Mga Magbabasa Nangutana . . .

Angay Bang Bawtismohan ang mga Masuso?

▪ “Nahadlok kong mapurgatoryo ang akong manghod nga si John,” matod ni Victoria. Nganong gibati niya kana? “Si John namatay nga wala mabunyagi,” siya miingon, “ug dunay pari sa Katoliko nga miingong tungod niana, si John magpabilin sa purgatoryo hangtod sa hangtod.” Makahahadlok gayod ang maong pagtuo, apan anaa ba kini sa Bibliya? Nagtudlo ba ang Bibliya nga ang mga batang mamatay nga way bunyag mapurgatoryo?

Ang Bibliya nagtudlo nga ang mga Kristohanon angayng magpabawtismo. Gisugo ni Jesus ang iyang mga sumusunod: “Paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Matikdi nga ang bawtismohan mga tinun-an na ni Jesus. Sa ato pa, sila nakakat-on na bahin kang Jesus ug mipili sa pagsunod kaniya—butang nga dili mahimo sa masuso.

Bisan pa niana, daghan ang moinsistir nga ang sugo ni Jesus mapadapat usab sa gagmayng bata. “Ang tanan kinahanglang bawtismohan, lakip ang mga masuso,” miingon ang Lutheranong pastor nga si Richard P. Bucher. Siya midugang: “Kon dili sila mabawtismohan, sila dili mapasaylo ug basin silotan sa dayon.” Apan sa pagkatinuod, ang maong mga komento supak sa pagtulon-an ni Jesus sa labing menos tulo ka paagi.

Una, si Jesus wala magtudlo nga angayng bawtismohan ang mga masuso. Nganong hinungdanon kana? Tagda kini: Si Jesus nagtudlo sa iyang mga tinun-an bahin sa kinahanglanon sa Diyos. Usahay, iyang sublion ang pangunang mga pagtulon-an. Ngano? Aron matino nga nasabtan nila kini. (Mateo 24:42; 25:13; Marcos 9:34-37; 10:35-45) Apan wala gayod siya magtudlo nga bawtismohan ang mga masuso. Nakalimot lang kaha si Jesus sa paghisgot niana? Imposible! Kon kinahanglan pang bawtismohan ang mga masuso, gisulti na unta kana ni Jesus.

Ikaduha, si Jesus wala gayod magtudlo nga dunay mag-antos human sa kamatayon. Siya nagtuo sa Kasulatan nga nag-ingon: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” (Ecclesiastes 9:5) Si Jesus nahibalo nga ang mga patay dili mahiadto sa purgatoryo, Limbo, impiyerno, o sa ubang dapit. Hinunoa, siya nagtudlo nga sila walay nahibaloan, nga samag natulog.—Juan 11:1-14.

Ikatulo, si Jesus nagtudlo nga “ang tanan nga anaa sa handomanang mga lubnganan” mabuhi pag-usab. (Juan 5:28, 29) Sa walay duhaduha, maglakip kini sa minilyon nga wala mabawtismohi. Sa pagkabanhaw, sila may kahigayonan nga makakat-on sa mga kinahanglanon sa Diyos ug mabuhi sa walay kataposan sa Paraiso sa yuta.a—Salmo 37:29.

Nan, tin-aw nga ang Bibliya wala magtudlo nga bawtismohan ang mga masuso.

[Footnote]