Nakakat-on Ka ba sa “Sekreto sa Pagkakontento”?

1. Unsay kahulogan sa pagkakontento, ug unsay wala ipasabot niini?

KONTENTO ka ba nga tawo? Ang tawong kontento naay kalipay ug kalinaw kay nagpokus siya sa mga panalangin nga iyang nabatonan. Dili siya masina sa kon unsay naa sa uban. Pero wala ni magpasabot nga dili na lang gyod siya maningkamot nga mouswag. Pananglitan, ingong mga Kristohanon, angay tang maningkamot nga mangab-ot ug mga pribilehiyo ug mohimo pag dugang sa pag-alagad. (Roma 12:1; 1 Tim. 3:1) Pero dili pod ta maguol kon dili dayon nato madawat ang mga pribilehiyo nga gusto natong mabatonan.

2. Nganong peligroso ang pagkahimong dili kontento?

² Ang pagkahimong dili kontento puwedeng moresultag kadaot. Kon ang usa dili kontento, basin hutdon niya ang iyang panahon sa pagsigeg trabaho aron lang mabatonan ang materyal nga mga butang nga, sa tinuod lang, wala niya kinahanglana. Makapaguol kay naay mga Kristohanon nga nakaako pa gani sa pagpangawat ug kuwarta o ubang butang. Tingali naghunahuna sila, ‘Para man gyod ni nako,’ ‘Dugay na nako ning gipangandoy,’ o ‘Bayran ra nako ni sa sunod.’ Pero gidumtan gyod ni Jehova ang tanang klase sa pagpangawat ug makahatag nig kaulawan sa iyang ngalan. (Prov. 30:9) Ang uban mihunong pa gani sa pag-alagad kang Jehova tungod kay nadismaya sila pag-ayo nga wala nila madawat ang pribilehiyo nga ilang gipangandoy. (Gal. 6:9) Nganong nahimo na sa pipila ka alagad ni Jehova? Tingali tungod kay nawala ang ilang pagkakontento.

3. Unsay gipasalig kanato sa Filipos 4:11, 12?

³ Kaya natong ugmaron ang pagkakontento. Si apostol Pablo misulat nga “nakakat-on [siya] nga magmakontento bisan unsay [iyang] kahimtang.” (Basaha ang Filipos 4:11, 12.) Iya ning gisulat samtang napriso siya. Bisan pa ana, wala mawala ang iyang kalipay kay “nakat-onan [niya] ang sekreto” sa pagkakontento. Kon nalisdan ta nga mahimong kontento, ang giingon ni Pablo ug ang iyang kasinatian nagpasalig nato nga kaya nato ning ugmaron. Siyempre, dili ni kanunayng sayon buhaton, maong kinahanglang maningkamot ta nga makakat-on sa pag-ugmad niini. Sa unsang paagi? Atong hisgotan ang mga hiyas nga makatabang nato nga makakat-on sa sekreto sa pagkakontento.

UGMARA ANG PAGKAMAPASALAMATON

4. Sa unsang paagi ang pagkamapasalamaton motabang nato nga magmakontento? (1 Tesalonica 5:18)

⁴ Mas sayon mahimong kontento kon mapasalamaton ta. (Basaha ang 1 Tesalonica 5:18.) Pananglitan, kon mapasalamaton ta kay nabatonan nato ang pangunang mga panginahanglan, dili ta magsigeg hunahuna sa ubang mga butang nga wala ra nato kinahanglana. Kon atong giapresyar ang mga pribilehiyo sa pag-alagad nga atong nabatonan karon, himoon nato ang atong maarangan niini nga mga asaynment, imbes nga magsigeg pangandoy ug dugang pribilehiyo. Kanay hinungdan nga ang Bibliya nagdasig nato nga pasalamatan si Jehova diha sa atong mga pag-ampo. Kon mapasalamaton ta, bation nato “ang kalinaw nga gikan sa Diyos, nga labaw sa tanang pagsabot.”—Filip. 4:6, 7.

