong Manluluwas.” (Luc. 1:46, 47) Mapauswag ba nimo ang kalidad sa imong mga pag-ampo pinaagi sa pagpahayag ug susama niana? Dili ikatingala nga ang diyosnong si Maria ang napili nga mahimong inahan ni Jesus nga Mesiyas!
21. Sa unsang paagi ang mga pag-ampo ni Jesus naghatag ebidensiya sa iyang halalom nga pagtahod ug pagtuo?
21 Si Jesus matinahorong nag-ampo uban ang bug-os nga pagtuo. Pananglitan, sa wala pa niya banhawa si Lazaro, “giyahat ni Jesus ang iyang mga mata sa langit ug miingon: ‘Amahan, nagpasalamat ako kanimo nga gidungog mo ako. Tinuod, nahibalo ako nga pagadunggon mo ako sa kanunay.’” (Juan 11:41, 42) Ang imo bang mga pag-ampo nagpakitag pagtahod ug pagtuo? Tun-i ang matinahorong modelo nga pag-ampo ni Jesus, ug imong makita nga ang hinungdanong mga bahin niini mao ang pagbalaan sa ngalan ni Jehova, pag-anhi sa iyang Gingharian, ug ang pagtuman sa iyang kabubut-on. (Mat. 6:9, 10) Hunahunaa ang imong mga pag-ampo. Nagbanaag ba kana sa imong dakong kaikag alang sa Gingharian ni Jehova, sa pagbuhat sa iyang kabubut-on, ug sa pagbalaan sa iyang ngalan? Angay gayod.
22. Nganong makaseguro ka nga si Jehova mohatag kanimog kaisog sa pagmantala sa maayong balita?
22 Tungod sa paglutos o sa uban pang kalisdanan, ang pag-ampo sagad maglakip ug pagpangayog tabang nga makaalagad kang Jehova nga maisogon. Sa dihang gimandoan sa Sanhedrin si Pedro ug Juan sa paghunong ‘sa pagpanudlo pinasukad sa ngalan ni Jesus,’ ang maong mga apostoles maisogong nagpadayon sa buluhaton. (Buh. 4:18-20) Human buhii, ilang gisugilon sa ilang mga isigkamagtutuo ang nahitabo. Dayon kadtong tanan nga presente nangayog tabang sa Diyos sa pagsulti sa iyang pulong nga maisogon. Hayan nga nalipay gayod sila sa dihang gitubag ang maong pag-ampo, kay sila “napuno sa balaang espiritu ug nanagsulti sa pulong sa Diyos uban ang kaisog”! (Basaha ang Buhat 4:24-31.) Ingong resulta, daghan kaayo ang nahimong mga magsisimba ni Jehova. Ang pag-ampo makapalig-on usab kanimo sa pagmantala sa maayong balita nga maisogon.
Magpadayon sa Pagpauswag sa Kalidad sa Imong mga Pag-ampo
23, 24. (a) Paghatag ug ubang pananglitan nga nagpakita kon sa unsang paagi ang pagtuon sa Bibliya makapauswag sa kalidad sa imong mga pag-ampo. (b) Unsay imong buhaton aron mouswag ang kalidad sa imong pag-ampo?
23 Adunay daghan pang mga pananglitan nga nagpakita nga ang pagbasa ug pagtuon sa Bibliya makapauswag sa kalidad sa imong mga pag-ampo. Pananglitan, sama kang Jonas, mahimo nimong ilhon diha sa pag-ampo nga “ang kaluwasan iya ni Jehova.” (Jon. 2:1-10) Kon nahasol ka tungod sa usa ka seryosong sala ug nakapangayo nag tabang gikan sa mga ansiyano, ang pag-ampo ni David makatabang kanimo sa pagpahayag sa imong paghinulsol panahon sa imong pribadong mga pag-ampo. (Sal. 51:1-12) Diha sa pipila ka pag-ampo, makadayeg ka kang Jehova sama sa gibuhat ni Jeremias. (Jer. 32:16-19) Kon nangita kag kapikas, ang pagtuon sa pag-ampo nga makaplagan sa Esdras kapitulo 9, uban sa imong personal nga pangamuyo, makapalig-on sa imong determinasyon sa pagsugot sa Diyos pinaagi sa ‘pagminyo lamang diha sa Ginoo.’—1 Cor. 7:39; Esd. 9:6, 10-15.
24 Padayon sa pagbasa, pagtuon, ug pagsusi sa Bibliya. Pangitag mga punto nga imong ikalakip sa imong mga pag-ampo. Mahimong gamiton nimo kana sa imong mga pangaliya ug mga pag-ampo sa pagpasalamat ug pagdayeg. Seguradong mas masuod ka kang Jehova nga Diyos samtang ikaw nagapauswag sa kalidad sa imong mga pag-ampo pinaagi sa pagtuon sa Bibliya.
Unsay Imong Tubag?
• Nganong angay natong pangayoon ug sundon ang giya sa Diyos?
• Unsay angayng magpalihok kanato sa pag-ampo alang sa kaalam?
• Sa unsang paagi ang basahon sa Salmo makapauswag sa kalidad sa atong mga pag-ampo?
• Nganong angay kitang mag-ampo uban ang pagtuo ug halalom nga pagtahod?
[Hulagway sa panid 8]
Ang sulugoon ni Abraham nag-ampo alang sa giya sa Diyos. Gibuhat ba nimo kana?
[Hulagway sa panid 10]
Ang Pamilyahanong Pagsimba makapauswag sa kalidad sa imong mga pag-ampo