Pagkakontento—Posible ba Kini?

“Ang pagkakontento makapadato sa mga kabos; ang pagkadiskontento makapakabos sa mga dato.”—Benjamin Franklin.

UYON sa maong panultihon, nasayod ang daghan nga ang pagkakontento dili mapalit. Busa ang pagkakontento o katagbawan daw imposible diha sa kalibotan nga nag-aghat kanatong magtinguha ug dugang mga kabtangan, kalamposan, o haruhayng kinabuhi nga gipahimuslan sa uban. Aduna bay usa niining mosunod nga nakaapektar kanimo?

• Ang mga tig-anunsiyo magdasig pag-ayo kanimo sa pagpalit ug daghang butang aron ikaw makontento.

• Ang kompetisyon sa trabahoan o eskuylahan nagpasiugda nga mahimo ka lang nga dinayeg kon sundogon nimo ang gihimo sa uban.

• Ang mga tawo dili mapasalamaton sa imong gihimo alang kanila.

• Paibogon ka sa imong mga higala kon unsay ilang nabatonan.

• Wala matubag ang hinungdanon nimong mga pangutana bahin sa kinabuhi.

Taliwala niini, posible ba gayod nga makontento? Gihisgotan ni apostol Pablo “ang sekreto sa pagkakontento.” Usahay, siya nagkinabuhing haruhay ug usahay sa kalisod. Gidayeg siya sa iyang mga higala apan gitamay sa uban. Bisan pa niana, siya miingon nga iyang “nakat-onan ang pagkakontento sa tanang kahimtang.”—Italiko amoa; Filipos 4:11, 12, New International Version.

Ang pagkakontento maoy usa ka sekreto nga wala pa mahibaloi sa uban, apan sumala ni Pablo, kini mahimong makat-onan. Palihog konsideraha ang lima ka sekreto sa pagkakontento nga mabasa sa Bibliya.