5. Unsay mga rason nga angay untang magmapasalamaton ang mga Israelinhon? (Tan-awa sab ang hulagway.)

⁵ Konsideraha ang nahitabo sa mga Israelinhon. Kadaghan silang mireklamo kang Jehova kay gimingaw na sila sa mga pagkaon didto sa Ehipto. (Num. 11:4-6) Tinuod dili sayon ang kinabuhi didto sa kamingawan, pero unsa untay ilang gihimo aron magmakontento sila? Angay unta nilang gipamalandong ug gipabilhan ang tanang gihimo ni Jehova para nila. Pananglitan, nagpadala siyag 10 ka hampak ngadto sa mga Ehiptohanon nga nagmaltratar nila ingong mga ulipon. Dihang mibiya sila sa Ehipto, “nakuha nila ang mga bahandi sa mga Ehiptohanon,” sama sa plata ug bulawan, apil na ang mga sinina. (Ex. 12:35, 36) Dihang ang mga Israelinhon gigukod sa mga Ehiptohanon ug natanggong sa Pulang Dagat, milagrosong gibahin ni Jehova ang mga tubig aron makaikyas sila. Ug didto sa kamingawan, adlaw-adlaw silang gihatagan ni Jehova ug mana. Busa nganong nangreklamo man sila ug wala makontento? Dili tungod kay kulang silag pagkaon nga ilang gikinahanglan, kondili tungod sa ilang pagkadili-mapasalamaton sa mga tagana ni Jehova.

6. Unsay pipila ka paagi nga mahimo tang mapasalamaton?

⁶ Sa unsang paagi makakat-on ta nga mahimong mapasalamaton? Una, paggahin ug panahon kada adlaw nga mamalandong bahin sa maayong mga butang nga nakapalipay nimo nianang adlawa. Puwede pa gani nimong isulat ang duha o tulo ka butang nga imong naapresyar. (Lam. 3:22, 23) Ikaduha, ipakita nga mapasalamaton ka. Pasalamati ang uban tungod sa ilang gihimo para nimo. Labaw sa tanan, pasalamati si Jehova kada adlaw. (Sal. 75:1) Ikatulo, pakigsuod niadtong mga mapasalamaton aron mahimo pod kang mapasalamaton. Kon makigsuod ka niadtong dili makamaong moapresyar, basin maimpluwensiyahan ka nila. (Deut. 1:26-28; 2 Tim. 3:1, 2, 5) Kon maningkamot ta nga kanunayng magpasalamat, malikayan nato ang pagkahimong reklamador.

7. Unsay nakatabang kang Aci nga magmapasalamaton, ug unsay resulta?

⁷ Konsideraha ang eksperyensiya ni Aci, sister nga nagpuyo sa Indonesia. Siya miingon: “Panahon sa COVID-19 nga pandemic, gitandi nako ang akong kahimtang sa kahimtang sa mga igsoon. Tungod ana, nahimo kong dili kontento.” (Gal. 6:4) Unsay nakatabang niya nga mausab ang iyang panghunahuna? Si Aci miingon: “Akong gipamalandong ang mga panalangin nga akong nadawat kada adlaw ug ang daghang maayong mga butang nga akong napahimuslan kay bahin ko sa organisasyon sa Diyos. Dayon akong gipasalamatan si Jehova. Tungod ana, nahimo kong kontento.” Dili ba ka kontento sa imong kahimtang karon? Kon mao, sundoga ang gihimo ni Aci aron mabalik ang imong kalipay.

MAGMAPAINUBSANON

8. Unsay nahitabo kang Baruk?

⁸ Dihay higayon nga ang sekretaryo ni propetang Jeremias nga si Baruk nahimong dili kontento sa iyang kahimtang. Dili sayon ang asaynment ni Baruk kay kinahanglan niyang suportahan si Jeremias sa paghatod ug bug-at nga mensahe ngadto sa dili mapasalamaton nga katawhan. Pero imbes magpokus sa asaynment nga gipahimo ni Jehova kaniya, nagsugod siya pagpokus sa iyang kaugalingon ug sa iyang mga pangandoy sa kinabuhi. Pinaagi kang Jeremias, giingnan ni Jehova si Baruk: “Nagtinguha kag dagkong butang alang sa imong kaugalingon. Hunong na sa pagtinguha sa maong mga butang.” (Jer. 45:3-5) Sama rag giingnan ni Jehova si Baruk: “Magmakontento sa imong kahimtang.” Gidawat ni Baruk ang tambag, ug tungod ana padayon siyang giuyonan ni Jehova.

9. Base sa 1 Corinto 4:6, 7, unsay makatabang nato nga mabatonan ang hustong panglantaw sa pribilehiyo? (Tan-awa sab ang mga hulagway.)

⁹ Usahay ang usa ka Kristohanon basin mobati nga angayan siyang makadawat sa usa ka pribilehiyo. Tingali kugihan siya, daghag skill, o dugay nang nag-alagad kang Jehova. Pero lahi nga igsoon ang nakadawat sa pribilehiyo nga iyang gipangandoy. Unsay makatabang niya nga mabatonan ang hustong panglantaw? Puwede niyang pamalandongon ang gisulat ni apostol Pablo sa 1 Corinto 4:6, 7. (Basaha.) Ang tanang pribilehiyo nga atong nadawat ug ang tanan natong katakos naggikan kang Jehova. Nadawat nato ni tungod sa dili hitupngang pagkamaayo ni Jehova, dili tungod sa atong kaugalingong mga paningkamot o kay takos ta niini.—Roma 12:3, 6; Efe. 2:8, 9.

10. Unsay makatabang nato nga mahimong mapainubsanon?

¹⁰ Makakat-on ta nga mahimong mapainubsanon kon pamalandongon nato ang ehemplo ni Jesus. Konsideraha ang nahitabo sa gabii nga gihugasan ni Jesus ang mga tiil sa iyang mga tinun-an. Si apostol Juan misulat: “Kay si Jesus nahibalo nga [1] gikatugyan na sa Amahan ang tanang butang ngadto sa iyang kamot ug [2] nga siya naggikan sa Diyos ug [3] hapit nang mobalik sa Diyos, . . . [iyang] gihugasan ang mga tiil sa mga tinun-an.” (Juan 13:3-5) Puwede untang maghunahuna si Jesus nga ang iyang mga tinun-an ang angayng mohugas sa iyang mga tiil. Pero dili kana ang iyang pagbati. Sa tibuok kinabuhi ni Jesus dinhi sa yuta, wala gyod siya maghunahuna nga angay siyang makabaton ug mas hayahay nga kinabuhi o nga silbihan siya sa uban. (Luc. 9:58) Si Jesus mapainubsanon ug kontento. Naghatag siyag maayo kaayong ehemplo para nato.—Juan 13:15.

11. Sa unsang paagi ang pagkamapainubsanon nakatabang kang Dennis nga magmakontento?

¹¹ Si Dennis, nga taga-Netherlands, naningkamot nga sundogon ang pagkamapainubsanon ni Jesus, pero nalisdan siya sa pagbuhat niana. Siya miingon: “Usahay mamatikdan nako nga dali rang matandog ang akong garbo ug masina ko, sama pananglitan dihang naay makadawat ug pribilehiyo nga gusto nako. Mao nga kon mobati ko ana, tun-an nako ang bahin sa pagkamapainubsanon. Sa akong JW Library^® app, naa koy gi-tag nga mga teksto bahin sa pagkamapainubsanon aron dali nako ning makit-an ug mabasa pag-usab. Nag-download pod ko sa akong cellphone ug mga pakigpulong bahin sa pagkamapainubsanon, ug kanunay nako ning paminawan.a Nakat-onan nako nga ang tanan natong ginahimo maoy alang sa kadayeganan ni Jehova, dili aron dayegon ta sa uban. Kitang tanan gihatagan ni Jehova ug pribilehiyo nga makigbahin sa buluhaton, pero siya gyod ang nagpalampos niini.” Kon mibati ka nga di ka malipayon sa imong kahimtang, paningkamoti nga maugmad ang pagkamapainubsanon. Makapalig-on ni sa imong relasyon kang Jehova ug makatabang nimo nga mahimong kontento.—Sant. 4:6, 8.

PAMALANDONGA ANG IMONG PAGLAOM SA UMAABOT

12. Unsang paglaom sa umaabot ang makatabang nato nga mahimong kontento? (Isaias 65:21-25)

¹² Mahimo tang mas kontento kon pamalandongon nato ang atong nindot kaayo nga paglaom sa umaabot. Ang gipasulat ni Jehova kang propetang Isaias nagpasalig nato nga nakasabot si Jehova kon unsa ka lisod ang atong kahimtang karon, ug nagsaad siya nga sa umaabot iyang wad-on ang tanan natong problema. (Basaha ang Isaias 65:21-25.) Nianang panahona, naa na tay nindot ug luwas nga puy-anan. Naa na pod tay makapalipay nga trabaho, ug mokaon tag lami ug sustansiyadong mga pagkaon. Di na gyod ta mabalaka nga basin naay daotang mahitabo nato o sa atong mga anak. (Isa. 32:17, 18; Ezeq. 34:25) Kining nindot kaayo nga saad segurado gyong matuman.

13. Unsang mga kalisdanan ang atong giatubang karon, ug sa unsang paagi ang pagpamalandong sa atong paglaom makatabang nato?

¹³ Nagpuyo na ta karon sa “kataposang mga adlaw,” ug kitang tanan naay mga problema nga “lisod sagubangon.” (2 Tim. 3:1) Tungod ana, importante kaayo ilabina karon nga magpokus ta sa atong paglaom. Kada adlaw, ginatabangan ta ni Jehova nga makalahutay pinaagi sa paghatag natog giya, kusog, ug tabang nga atong gikinahanglan. (Sal. 145:14) Gawas pa ana, ang atong paglaom sa umaabot makatabang nato sa paglahutay sa atong mga problema karon. Pananglitan, tingali nalisdan ka sa pagtagana sa materyal nga panginahanglan sa imong pamilya. Nagpasabot ba ni nga hangtod sa hangtod na lang gyod kang mag-antos sa kalisod? Dili! Si Jehova nagsaad nga sa Paraiso, ihatag niya ang tanan nimong gikinahanglan, apil na ang mga butang nga imong gipangandoy. (Sal. 9:18; 72:12-14) Kon naa kay grabeng sakit o depresyon, hangtod sa hangtod na lang ba gyod kang mag-antos sa kasakit ug wala nay paglaom nga maulian? Siyempre dili. Sa bag-ong kalibotan sa Diyos, ang tanang sakit ug ang kamatayon mawala na. (Pin. 21:3, 4) Ang atong paglaom motabang nato nga mahimong kontento ug dili maghambin ug kasuko ug kahiubos. Bisag makasinati ta karon ug inhustisya, mamatyag minahal, masakit, o mag-atubang ug uban pang problema, puwede gihapon tang magmalipayon ug magmalinawon. Ngano? Kay bisan unsa pa ka lisod ang atong mga problema karon, nahibalo ta nga ang atong “kasakitan kadiyot lang” ug sa bag-ong kalibotan, mawala na ang tanan natong pag-antos.—2 Cor. 4:17, 18.

14. Sa unsang paagi mapalig-on nato ang atong pagsalig sa mga saad ni Jehova?

¹⁴ Kay ang atong paglaom sa umaabot makatabang man nato nga mahimong kontento, sa unsang paagi mapalig-on nato ang atong pagsalig sa mga saad ni Jehova? Sama nga ang usa ka tawo nagkinahanglan tingalig antipara aron mas tin-aw niyang makita ang mga butang sa layo, kinahanglan pod natong palig-onon ang atong pagsalig sa mga saad ni Jehova aron tin-aw natong makita ang umaabot nga Paraiso. Kon sobra tang nabalaka bahin sa pinansiyal, puwede natong pamalandongon ang panahon dihang dili na ta magkinahanglag kuwarta, wala na tay utang, ug kitang tanan patas nag kahimtang sa kinabuhi. Kon naguol ka kay wala pa nimo makab-ot ang mga pribilehiyo nga imong gipangandoy, hunahunaa ang panahon dihang hingpit na ta ug nakaalagad na kang Jehova sulod sa libolibo ka tuig. Makatabang na aron dili ka sobrang mabalaka bahin sa mga pribilehiyo. (1 Tim. 6:19) Tingali sa sinugdan malisdan ta sa pagpamalandong sa umaabot tungod sa atong presenteng mga gikabalak-an. Pero sa ngadtongadto, mahimo ra ning mas sayon kon batasanon nato ang pagpamalandong sa mga saad ni Jehova.

15. Unsay imong nakat-onan sa giingon ni Christa?

¹⁵ Konsideraha kon sa unsang paagi ang paglaom nakatabang kang Christa, asawa ni Dennis nga gihisgotan sa miaging mga parapo. Siya miingon: “Tungod sa akong sakit, luya kaayo ko ug kinahanglan kong mogamit ug wheelchair. Halos tibuok adlaw kong maghigda. Grabe kaayo ang kasakit nga akong bation kada adlaw. Giingnan ko sa akong doktor nga dili na ko maulian. Pero nakahunahuna dayon ko, ‘Dili mi parehas ug panglantaw sa umaabot.’ Nagpokus ko sa akong paglaom, ug kini nakahatag nakog kalinaw sa hunahuna. Bisag daghan kog giantos niining sistemaha, masaligon ko nga sa bag-ong kalibotan, bug-os na kong mag-enjoy sa akong kinabuhi!”

“WALAY MAKULANG ALANG NIADTONG MGA MAHADLOK KANIYA”

16. Nganong nakaingon si David nga “walay makulang” alang niadtong mga mahadlok kang Jehova?

¹⁶ Bisan pag kontento ta, wala ni magpasabot nga wala na tay mga problema. Si Haring David namatyan ug labing menos tulo ka anak. Sayop siyang giakusahan, gitraydor sa uban, ug nagtagotago sulod sa daghang tuig gikan niadtong gustong mopatay niya. Pero bisag nakaatubang siyag grabeng mga pagsulay, siya miingon: “Walay makulang alang niadtong mga mahadlok [kang Jehova.]” (Sal. 34:9, 10) Nganong nakaingon siya ana? Tungod kay bisan pa sa mga problema nga masinatian sa mga alagad ni Jehova, itagana gyod Niya kon unsay ilang gikinahanglan. (Sal. 145:16) Makasalig ta nga tabangan ta ni Jehova nga malahutay ang tanan natong mga pagsulay. Bisag unsa pay atong kahimtang, puwede tang magmalipayon, magmalinawon, ug mahimong tinuod nga kontento.

17. Nganong determinado ka nga makakat-on sa sekreto sa pagkakontento?

¹⁷ Gusto ni Jehova nga mahimo kang kontento. (Sal. 131:1, 2) Maong paningkamoti nga makat-onan nimo ang sekreto sa pagkakontento. Kon maningkamot ka nga magmapasalamaton, magmapainubsanon, ug palig-onon ang imong paglaom, makaingon pod ka: “Oo, kontento ko.”—Sal. 16:5, 6.